Juɛl a pwɔdɛn tɛ Mak 5
5
1EKEN atɛn kwɔca tɛ ban ma Gadara. 2Tɛ Yecu koyɛn tɛ bumɛ ji, aca nɛntɛ minɛ kugɛn Eke ti, minɛ tɛ non a kolgɛ, minɛ mwuŋɛn juoŋ a yayɛn, 3minɛ ciyɛ non a kolgɛ: minɛ yakɛn ti wiɛnɛ eke bawɛ, jinjɛr bwɔnɛ; 4aŋkɛ ɣoŋkɛ a coŋɛn eke wiɛnɛ ma tɛ jinjɛr ɔci diegdɛ tɛ bilkɛ; bilkɛ ɔci jinjɛr lɛŋɛ jitɛn: minɛ yakɛn ti muŋɛ eke bawɛ. 5Ɔci tɛ ɣoŋ ji ɔci tɛ wɛn ji ŋɛcu, tɛ kolgɛ ɔci tɛ pomgɛ jitɛn, eke yaadɛ a yaadɛ. Warɛ yhɛrɛn tɛ gwiy. 6Ɔci tɛ eke gɔrcɛn Yecu ballɛ loncɛn ɔntɔ, eke yuŋdɛ muortɛ Eke ti; 7ɔci yaadɛ tɛ pwɔnu tolɛn, gɔkjɛn: Ya noŋjɛ aginɛ tɛ I, Yecu, I Kacɛ Juɔŋ a Tolɛn, Minɛ tolɛn a tolɛn? Ya cɔkɛ I ti tha Juɔŋ a Tolɛn, na ya jɛbjɛ bɛ. 8Yecu gɔŋɛ minɛ ti: Kacɛ burɛ, i juɔŋ a yayɛn; minɛ daljɛn. 9Yecu tocɛ eke ti: I yintɛ ɔki? Ɔci eke gɔkjɛn: Ya yintɛ Coŋɔ; aŋkɛ ɔn a diɛkɔn bɛ. 10Ɔci eke cɔkɛ Yecu ti nɛ tolɛn aŋkɛ eken yɛptɛ Yecu ban ɔntɔ bɛ. 11Tɛ ɣoŋ a nɛnɛ kwutɛn atɛ pul a tolɛn pom ti, kɛnyɛ luɔm. 12Ɔci jɔkɛn tɔlgɛn nyiwɛn Eke ti, gɔkjɛn: Dalɛ ɔn odɔn ta I kwutɛn ti, kacɔn eken ti. 13Ɔci Yecu gɔkjɛ: Ɔgdɛ otɛ. Ɔci jɔkɛn yɛyɛn kacɛn burɛ, ɔci kacɛn kwutɛn ti: ɔci kwutɛn yiŋɛn pom ŋwɔyɛ ti, dɛmdɛn thul ji; jadɛ tɛ thul ji. 14Kwutɛn a diɛkɛn bɛ, a elp ayo. Ɔci makɛ ciɛtɛ kwutɛn yiŋɛ ban ji; ma ban ji myitkɛ, ɔci ma burɛ myitkɛ. Aŋkɛ ma bɛnɛ gɔrcɛ wakɛ naŋɛn. 15Ɔci eken bɛnɛ Yecu ti, ɔci gwɔldɛ, minɛ mwuŋɛ jɔkɛn tɔlgɛn cocɛn, yhɛŋdɛ buruŋ ɔci winyu ballɛ tɛ tiŋdɛn jig nɛ pwɔdɛn, eke minɛ mwuŋɛ Coŋɔ; ɔci ma bwɔyɛ. 16Ɔci makɛ gɔrcɛn wakɛ naŋɛn tɛ minɛ a ludɛn, ɔci naŋɛn tɛ kwutɛn, gɔkjɛn ma ti. 17Ɔci ma atɛ gɔŋɛ Yecu ti aŋkɛ Eke odɛ ɔntɔ banɛ ti. 18Ɔci Yecu ballɛ kacɛn bumɛ ji, minɛ pwɔŋɛn tɛ jɔkɛn bɛnɛ, nyiwɛn Eke ti aŋkɛ eken otɛn yakɛn. 19Ɔci Yecu yuokɛn, ɔci gɔkjɛn eke ti: Ɔgdɛ banɛ ti, ɔgdɛ ma ɣɛke ti, ɔci ma myitkɛ tɛ wakɛ tolɛn naŋɛn Ciagɔn Tolɛn i ti: ɔci yum pwɔktɛn. 20Ɔci eke atɛ pɔy eke, ɔci ma Dekapoli myinɛn, tɛ wakɛ tolɛn naŋɛn Yecu: aŋkɛ ma punɛn wakɛnda.
21Ɔci tɛ Yecu atɛn kwɔca mokɛ tɛ bum, ma ɔcɛn Eke ti a coŋɛn: ɔci Eke ballɛ tɛ thul dwɔŋɛ ti. 22Minɛ a ciagɔn cinagog ti bɛnɛ. Eke yintɛ Jayra; eke gɔrcɛn Yecu, dwinjɛn tɛ kiegɛ Eke, 23nyiwɛn Eke ti nɛ tolɛn, gɔkjɛn: Kacɛ ya amɛ lien, kacɛ a eŋ: ya tokɛ I, aŋkɛ I bɛdɛ, eke tabdɛ, akɛ eke warɛ pwɔktɛ, ɔci eke ɣodɛn. 24Ɔci Yecu atɛ yakɛn eke; ɔci makɛ botɛn Eke ŋwoyɛ ti a coŋɛn, a pwɔdɛ bɛ.
25Ɔci minɛ eŋ ballɛ a ciɛlɔ, minɛ warɛ yayɛn yuinkɛ a coŋɛn, yuinkɛ aŋɛ inyakɛn witkɛn ayo. 26Eke warɛ yanɛn nɛ tolɛn tha aginɛ naŋtɛn makɛ noŋɛn jan, ɔci tha aginɛ naŋtɛn makɛ tirt; aŋkɛ mal eke dakcɛn tha makɛ naŋtɛn ma wakɛ yɛyɛn, ɔci warɛ ekta pwɔnɛn min bɛ, ballɛ min yɛyɛn. 27Eke tiŋɛ juɛl gwɔŋɛn ma tɛ Yecu, eke bɛnɛ tɛ makɛ coŋɛn, botɛn Yecu, ɔci buruŋ Eke tabtɛn. 28Eke gɔkjɛn yumɛ ti: Kan ya lakɛn buruŋ Yecu tabtɛn ti, ya warɛ pwɔnɛn kan. 29Tɛ buruŋ Yecu tammɛn dokɛ, aca nɛntɛ minɛ eŋ warɛ pwɔnɛn dokɛ; warɛ pwɔnɛn kan, nhijɛn eke. 30Wontɛ aca nɛntɛ aginɛ tɛcɛn atɛn ta Eke nhijɛn Yecu, ɔci warɛ yalɛn makɛ coŋɛn ti ɔci gɔkjɛn: Buruŋ Ya tammɛn minɛ? 31Ɔci makɛ botɛn gɔkjɛn Eke ti: Makɛ ballɛ cwɔkɛn ti a coŋɛn yowɛrnɛn I, ɔci I gɔŋnɛn, Ya tammɛn minɛ? 32Ɔci Yecu gɔrtɛ a gwɔlɛ, bwɔgɛ gɔrcɛ minɛ noŋɛn nɛnɛ. 33Minɛ eŋ bwɔyɛ ɔci warɛ dirɛn, warɛ pwɔnɛn nhijɛn, bɛnɛ ɔci dwinjɛn inyu Yecu nyamɔ ti, ɔci juɛl a warɛ myinɛ eke wakɛnda. 34Wontɛ Yecu gɔkjɛn eŋ ti: Kacɛ Ya, jithɛ ballɛ i ti aŋkɛ noŋɛn warɛ pwɔnɛn; otɛ, yum ninɛ a nyɔn, ciyɛ warɛ pwɔnɛn.
35Tɛ Eke ballɛ min gɔkjɛn, ma bɛnɛ tɛ ban minɛ ciagɔn nɛnɛ, gɔkjɛn: Kacɛ i tunɛ dokɛ: Minɛ Ciagɔn Tolɛn daljɛn, i gɔkjɛ wutɛ ɣogɛ? 36Ɔci Yecu tiŋɛn juɛl a gwɔŋɛn, gɔkjɛn minɛ tolɛn ti: Na bwɔyɛ bɛ, lakɛn jithɛ. 37Ɔci Yecu yuokɛn tɛ makɛ botɛn Eke ti, aŋkɛ Peter, ɔci Jakob, ɔci mod Jakob Jɔn pokɛn botɛn Eke ti. 38Eken bɛnɛ tɛ ɣon minɛ ciagɔn nɛnɛ; ɔci gɔrcɛn ma yaadɛ a yaadɛ, ɔci wiagɛn jun tol tol. 39Ɔci tɛ Eke kacɛn ɣora, Eke gɔkɛ ma ti: Ɣɛke wiagɛ a jun ɣogɛ? Kacɛ tunɛ bɛ, lakɛn wicɛn. 40Aŋkɛ ma nhuktɛ yalgɛ. Yecu ma uldɛn ɔntɔ, Eke yakɛn kacɛ wegen, ɔci kacɛ megen, ɔci makɛ ballɛ Eke ti kacɛn ɣora kacɛ ti. 41Ɔci kacɛ mwugdɛ tɛ biŋɛ, Yecu gɔkjɛn kacɛ ti: Talitha kumi; tɛ jig ikin, Tɔla, Ya gɔkɛ i ti, Jɔŋɛ nyalɔ. 42Aŋkɛ aca nɛntɛ tɔla nɛnɛ jɔŋɛ dokɛ, ɔci pucɛ wun; yuinkɛ eke ballɛ inyakɛn witkɛn ayo. Ɔci ma punɛn nɛ tolɛn, punɛn pot pot bɛ. 43Ɔci Yecu ɣitɛ ma ti aŋkɛ makɛ pokɛn na myitkɛ bɛ: ɔci Eke gɔkɛ wakɛ amtɛn ɣondɛn tɛ kacɛ.
Seçili Olanlar:
Juɛl a pwɔdɛn tɛ Mak 5: MFZ1947
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
First published by British and Foreign Bible Society in 1947.