Genesis 5
5
CAB. V
1Shoh lioar sheelogheyn Adam. ’Sy laa ren Jee dooinney y chroo, ayns caslys Yee ren eh eshyn y chroo: 2Fyrrynagh as bwoirrynagh chroo eh ad: as vannee eh ad, as denmys eh yn ennym oc Adam, er y laa v’ad er nyn groo.
3As va Adam shey-feed bleïn as jeih dy eash, as hooar eh mac ayns e chaslys hene, goll-rish hene; as ren eh genmys eh Seth. 4As va eash Adam lurg da Seth ve ruggit, hoght cheead bleïn. As va echey mec as inneenyn. 5As va slane eash Adam nuy cheead as jeih bleeaney as feed, as hooar eh baase.
6As va Seth queig-feed as queig bleeaney dy eash, as va echey Enos. 7As lurg da Enos ve ruggit, va Seth hoght cheead bleïn as shiaght; as va echey mec as inneenyn. 8As va slane eash Seth nuy cheead as daa vleïn jeig, as hooar eh baase.
9As va Enos kiare-feed bleïn as jeih dy eash, as va echey Cainan: 10As lurg da Cainan ve ruggit, va Enos hoght cheead bleïn as queig-jeig, as va echey mec as inneenyn: 11As va slane eash Enos nuy cheead bleïn as queig, as hooar eh baase.
12As va Cainan three-feed bleïn as jeih dy eash, as va echey Mahalaleel: 13As lurg da Mahalaleel ve ruggit, va Cainan hoght cheead bleïn as da-eed, as va echey mec as inneenyn. 14As va slane eash Cainan nuy cheead bleïn as jeih: as hooar eh baase.
15As va Mahalaleel three-feed bleïn as queig dy eash, as va echey Jared: 16As lurg da Jared ve ruggit, va Mahalaleel hoght cheead bleïn as jeih as feed, as va echey mec as inneenyn: 17As va slane eash Mahalaleel hoght cheead bleïn as kiare-feed as queig-jeig: as hooar eh baase.
18As va Jared hoght-feed as daa vleïn dy eash, as va echey Enoch. 19As lurg da Enoch ve ruggit va Jared hoght cheead bleïn, as va echey mec as inneenyn: 20As va slane eash Jared nuy cheead bleïn three-feed as jees: as hooar eh baase.
21As va Enoch three-feed bleïn as queig dy eash, as va echey Methuselah. 22As ren Enoch gimmeeaght myr ayns fenish Yee, lurg da v’er gheddyn Methuselah, three cheead bleïn, as hooar eh mec as inneenyn: 23As va slane eash Enoch three cheead bleïn, three-feed as queig: 24As ren Enoch gimmeeaght myr ayns fenish Yee, as cha dooar eh baase, son ghow Jee eh, huggey hene.
25As va Methuselah nuy-feed bleïn as shiaght dy eash, as va echey Lamech: 26As lurg da Lamech ve ruggit, va Methuselah shiaght cheead bleïn as kiare-feed as jees, as va echey mec as inneenyn. 27As va slane eash Methuselah nuy cheead bleïn three-feed as nuy: as hooar eh baase.
28As va Lamech nuy-feed bleïn as jees dy eash, as va mac echey. 29As ren eh genmys eh Noah, gra, Nee eh shoh shin y gherjaghey ayns nyn obbyr as tooilleil nyn laueyn, kyndagh rish y thalloo ta’n Chiarn er gheyrey: 30As lurg da Noah ve ruggit, va Lamech queig cheead bleïn as kiare-feed as queig-jeig, as va echey mec as inneenyn: 31As va slane eash Lamech shiaght cheead bleïn three-feed as shiaght-jeig: as hooar eh baase. 32As va Noah queig cheead bleïn dy eash: as hooar Noah Shem, Ham, as Japheth.
Seçili Olanlar:
Genesis 5: BIB1819
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© British and Foreign Bible Society 1819, 2019