ಮತ್ತಾಯ 20
20
ದ್ರಾಕ್ಷಿನ ಬಾಗ್‌ಮ ಕಾಮ್ ಕರಾವಾಳಾನಿ ಬಾರೇಮ
1ಸೊರ್ಗಾನು ರಾಜ್ಯ ಏಕ್‌ ದ್ರಾಕ್ಷಿನೊ ಬಾಗ್‌ನೊ ಯಜಮಾನ್ನಿಘೋಣಿ ಛಾ಼.ಏಕ್‌ ದನ್ನೆ ವ್ಹಾಣಾನು ಯೋ ಇನ ಬಾಗ್‌ಮ ಕಾಮ್ ಕರಾನಖ್ಹಾಜೆ ಥೋಡ ಕೂಲಿಆಳ್‍ನ ಬುಲಾವನ ನಿಕ್‌ಳ್ಯೊ. 2ಇನೆ ದನ್ನ ಏಕ್‌ ಕೂಲಿ ಆಳ್‌ನ ಏಕ್‌ ರೂಪಾನಬಿಲ್ಲಾ ದೆವುಸ್ ಕರಿ ವಾತೆ ಕರೀನ್, ಯೋ ಆಳ್‌ನ ಖ್ಹಾರು ಇನ ಬಾಗ್‌ಮ ಬೋಲಿ ಮೋಕ್‌ಲ್ಯೊ. 3ಅನಕೇಡೆಥು ಯೋ ಬಾಗ್‌ನೊ ಯಜಮಾನ್ ಕಮ್ಶಿಕಮ್ ನೌ ಘಂಟಾನ ಪಾಛೊ಼ ಘರ್‌ಥೊ ನಿಕ್ಳಿನ್, ಬಜಾ಼ರ್‌ನಿ ಝ಼ಗೋಕನ ಜೈ಼ನ್, ಹಿಜ್ಜಾ಼ ಥೋಡು ಜ಼ಣು ಫಾಯಿದೊಕೊಂತೆ ಭೀರ‍್ಯುಥೂತೆ ದೇಖಿನ್, 4ಇವ್ಣುನ, “ತುಮೇಬಿ ಮಾರ ದ್ರಾಕ್ಷಿನ ಬಾಗ್‌ಮ ಜೈ಼ನ್ ಕಾಮ್ ಕರೊ. ತುಮೂನ ಮೇ ನೀತಿನಿ ಕೂಲಿ ದೆವುಸ್’ ಕರಿ ಬೋಲ್ಯೊ. 5ತದೆ ಇವ್ಣೆ ಬಾಗ್‌ಮ ಗಯು. ಯೋ ಯಜಮಾನ್ ಪಾಛೊ಼ ಕಮ್ಶಿಕಮ್ ಭಾರ ಘಂಟಾನ ಅಜು಼ ತೀನ್ ಘಂಟಾನ ಏಕ್‌ ಹಲ್ಲ ಬಜಾ಼ರ್‌ನಿ ಝ಼ಗೋಕನ ಗಯೊ. 6ಖ್ಹುಮಾರ್ ಪಾಚ಼್ ಘಂಟಾನ ಏಕ್‌ ಹಲ್ಲ ಯೋ ಯಜಮಾನ್ ಬಿಜೇಕ್ ಹಲ್ಲ ಬಜಾ಼ರ್‌ನಿ ಝ಼ಗೋಕನ ಜೈ಼ನ್, ಹಿಜ್ಜಾ಼ ಭೀರ‍್ಯುಥೂತೆ ಥೋಡ ಅದ್ಮಿನ ಇನೆ ದೇಖಿನ್, ‘ತುಮೆ ದನ್‌ಭರ್ ಫಾಯಿದೊಕೊಂತೆ ಚು಼ಪ್‌ಕೆಸ್ ಶನ ಭೀಯಾಸ್?’ ಕರಿ ಪುಛಾ಼ಯೊ. 7ತದೆ ಇವ್ಣೆ, ‘ಕೋಣ್‌ಬಿ ಹಮೂನ ಕಾಮ್ನ ಬುಲಾಯು ಕೊಯ್ನಿ’ ಕರಿ ಬೋಲ್ಯು. ಯೋ ಯಜಮಾನ್ನೆ, ‘ಇಮ್‍ಕತೊ, ತುಮೆ ಜೈ಼ನ್, ಮಾರ ದ್ರಾಕ್ಷಿನ ಬಾಗ್‌ಮ ಕಾಮ್ ಕರೊ’ ಕರಿ ಬೋಲ್ಯೊ.
8ಖ್ಹಾಂಜ಼್ ಹುವ್ವಾದೀನ್, ಬಾಗ್‌ನೊ ಯಜಮಾನ್ನೆ ಕಾಮ್ ಕರಾವಾಳಾನ ದೇಖಿಲೇಸ್ತೆ ಇನ ಬುಲೈನ್, ‘ಖ್ಹಾರೇಥಿ ಪಾಛ಼ಳ್ ಆಯೂತೆ ಆಳ್‌ಥಿ ಶುರುಕರೀನ್, ಪಹಿಲೆ ಆಯೋತೆ ಆಳ್‌ತೋಡಿ ಖ್ಹಾರಾನಿ ಕೂಲಿನ ದೇ’ ಕರಿ ಬೋಲ್ಯೊ. 9ಪಾಚ಼್ ಘಂಟಾನ ಕೂಲಿನ ಆಯುಥೂತೆ ಆಳ್‌ ಖ್ಹಾರಾನಾಬಿ ಏಕೇಕ್‌ ರೂಪಾನುಬಿಲ್ಲಾ ಮಳ್ಯು. 10ಅನಕೇಡೆಥು ಪಹಿಲೆ ಕಾಮ್‌ಪರ್ ಆಯುಥೂತೆ ಇವ್ಣೆ ಆಯಿನ್, ಹಮೂನ ಜಾ಼ಖ್ಹತ್ ಕೂಲಿ ಮಳ್‌ಶೆ ಕರಿ ಸೋಚ್ಯು; ಕತೋಬಿ ಇವ್ಣುನಾಬಿ ಏಕೇಕ್‌ ರೂಪಾನುಬಿಲ್ಲಾ ಮಳ್ಯು. 11ಇವ್ಣೆ ಯೋ ಪೈಶಾನ ಲೀಲಿನ್‌, ಯೋ ಬಾಗ್‌ನ ಯಜಮಾನ್‍ಪರ್ ಮಶ್ಲಾ ಮಾರ್‌ತುಹುಯಿನ್, 12‘ಪಾಛ಼ಳ್ ಆಯೂತೆ ಆ ಎಕ್ಕಸ್ ಘಂಟೊ ಕಾಮ್ ಕರ‍್ಯು, ಕತೋಬಿ ಹಮೆಖ್ಹಾರು ದನ್‌ಭರ್ ತಡ್ಕಾಮ ಮ್ಹಿನತ್ ಕರೀನ್, ಕಾಮ್ ಕರ‍್ಯಾ, ತೋಬಿ ತುನೆ ಹಮೂನ ದಿದೋತೆ ಎತ್ರುಸ್ ಇವ್ಣುನಾಬಿ ದಿದೋನಿ!’ ಕರಿ ಬೋಲ್ಯು.
13ತದೆ ಬಾಗ್‌ನೊ ಯಜಮಾನ್ನೆ ಯೋ ಆಳ್‌ಮ ಏಕ್‌ನ, ‘ಹಂದೇಕ್‍ಲ, ದೋಸ್ತ್, ಮೇ ತುನ ಠಗಾಯೊ ಕೊಯ್ನಿ. ತೂ ಏಕ್‌ ರೂಪಾನ ಕಾಖ್ಹ್‌ನಖ್ಹಾಜೆ ಏಕ್‌ ದನ್ನು ಕಾಮ್ ಕರುಸ್ ಕರಿ ಮಾನಿಗಯೊಥೋನಿ? 14ಅಲ್ಲೆ, ತಾರಿ ಕೂಲಿ, ಅನ ಲೀನ್ ಘರೆ ಜಾ಼. ತುನ ದಿದೋತೆ ಇಮ್ಮಸ್, ಆ ಪಾಛ಼ಳ್ ಆಯೋತೆ ಇನಾಬಿ ಮನ ಮನ್ ಛಾ಼. 15ಮಾರ ಶೊಂತ್ ಪೈಶಾನ ಮಾರು ಮನ್ಆವಾತೆ ಇಮ್‌ ಕರಾನ ಮನ ಹಕ್‍ಕೊಯ್ನಿಕಿ ಶು? ಮೇ ಇವ್ಣುನ ಅಛ಼್ಛು ಕರ‍್ಯೊತೆ ಇನಖ್ಹಾಜೆ ತೂ ಬಳಾಪೊ ಕರಾಸ್ಕಿ ಶು?’ ಕರಿ ಬೋಲ್ಯೊ.
16“ಅಮ್ಮಸ್ ಪಾಛ಼ಳ್ ರ‍್ಹವಾಳು ಅಗಾಡಿ ಹುಯಿಜಾ಼ಶೆ, ಅಜು಼ ಅಗಾಡಿ ರ‍್ಹವಾಳು ಪಾಛ಼ಳ್ ಹುಯಿಜಾ಼ಶೆ.
ಯೇಸುನೆ ಇನಿ ಮರಣ್ಣಿ ಬಾರೇಮ ತೀನ್ನಿ ಹಲ್ಲ ಬೋಲ್ಯೋತೆ
(ಮಾರ್ಕ 10:32-34; ಲೂಕ 18:31-34)
17ಯೇಸು ಯೆರೂಸಲೇಮ್ಮ ಜ಼ವ್‍ಕರಾನಿ ವಖ್ಹತ್‌ಮ, ಭಾರ ಜ಼ಣ ಶಿಷ್ಯರ್‌ನ ಏಕ್‌ ತರಬ್‌ ಬುಲೈನ್, ವಾಟ್‌ಪರ್ ಚಾ಼ಲ್ತೊಹುಯಿನ್‌, ಇವ್ಣುನ, 18“ಹಂದೇಖೊ, ಅಪ್ಣೆ ಯೆರೂಸಲೇಮ್‌ನ ವಳ್ಯಾಜಯ್ಯೇಸ್‌, ಹಿಜ್ಜಾ಼ ಅದ್ಮಿನೊ ಛಿಯ್ಯಾನ ಗಲ್‌ಢಯಾಜಕರ್‌ನ ಅಜು಼ ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೇನ ಹಾತ್‌ಮ ಧರಿದಿನಾಕ್‌ಶೆ. 19ಇವ್ಣೆ ಇನ ಮರಣ್ ದಂಡ್‌ ದೀನ್, ಇನ ಖ್ಹರಮ್‌ ಕಾಡಾನ, ಕೊಳ್ಡೇಥಿ ಮಾರಾನ ಅಜು಼ ಶಿಲ್‌ಬೇಪರ್ ನಾಖಾನಖ್ಹಾಜೆ ಪರೈ ಜಾ಼ತ್‌ವಾಳಾನ ಹಾತ್‌ಮ ದಿನಾಕ್‌ಶೆ. ಕತೋಬಿ ಮರೀನ್ ತೀನ್ ದನ್‌ಕೇಡೆ ಯೋ ಪಾಛೊ಼ ಜಿವ್ತೊಹುಯಿನ್ ಆವ್‌ಶೆ” ಕರಿ ಬೋಲ್ಯೊ.
ಏಕ್‌ ಆಯಾನಿ ಬಿಂತಿ
(ಮಾರ್ಕ 10:35-45)
20ತದೆ ಜೆಬೆದಾಯನಿ ಬಾವಣ್‍ ಇನ ಭೇ ಪರ್ಖ್ಹಾ ಲಡ್ಕಾನ ಜೋ಼ಡೆ ಯೇಸುಕನ ಐನ್, ಇನಖ್ಹಾಮ್ಣೆ ಆಡ್‍ಪಡಿನ್, ಮಾರಿ ಏಕ್‌ ಬಿಂತಿನ ಚ಼ಲೈದೇಣು ಕರಿ ಬೋಲಿಲಿದಿ.
21ಯೇಸುನೆ ಇನ, “ತುನ ಶಾತ್ ಹೋಣು?” ಕರಿ ಪುಛಾ಼ಯೊ.
ತದೆ ಇನೆ, “ಮನ ಹುಕುಮ್‌ಕರ್‌ ತಾರಿ ರಾಜ್ಯಮ ಮಾರ ಬೇ ಛಿಯ್ಯಾಮ ಏಕ್‌ ಜ಼ಣೊ ತಾರಿ ಖಾವಿ ಬಾಜು಼ಮ ಅಜು಼ ಏಕ್‍ಜ಼ಣೊ ತಾರಿ ಡಾವಿ ಬಾಜು಼ಮ ಬೇಖ್ಹಾನ ಬೋಲ್‌ಕರಿ ಬೋಲಿ
22ಯೇಸುನೆ ಇನ ಛಿಯ್ಯಾವ್‍ನ, “ತುಮೆ ಶಾತ್ ಮಾಂಗಿಲಿದ ಕರಿ ತುಮೂನ ಮಾಲುಮ್ ಕೊಯ್ನಿ. ಮೇ ಪೀಣುತೆ ಖ್ಹತಾಪ್ಣಿನ ರಾಛ಼ಮ ತುಮೆ ಪಿಯ್ಯಾನ ಉಶೇಕಿ ಶು?” ಕರಿ ಪುಛಾ಼ಯೊ.
ಇನ ಇವ್ಣೆ, “ಹಮೂನ ಹುವಾಸ್” ಕರಿ ಜ಼ವಾಬ್‍ದಿದಾ.
23ತದೆ ಯೇಸುನೆ ಇವ್ಣುನ, “ಮೇ ಪೀಣುತೆ ರಾಛ಼ಮ ತುಮೇಬಿ ಪೀಶು. ಕತೋಬಿ ಮಾರಿ ಖಾವಿ ಬಾಜೂ಼ಮ ಅಜು಼ ಡಾವಿ ಬಾಜೂ಼ಮ ಕೋಣ್ ಬೇಖ್ಹ್‌ಶೆ ಕರಿ ಚೂ಼ಣವಾಳೊ ಮೇ ಕಾಹೆ. ಮಾರೊ ಬಾ ಯೋ ಝ಼ಗೋನ ಕಿನ ಕರಿ ಮ್ಹೇಲಿರಾಖ್ಯೋಸ್ಕಿ ಇವ್ಣುನಾಸ್ ಯೋ ಮಳ್‌ಶೆ” ಕರಿ ಬೋಲ್ಯೊ.
24ಉಬ್‌ರ‍್ಯಾತೆ ದಖ್ಹ್‌ ಜ಼ಣ ಶಿಷ್ಯರ್‌ನೆ ಅನ ಖ್ಹಮ್‌ಜಿನ್‌, ಯೋ ಬೇ ಭೈಯೇಪರ್ ಖೀಜ಼್‌ಖಾದ. 25ಕತೋಬಿ ಯೇಸುನೆ ಇವ್ಣ ಖ್ಹಾರಾನ ಇನಾಕನ ಬುಲೈನ್ ಇವ್ಣುನ, “ಯೆಹೂದ್ಯರ್‌ಕಾಹೆತೆ ಅದ್ಮಿನ ಅದಿಕಾರ್‌ಮ ರ‍್ಹವಾಳು ಇವ್ಣಾಪರ್ ಹಂಕಾರ್‌ಥಿ ಅದಿಕಾರ್ ಚ಼ಲಾವಸ್, ಅಜು಼ ಮೋಟು ಅದಿಕಾರಿಖ್ಹಾರು ಇವ್ಣಪರ್ ಜು಼ಲಮ್‌ಥಿ ಹಕ್ನ ಚ಼ಲಾವಸ್ ಕರಿ ಹಮೂನ ಮಾಲುಮ್. 26ಕತೋಬಿ ತುಮಾರಮ ಇಮ್‌ ನಾರ‍್ಹೇವ್ಣು. ತುಮಾರಮ ಕೋಣ್‌ತೋಬಿ ಮೋಟು ಹೋಣು ಕರಿ ಉಶೇತೊ, ಯೋ ತುಮಾರೊ ಸೇವಕ್ ಹುಯಿರ‍್ಹವಾದೆ. 27ಅಜು಼ ತುಮಾರಾಮ ಅಖ್ಖೇಥಿ ಖ್ಹಾಮ್ಣೆ ರ‍್ಹವಾನ ಆಖ್ಹ್‌ಕರವಾಳೊ ಕೋಣ್‌ತೋಬಿ ಉಶೇತೊ, ಯೋ ತುಮಾರೊ ಸೇವಕ್ ಹುಯಿರ‍್ಹೇಣು. 28ಅಮ್ಮಸ್ ಅದ್ಮಿನೊ ಛಿಯ್ಯೋಬಿ ಸೇವೆ ಕರೈಲ್ಯವಾನಖ್ಹಾಜೆ ಕೋ ಆಯೋನಿ, ಪಣ್ಕಿ ಸೇವೆ ಕರಾನ ಅಜು಼ ಇನೊ ಜಾನ್ನ ದೀನ್, ಕೈಯೆಕ್ಕಿ ಅದ್ಮಿನ ಛೋ಼ಡೈಲ್ಯವಾನಖ್ಹಾಜೆ ಆಯೊ” ಕರಿ ಬೋಲ್ಯೊ.
ಯೇಸುನೆ ಬೇ ಜ಼ಣ ಕಾಣಾನ ಅಛ್ಛು಼ ಕರ‍್ಯೋತೊ
(ಮಾರ್ಕ 10:46-52; ಲೂಕ 18:35-43)
29ಯೇಸು ಅಜು಼ ಇನ ಶಿಷ್ಯರ್‌ ಯೆರಿಕೋಥು ಚ಼ಲ್ಯಾಜ಼ವ್‍ಕರ್ತಥಾತೆ ವಖ್ಹತ್‌ಮ, ಅದ್ಮಿನಿ ಮೋಟಿ ಭೀಡ್ ಇನ ಪೀಠೆ ಗಯು. 30ತದೆ ಮಾರಗ್‌ನ ಶೇಡೆ ಬೆಠಾಥಾತೆ ಬೇ ಜ಼ಣ ಕಾಣಾನ ಯೇಸು ಹಜ್ಜಾ಼ಸ್‌ಕರಿ ವಳ್ಯೊಜಾ಼ಸ್ ಕರಿ ಖ್ಹಮ್‌ಜಿನ್‌, “ಪ್ರಭು, ದಾವೀದ್‌ನ ಛಿಯ್ಯಾ! ಹಮಾರಪರ್ ಗೋರ್‌ಕರ್‌” ಕರಿ ಚಿಕ್ರಾಲಗ್ಯಾ.
31ಯೋ ಭೀಡ್‌ಮ ಥೂತೆ ಅದ್ಮಿಖ್ಹಾರು ಇವ್ಣುನ ಗುರ್‌ಕೈನ್, “ಖ್ಹೊಪೇಥಿರ‍್ಹವೊ” ಕರಿ ಬೋಲ್ಯು. ತೋಬಿ ಭೇ ಕಾಣಾವ್ನೆ ಬಿಜೂ಼ಬಿ ಜೋ಼ರೇಖ್ಹು ಚಿಕ್ರಿನ್, “ಪ್ರಭು, ದಾವೀದ್‌ನ ಛಿಯ್ಯಾ! ಹಮಾರಪರ್ ಗೋರ್‌ ಕರ್‌” ಕರಿ ಬೋಲ್ಯ.
32ತದೆ ಯೇಸುನೆ ಭೀರಿನ್, ಇವ್ಣುನ ಬುಲೈನ್, “ಮೇ ತುಮೂನ ಶಾತ್ ಕರ‍್ನು?” ಕರಿ ಇವ್ಣುನ ಪುಛಾ಼ಯೊ.
33ಇವ್ಣೆ, “ಪ್ರಭು, ಹಮಾರ ಡೋಳಾ ದೆಖಾವಾನಿಘೋಣಿ ಕರ್ಲಾ!” ಕರಿ ಬೋಲ್ಯು.
34ತದೆ ಯೇಸುನೆ ಇವ್ಣಾಪರ್ ಗೋರ್‌ಖೈನ್, ಇವ್ಣ ಡೋಳಾನ ಛೀಮ್ಯೊ. ತದ್‌ನು ತದ್ದೇಸ್ ಇವ್ಣ ಡೋಳಾ ಐಗಯ, ಅಜು಼ ಇವ್ಣೆ ಇನ ಪೀಠೆ ಗಯ.
Kasalukuyang Napili:
ಮತ್ತಾಯ 20: NTWVe23
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
The New Testament in Waghri Language © The Word for the World International and Waghri Translation Samiti, Karnataka, 2023.
