Matius 2
2
Orang-orang majus datang dari sabala matahari nai
2:1-12
1Yesus lahir di kota Betlehem di propinsi Yudea waktu Raja Herodes pegang parenta di situ. Waktu itu orang-orang majus datang dari sabala matahari nai ka kota Yerusalem. 2Waktu dong su sampe, dong tanya orang-orang di situ kata, “Orang Yahudi pung Raja yang baru lahir tu ada di mana? Katong su lia bintang satu di sabala matahari nai yang jadi tanda kalo Dia su lahir. Jadi katong datang par somba Dia.”
3Waktu Raja Herodes dengar bagitu, dia pung hati balisa paskali, bagitu jua deng samua orang yang ada di Yerusalem. 4Tarus, dia panggel imam-imam kapala deng guru-guru Torat samua datang par dia. La dia tanya dong kata, “Orang yang Allah su Angka par Kasi Salamat Manusia tu nanti lahir di mana?” 5Dong bilang kata, “Bapa, Dia lahir di Betlehem di propinsi Yudea. Barang, Allah pung juru bicara satu su tulis bagini,
6‘He, orang-orang Betlehem di tana Yehuda#2:6 Yehuda deng Yudea tu sama sa. Waktu jamang Janji Baru, tana Yehuda tu jadi satu propinsi di karajaang Roma yang nama Yudea. e!
Kamong pung kota tu bukang kota yang paleng seng panting dari kota-kota laeng yang ada di Yehuda.
Barang, dari kamong nanti muncul pamimping satu
yang kalesang Beta pung orang-orang Israel.’ ”#Mika 5:1
7Waktu Herodes dengar bagitu, dia tado-tado panggel orang-orang majus tu biar dia bisa tanya-tanya dong. Dia bilang, “Pas apa tempo kamong dapa lia bintang tu?” La dong bilang akang par dia. 8Abis itu, dia suru dong pi ka Betlehem. Dia bilang, “Pi cari Ana tu bae-bae, la kalo kamong su dapa Dia, kasi tau beta biar beta bisa pi somba Dia lai.”
9Abis dengar apa yang raja bilang tu, dong pi. La bintang yang dong lia kamuka di sabala matahari nai tu bajalang kamuka dong la barenti di atas Ana tu pung tampa tinggal. 10Waktu dong lia bintang tu, dong pung hati paleng sanang. 11Tarus dong maso ka dalang ruma tu, la dong lia Ana tu deng Dia pung mama Maria. Dong tikang lutu somba Ana tu, la buka dong pung tampa taru mas, kamanyaang, deng mur,#2:11 Kamanyaang ni gata pohong yang kalo bakar, akang bobou sadap. Mur ni gata pohong yang orang pake par biking obat deng minya bobou sadap. la kasi hadia-hadia tu par Dia. 12Abis itu, dong pulang ka dong pung negri lewat jalang laeng. Barang, Allah kasi tau dong dalang mimpi kalo dong jang bale par Herodes lai.
Yusuf dong lari ka Mesir
2:13-15
13Waktu orang-orang majus tu pulang, Tuhan pung malekat datang par Yusuf dalang mimpi. Malekat tu bilang, “Yusuf e! Bangong la pi ambe Ana tu deng Dia pung mama la lari ka Mesir. Tinggal di sana sampe beta kasi tau kamong baru kamong bale. Barang, Herodes nanti cari Ana tu par bunu Dia.”
14Jadi Yusuf bangong, la malang itu jua dia ambe Ana tu deng Dia pung mama, la dong lari ka Mesir. 15Dong tinggal di Mesir sampe Herodes mati. Samua tu jadi bagitu biar apa yang Tuhan su bilang dolo lewat Antua pung juru bicara tu jadi. Antua bilang kata,
“Beta panggel Beta pung Ana kaluar dari Mesir.”#Hosea 11:1
Herodes suru orang bunu anana laki-laki di Betlehem
2:16-18
16Waktu Herodes tau kalo orang-orang majus su parlente dia, dia pung dara mandidi paskali. Tarus, dia suru orang par bunu anana laki-laki samua yang ada di Betlehem deng di kampong-kampong yang baku dekat deng akang. Dia suru bunu yang umur dua taong sampe yang baru lahir, tagal dia rekeng umur tu mulai dari orang-orang majus partama kali lia bintang tu. 17Deng bagitu, apa yang Allah pung Juru Bicara Yeremia su bilang tu jadi. Yeremia bilang kata,
18“Ada suara manangis marata sampe mau putus jantong di kota Rama.
Rahel manangis dia pung anana deng seng ada yang bisa buju dia, tagal dia pung anana su seng ada lai.”#Yeremia 31:15
Yusuf dong bale kombali dari Mesir
2:19-23
19Waktu Herodes su mati, Tuhan pung malekat datang par Yusuf di Mesir dalang mimpi la bilang kata, 20“Yusuf e, bangong la ambe Ana tu deng Dia pung mama la bale ka negri Israel, tagal orang-orang yang mau bunu Ana tu samua su mati.” 21Jadi Yusuf bangong, la pi ambe Ana tu deng Dia pung mama, la dong bale ka negri Israel. 22Mar, waktu Yusuf dapa dengar kalo Arkelaus su jadi raja Yudea ganti dia pung bapa Herodes, Yusuf taku bale ka sana. La tagal Tuhan kasi nasehat par dia dalang mimpi, Yusuf dong pi ka propinsi Galilea. 23Sampe di sana, dong tinggal di kampong satu yang nama Nasaret. Samua tu jadi bagitu biar apa yang Allah bilang dolo lewat Antua pung juru-juru bicara tu jadi, kalo orang nanti panggel Ana tu par “orang Nasaret.”#Markus 1:24; Lukas 2:39; Yohanis 1:45
Seçili Olanlar:
Matius 2: ABMA
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2022, Sinode Gereja Protestan Maluku