GENESISE 6
6
Boikepo jwa batho
1 Ga dirala, e rile batho ba simolola go ntsifala mo lefatsheng, ba tshola bana ba basetsana. 2Bomorwa Modimo ba bona bomorwadia batho fa ba le bantle, jalo ba tsaya basadi mo go bone, botlhe ba ba ba ratang. 3Jehofa a re: “Mowa wa me ga o ketla o nna o ganela le motho ka bosenabokhutlo, ka gobo le ene e bile ke nama. Le fa go ntse jalo malatsi a gagwe a tlaa nna dinyaga di le 120.” 4 Ga bo go le mekaloba mo lefatsheng mo malatsing ao. Le gone morago ga moo, fa bomorwa Modimo ba tsena mo go bomorwadia batho, ba tsala bana nabo, bao, e ne e le banna ba ba diganka tsa metlha ya bogologolo; banna ba ba itsegeng.
5 Mme Jehofa a bona fa boikepo jwa motho bo le bogolo mo lefatsheng, le go akanya ga megopolo ya pelo ya gagwe gotlhe, go le bosula ka metlha yotlhe. 6Jehofa a ikwatlhaya ka a dirile motho mo lefatsheng, mme ga mo tlhokofatsa pelo. 7Jehofa a re: “Ke tlaa senya motho yo ke mo dirileng ke mo tlosa mo lefatsheng, ene motho le phologolo le sebatana le se se gagabang le nonyane ya loapi; gonne ke a ikwatlhaya ka gobo ke di dirile.” 8Mme Noa ene a bona bopelotlhomogi mo matlhong a ga Jehofa.
Noa o aga areka
9 Tse, ke tsone ditshika tsa ga Noa. Noa e ne e le monna yo o siameng, a itekanetse mo ditshikeng tsa gagwe; Noa a sepela le Modimo. 10Noa a tshola basimane ba le bararo: Sheme, Hame le Jafethe. 11Lefatshe le ne le senyegile fa pele ga Modimo, le ne le tletse thubakano. 12Modimo wa bona lefatshe, mme bona, le ne le senyegile; gonne batho botlhe ba sentse mekgwa ya bone mo lefatsheng.
13Modimo wa raya Noa wa re: “Bokhutlo jwa batho botlhe bo fitlhile fa pele ga me; ka lefatshe le tletse thubakano ka ntlha ya bone. Bona, ke tlaa ba senya mmogo le lefatshe. 14Itirele ntlo e e kokobalang ka dikgong tsa morukudu; dira matlwana mo ntlong, o e kane ka boka ka fa teng le ka fa ntle. 15Sekao ke se, sa ka fa o tlaa e dirang ka gone: boleele jwa ntlo bo nne kana ka boleele jwa mabogo a le 300, le boatlhamo jwa yone bo nne mabogo a le 50, le bogodimo jwa yone bo nne mabogo a le 30. 16O direle ntlo e e kokobalang marulelo, o sadise phatlha ya selekanyo sa lebogo fa gare ga lebota le marulelo. Mojako wa ntlo o o ntshe ka fa lotlhakoreng lwa yone. O e dire dikgaogano di le tharo tse di tlhatlaganyeng: e e fa tlase, le e e fa gare, le e e fa godimo. 17Bona, ke tlaa tlisa morwalela wa metsi mo lefatsheng go senya nama yotlhe e mowa wa botshelo o leng mo go yone, go e tlosa fa tlase ga legodimo; dilo tsotlhe tse di mo lefatsheng di tlaa swa. 18Ke tlaa tlhomamisa kgolagano ya me nao; o tlaa tsena mo ntlong e e kokobalang, wena, le bomorwao, le mosadi wa gago, le basadi ba bomorwao ba na nao. 19Mo go tsotlhe tse di tshelang; tsa nama yotlhe, o tseye di le pedi tsa ditshika tsotlhe, o di ise mo ntlong eo go di tshedisa nao; di nne e tona le e namagadi. 20Ga dinonyane ka fa ditshikeng tsa tsone, le ga diruiwa ka fa ditshikeng tsa tsone, ga sengwe le sengwe se se gagabang fa fatshe ka fa losikeng lwa sone, go tlaa tla kwa go wena di le pedi tsa losika longwe le longwe, go di tshedisa. 21O itseele dijo tsotlhe tse di jewang, o di phuthele kwa go wena; mme e tlaa nna dijo tsa gago le tsa tsone.” 22 Noa a dira jalo; mo go tsotlhe tse Modimo o di mo laoletseng, a dira fela jalo.
Seçili Olanlar:
GENESISE 6: TSW08NO
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Bible Society of South Africa 1992. Used with permission. All rights reserved.