Luka 17
17
Te au 'ara
(Mātaio 18.6-7,21-22; Māreko 9.42)
1Kua karanga atura a Iēsū ki tāna au pipi, “Kāre rava e kore i te tupu mai te au mea e 'ara ai te tangata nei. 'E 'ae aia tei 'akatupu i te reira. 2'E ngari ake aia kia rī'ia tēta'i toka tāviri'anga ki runga i tōna kakī, ē kia titiri'ia aia ki raro i te tai, i aia kia riro 'ei tumu'anga nō tēta'i o tēianei au tangata rikiriki kia 'ara. 3#Māt 18.15Nō reira, e matakite i a kōtou 'ua'orāi.
“Kia 'ara tō taeake, e kauvae atu i aia, ē kia tatarā'ara aia, e 'akakore koe i tāna 'ara. 4Ē kia 'itu 'ua atu rāi ōna 'ara'anga mai i a koe i te rā 'okota'i, ē e 'itu 'oki ōna 'āriu'anga mai ē te tuatua'anga mai ē, ‘Kua tatarā'ara au,’ e 'akakore atu rāi koe i tāna 'ara.”
Te 'irinaki'anga
5Kua tuatua maira te au 'āpōsetolo ki a Iēsū, “E 'akama'ata mai i tō mātou 'irinaki'anga.”
6Kua pa'u atura te 'Atu, “Nāringa 'e 'irinaki'anga tō kōtou mei te 'ua sinapi te ma'ata, e tuatua 'ua atu i a kōtou ki tēianei pū sukamīno, ‘Kia kiriti tumu'ia koe, ē kia tanumia atu ki raro i te tai,’ ē ka kauraro mai aia i a kōtou.”
Te 'anga'anga a te tāvini
7“Ko 'ai tō kōtou na, 'e tāvini nōna tei 'ārote ana, mē kāre, i 'aka'āngai ana i te māmoe, ē 'oki maira mei te kāinga, e karanga vave atu āinei ki aia, ‘Ka 'aere mai koe, ka no'o ki te kaingākai’? 8Kāre āina e karanga atu ki aia ē, ‘E 'akano'ono'o i te kaingākai nāku, tātua'ia tō kāka'u, ka raverave mai ei kia kai au ē kia inu 'oki. Ē muri ake ka kai ē ka inu ei koe.’ 9E 'akameitaki atu āinei aia i taua tāvini ra, ko ia i rave i tei 'akaue'ia atu? 10Koia katoa kōtou! Kia rave'ia e kōtou te au mea katoa i 'akaue'ia atu, nā kō atu kōtou, ‘'E au tāvini 'ua mātou nei ko tei rave tikāi i tei tau i a mātou kia rave i'o nei.’ ”
Te au tangata lēpera e 'okota'i nga'uru tei 'akaora'ia
11I taua 'aerenga nō Iēsū ki Iērūsalēma ra, i nā rotopū aia i a Sāmāria ē Galilea te 'aere'anga. 12Ē tei te tomo'anga atu aia ki roto i tēta'i 'ōire rikiriki, kua 'ārāvei akera i aia ēta'i aronga lēpera e tino nga'uru, tū 'ua maira i te ātea kē, 13kāpiki maira, nā kō maira, “E Iēsū, e te 'Atu, e aro'a mai koe i a mātou.”
14 #
Lev 14.1-32
Kia 'ākara atura aia i a rātou, kua karanga atura, “Ka 'aere, ka 'akaāri i a kōtou ki te kau ta'unga.”
Ē tei tō rātou 'aere'anga nā te arāta'a, kua mā tākiri rātou. 15Ē kia kite i'ora tēta'i o rātou ē kua ora aia, kua 'oki maira ma te kāpiki 'ua ma te reo ma'ata i te 'akakakā'anga i te Atua. 16Ē kua tīpapa i'ora aia ki raro i te pae vaevae o Iēsū, ē kua 'akameitaki maira i aia. Nō Sāmāria taua tangata ra. 17Kua ui atura a Iēsū, “Kāre āinei ē tino nga'uru katoa i 'akaora'ia nei? Tei 'ea i'o nei ra te tokoiva? 18Kāre rava āinei tēta'i i kitea i te 'oki'anga mai e 'akakakā i te Atua, māri rā, ko tēianei tangata kē?” 19Kua karanga atura a Iēsū ki aia, “Ka tū, ka 'aere. Kua ora koe i tō'ou 'irinaki'anga.”
Te 'aere'anga mai o te bāsileia o te Atua
(Mātaio 24.23-28,37-41)
20I tēta'i 'ati'anga i ui'ia mai a Iēsū e te au Phārīsea nō runga i te tae'anga mai o te bāsileia o te Atua. Kua pa'u atura a Iēsū ki a rātou, nā kō atura, “Kāre te bāsileia o te Atua e tae mai ma te au 'akairo tei tāpapa'ia. 21Kāre 'oki ra e tuatua'ia ē, ‘Inā, tēia!’ ē ‘Inā, tērā!’ Inā 'oki, te bāsileia o te Atua tei roto ia i a kōtou nei.”
22Ē kua karanga atura a Iēsū ki tāna au pipi, “Ka tae mai te au rā e 'inangaro ei kōtou kia kite i tēta'i o te au rā o te Tamaiti a te Tangata nei, ē kāre rāi kōtou e kite. 23Kia tuatua'ia mai ki a kōtou ē, ‘Inā, tēia!’ ē ‘Inā, tērā!’ auraka kōtou e 'aere 'ua atu ki reira, mē kāre, e āru 'ua atu. 24Mei te uira 'oki e kōraparapa mei tēta'i pae rangi, e mārama 'ua atura ki tēta'i pae rangi, ka pērā katoa te Tamaiti a te Tangata kia tae ki tōna tuātau. 25Ē nā mua ra 'e mānganui tōna au mate e tikāi, ē e kōpae'ia aia e tēianei uki. 26#Gen 6.5-8Mei tei te tuātau i a Noa ra, ka pērā katoa i te tuātau o te Tamaiti a te Tangata nei: 27#Gen 7.6-24tē kaikai ra te tangata, tē inuinu ra, tē 'akaipoipo ra ē te 'ōronga'ia ra rātou kia 'akaipoipo'ia, e tae rava akera ki te rā i tomo ei a Noa ki roto i te 'āraka ra. Ko te vai puke maira e tā'iripoti'ia rava akera rātou. 28#Gen 18.20—19.25Mei te tuātau rāi i a Lota ra: tē kaikai ra te tangata ē tē inu ra, tē 'oko atura ē tē 'oko maira, tē tanu ra ē tē 'akatū ra i te 'are. 29Kia tae rā ki te rā i 'akaruke atu ei a Lota i a Sodoma, kua topa maira te a'i ē te teio nō runga mai i te rangi, ē tā'iripoti'ia rava akera rātou. 30Ka pērā katoa kia tae ki te rā e 'akakite'ia mai ei te Tamaiti a te Tangata.
31 #
Māt 24.17,18; Mār 13.15,16 “Kia tae ki te reira rā, tēta'i tangata i runga a'o i tōna 'are ē tei roto i te 'are tōna 'apinga, auraka roa e 'eke mai ki raro e tiki i taua 'apinga ra; ē tei te ngā'i tanu'anga aia, auraka e 'oki mai ki te ngutu'are. 32#Gen 19.26E 'akama'ara i te va'ine a Lota. 33#Māt 10.39; 16.25; Mār 8.35; Luk 9.24; Ioa 12.25Ko tei aruaru i te mou i tōna 'ua'orāi ora, ka ngere ia i te reira; ko tei kore rā e umuumu atu i te reira, ka rauka ia tōna ora. 34E 'akakite atu au ki a kōtou ē, i taua pō ra 'e tokorua tangata i te ro'i 'okota'i ra: e riro tēta'i, e toe mai tēta'i. 35'E tokorua va'ine i te tāviri'anga sītona: e riro tēta'i, e toe mai tēta'i.”#17.35 Kua tātā'ia te 'īrava i roto i ēta'i pōkaikai tuatua, kāre rā i roto i te au pōkaikai ta'ito tikāi: 36 'E tokorua tangata e 'anga'anga i te koro: e riro tēta'i, e toe mai tēta'i.
37Kua ui maira te au pipi ki a Iēsū, nā kō maira, “E te 'Atu, 'ei 'ea?”
Kua pa'u atura aia ki a rātou, “'Ei te ngā'i kōpapa mate ra, 'ei reira te au 'āeto e putuputu ei.”
Seçili Olanlar:
Luka 17: CIMRNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Cook Island Maori Revised New Testament © Bible Society of the South Pacific, 2021.
