Génesis 4
4
Caín Abeljai pachisa etsermau
1Adán nuwen ajaprumtikauwaiti. Turam Caínkan jureruiti. Tura chichaak: Uchi aishmagkun Yuus surusai, tusa tinaiti. 2Tura ataksha chikichnasha Caínkan yachin Abelan jureruiti. Abelka oveja ainan kuitamin ajakuiti. Antsu Caínka arakan arakmau ajakuiti.
3Chikich tsawantin Caín árak ainan juuk Yuusnau atii tusa jukinaiti. 4Antsu Abelka oveja uchiri yama nagkamchak akinan pegkeran iis jukinaiti. Tura asamtai Yuus Abelan, tura ni takamurijai pegker enentaimtusuiti. 5Turasha Caínnaka ni takamurijai nakitrauwaiti. Turamu asa Caín senchi kajekuiti. 6Tuman Yuus nekau asa chicharuk: “Caínka ¿urukamtai imanikmesha kajekume? 7Ame pegkerchau takakminka tunau nepettammainaiti, turasha ame pegker takakmeka tunau nepetmainaitme”, tusa tinaiti.
8Chikich tsawantin Caín ajanam wekasami tusa yachin ipaawaiti. Tuma ajanam jeaa Caín nina yachin Abelan maawaiti. 9Turamtai Yuus Caínkan chicharuk: ¿Amina yatsum Abelsha tui pujawa? tusa iniam: Nekatsjai ¿wina yatsurun kuitamnun wikaitaj? tusa tinaiti. 10Tama Yuus chicharuk: ¿Urukamtai aitkame? amina yatsumin numpe nugkanam ukarmaun wainjai. Tuma asan amincha pegkerchaunam ikkattajme. 11Aminka ju nugka juigka jiiktatjame. Turamu asam chikich nugkanam wekasam waitu wekaitinaitme. 12Tura arakrumsha nereshtinaiti. Ameka emetna pujutsuk aya wekain atinaitme, tusa tinaiti. 13Tama Caín Yuusan chicharuk: “Wika waitat imannaka katsunmaitsujai. 14Yamaika ju nugkanmagka jiirkin asaakmin amina enentaimtutsuk wekaittaj nui, yáki waitkat nu mantuati”, tusa tinaiti.
15Tusa tama Yuus ayak: Nunaka nutikramachartatui. Shuar amina mantamunka waitat tuke atinan susatnaitjai, tusa tinaiti. Nuna tusa Yuus Caínkan macharti tusa iyashnum anujtukuiti. 16Turam Caín Yuusnaka ikuak, nugka Edén etsa watainmani amaunam Nod nugkanam pujustasa wuwaiti.
Caín weantu aina
17Caín nuwen ajaprumtikauwaiti. Tura Enocan akiawaiti. Nui yaaktama, nu yaaktancha nina uchiri naarinak anaikauwaiti. 18Enocka Iradta apari ajakuiti. Iradka Mehujaelan apari ajakuiti. Mehujaelka Metusaelan apari ajakuiti. Tura Metusaelka Lameckan apari ajakuiti. 19Lamec nuwan jimaran nuatkauwaiti: Chikich nuwegka Ada, tura chikichka Zila naartin ajakuiti. 20Ada Jabalan jureruiti. Tura yama nagkamchak nuap jeanam matsamsar, vacan tagkuma jakarua nuka Jabal weantu aina nuwaiti. 21Nina yachigka Jubal naartin ajakuiti. Tura Jubalka arpan awatin ainan, tura pigkuin umpuin ainan apari ajakuiti. 22Tura Zila Tubal-caínkan jureruiti. Tubal-caínka jiru bronce tutai, tura hierro tutain taká jakuiti. Tubal-caínka umaigka Naama ajakuiti. 23Lamec nina nuwe ainan Ada tura Zilajai chicharuk:
“Wina nuwar ainata wina chichamur shir anturtuktarma. Shuar wina ijuti numpan jiirtaun, tura uchi awattauncha maamjai, tusa tinaiti. 24Caínkan maanka waitat tuke atinan susatnaitjai tusa Yuus tinaiti. Numamtuk wina mantuasha waittan nu senchin jukitnaiti”, tusa tinaiti.
Adánnaun Eva chikichnasha uchin jurermau
25Adán nuwen ataksha ajaprumtikauwaiti. Tura uchin jureruiti. Tura Caín nina yachin Abelan maa asamtai, yamaisha Yuus chikichan uchin surusai tusa, Set anaikauwaiti. 26Set uun jas nuwena uchin akia Enós anaikauwaiti. Enós pujujakua nui shuar aina Yuusan ememattan nagkamawaruiti.
Kasalukuyang Napili:
Génesis 4: hubDBL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2010, Wycliffe Bible Translators, Inc. All rights reserved.