Matyu 9
9
Yesus lua gute ka kamla e limla timete
(Mak 2.1-12 e Luk 5.17-26)
1Deka Yesus sep ke bot e bru elim e iding ke armok ka iye dong ine. 2E osep tipaur gute ka kamla e limla timete ka iye munu ke omoi ke Yesus. Alo ka Yesus vati osep aitno lisak ila dagar iye wai ke gute tonari langane. “Lou aten aitno lugom kro kovok. Ida Tapolngon sak lem elio epmes ina kodong.”
3E osep leklou ka tile itau ke Moses ila sogongon tiwai pulu langane. “Yesus wai pelengon soulu kesua aitno mter langka iye Ida Tapolngon.” 4E Yesus ile aitno lisak e wai ke isak langane. “Ina lange aitno lumu mter soulu ke lou pelengon? 5Pelengon lange opru ngong kovok? Ngakaranga ngawai ke gute ‘Ida Tapolngon sak lem elio epmes ina’ koke ngakaranga ngawai ‘emtito emlila’? 6E ma nganis umu Gute Ka Polou Langka Osep due arit ma iye karanga sak osep urok elio epmes ina ke taklak ane.” Deka Yesus wai ke gute langane. “Emtito omdue lem omoi e amla ke lem ninu.” 7Deka gute tonari tito e la ke ila ninu. 8Alo ka osep pula pula tivati elio ka Yesus due tilim ke iye e tikakai Ida Tapolngon angaine kesua iye kar arit langane ke osep.
Yesus wai ma Matyu didi iye
(Mak 2.13-17 e Luk 5.27-32)
9Yesus songon omur are e iye lila e vati gute ka due takis ka angaine Matyu dong ke omur ka osep tikli takis ine. E Yesus wai ke iye langane. “Omo emdidi ngong.” Deka Matyu tito e didi Yesus. 10Mase Yesus gosok ila disaipel tingen ngangon ke Matyu ila ninu e osep pula ka tidue takis e osep epmes ina leklou tidong blang. 11E osep Farisi ina leklou tipmi Yesus ila disaipel langane. “Ina lange lumu gute parerengen ina ngen ngangon kap osep ka tidue takis e osep epmes ina?” 12E Yesus klingen urok pmingen e koli wai ke isak langane. “Osep ka tarna lisak itau kla ke dokta kovok e osep ka tarna lisak sasi isak kla ke dokta. 13Umala e umanana ma umeile Ida Tapolngon ila pelengon ka wai langane lana ine.
‘Ngawaiki umodue elio opmu ina ke ngong kovok. Aurou. Ngawaiki aitno lumu due osep vala.’”
Deka Yesus wai langane. “Ngame ma ngagi osep ka itau ma tididi ngong kovok. Aurou. Ngame ma ngagi osep epmes ina tididi ngong.”
Yesus wai ke elio ka osep tipli inarak ngangon
(Mak 2.18-22 e Luk 5.33-39)
14Oklou kene Jon ila disaipel leklou time e tipmi Yesus langane. “Ina lange aling kene kene imi e osep Farisi ina imepli ipem ngangon ma aitno limi la ke Ida Tapolngon e lem disaipel tidue langare kovok?” 15Yesus koli wai ke isak langane. “Langka isuk boto gute ma gi io ila saten tipli inarak ngangon alo ka gute dong kap isak kovok. E mase ma osep tidue gute tonari la e iye dong kap isak kovok deka ma tipli inarak ngangon.”
16“Langka molo oglou ina nabak osep tisisir molo arlak ka oku ina ine kovok. Kesua alo ka tigrong molo deka arlak ka oku ina polou daudeng e bak molo e ovuk ka oku mole ovuk ka oglou dong. 17E langane blang ke aki wain tarna ka tidue ke meme tarna. Langka osep tidue aki wain oku ina io tidue sep ke aki wain tarna oglou ina kovok. Kesua langka tidue langane aki wain oku ina ma bak aki wain tarna deka aki wain oku ina baser yagos e aki wain tarna nabak e sasi. Osep tidue aki wain oku ina sep ke aki wain tarna ka oku ina blang ma aki wain e aki wain tarna isak orwo tidong itau.”
Yesus due apmang bela ka mete poga ke metengen e lua apmang silang ka paia
(Mak 5.22-43 e Luk 8.41-56)
18Yesus dau wai e gute kene ka plau osep Yuda ina me grum kamla ke Yesus bitna e wai langane. “Erigu apmang oku ane mete kodong. Ngawaiki omo e omdue livep munu ke iye e ma iye bauluk ke mosongon blang.” 19E Yesus gosok ila disaipel titito kla kap gute tonari. 20Isak kla dau e apmang ka ina marau baser ke tobor songotno orwo polou batne ke Yesus e due limla kai ila molo. 21Apmang tonari aitno mter langane. Langka ngakaranga ngakai ila molo ma ngapolou itau blang. 22Iye kaie deka Yesus bauluk e vati apmang tonari e iye wai ke iye langane. “Aitno lugom kro kovok. Aitno lugom ila dagar due wom ompolou itau blang oku ane.” E lokono iye polou itau blang.
23Alo ka Yesus sep ke gute plaungan ina tonari ila ninu iye vati osep tipu piloli e osep pula tikngis ke apmang. 24Deka iye wai ke isak langane. “Umala kesua apmang are mete kovok iye munu kudung vala.” E osep tivel ke Yesus. 25E mase alo ka timla e tna tidue osep kla ke dogur Yesus la ke apmang ka munu ke kova. E iye kis limla e apmang poga e ila mosongon iding. 26E omon ke elio are kes lila ke omur are.
Yesus lua osep orwo ka amtarsak evin
27Yesus songon omur are e lila la. Alo ka iye lila osep orwo ka amtarsak evin tididi iye e tidaiku langane. “Yesus wom ka osep tisir wom Devit Otno Arang aitno lugom due imi.” 28Yesus sep ke ninu gesa deka osep orwo tonari polou ke iye. E Yesus pmi isak langane. “Aitno lumu mter ngakaranga ngadue umu umodong itau blang?” E tikoli tiwai langane. “Ee. Ida Puda aitno limi mter langare.” 29Deka Yesus kai amtarsak e wai langane. “Ngadue umu umopolou itau blang batne ke aitno lumu ila dagar.” 30E amtarsak polou itau blang deka Yesus wai dagar ke isak langane. “Umapalongo osep ke elio ane kovok.” 31E isak kla e tipalongo osep ka pula keniye ke omur tonari ke wan ka Yesus due ke isak.
32Alo ka osep orwo tonari kla osep tipaur gute ka karanga wai kovok kesua angelo soulu dong ke iye. E Yesus sapir angelo soulu tonari. 33Alo ka Yesus sapir angelo soulu kodong gute tonari nogrum wai. E osep ka tidong tidigrik e tiwai pulu langane. “Ke oglou elio langane polou ke omur Israel kovok.” 34E osep Farisi ina tiwai langane. “Iye karanga sapir angelo soulu kesua Satan ka vri mgo ke isak kar iye arit ma iye sapir isak.”
Yesus aitno kro ke osep
35Yesus la ke armok omba e armok daudeng keniye ke omur Israel. Iye parere isak ke urok duningen ina ninu e napapra omon itau ka la ke omur ka Ida Tapolngon plaue. E iye due osep keniye ka paiangan bitna bitna tidue isak e ka pampamu lisak soulu tipolou itau blang. 36Alo ka iye vati osep pula pula aitno kro ke isak kesua aitno lisak karanga mter itau kovok e tikaranga tilua isak tona kovok. Tidong langka sipsip ka inarak plaungan dong kovok. 37E iye wai ke ila disaipel ke pelengon ano langane. “Ngangon pula ka anino dong ke yage e osep awal boto vala tidong ma tipi ngangon tonari. 38Umepmi Upu Puda ka plau ngangon ina pingen ma iye pagei osep bokongon ina kla ma tipi ngangon tonari.”
Seçili Olanlar:
Matyu 9: ANT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
copyright 2003 New Tribes Mission, Sanford, FL 32771