Matyu 26
26
Osep Yuda ina tilalo pelengon ma tidue burwa ke Yesus
(Mak 14.1-2 e Luk 22.1-2 e Jon 11.45-53)
1Alo ka Yesus wai ila pele-ngon tonari yagos iye wai ke ila disaipel langane. 2“Umeile ma oklou orwo mela yagos deka itodue rogo omba ka lana ine la ke alo ka Ida Tapolngon lua osep Yuda ina tisongon omur Isip. E osep ma tikar Gute Ka Polou Langka Osep ke osep leklou ma tinilim iye ke ina akai.”
3E osep loulou ina ka omba e osep namormor ke osep Yuda ina tiduni pulu ke gute loulou ina ka mgo ila ninu omba. Gute tonari angaine Kaiafas. 4E tilalo pelengon ma tikis Yesus alo ka osep tile ine kovok deka timter iye ma iye mete. 5E tiwai langane. “Itodue elio ane alo ka itodue rogo dau kovok lama itosruk osep aitno lisak ma tidue evlei.”
Apmang baser wel ka amna itau ke Yesus apna
(Mak 14.3-9 e Jon 12.1-8)
6Yesus dong ke Betani ke Saimon ila ninu. Oglou paiangan lepra due gute tonari. 7E Yesus dong ke bota deka apmang gesa me kalke botol ka tidue ke opmu ka itau ka wel ka ina klingen omba lokono dong ine. E iye basere ke Yesus baraine. 8E alo ka ila disaipel tivati elio ane aitno lisak engil ke apmang e tiwai langane. “Ina lange iye baser wel ane adai? 9Kesua itakaranga itodue burong ke wel ane ke mani pula e itakar mani tonari ke osep ka urok wan isuk boto vala.” 10E Yesus ile aitno lisak e wai ke isak langane. “Ina lange umawai sasi ke apmang ane? Kesua iye due elio itau ke ngong. 11Kesua aling aling osep ka urok wan isuk boto vala tidong kap umu. E ngong ma ngadong kap umu aling aling kovok. 12Ke elio ka iye baser wel ane ke ngong iye kere pampamu lungong ma osep tiyas ngong. 13Ngawai lokono ke umu langane. Ke omur omur ka osep tinapapra omon itau ke taklak ka pula keniye osep ma tiwai blang ke elio ka apmang ane due ke ngong ma osep amtarsak sisir iye.”
Judas wai ma iye lai Yesus ina
(Mak 14.10-11 e Luk 22.3-6)
14Deka gute kene ke Yesus ila disaipel songotno orwo angaine Judas Iskariot la ke osep loulou ina ka omba. 15E wai ke isak langane. “Ma umakar mani sesue ke ngong langka ngalai Yesus ina ke umu?” E tikar iye mani silva iseklu ine. 16E alo ari iye nogrum e krim ekreng ma iye lai Yesus ina ke isak.
Yesus ngen ngangon kap ila disaipel
(Mak 14.12-21 e Luk 22.7-14 e Luk 22.21-23 e Jon 13.21-30)
17Oklou mgongon ina ke rogo omba ka tingen bret ka yis dong ine kovok polou e Yesus ila disaipel time ke iye e tiwai langane. “Ma amwaiki imekere ngangon ke rogo omba ka lana ine la ke alo ka Ida Tapolngon lua osep Yuda ina tisongon omur Isip ke omur ge ma itangene?” 18E iye koli wai ke isak langane. “Umesep ke armok e umala ke gute kene e umawai ke iye langane. ‘Ipem parerengen vai omon ke wom langane. “Alo ka osep tidue burwa ke ngong isuk boto polou e ngong kap lou disaipel ma imangen rogo ina ngangon ke lem ninu.”’” 19E ila disaipel tididi Yesus ila pelengon e tikere rogo ina ngangon.
20Alo ka epmes polou iye munu ke bota kap ila disaipel songotno orwo. 21E alo ka tingen iye wai ke isak langane. “Ngawai lokono ke umu langane. Gute kene ke umu ma lai ngong ngau.” 22E aitno lisak soulu lokono ke ila pelengon e isak kene kene tiwai ke iye langane. “Ngau Puda ma ngadue?” 23E Yesus koli wai langane. “Gute ka limla due bret sep ke dis ane kap lungu ma lai ngong ngau. 24Osep ma tidue burwa ke Gute Ka Polou Langka Osep eriar langka Ida Tapolngon ila pelengon wai ine e aisudo ke gute ka lai iye ina. Wan ka itau tna divir iye kovok.” 25Judas ka iye lai Yesus ina pmi iye langane. “Gute parerengen ina ma ngadue?” E Yesus koli wai ke iye langane. “Wom tona amwai ine.”
Yesus kar bret e aki wain ke ila disaipel
(Mak 14.22-26 e Luk 22.15-20 e 1 Korin 11.23-25)
26Alo ka tingen dau Yesus due bret e wai tenkyu ke Ida Tapolngon ine e tuktuke e kare ke ila disaipel e wai ke isak langane. “Umodue e umangen. Wan ane pampamu lungong.” 27E iye due kap ka aki wain dong ine e wai tenkyu ine e kare ke isak e wai langane. “Umu keniye umeinim. 28Kesua wan ane ngau marau ka la ke Ida Tapolngon ila kontrak ka iye wai e ma iye didie. E ma ngau marau baser ma sak osep urok elio epmes ina. 29Ngawai ke umu langane. Ma ngainim aki wain blang kovok la lama ngainim oku kap umu ke omur ka Livou plaue.”
30E tidue sakul deka tisongon ninu e isak kla ke gigri Oliv.
Yesus wai ma ila disaipel tisongon iye
(Mak 14.27-31 e Luk 22.21-34 e Jon 13.36-38)
31Deka Yesus wai ke isak langane. “Ke epmes ane umu keniye ma umoulou e umosongon ngong. Kesua Ida Tapolngon ila pelengon wai langane.
‘Ma ngamluk sipsip ina plaungan e ma sipsip tidardar kla.’
32E mase alo ka ngapoga ngatito ke ngau denga ngamgo ke umu ke omur Galili.” 33E Pita wai ke iye dagar langane. “Lama isak keniye tiulou e tisongon wom ma ngasongon wom kovok.” 34E Yesus koli wai ke iye langane. “Ngawai lokono ke wom langane. Ke epmes ane mgo ke alo ka kwako bole wai wom ma amwai emile ngong kovok aling eklu.” 35E Pita koli wai langane. “Aurou. Lama ngamete kap wom ma ngawai langare kovok.” E ila disaipel keniye tiwai langane blang.
Yesus wai ke Ida Tapolngon ke yage Getsemani
(Mak 14.32-42 e Luk 22.39-46)
36Deka Yesus la kap ila disaipel ke yage Getsemani e wai ke isak langane. “Umodong ane e ma ngala are e ngawai itau.” 37E iye due Pita e Sebedi titno arang orwo e isak kla kap iye. E aitno kro e aitno soulu lokono. 38E iye wai ke isak langane. “Aitno lungong kro soulu langka ma ngamete ine. Umodong ane e umaplau umu itau kap ngong.” 39E iye la isuk boto e munu ke taklak e bitna pes taklak e iye wai itau langane. “Livou langka empi elio soulu ka osep ma tidue ke ngong are itau e dau ngawaiki ngadidi aitno lungong kovok e ngawaiki ngadidi aitno lugom vala.” 40E iye iding ke ila disaipel eklu e vati isak timunu kudung. E iye wai ke Pita langane. “Umakaranga umaplau umu itau kap ngong ke aua kene kovok i? 41Umaplau umu itau e umawai itau lama Satan tok umu e umodue elio epmes ina kesua aitno lumu waiki due elio itau e dau pampamu lumu waiki due elio itau kovok.” 42E aling orwo iye la isuk boto e wai itau langane. “Livou langka elio soulu ane karanga songon ngong kovok lama nganamani ine ngawaiki ngadidi aitno lugom.” 43E iye iding ke ila disaipel eklu blang e vati isak timunu kudung kesua amtarsak bunga. 44E aling eklu iye songon isak e la isuk boto e wai itau e iye wai pelengon langka oglou iye wai. 45Deka iye polou ke ila disaipel e wai ke isak langane. “Umu dau umomtong e umomunu kudung i? Umoklingen. Taim ka gute lai Gute Ka Polou Langka Osep ke osep epmes ina polou kodong. 46Umetipa e itala kesua gute ka lai ngong ngau polou.”
Judas lai Yesus ina
(Mak 14.43-50 e Luk 22.47-53 e Jon 18.3-12)
47Alo ka Yesus dau wai Judas ka iye gute kene ke disaipel songotno orwo me ke iye. E osep loulou ina ka omba e osep ngongle ke osep Yuda ina tipagei osep pula ka tikalke elil omba e akai kap iye. 48E gute ka ma lai Yesus ina wai ke isak mgo langane. “Gute ka ma ngangen banga iye gute ka umawaiki umodue. Ma ngangen banga deka umodue.” 49E suong Judas me ke Yesus e wai ke iye langane. “Epmes itau gute parerengen ina.” E iye ngen banga. 50E Yesus koli wai langane. “Ate omdue wan ka amwaiki omdue suong.” Deka osep time tidue e tikis iye. 51E disaipel kene ka dong kap Yesus kis ila elil omba e mluk gute kene e blou tala la. Gute tonari iye gute bokongon ina ke gute loulou ina ka mgo. 52Deka Yesus wai ke ila disaipel tonari langane. “Omdue lem elil omba iding ke tarna e dong kesua osep ka tidue evlei ke elil omba ma timete ke elil omba. 53Emile itau langane. Langka ngawaiki ngadue io ngakaranga ngapmi Livou e ma iye pagei ensel pula pula ma tilua ngong. 54E Ida Tapolngon ila pelengon wai ma elio ane polou ke ngong. Langka Ida Tapolngon pagei ensel ma tilua ngong deka elio ka ila pelengon wai ine ma polou kovok.” 55Deka Yesus wai ke osep pula are langane. “Ina lange umomo e umakalke elil omba e akai ma umodue ngong langka ngong gute panakongon ina ka soulu? Oklou kene kene ngadong ke omur ka lelei Ida Tapolngon ila ninu e ngaparere umu e umekis ngong are kovok. 56E elio ane polou ma wan ka osep napaprangan ina tiwai ine ke Ida Tapolngon ila pelengon ma polou.” Deka ila disaipel keniye tisongon iye e tiulou.
Yesus vri ke osep kaunsil ina amtarsak
(Mak 14.53-65 e Luk 22.54-55 e Luk 22.63-71 e Jon 18.13-14 e Jon 18.19-24)
57Deka osep ka tikis Yesus tipaur iye ke gute Kaiafas ka iye gute loulou ina ka mgo. E osep ka tile itau ke Moses ila sogongon tigosok osep namormor tiduni pulu kap iye. 58E Pita didi Yesus iding ke omur ka lelei Kaiafas ila ninu e la dong kap osep ola ina ka tiplau ninu ma iye vati elio ka ma polou. 59E osep loulou ina ka omba tigosok osep kaunsil ina tiwaiki tidue osep ma tisin pelengon yakngan vri ke Yesus ma tidue burwa ke iye. 60E tikaranga kovok lama osep pula time e tiwai pelengon yakngan. Deka osep orwo time e tiwai langane. 61“Gute ane wai ma iye karanga dar Ida Tapolngon ila ninu e mase urie blang ke oklou eklu.” 62E gute loulou ina ka mgo tito e wai ke Yesus langane. “Emklingen osep orwo ane urok pelengon. E omkoli urok pelengon koke aurou?” 63E dau Yesus koli wai kovok. E gute loulou ina ka mgo wai ke iye langane. “Ngawai ke wom ke Ida Tapolngon ka dong vala dong angaine ma amwai lokono ke imi. Wom gute Krais ka Ida Tapolngon rere ma iye lua osep koke aurou? Wom Ida Tapolngon Otno Arang?” 64E Yesus koli wai langane. “Wom tona amwai ine e dau ngawai ke umu langane. Mase ma umavati Gute Ka Polou Langka Osep dong ke Ida Tapolngon ka ila arit ombatno limla odung. E ma umavati iye me ke taklak ke gaup ke sirva.” 65Deka gute loulou ina ka mgo trum ila molo e wai langane. “Iye wai pelengon soulu ke Ida Tapolngon. Ma iteklingen osep leklou urok pelengon kovok kesua umoklingen iye tona wai pelengon soulu ke Ida Tapolngon.” 66Deka iye pmi osep kaunsil ina langane. “Umawade gute ane lange?” E tikoli tiwai ma iye mete ke ila pelengon soulu. 67E tiuri omsok ke bitna e timluk tarna e isak leklou limsak timluk bitna. 68E tiwai ke iye langane. “Wom ka emsir wom Krais amnapapra ke imi. Gute sei mluk wom?”
Pita wai iye ile Yesus kovok
(Mak 14.66-72 e Luk 22.56-62 e Jon 18.15-18 e Jon 18.25-27)
69E Pita dong ke omur ka lelei ninu e apmang bokongon ina kene me e wai ke iye langane. “Wom blang omdong kap Yesus ka gute Galili ina.” 70E Pita wai iye ile Yesus kovok ke osep ka tidong amtarsak. Iye wai langane. “Ngaile lem pelengon lana ine kovok.” 71E iye la ke omur are ina ekreng bitna e apmang bokongon ina silang vati iye e wai ke osep langane. “Gute ane iye dong kap Yesus ka me ke armok Nasaret.” 72E aling silang Pita wai iye ile Yesus kovok. Iye wai langane. “Ngaile gute ari kovok. Eiou ane.” 73E mase sasi boto osep ka tidong ari time ke iye e tiwai ke Pita langane. “Lokono. Wom blang gute ka emdidi Yesus kesua elio ka amwai pelengon nis imi ine.” 74Deka Pita aitno nevlik e iye wai langane. “Ngawai lokono ke umu e langka ngayak umu Ida Tapolngon ma mluk ngong ine. Ngaile gute ari kovok.” Pita wai kodong e lokono kwako bole wai. 75Deka Pita bitna sisir oglou Yesus wai pelengon langane. “Mgo ke alo ka kwako bole wai ma amwai emile ngong kovok aling eklu.” E Pita la ke dogur e kngis omba lokono.
Seçili Olanlar:
Matyu 26: ANT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
copyright 2003 New Tribes Mission, Sanford, FL 32771