If you would like a copy of this version please contact info@davaraudiobibles.org

Lahuali New Testament, CC-BY-SA-4.0, The Love Fellowship. Lahuali New Testament Audio Bible, CC-BY-SA-4.0, Davar Partners International, The Love Fellowship, 2022.

Lahuali New Testament

Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.

फरीसी ए सदूकी मीहज़ी यीशु कछंङ अंज़े दोबि परखेक्च़िमी थल्जी कुह्तोर, “ञेंतिंङ स्वर्गो निशानी कंड्रु।” यीशुज़ि दोतिंङ जुबाब रेंई, “ञोंकल कि केहच़ी कुट्रातंई, सर्ग ठीक बंङज़ोतो, छना कुचे सर्ग शेह्ई तोह। दंङ मुन्जे कुट्रातंई, तोग भमबुट हुंज़तो; छना कुचे सर्ग शेह्ई ए धुडचटे तोह। केहच़ी सर्ग खंऐ दोऊ भेद कंड्रातंई पर ध्याड़ो निशानीऊ भेद छिले कंड्री मरच़ातंई? दीह जुगो मांजी मीहरे ए कुकम लहज़ा मीहरे स्वर्गो निशानी पेट्रातोर पर योना ओ निशानी छोड़ेके दोतिंङ ऊहई छल्ले निशानी माह खोकसोतो।” दंङ दोहथल यीशुज़ि दोतिंङ छोड़ेके अच्च़ा इलि।


चेलारे झीलो दोसी पले पिह्छातोर, पर दोरे रोटी शिल्ज़ी पेशा इल्देर। यीशुज़ि दोतिंङ कुहतो, “रेड्रुंई, फरीसी ए सदूकी मीहतु खमीरो दोरच़ी बचेके तोहई।”
दोरे एनातु बिचंङ सोचेके लेहतिरे हेंज़ी रोटी माई दोऊ थल्जी यीशुज़ि झांह कुट्रा। दोतु विचार ञेंह यीशुज़ि दोतंङ साते कुतोह, “हे थोड़े विशवास लहज़ा मीहरे केहच़ी केनातु बिचंङ छिल्ले गप्पा लाहतंई कि हेंदु दोहर रोटी माह? छि केहच़ी अयतालाह माह ञेंईया? केतिंङ छि दुह ङा हज़ार रोटी ओ हिद माह्दा, माह दिह कि केहच़ी अंयों टोकरी उठाकतेंई? माह दुह पी हज़ार ओ निहज़ी रोटी माह दिह कि केहच़ी अंयों टोकरी उठाकतेंई? केहच़ी छिले माह समझेकतानि कि केतिंङ रोटीऊ पाहठी माह कोहग पर दिह कि केरे फरीसी ए सदूकी मीहतु मलेडाज़ि ओहई बंङज़ुंई।” दंङ दोतिंङ पता लेहती कि दोई रोटीऊ मलेडाज़ि माह पर फरीसी ए सदूकी मीहतु ओहई बंङज़िमी कुहते।


यीशु केसारियो फिलिप्पी नगरो कछंङ अन्जा, दंङ एनोह चेला तु हखा रुहक्ती कि, “मीहच़ी गेह मीहू योह बि छि कुट्रातोर?”
दोच़ी कुह्तोर, रेईच़िता यूहन्ना बपतिस्मा रंड्रा कुट्रातोर, “रेहच़ि एलियाह भविष्यवक्ता, दंङ रेहच़ि यिर्मयाह छिता भविष्यवक्तातु बिचंङज़ि इच्च़ा कुट्रातोर।”
यीशुज़ि एनोह चेला तु हखा कुहतो, “पर केहच़ी गिह्बी छी कुट्रातंई?” शमौन पतरसे दोबि जुबाब रेंहई, “कांह श्रींङी परमेश्वरो योह मसीह शुनाह।” यीशुज़ि दोबि जुबाब रेंई, “हे शमौन योना ओ योह कांह धन्य शुनाह; छना कुचे अरीया मीह मशत पर गिऊ पिता परमेश्वरे अरी स्वर्गंङ तोह दिह गप्पा कनिंङ टोहकठे प्रगट लह्तो। दाह गेह ला कनिंङ कुट्रातग कि कांह पतरस शुनाह, दंङ गेह दिह रघटु टोईच़ी कलीसिया बंणाएपोग, दंङ अधोलोको पितंङरे दोऊ टोईच़ी अधिकार माह लोहर। गेह कनिंङ स्वर्गो राज्यो केईटी रमोग; दंङ केई छिल्ला धरतीरिंङ छुपोन दुह सर्गंङ छुहसोतो; दंङ केई छिल्ला धरतीरिंङ युह्प्पोंन, सर्गंङ युह्प्सोतो।”
दंङ यीशुज़ि चेला तिंङ कुहतो “अतंङ साते लाह था कुंहई कि गेह उद्धार लहज़ा मसीह शुगाह।”


दोहथर यीशु एनोह चेला तिंङ कंड्री लेहती, “ज़रूरी तोह कि यरूशलेम शहरो हखा योग दंङ यहुदी सेंहणा मीहरे यहुदी मोह्ड़े पुरोहित ए यहुदी शास्त्री तु गुहड़च़ि महस दुख उठाएपोग सिए योग दंङ तीसरा ध्याड़ारिंङ षीङे योग।” दिरंङ पतरसे यीशुबि शत्‌ह लेह दोबि रैहच़ी लेहती, “हे प्रभु, परमेश्वरे माह लोहतो करंङ अपेहला झांह माह शोतो।” यीशुज़ि किरज़ा पतरसो हखा कुंई, “केई गिह्बी शेतानो ठ्रोह परखेकच़ी बंद लोह, गिऊ दोरच़ी ऊई तार शुहचे इल। कांह गिऊ थल्जी ठोकरो बजह शॉन; छना कुचे कनु बिचार मीहू दोरच़ी तोतोर परमेश्वरो दोरच़ी माह।”

दंङ यीशुज़ि एनोह चेला तिंङ कुहतो “अगर अरीला गिऊ चेला बणेकपी तातंई दोच़ी एनोह हिटी छोड़ेके एनोह दुख उठाके गिऊ थलेच़ि अच़ा अतंई। छना कुचे अच़ि एनोह जहानो दिह धरतीऊ टोईच़ी बचाएपोतो दोई परमेश्वरारंङ साते अनंत जीवन खोकसिमी मोका योह्च़े च़रपोतो। दंङ अंऊ मीह गिऊ बजाहज़ि एनोह जहानो रमतो दुह मीहे परमेश्वरारंङ साते अनंत जीवन खोकपोतो। अगर मीह भत्ते संसाराबि खोक्शे च़रपोतो दंङ एनोह जहानो नुकसान लोहतो, ता दोबि छि फायदा शोतो? या परमेश्वरारंङ साते अनंत जीवन खोकसिमी थल्जी ञेंहच़ी परमेश्वरा बि छल्ले रेह मरच़ि। मीहू योह एनोह स्वर्गदूत तंङ साते एनोह बाहऊ महिमारंङ अपतो, दंङ दोई दोहथर भत्तेतिंङ दोतु काहमो हिसाबे फल रमोतो। गेह केतंङ साते हेले कुट्रातग कि देर खड़े मीहतु बिचंङज़ि रेइरे झांह तोतोर दोच़ी अपेहल तचेक मीहू योह बि दोऊ राजंङ अपि माह तंङमोर धोंण तचेक सिओर माह।”

Makinig sa मत्ती 16