Kuyamba 44
44
Kusayika kwa khomeshi
1Jozefi adawuza mulanda wake akhanyanganila munyumba mwake kuti, “Dzadza masakha yaamuna awa nachakudya chaankwanisa kutakula, uyikhe masheleni yamunthu yekha-yekha musakha lake, 2uyikhe khomeshi yangu yasiliva musakha lamung'ono wawo, masheleni yawagula nayo chakudya uyayikhe pomwe musakhamo.” Mwamunayo adachita bzaadawuziwa na Jozefi. 3Mangwana yache machibese-bese amunawo adawuziwa kuti ayende bzawo ulendo wawo namadhonki yawo. 4Koma paadandoti buleni muguta, adafamba kanthawe kang'ono-ng'ono, Jozefi adati kwamwamuna akhanyanganila munyumba mwake, “Teyela amuna wale, ukaaphata uwabvunze kuti, ‘Thangwe lanyi kubwezela chakuyipa pana chabwino? Thangwe lanyi mwaba khomeshi yasiliva yamambo? 5Ko sindiyo yaamwela mbuya wangu inimudziwisa bzin'zachitika kutsogolo? Mwataza pakuchita tenepo.’ ”
6Paadakaaphata adaawuza mafala yamweyo. 7Iwo adati kwayiye, “Ko thangwe lanyi mbuya wangu kulewa mafala yatenepo kwayise? Ise alanda wanu tingachite lini chinthu chatenepo. 8Wonani, masheleni yatidawona mumasakha yathu pakuyamba sitidabwelela nayo, kuchoka kudziko la Kenani; ko tingabe tani siliva panango golidhe kuchoka munyumba yambuya wako? 9Umweyo wamuti muwone ana komeshi imweyo ngaaphewe. Anango tichizakhala alanda wambuya wangu.”
10Iye adati, “Nin'chita bzamwalewa, wandichawona ana komeshi ndiye achakhala mulanda wangu, koma anango wentse achakhala alibe mulandu.” 11Nakutenepo munthu wentse adabulusa sakha lake, nkulitsudzula. 12Iye adayamba kunyangana musakha yankulu mpaka kwang'ono wawo. Khomeshi idazawoneka ili musakha ya Bhenjemani. 13Pamwepo iwo adang'amba bzakubvala bzawo. Munthu wentse adayikha ntolo wake padhonki lake achibwelela kuguta. 14Judha naabale wake adayenda kunyumba kwa Jozefi, adakamuwona aliko, iwo adamukotamisa nkhope zawo pantsi patsogolo pake. 15Jozefi adati, kwayiwo, “Ko n'chinyi chamwachita? Ko mukhadziwa lini kuti munthu ninga ine ninilotela chadidi?”
16Judha adati, “Tingati tani kwayimwe mbuya wathu? Tingalewenyi, ko tingabzichenese tani? Mulungu wawona chakuyipa chaalanda wanu; wonani ndise akapolo wambuya wathu, ise tentse nayiye ana janja lawoneka nakhomeshi.”
17Jozefi adati kwayiwo, “Ningachite lini tenepo. Munthu aninga wawoneka ana komeshi ndiye achakhala mulanda wangu. Imwe anango mungayende kwaapayi wanu, mufambe mun'delekho.”
Judha ankumbila Bhenjemani
18Judha adafika pafupi na Jozefi, adati kwayiye, “Ndaphata minyendo mbuya wangu, lekani mulanda wanu, alewe-lewe nayimwe. Lekani kundikalipila pakuti imwe mudandolingana na Farawo. 19Mbuye wangu adabvunza alanda wake kuti, ‘Ko muna apayi panango m'bale?’ 20Ise tidati kwambuya wathu, ‘Yinde tina apayi, nikhalamba, namung'ono wathu waadabala akalamba, koma nkulu wake ndiye adafa. Koma iye ndiye adasala ali yekha munyumba mwaamayi wake. Apayi wake animufuna kwene-kwene.’ 21Pamwepo imwe mudati kwayise alanda wanu, ‘Mubwele naye ndizamuwone.’ 22Ise tidati kwambuya wathu, ‘Mwana umweyo angasiyane lini naapayi wake, pakuti akasiyana nawo, apayi wakewo angafe.’ 23Pamwepo imwe mudati kwaalanda wanu, ‘Mukaleka kubwela namung'ono wanuyo, mun'zawona lini nkhope yangu pomwe.’ 24Patidafika kwamulanda wanu payi wathu, tidaawuza mafala yambuya wathu. 25Apayi wathu paadati, ‘Yendani pomwe mukatigulileko tuchakudya,’ 26ise tidati, ‘Tiniyendako lini pomwe. Mung'ono wathu tikayenda naye ise tiniyenda; pakuti tingakawonane nankhope yamunthu ule, kusala kwakuti mung'ono wathu tayenda naye.’ 27Pamwepo mulanda wanu, apayi wathu adati, ‘Imwe mun'dziwa kuti nkazi wangu adandibalila wana awili, 28munango adandisiya, pamwepo ine ndidati, Chadidi wang'ambiwa-ng'ambiwa, ndilibe kuzamuwona pomwe.’ 29Mukanditolela uyu pomwe, chakuyipa chikakachitika payiye, muniyendesa nsolo wangu wayimvi kumbuto yawanthu wakufa. 30Nakunetepo ine ndikabwelela kwamulanda wanu apayi wathu, mwanayu palibe, pakuti umoyo wawo udaphatana nawumoyo wamwanayu, 31akakawona kuti mwanayu palibe, ankafa. Ise alanda wanu tinkayendesa nsolo wayimvi waapayi wanthu mulanda wanu kumbuto yawanthu wakufa nashungu. 32Pakuti ndidalumbila kwaapayi wangu kuti, ‘Ndikaleka kubwelela naye kwayimwe, nin'zakhala namulandu kwaapayi wangu kwawumoyo wangu wentse.’ 33Ndaphata minyendo lekani mulanda wanu asale pambuto yamwanayu kuti akhale kapolo wambuya wangu, lekani iye ayende naakulu wake. 34Ko ningabwelele tani kwaapayi ndilibe mwanayu? Nin'gopa kawona chakuyipa chinkachitika kwaapayi wangu.”
Seçili Olanlar:
Kuyamba 44: KUNDA
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bhaibheri reChikunda © Bible Society of Zimbabwe