Kɛɛradzin neè faadziɛ 3

Piyɛrì ko Yùxanà nìi fau Ŋaablà re gbà blàa rà

1Àyìwà, sii sɔn see ɲɛ̀rɛɛ̀ rà, è dɛ̀rɔɔ̀n yè Ŋaablà blabee waatsi riì ɲàn, Piyɛrì ko Yùxanà yè fù, yè dɔ̀n be Ŋaablà re gbà blàa rà esire. 2Dɔ̀nmàdzii sɔn na ni Ŋaablà re gbà blàa fɔɔn nà, yè bà tɔ̀ kir'là ci Dzii Wùɔ. Mùrùkù kpiri sɔn sa na ni wɔ̀ɔ̀ doùn, tɔ̀ yeè bà kereo e raa mùrùkùbee ka. Jisee sapɛ, è tɔ̀ mùrùkù kpir'là sen be tsùɔ Ŋaablà re gbà blàa fɔɔn Dzii Wùɔ rà, sànko mòdzian ye ba dɔ̀ɔn, è dzi fyɛ̀yn faa è re. 3Nèe sii sèè, yè nà bè à tsùù mɔn nɔn. Àwà, Piyɛrì ko Yùxanà nàu ci ye nà dɔ̀n, mùrùkù kpir'là yè è jà. È jàu min niì, è ɲɛyn fyɛn è re. 4Tɔ̀un, Piyɛrì ko Yùxanà sa yeè e jaà gban to à ra, y'à siɛ̀n. Piyɛrì yè dzin à ra ci: «Mùn siin.» 5Mùrùkù kpir'là yè e jaà gban to è ra, à duungoo ma, è nà gèè sɔn ni sìn wò ra. 6Piyɛrì yè dzin à ra tɔ̀ rii ɲàn ci: «Warifyɛ na ni mun ne, sɛnu tsu to na ni mun ne waa. Ŋà, nìi ni mun ne, mun nà tɔ̀ sìn wo ra. Nazarɛtsika kpiri Ŋaablà Jaara Moo Yesù tsoò baraka rɔ̀n, fù e jìì !»

7Piyɛrì tɔ̀ dèu min niì, è kpir'la kun e sirama sia rà, è wɔ à ra, è fù. Tɔ̀ nɔ̀nkɔɔrɔn ko e sa, mùrùkù kpir'là sàn nèè ko sànvukɔrɔun neè sa yeè fààn tarà. 8Tɔ̀un, è tsyɛn fù jaa soo, è tsiì e san nèè tsɛ, è maa è jìɛ. È dɔ̀n Piyɛrì ko Yùxanà ka Ŋaablà re gbà blàa fɔɔn doùn. Tɔ̀ sapɛ ɲan, à jìì jìɛ, è tsyɛn tsyɛɛ̀n taamadzibeè rè, è tsoo dzi ɲɛɛn Ŋaablà tsɛ. 9Mòdzian sapɛ y'a jà tɔ̀ jìì jìɛ̀ rà, è bà tsoo dzi ɲɛɛn Ŋaablà tsɛ. 10È sapɛ y'a jà, ci mùrùkù kpir'lìi na bàa tsùuŋnà kudɛyn Ŋaablà re gbà blàa Dzii Wùɔ rà, è bà fyɛ̀ɛn faa, ci à wò rii taki. À bàu nìi tsuru kpir'la yè dzi jiì, tɔ jiu è sapɛ dzii tsɛ, à yè è duungoo do, fɔ è bè geren.

11Tɔ̀un, kpir'la yè e gban tsùù Piyɛrì ko Yùxanà nà. Mòdzian tɔ̀ jà nìi fau, è duungoo douma yè vwɛ̀yn be, yè bè e kuru è tɛyn Ŋaablà re gbà blàa fɔɔn fààkɔ̀r'la sɔn doùn, yè bà tɔ̀ kir'là, ci màsa Sɔ̀ɔ̀mɛyn naa fààkɔ̀r'laà. 12Piyɛrì jàmaà jàu min niì, è dzin è ra ci: «Isirayɛlì mòdzin ì, fee bèe à to nèe goo fauma rèe yè ye duungoo do ? Fee y'à too ye yè bà ɲe siin too nèe tsuru ? Y'a kɛ̀sɛɛ̀ ci ɲe yɛ̀r'la raa dzi rii y'à too kpir'lee yè dzi jiì gbɛ ? Tàà ɲe yè e shi nìi faɔ̀ Ŋaablà ra, ci à tɔ̀ rii gbɛ ? À na tɔ̀ dɛ. 13#Jdk 3.15.Ŋà, Ibraximà rè Ŋaablà ko Ishakà rè Ŋaablà ko Yàkubà rè Ŋaablà, ɲe fàbɔɔ rèè rè Ŋaablàa, tɔ̀ rii yè e re faagoofadzin Yesù blàbee kpàdeò nèe goo rèe ka. Ye wò rii wɔu fàan suun, ci à y'à vu. Pilatsì sàò to na ni à re, wò y'a bàji. Ŋà, ye yè e nɔun à re Pilatsì jaa ra, ci ye na à tɔ̀ waa. 14#Mat 27.15-23; Mar 15.6-14; Luk 23.13-23; Yux 19.12-15.Ɔ̀ɔn, ye yè e nɔun mòdzìn fɛnɛ tereonmaà rè, ye y'à gaa ci yè mòdzìnvubaà rìì bo bàji. 15Ye tɔ̀ niì fau, ye jaamabee kùntsiɛ̀ rìì vuu tɔ̀ tsuru. Ŋà, Ŋaablà y'a kpunan bou fùn nèè fi. Mùn sapɛ tɔ̀ jàu e jaadzin fiɛ̀ ka. 16Ye jaa yɛ nèe kpir'liì rà nèe, è bà fù tsìiŋnà, ye y'à tɔ̀. Ɲe ɲɛn niì faɔ̀ Yesù rà, tɔ̀ tsoò baraka rɔ̀n nì, kpir'lee dziu fù è tsiì. Àwà, e ɲɛn Yesù rà, tɔ̀ tsoò barakaà rìì nèe kpir'lee cɛrɛmabeu gbereyn gbereyn nèe tsuru. Tɔ fau ye sapɛ jaa ra.

17Tà doùn, n neema ì, ye ko e kuntsii rèè nèe goo rèe faa Yesù rà waatsi riì bwèy, ye naà à tɔ̀, ye nìi faa waa. 18Ŋaablà na nìi deò dan, è bo à re kɛɛra reè sapɛ dzu, ci wò Jaara Modzìàn wù è byɛn, àwà, à yɛ tɔ̀ rii boo e shi tsɛ nèe. 19Dòònuùn, ye sèè bo e re gooɲaan neè kpɛyn, ye e re jaamabee fau'n kur'la lakere, ye sèè na Ŋaablà ra, sànko e re gooɲaan tsìɛ̀ yè mɛɛy bo e vu ra. 20Tɔ̀ tsuru, mùn Tsìfa Ŋaabla nà waatsi fyanbe ye re, ye yè bà ni xɛɛrɛ ɲan. À na e Jaara Modzìn nìi sa layiri seòn ye re, tɔ̀ yeè bà Yesù, è tɔ̀ sa ka na ye re. 21Àwà, sani tɔ̀ yeè fa, à wù Yesù yè to mɔn jìrànxɔɔ̀ doùn ŋe, fɔ jisee riì, goò sapɛ nà e lakere è bà yeu, a ci Ŋaablà na à deò nìi tsuru dan, è bo à re kɛɛra fɛnɛ reè dzu. 22#Sdk 18.15,18.Ŋaablà re kɛɛra Musà na à deò Yesù rè goò ɲàn nèe tsuru ci:

"Mùn Tsìfaà, nìi ye re Ŋaablà,

tɔ nà mun tsuru kɛɛra baji na,

è bo ye neema saan ɲàn.

À ye na nà, è gè o ge dè e ra, ye e toro wɔ à re.

23 # Sdk 18.19. Mòò o moò ma tɔ̀ kɛɛraa dzugoomaa blàbe,

tɔ nà bo Dzyèèsìbee mòò rèè ɲàn, è vu."»

24Piyɛrì yè geren goomaa ka kɔn ci: «Kɛɛra niì reè sapɛ gooma dɔun dan, è sen Samuyɛlì rà, ko nìì reè sapɛ nàu tà shɔ̀ùn, mùn yɛ bwèy rìi ɲàn a ci she, twɛy sapɛ tɔ̀ bwèè gooma deu. 25#Gok 22.18.Ŋaabla làyir'lìi seun è bo kɛɛra reè dzu, tɔ seun ye rìì lè. À to dzyèèsìbe niì wɔu ko mùn fàbɔɔ rèè ka, ye sa nin ni tɔ̀ ɲan. À na tɔ̀ rii deò Ibraximà nà nèe tsuru ci: "Wo tsua dzin nèè baraka rɔ̀n, dzɔ̀nxɔɔmaà tsɛ mòdzian sapɛ nà dzwɛ tàrà." 26Àwà, a y'a jà Ŋaablà yeè e re faagoofadzin Yesù bàji na, à tɔ̀ fau ye rìì jɔ̀na re ŋe. À y'à ka nau, è nà bà dzwɛ ye mà, ye mòò sɔ̀n sɔ̀nkɔɔn sa yeè sèè bo e re gooɲaan fakɔɔn kpɛyn.»

Seçili Olanlar:

Kɛɛradzin neè faadziɛ 3: BDZU

Vurgu

Paylaş

Kopyala