Kɛɛradzin neè faadziɛ 2

Ŋaablà re Dzia jàaŋ kàràndzin neè tsɛ min niì

1 # Sak 23.15-21; Sdk 16.9-11. Àwà, Dzyèèsìbee mòdzin neè rè jòòn jaa sɛr'lìi na kir'là, ci Pantekɔtsì, tɔ̀ jisee wɔu, Yesù rè kàràndzin neè sapɛ yeè bè e ladzyèè e ladzyèèma bɔrɔɔ rɔn. 2Tɔ̀un, màànkan bla sɔn yeè nà bàràma bo ŋaablaxɔɔ̀ rà, a ci fyɛn bla maànkan. È ni tɔ̀ gbà nìi doùn, màànkaan yè nà tɔ̀ tsyɛn. 3Tɔ̀ waatsi soo ɲàn, yè sàden ì jà, twɛy ni a ci nɛyn. Twɛy nɛyn tsuru sàden nèè yè e tanan tanan tɔ̀un, yè e tsuù tsùù bè è soo sookɔɔn sapɛ tsɛ. 4Tɔ fau min niì, Ŋaablà re Dzi Fɛnɛɛ baraka rɔ̀n, è sa yeè e maa, yè goomaa kun kpɛrɛ goòmàà ì ɲàn, è naà nìi reè tɔ̀ bɔrɔɔ waa.

5Tɔ̀ y'a tàrà Ŋaabla goo ni Dzyèèsìbee mòdzin niì reè vunun tsɛ, è ni dziɲantsiɛ min o min, twɛy giri na ni tɔ̀ bwèy fii rɔ̀n Yerusalɛmùn wɔ̀ɔ̀ doùn. 6Àwà, tɔ̀ màànkan blaa bou min niì, twɛy mòdzin neè giri yè vwɛ̀yn be mɔn, yè bè e ladzyèè jàma brìsi. È bèu wɔ mɔn, y'à jà kàràndzin neè goomaa è soo sookɔɔn sa re kungoòmà ì ɲàn. Àwà, tɔ̀ goò yè è duungoo do fɔ è bè geren. 7È duungoo dòumaà tɔ̀ tsuru, è na tɔ̀ niì myɛ̀ɛn e tor'la, è naà ɲɛɔ̀n à ra waa. Yè dziàn e si ra ci: «Mòdzin niì reè goomakɔɔn yɛ nèe, è sapɛ na Galileka ì rìì gbɛ ? 8Fee to y'à to ɲe yè bà è gooma vu myɛ̀ɛn e soo sookɔɔn sa re kungoòmà ì ɲàn.»

9Twɛy mòdzin neè ɲàn, Paritsika ì na ni, Mɛdzika ì na ni, Elamunka ì na ni. Swey boò Mezopotamin, swey boò Yudè mar'la ɲàn, swey boò Kapadɔsì, swey boò Pɔn, swey boò Azhi jamaan ɲàn. 10Swey boò Firizhi, swey boò Panfili, swey boò Misiran jamaan ɲàn, Libi jamaan gàne nìi reè ni Sirɛnìn wɔ̀ɔ̀ tɛyn, swey boò mɔn, swey yè bà boò Ɔ̀rɔ̀mùn jamaan nɔn. 11Dzyèèsìbee mòdzin ì na ni è ɲan, swey yè bà ni, twɛy dɔɔ̀n Dzyèèsìbee mòdzin neè rè dzinɛɛ ɲàn. Kɛrɛtsika ì na ni ko Àrabu ì. Twɛy mòdzin neè ci: «À baɔ̀ dzùrù nèe mòdzin nee reè yè bà dzia Ŋaablà re kabagoo goo fauma rèè dèe ɲe re kungoòmà rèè ɲàn.» 12È duungoo do ɲaanfaa suun tà goò rè, è naà dèràma tsu rii tɔɔ̀ dɛ waa. Tɔ̀un, yè e maa yè e si teè ci: «Nèe dzuɔn to fee ?» 13Swey y'à bà jirangoo kàràndzin neè mà, yè dziàn ci: «Dɔ̀ɔ̀ rìì nèe rèè kuɔn.»

Piyɛrì waajibia fau min niì

14Àwà, Piyɛrì yè fù tɔ̀ rii ɲàn, à ko kɛɛradzin neè dzyee teeŋ sɔɔn, è dzin jàmaà nà fààn na ci: «Ye Dzyèèsìbee mòdzin neè, ko nìì reè sapɛ yɛ Yerusalɛmùn mìin, ye e toro wɔu'n kuru wube n ne goomaa rè, y'a myɛ̀n cɛyn. 15E maà à siin ci nèe mòdzin nee reè dɔ̀ɔ̀kùnkɔɔn ì, jàci ye y'à kɛ̀sɛɛ̀ nìi tsuru dɛ ! À na tɔ̀ tsuru waa. Mòò na dzia dɔ̀ɔ̀ mìn nèe gbishɛɛ̀mà rèe ɲan, fɔ è bè wɔ à kun mà dɛ ! 16Ŋaablà na nìi deò dan, è bo à re kɛɛra Yòwɛlì dzu, tɔ̀ rii bokɔɔn yɛ e shi tsɛ. À na deò ci:

17 # Ywk 3.1-5. "Goo nìi reè nà fa dziɲaan dò bwey, twɛy rìì siin:

Mun Ŋaabla nà n ne Dzia jàà dziɲantsiɛ doùn mòdzian sapɛ tsɛ.

Tɔ̀un, ye dzin kpir'leè ko ye dzin taan reè nà mun ne kɛɛrabee fa.

Ye re dzunwɛyn neè nà bà jɛ̀y faa,

ye re mòòbɔɔ rèè yè bà sìràn nèè faa,

yè goo rèè jàa twɛy doùn.

18Tɔ̀ jisee kamà, kpiri niì reè ko tàan nìi reè

mun Ŋaablà re kɛɛrabee faa, mun nà n ne Dzia jàà è tsɛ.

19Mun nà kabagoo goo reè swey fa kpadè ŋaablaxɔɔ̀ rà jìran nɔ̀n,

min tàànmàshɛn neè swey kpàdè dzɔn nɔ̀n.

Tsìɛn nà bà ni, sàà ni, sàtsuru yeè bà ni, a ci ŋaamunun.

20Bwèè nà kuu, è tsitsii wɔ, kuɔ̀ yè xè, a ci tsììn.

Tɔ̀ rii sapɛ shɔùn, mùn Tsìfa Ŋaablà raa jisee yè kòmànà wɔ,

tɔ̀ riì jisee bla, à nɔrɔ yè bà wù.

21Tɔ̀ sii sèè, wo mòo o moò nà Tsìfaà tsoo kiri, wo nà tsi."»

22Piyɛrì yè geren goomaa ka kɔn. À ci: «Ye Isirayɛlì mòdzin neè, ye e toro wɔu'n kuru wube, ye n devuà myɛ̀n: Àwà, Nazarɛtsika kpiri Yesù na mòò riì kuru, Ŋaabla tɔ̀ kpàdèu ye ra. Tɔ̀ doùn, è Yesù to ye fi, Ŋaablà y'a ka e re dzibaabe goo niì reè, ko e re kabagoo goo niì reè, ko e re tàànmàshɛn kabagooma niì reè fa kpadèu ye ra, ye na fìriɔ̀ tɔ̀ mà waa. 23#Mat 27.35; Mar 15.24; Luk 23.33; Yux 19.18.Mòdzian y'à wɔ nìi fau ye suun, Ŋaablà na tɔ̀ tɔ̀ bɔrɔɔ è kòrò à ɲan twɛ̀ɛ ka, è bà na e tsiiŋnà à faa rà. Àwà, ye rìì to bàu à wɔbaa rèè mòdzin ì suun, nìì reè na Ŋaablà tɔ waa, twɛy y'à gban gɔɔ̀ rà, y'à vu. 24#Mat 28.5,6; Mar 16.6; Luk 24.5.Ŋà, Ŋaablà y'a fau è sèè kpunan, è bo saàn byɛnbee ɲàn. Tɔ fau, kàtsu saàn fa ni dzi à mà ɲinan to e raa dzia doùn waa. 25#Zab 16.8-11.Tà doùn, màsà kpiri Dawudà na wò rii gooma deò dan e re Kìtaabuà doùn nèe tsuru ci:

"Kudɛyn, mun jaa na ni mùn Tsìfaà rà n biìn.

À ni mun tɛyn, è bà wɔɔ̀ mun na, sànko

ge mà mun bo n shɔùn waa.

26Tɔ̀ rii y'à to, mun taama dzi,

mun goomakɔɔn sapɛ yeè bà taamadzibe vu bokɔɔn.

Mun ɲɛɔ̀n à ra, ci arì mun saàn shɔ̀ùn,

mun màà nà bà ni jaancin na.

27Mun ɲɛɔ̀n tɔ̀ ra, kàtsu,

wo na naà mun to fùn nèè fi waa.

Ɔ̀ɔɔn, wo fa à to wo re mòdzìn fɛnɛɛ

yè fyee kɔ̀ɔ̀ doùn waa.

28Àwà, shi niì bèe jaamabee rà, wo tɔ̀ kpàdèu mun na.

Wo nà bà ni mun ka nìi fa,

tɔ nà mun ɲantsyɛn taamadzibeè rà."»

29Tà shɔ̀ùn, Piyɛrì yè sɔn ba e re goomaa tɛ̀y kɔn ci: «N neema ì, y'a to min gooma soo de fyɛ e ra. Nìi ɲe re bɔɔ màsà kpiri Dawudà, tɔ saun, à fun yè wɔ. Arì she, à kɔ̀ɔ̀ sa ni mùn ne mìin ŋe. 30#Zab 132.11; Sak2 7.12,13.Màsà kpiri Dawudà bàu Ŋaablà re kɛɛra. À na à tɔ̀ sa, ci Ŋaabla làyiri seòn wò re nìi doùn à ci, sii sɔn see, wo nà à tsua dziàn sɔn tsuù à shɔ̀ùn, à re màsà gbaaniɛn tsɛ. 31Sani Ŋaablà Jaara Modzìàn yè san, è kòmànà sèè kpunan, Ŋaablà baraka rɔ̀n, màsà kpiri Dawudà na tɔ̀ tɔ̀ tsùuŋnà nòn. Tɔ̀ rii y'à to, è bà na à deò nèe tsuru ci, Ŋaablà fa à to, è to fùn nèè fi waa. Tà ko, à fa à to è fyee kɔ̀ɔ̀ doùn mɔn waa. 32Nìi Yesù, Ŋaablà y'a sèè kpunan bou saàn ɲàn, mùn sapɛ tɔ̀ goò jàu e jaadzin fiɛ̀ ka. 33È sèè è blà wɔ à ɲan, à y'à tsùù e sirama si jaa rè. Yesù na Dzi Fɛnɛɛ riì làyiri seòn ɲe re, à fà Ŋaabla tɔ̀ sìun à ra. Àwà, à sa tɔ̀ Dzia rìì jàaŋnà ɲe tsɛ. Ye jaa yɛ nìi rà, ye yè bà à myɛ̀ɛn, tɔ tɔ̀ Dzia tàànmàshɛɛn nì. 34#Zab 110.1.Nìi màsà kpiri Dawudà yɛ̀r'la, à na teyn be ŋaablaxɔɔ̀ doùn dɛ, ŋà, à dziun nèe tsuru ci:

"Mùn Tsìfa Ŋaabla dziun mun Tsìfaà rà ci:

Nà a tsuù n sirama si jaa rè,

35fɔ min b'à ɲan rèè sapɛ wɔ a san dzuun."»

36Piyɛrì yè geren goomaa ka kɔn ci: «Tà doùn, ye Dzyèèsìbee Mòdzin neè sapɛ wù y'a tɔ̀, ye yè ɲɛn à ra cɛyn, ci ye tɔ̀ Yesù nìi gbaun gɔɔ̀ rà, Ŋaablà wò rii bou e Jaara Modzìn, à y'à bà Tsìfaà.»

37Àwà, nìì reè na ni mɔn, tɔ̀ goomaa myɛ̀unmaà twɛy rè, è dɔ̀n è ɲan fɔ è bè geren. Yè Piyɛrì ko kɛɛradzin dzyee reè tey tɔ̀un ci: «Mùn neema ì, ɲe nà fee rìì fa sa ?» 38Piyɛrì yè dzin è ra ci: «Ye sèè bo e re gooɲaan neè kpɛyn, ye e re jaamabee fau'n kur'la lakere, y'a to yè e jaara foò Ŋaablà re shia goo rèè rà Ŋaablà Jaara Moo Yesù tsoò ka, e re gooɲaan tsìɛ̀ yè mɛɛy bo e vu ra. Tɔ̀ ye fa, Ŋaablà re Dzi Fɛnɛɛ nà jàà ye tsɛ, 39kàtsu Ŋaabla tɔ̀ Dzia làyiri seun ye ko e re dziin nèè sa rii laa. À y'à seun sa gànè dàn gbààn dzian sapɛ re, mùn Tsìfa Ŋaabla nà twɛy nìi reè sapɛ kir'na e yɛr'la.»

40Àwà, Piyɛrì yè gooma giri kpɛ̀rɛ̀kuru ì dè è ra, à nà dzi è dzuun nìi reè ka, è màxɔ̀n. Tà doùn, à ci: «Ye e san bo she raa mòdzin ɲan reè sààn, sànko ye tsi.» 41Nìì reè na ni mɔn, twɛy giri yè e tsiì Piyɛrì rè goomaa nà, y'à to yè ye jaara foò Ŋaablà re shia goo rèè rà ko yuà ka. Tɔ̀ sii sèè, mòkun gbaa zhììgi rii yè e bau Yesù rè kàràndzin neè tɛ̀y.

Kàràndzin neè rè dzyèè

42È sen tɔ̀ jisee rà, twɛy yè e jaa tsùù kɛɛradzin neè rè kàr'nà rè. Yè dzyèè, yè e re jaamabee faa esire, a ci tseyn ko tsìnà tsuru. È bur'la tan'nà e ko e si fi, a ci Yesù y'à dèu nìi tsuru, yè bà Ŋaablà mafyɛ̀ɛn esire. 43Mòdzian sapɛ ɲɛyn na shɛɔn Ŋaablà jɔun, kàtsu kɛɛradzin neè na kabagoo goo giri ko goo blà bla giri faa Ŋaablà baraka rɔ̀n. 44#Kɛf 4.32-35.Yesù rè kàràndzin neè sapɛ na byɛɔ̀n soo ma, yè e suun ge reè bà e si raa, y'à tan'nà e si fi. 45È sa na e suun ge reè seen, à bàu gè o ge rìì, y'à gɔɔ, y'à ɲɛɛn tanan e si ra, è sa ŋoòma tsyeè raa. 46È sapɛ na byɛɔ̀n à mà, yè e si ladzyee sii sa see Ŋaablà re gbà blàa rà. È na bèe e si re tsii, bur'la, yè tɔ̀ tanan e si ra, a ci Yesù y'à deò nìi tsuru, yè ɲwɛyn fa e si re taamadzibe ko duun fyɛ ka. 47Kudɛyn, è na tsoo dzi ɲɛɛn Ŋaablà tsɛ, è goo to na dzi mòdzian sapɛ ra. Sii sa see, Tsìfaà na mòdzin tsiuma rèè bàa è kur'la tɛ̀y.

Seçili Olanlar:

Kɛɛradzin neè faadziɛ 2: BDZU

Vurgu

Paylaş

Kopyala

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

Bible Dzùùngoo Unicode Hakkında Daha Fazlasını Öğrenin