Mwandzo 11
11
Mnara wa Babeli
1Siku hizo duniani atu kala anagomba luga mwenga na maneno gao kala ni mamwenga. 2Atu ariphokala anatsama uphande wa mlairo wa dzuwa, afika tsi ya kugbwa hiko Shinari na achisagala kuko.
3Achiambirana, “Haya! Nahutengezeni matofali, hugaocheni vinono gakale mafu.” Ahumira matofali badala ya mawe na lami badala ya simiti. 4Achiamba, “Sambi, nahudzengeni mudzi na mnara ambao chirereche chifike mlunguni, ili huphaheni dzina na husedze hukatsamukana dunia ndzima.”
5Phapho Mwenyezi Mlungu watserera kpwedzalola nyo mudzi na nyo mnara ambao atu kala anadzenga. 6Mwenyezi Mlungu achiamba, “Aah! Atu aha ni amwenga na osi anagomba luga mwenga na chichi ni chandzo cha maneno makulu ambago andagahenda. Na takuna rorosi ambaro andaripanga ambaro tarindakala. 7Nahutserere photsi na hukabanange luga yao ili achigomba asielewane.”
8Kpwa hivyo Mwenyezi Mlungu achiatsamula dunia ndzima na achiricha kudzenga nyo mudzi. 9Ndiyo mana mudzi hinyo waihwa Babeli, kpwa kukala phapho ndipho Mwenyezi Mlungu ariphotsanganya luga yokala ichigombwa ni atu duniani kosi, achiatsamula dunia yosi.
Vivyazi vya Shemu
(1 Nyakati 1:24–27)
10Higa ni maneno ga kuhusu Shemu na uvyaziwe.
Miaka miiri bada ya mafuriko Shemu kala ana miaka gana mwenga, achivyala mwana mlume, Arifakisadi. 11Bada ya kuvyala Arifakisadi, Shemu wasagala miaka magana matsano na achikala akavyala ana anjina, alume na achetu.
12Arifakisadi ariphofika miaka mirongo mihahu na mitsano wavyala Shela. 13Bada ya kuvyala Shela, Arifakisadi wasagala miaka magana mane na tahu na achikala akavyala ana anjina, alume na achetu.
14Shela ariphofika miaka mirongo mihahu wavyala Eberi. 15Bada ya kuvyala Eberi, Shela wasagala miaka magana mane na tahu na achikala akavyala ana anjina, alume na achetu.
16Eberi ariphofika miaka mirongo mihahu na ne wavyala Pelegi. 17Bada ya kuvyala Pelegi, Eberi wasagala miaka magana mane na mirongo mihahu na achikala akavyala ana anjina, alume na achetu.
18Pelegi ariphofika miaka mirongo mihahu wavyala Reu. 19Bada ya kuvyala Reu, Pelegi wasagala miaka magana mairi na tisiya na achikala akavyala ana anjina, alume na achetu.
20Reu ariphofika miaka mirongo mihahu na miiri wavyala Serugi. 21Bada ya kuvyala Serugi, Reu wasagala miaka magana mairi na sabaa na achikala akavyala ana anjina, alume na achetu.
22Serugi ariphofika miaka mirongo mihahu wavyala Nahori. 23Bada ya kuvyala Nahori, Serugi wasagala miaka magana mairi na achikala akavyala ana anjina, alume na achetu.
24Nahori ariphofika miaka mirongo miiri na tisiya wavyala Tera. 25Bada ya kuvyala Tera, Nahori wasagala miaka gana mwenga na kumi na tisiya na achikala akavyala ana anjina, alume na achetu.
26Tera ariphokala na miaka mirongo sabaa, wavyala Buramu, Nahori na Harani.
Vivyazi vya Tera
27Hano ndio atu a chivyazi cha Tera.
Tera wavyala Buramu, Nahori na Harani. Harani wavyala Lutu. 28Harani wafwa Uru mudzi wa Akalidayo, ambako ndiko kovyalwa, na ariphofwa iseye Tera kala achere moyo. 29Buramu walóla Sarai na Nahori walóla Milika mwana wa Harani, ambaye piya kala ni ise wa Isika. 30Sarai kala ni tasa, kala kana mwana.
31Tera wamuhala mwanawe Buramu na mdzukuluwe Lutu, mwana mlume wa Harani na mkpwaza-mwanawe Sarai, mkpwaza Buramu. Osi atuluka Uru, mudzi wa Akalidayo achitaka kuphiya tsi ya Kanani. Ela ariphofika Harani, achisagala phapho.
32Tera wafwa ko Harani. Wakati ariphofwa, kala ana miaka magana mairi na mitsano.
Seçili Olanlar:
Mwandzo 11: dig
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2019, Bible Translation and Literacy, All rights reserved.