Kuyamba 42
42
Abale Jozefi aniyenda ku Ijipiti kasunza
1Jakobho paadadziwa kuti ku Ijipiti kukhana chakudya, adati kwawana wake, “Ko thangwe lanyi tikundonyanganana?” 2#Mab 7:12Iye adati, “Ndabva kuti ku Ijipiti kuna chakudya. Yendani mukatigulile chakudya, kuti tilalame, tileke kufa.” 3Nakutenepo akulu wa Jozefi khumi adayenda ku Ijipiti kagula chakudya. 4Koma Jakobho alibe kuyendesa Bhenjemani mung'ono wa Jozefi, pabodzi naakulu wake, pakuti akhagopela kuti chinango chinthu chingachitike kwayiye.
5Wana wa Izraeli adabwela kuzagula pabodzi naanango, pakuti mu Kenani mukhadachita njala. 6Jozefi akhali nduna ikulu mudziko la Ijipiti yentse, iye ndiye akhagulisila wanthu wamudziko limwelo chakudya. Abale wa Jozefi adafika achimukotamila, adakotama patsogolo pake. 7Jozefi paadawona akulu wake adaadziwa, koma adaaphata ninga alendo, adalewa-lewa nawo mwakunyinduka, adati kwayiwo, “Mwachoka kuponi?” Iwo adati, “Tachoka kudziko la Kenani, tabwela kuzagula chakudya.”
8Jozefi adadziwa akulu wake, koma iwo alibe kumudziwa. 9#Kuya 37:5–10Pamwepo Jozefi adazakumbuka maloto yake yaadalota yakhadanyangana nayiwo, iye adati kwayiwo, “Ndimwe akadidiya, mwabwela kuzawona kuti dziko lathu nilakulimba panango nee.”
10Iwo adati, “Nee mbuya wathu, ise alanda wanu tabwela kuzagula chakudya. 11Ndise wana wamunthu m'bodzi, ndise wanthu wakukhulupilika, ise alanda wanu ndise lini akadidiya.”
12Jozefi adati kwayiwo, “Nee, imwe mwabwela kuzawona kuti dziko lathu nilakulimba panango nee.”
13Iwo adati, “Ise alanda wanu, ndise khumi naawili pawubale wathu, wana wamunthu m'bodzi wamudziko la Kenani; wakumalizila ana apayi wathu, mung'ono wathu pachalibe.”
14Jozefi adati, “Ndipo pandalewa kuti ndimwe akadidiya. 15Nathangwe layibzi ninkuyesani, nintolumbila namambo Farawo, muniyenda lini, kufikila mung'ono wanu wabwela pano. 16Mutume m'bodzi wanu, abwele namung'ono wanu adasala, koma anango mwentse muchasala muli mujeli. Mukabwela naye ndipo panin'zadziwa kuti mukulewa chadidi panango mukulewa gunkha, mukaleka kuchita bzandalewa ninilumbila na Farawo, kuti chadidi ndimwe akadidiya.” 17Iye adazaayikha mujeli kwantsiku zitatu.
18Ntsiku yachitatu Jozefi adati kwayiwo, “Pakuti ine nin'gopa Mulungu, peno munfuna kuchila muchite bzaninkuwuzani. 19Peno ndimwe wanthu wakukhulupilika, m'bodzi wanu asale njeli, anango wentse yendeselani chakudya mabanja yanu kuti yaleke kufa nanjala, 20mubwelese mung'ono wanu kwayine, pamwepo nin'zadziwa kuti mukulewa chadidi, kuchitila kuti muzaleke kuphewa.”
Iwo adabvuma, nkuchita bzaakhadawuziwa. 21Adati kwamunango namunango, “Chadidi, tina mulandu thangwe labzatidachitila mung'ono wathu Jozefi, tidawona kushupika kwake paakhatikumbila kuti tichize umoyo wake, ise tilibe kutetekela. Koma lelo uno bzatidachita bzaakutibwelelambo ise.”
22 #
Kuya 37:21,22 Pamwepo Rubheni adati, “Ko ndilibe kukuwuzani kuti lekani kuchitila chakuyipa kwamwana uyu? Koma imwe mulibe kunditetekela, nakutenepo gazi lake laakubwezelambo.” 23Koma iwo alibe kudziwa kuti Jozefi akhabva bzaakhalewa, pakuti pakhana munthu akhatulukila pakati payiwo nayiye. 24Jozefi adachokapo nkuyamba kulila. Adabwelela pomwe kuzalewa-lewa nawo, adazatola Simiyoni achimuyikha mujeli wentse achiwona.
Akulu wa Jozefi am'bwelela ku Kenani
25Jozefi adawuza wanthu kuti adzadze chakudya m'masakha yawo, achiyikha masheleni yaadagula nayo chakudya m'masakhayo, nakuwapasa chakudya chakuyenda achidya pawulendo wawo, ibzi ndibzo bzaadachitiliwa. 26Pamwepo akulu wake adayikha mitolo yawo yachakudya pamadhonki, nkuyenda ulendo wawo. 27Koma paadayima kuti agone, munango wawo adatsudzula ntolo wake kuti apase dhonki lake chakudya, adawona masheleni pamulomo wasakha lake. 28Iye adati kwaabale wake, “Masheleni yandagula nayo chakudya yabwezelewa, yayikhiwa pomwe musakha langu.” Pamwepo mitima yawo wentse idamenya. Iwo adati, “Nchinyi chimwechi chatachitiliwa na Mulungu?”
29Paadafika kwaapayi wawo Jakobho mudziko la Kenani, adalongosola bzentse bzikhadachitika kwayiwo, iwo adati, 30“Mwamunayo, mbuya wamudziko watidawona, paakhalewa-lewa nayise akhachita bzakutinyindukila, akhati ndise akadidiya, tidayenda kanyangana dziko. 31Koma ise tidati kwayiye, ‘Ndise lini akadidiya, ndise wanthu wakukhulupilika; 32tilipo khumi naawili pawubale bwathu; wana wamunthu m'bodzi, m'bodzi pachalibe, mung'ono wathu wakumalizila ana apayi wathu mudziko la Kenani.’ 33Pamwepo mwamunayo, mbuya wadziko limwelo adati, ‘Ibzi ndibzo bzichandidziwisa kuti ndimwe wakukhulupilika, siyani m'bale wanu m'bodzi kuno, takulani chakudya chamabanja yanu yananjala muyende. 34Bwelani namung'ono wanu, pamwepo ine nin'zadziwa kuti ndimwe lini akadidiya, koma wanthu wakukhulupilika. Mukatenepo nin'zakubwezelani m'bale wanu, imwe muchizachita malonda yanu mudziko lino.’ ”
35Paadakhuthula masakha yawo, munthu wentse adawona musakha lake muna masheleni, apayi wawo adawona nthawa zamasheleniyo, wentse adakankhamuka nabzo. 36Apayi wawo Jakobho adati, “Mwandimalila wana wangu Jozefi adafa, Simiyoni pachalibe. Tsapano mwaakufuna kunditolela Bhenjemani pomwe. Bzentse bzagwela ine.”
37Pamwepo Rubheni adati kwaapayi wake, “Ndikaleka kubwelela na Bhenjemani, mun'zapha wana wangu awili awa. Muyikheni m'manja mwangu, ndine nimbwelela naye kwayimwe.”
38Koma Jakobho adati, “Mwana wangu aniyenda lini, nkulu wake adafa. Uyu ndiye wasala, pakachitika chinango chakuyipa pawulendo wamukufamba, mun'zayendesa nsolo wangu wayimvi kumbuto yawanthu wakufa.”
Seçili Olanlar:
Kuyamba 42: KUNDA
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bhaibheri reChikunda © Bible Society of Zimbabwe