Dadatika Maxaafa 3
3
Manjiinxa Ajajema Gopha
1Duuchchi Woddik Gootti Mageni dadeeke biniinchuwwi duuchchinaa'ni bofi yo'oshsha xaqartichchakemmani isinna manjichcho, «Dhugaandinni Mageni, ‹hiddichchuwiinxe bakkaxxe haqqe duuchchanaa'n ittinabaashsha› hoyyee?» Hiyye ise qore.#Wal. 12:9; 20:2.
2Manjichchotinna bofake'n hitee qici, «Hiddichchuwwiinxe bakka'n hexxeexxe haqqenaa'n gumma ita dandeennanon. 3Yaane kinni Mageni ‹Hiddichchuwwiinxe bakkaxxe oddo'n hedheeke haqichchinaa'n gumma ittinoqqe; anga ha'nooxxen midde isoo tuqqinoqqe'e; tennee assitinoole rertinaan hiyye no'o xonxommachchise'en› » hite.
4Bofi manjichchotanna, «Rertinabaan» 5«Mageni iitta hiyyeechchi konne haqichchinaa'n ittinaaxxa yanna ille ha'noo baqqi hitaaxxannaa elo yo'oxxa ege'nati isoo fakkatinaaxxa ege'nemmaxxeeten» hiyye.
6Manjichchotinna konne haqichchixxi gumma itatee eloxxe, illetixxe uushsho'aanna gammachchissaxxenna beekkuma alfatee halchisa'neexxe kaddeexxa uuddeexxi gummatenaa'n aaxxe itte; aro'o ifikeenna uute'naa'a isinna ite. 7Ookkoneechchi uduma lamiingixxi ille baqqi hite; duwwi he'neexxanna egenne; tennexxee Balasetike haqichchika shafa summe buqe'ne.#3:7 Belese Tophiyiinke mitte mitte boncho'n egenedeemashshanni Ode'e fakataake, shifi isikinna ute afebaake, gumma isixxinna xe'mtaake haqichchon.
8Ookkoneechchi uduma bogi siphphi siphphi hiyyee wodda Duuchchi Woddik Gootti Mageni hiddichchuwwiinxe bakka'ni mammarema'naa Addaaminna are isixxi Heewaan isika hafuura lanqeexxi Duuchchi Woddike Gootta Mageni edii'n haqqetixxe oddo'n sho'omme. 9Yaane kinni Duuchchi Woddik Gootti Mageni Addaami ye'eexxi, «Haba hexxette?» Hiyye.
10Addaaminna, «Hiddichchuwwiinxe bakka giddo hafuura atika laqennen, duwwitti hedhennaxxeenna sodaate sho'omeenne» hiyye.
11Magenikinna, «Duwwi hexxettexxa ayyete ate'ni kule? Isinaa'n ittoxxe hiyye atee ajajennake haqichchinaa'n ittette?» Hiyye.
12Addaaminna, «Tinni aninni welti hexxo'a uutettexxi manjjichcho, ise ookkone haqichchinxe gummanaa'n uutee'naa itennen» hiyye.
13Ookkoneechchi uduma Duuchchi Woddik Gootti Magen manjichchotanna, «Mayee tenne assitette?» Hiyye.
Isenna «Bofake anee'e dedhisee'naa itennen» hite.#2 Qor. 11:3; 1 Xim. 2:14.
14Tennexxee Duuchchi Woddik Gootti Mageninna bofa hiyyee qici: «Tennee assitettaxxee hore biniinchuwwi duuchchanaa'n ati calli badinendeetteke kadi,
«Godobikinna me'ittato;
baro atike duuchcha'ninna buttina ittatto.
15Atixxenna manjichchotixxe oddo'n, atixxennaa isexxe sannexxe oddo'n naaphumma uggannon;
isinna umo atika cancaqqaani,
atinna tinxa isika idditatton.»#Wal. 12:17.
16Manjichchotanna hiyyee qici,
«Siila'wittato wodda abara,
ciniinfattato woddanna wixxirri ate'n bira sa'issannon;
Tinni duuchcha kadda'naa'n aro'o atika yortatto
isinna atike galchallo kadaan» hiyye.
17Isinna Addaamii'i hiyyee qici, «Atixxe arexxa laqqettexxi ‹Isonaa'n ittoxxe'e› hiyyennexxi atee ajajennake haqichchinaa'n itteettaxxee
«Atixxe buutonaa'ni kexxeexxa buttin badinemeeke kaddowwaal;
hexxetteke baro duuchcha'ni
elootte daffite ita isenaa'n alfitatto.
18Buttini qu'muudotannaa utetixxa haqqe fulchuun;
atinna buttini fulcheechcho ittatton.#Ibr. 6:8.
19Dadendetteke buttina'n higgato qico'n,
daffa atikinni ittatton;
Buttinake kaddettaxxee
buttinange'n higgatton.»
20Addaminna are ifixxi hedho afeeke manji duuchchi'a amate kaddemmaxxee ifixxe areka summa Heewani#3:20: Heewan Heewan hiyyanna Hedho hiyya Ibritotike laagadinni weli fakkaataani hiyye fulche. 21Duuchchi Woddik Gootti Mageni gogiinxa seemma giisse Addaami'ninna Heewani'ni oddeesse.
22Ookkonechchi uduma Duuchchi Woddik Gootti Mageni, «Addaamii elo yo'oxxa ege'neeke kadati no'onaa'n mitteke kade'een; ta'a yoona isi anga qeersee hedhotike haqichchonaa'ni adhdhe itati duuchchi woddi'a hedha isi'a hasissabaan» hiyye.#Wal. 22:14. 23Tennexxee isi dademeemmaka buttina hucco'a Duuchchi Woddik Gootti Mageni Addamii'i Edeenike hiddichchuwwiinke boonchonaa'ni fulche. 24Mageni Addaamii'i ookko'ni fulcheechchi uduma hedhotike haqichchibaa ayyinna marabaashsha heqqatee Kirubeelinna duuchchii darre'ni wirri wirri hiyya'n giiratishsha bubaaka wolaanttichcho Edeeni hiddichchuwiinxe bakkanaa'n borroti darre'ni ugge.
Kasalukuyang Napili:
Dadatika Maxaafa 3: gdo
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
The Word for the World International, The Word for the World Ethiopia