LUK 15
15
Ndal boyna kay timiira viɗ ki hin faɗta
(Matiye 18.12-14)
1Suu vi taara u suu cona ɦuɗ tasi eg Yesu a humum boy mamma. 2Suu Farisenna u suu wi magaara gaɗta hosok duk tasi ana, «Sa namma vi suu cona varam ti funa u asi lay.» 3Nam Yesu tinisi ndal boyna ana, 4«Lini sa ma dukugi u timigiina kom kis, lini taa dew viɗ ki wa ni nam ka hin suu dok dleeŋe yam dleeŋe suu wanna ka um tani, tuɗ hal ta dewra ay tuɗi su? 5Nam faɗ ay wa ni, hurum furi cocoo. Nam tlaɗ ay kelemu. 6Nam hin mbay voo, yi ndarayam suu zina ay egemu, dasi ana, An fi timii manda viɗ kira ay wa. 7An dagi ha ni na may sa dew ma li corana hin coomba ki wa ni, suu kolo huulonna hin furi kammi su suu dok dleeŋe yam dleeŋe suu hurusi jivina.»
Ndal boyna kay begera viɗ ki hin faɗta
8«Ɗowba lini cara sili maɗta koɗ doogo lini ta dewra viɗ ki wa ni, ndaɗ ka do kura koɗ do ni, too hu ziiɗ ki halaɗ gak gak faɗɗi su? 9Ndaɗ faɗ wa ɗaŋŋi, yi banayaɗna u heneyeɗna, hin dasi ana, Furiyugi u an lay, an fi sili manda viɗ ki ginda wa. 10An dagiya, suu sunda huulona hin furi kay sa co ma hin coomba kina ni na may.»
Ndal boyna kay goo ma viɗ ki hin famma
11Yesu di ana, «Sana u goryom kom mba'. 12Ma goona di bum ana, Aŋ ɦan ii tlegeyen ki gaw. Bum ɓorowosi tlegeyem ki u wayamma may. 13Buu dagan ca ni ma goona gus tlegeyem ki gusni, tuɗ u gursu mamba hu mbassa dayra. Nam ɓeŋ gursu mam ndaɗta ki halaŋ. 14Mayra hin ndi hu zi namma, va ti ka oloɗi. 15Nam i kal li sunda fok sa maa dew. Nam tinim a taa kosoŋŋa. 16Nam hal a ti tlesuu kosoŋŋa tasina, sa ka ɦamsinaɗi lay. 17Nam gijaŋ saa kay dlaamba ana, Suu li sunda vi bunna ha ti funa, an ci tan ki u mayra tani kay mege? 18An min holoŋ vi bun balamanu. An hin dam ana, Bunu, an li cora eg Lona may egeŋ may. 19An ka min ana aŋ golon ko goroŋŋa na oloɗi. Golon ni ko suu li sunda varaŋŋa ɦawa na.» 20Nam hoŋ ay a nda vi bumba gaw.
«Nam ay ki eg zina day tu ni, bum wam ay na ni, nam mbuɗ irim hahaw cocoo. Bum ndi liŋŋa ha a ŋgafamba gaw, mboɗom hurumu. 21Goona di bum ana, Bunu, an li cora eg Lona may egeŋ may. An ndak ka a aŋ a golon a goroŋŋa oloɗi. 22Bum di maŋ suu lam sun mamba ana, Yowogi baraw ma jivina ay toŋgo zak. Cukumma tamu, kalam walakka kay komu, cukum tuɓuruna sem may. 23Vagi mbutl ma aygi ɗooromma aya, ŋgaɗamu, taygi fu furira. 24Kayme goron ma namma ay ki gin ni miɗiya, nam dliɗ ki wa. Nam ay ki gin ni viɗiya, an fam wa.» Luu ma furira gi jaŋŋa ni na gaw.
25«Asi luu na ni, gorom ma ŋgolna ay ki hu senena, nam a hoŋ ay vora wanni, mba ŋgoo zin na tokŋi, hum timma tii may, suuna luu may. 26Nam yi sa ma li sun ma ay dew, joɓom ana, Va li nana ni mege?» 27Sa sunda hoŋom dira ana, Wayaŋŋa mba vo wa. Buŋ ci mbutl ma aygi ɗooromma ki wa, kay goromma mba tewem ki vo wa. 28Nam ma ŋgolna ɓeŋ hurum ki gaw, ka a kal vo oloɗi. Nam bum kal ay ki mba tayam ana nam kal ay voo. 29Nam goona hoŋ dira maŋ bum ana, Basara ki ni ŋgolo, an laŋ sunda. An gaŋ vunuŋ ka ki dewɗi lay. Aŋ ɦan ɦu ka na dew ana an ti fu furi u banayannara kaɗi lay. 30Goroŋ ma tin yam ay ki na, basaŋ bege maŋga ay ki u gawlaŋina, mba karam may, aŋ ŋgaɗam mbutl ma aygi ɗooromma ki na gaw ni nanage? 31Bum hoŋom dira ana, «Goonna, aŋ tew tew ni egenu, tlesuu konna halaŋŋi maŋ lay. 32Ay ndak a luu luu ma furira kayme wayaŋŋa gin ay ki ni ko miɗira na, cecemi nam mbuɗ ki ni iiriya. Nam ay ki ni baaya, cecemi an fam wa.»
Seçili Olanlar:
LUK 15: BMS
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bible Moussey © Bible Society of Chad, 2002.