Yùxanà 16

1Àyìwà, mun tɔ̀ sapɛ deu ye ra rii, sànko, ye ɲɛn niì faɔ̀ Ŋaablà ra, gèsɔn pɛn mà dzi ye kùnàn ban, ye yè bo tɔ̀ tsɛ waa 2Nìi ŋaablabegba rèè, è nà ye kaa twɛy tsɛ. Waatsi to yè bà nàa waatsi ra, nìì reè ye vua, twɛy nà bà à siɛ̀n, ci ye Ŋaablà blabee rìì tɔ̀ tsuru. 3È nà twɛy goo rèè sapɛ fa, kàtsu, è na Fà Ŋaablà tɔ jà, è to na mun tsu tɔ jà. 4Àwà, mun tɔ̀ dè tsùuŋnà ye ra rii, sànko à fa waatsi ye na wɔ è re, ye bà à tɔ̀, ci mun na à dè tsùuŋnà ye ra. Mun na à gooma de ye ra fɔ goo rèè dzunjɔn bwèy waa, kàtsu mun na ni ye ka ŋe.

5Dòònuùn, mòò riì mun ka nau, mun nà bè tɔ̀ re, ye pɛn to fa mun tey, ci wo bèe min ? 6Ŋà, mun tɔ̀ dèu ye ra nìi fa, tɔ̀ kamà ye taama ŋununbeò fɔ è bè geren. 7Tɔ̀ to y'à tàrà, mun to nà sààben ni dè ye ra gbɛ. Min bè, tɔ̀ rii fyan ye mà. Mun ma be fyeu, Dzwɛ̀mabaà fa nà ye re waa. Ŋà, mun ye be tɔ̀un, mun nà à ka na ye re.

8Tɔ̀ Dzwɛ̀mabaà ye na nà waatsi riì bwèy, à nà à kpàdè dziɲan modzian nà, ci nìi gooɲaantsiɛ raa goò ko goo tereonmaà raa goò ko Ŋaablà re kitsia raa goò, è fìriɔ̀ twɛy kàjaa tsɛ. 9Ɔ̀ɔn, à nà à kpàdè dziɲan modzian nà, ci è fìriɔ̀ gooɲaantsiɛ kàjaa tsɛ, kàtsu, è na ɲɛn mun na waa. 10À y'à kpàdè è ra, ci è fìriɔ̀ goo tereonmaà raa goò kàjaa tsɛ, kàtsu mun bèe Fà Ŋaablà re, ye to fa mun jà dɛ. 11Yè bà fìriɔ̀ Ŋaablà re kitsia raa goò kàjaa tsɛ, kàtsu, nìi Sùtana dziɲan ree kùntsiɛ̀, kitsia mɛrɔun tɔ̀ tsɛ nòn.

12Goo giri ni arì she, mun y'à dè ye ra, ŋà, ye fa dzi è dzuun dòònuùn ŋe waa. 13Àwà, Ŋaablà re Dzi saàbèntsià ye na nà waatsi riì bwèy, à nà ye jaa ji sààbeen ko e kur'la sapɛ ra. À re goomaa pɛn na naà bo à yɛ̀r'la ɲàn waa. Ŋà, à nà bà nìi myɛɔ̀n, à nà tɔ̀ rii dè, è ye toro kɔ̀ goo nànàma rèè sa ra. 14À nà mun blàbee kpàdè, kàtsu, à nà nìi tàrà bo mun ne, à nà ye toro kɔ̀ tɔ̀ rii là. 15Gè o ge mun Fà Ŋaablà raa, tɔ mun sa raa rìì. Tɔ̀ rii kamà, mun ci Dzwɛ̀mabaà nà nìi tàrà bo mun ne, à nà ye toro kɔ̀ tɔ̀ ra.»

Yesù gooma niì dèu à re kàràndzin neè na à dzuɔn jà waa

16Tà shɔ̀ùn, è dzin e re kàràndzin neè rà kɔn ci: «Sani dɛyn, ye jaa fa ɲɛn mun mà dɛ, dɛ̀ɛnin tà shɔ̀ùn kɔn, ye nà mun sèè jà.»

17Kàràndzin neè tɔ̀ goomaa myɛ̀un, swey yè e si tey è ɲan tɔ̀un ci: «À sàò yeè bà n'a re, è fee dè ɲe ra nèe gooma ree ka: "Sani dɛyn, ye jaa fa ɲɛn mun mà dɛ, dɛ̀ɛnin tà shɔ̀ùn kɔn, ye nà mun sèè jà." À to dzin nìi fau ci: "Mun bèe Fà Ŋaablà re", tɔ̀ sa dzuɔn yè bà fee ?»

18Yè dzin kɔn ci: «Sani dɛyn nèe, tɔ̀ dzuɔn yè bà fee ? À nìi dèe ɲe akiri na tɔ̀ jaɔ̀ dɛ.»

19Yesù y'à jà, ci è sào n'a re, yè wò tey. Tà doùn, è dzin è ra ci: «Mun dzin nìi fau ci sani dɛyn, ye jaa fa ɲɛn mun mà dɛ, dɛ̀ɛnin tà shɔ̀ùn kɔn, ye nà mun sèè jà. Ye yè e si teè tɔ̀ goomaa dzuɔn nì mà ɔ̀n ? 20Sààben fyan, mun nì ci e ra, ye nà gɛyn, ye yè e màtsùrùkɔ̀ɔ̀n fa beè, tɔ̀ to y'à tàrà, dziɲan ree mòdzin neè taama nà bà dzi cɛyn. Ye kpɛ̀yn taama nà bà ŋunun, ŋà, ye re taamaŋununbeè nà e lakere ba taamadzibe. 21Taàn ye ba dziɛ̀n ker'là waatsi riì bwèy, à taama bàa ŋunun ɲìnìnbee rè, kàtsu tɔ̀ waatsi bàa wɔɔ. Ŋà, à ye dzi kere dò min niì, taamadzibeè suun, à taamyɛ̀un tɔ̀ sapɛ re, kàtsu, à mòò kere jiu dziɲaan doùn. 22Tɔ̀ soo tsuru, ye sa taama ŋunun dòònuùn, ŋà, mun nà ye sèè jà kɔn yeu. Tà doùn, ye taama nà dzibe cɛyn, mòò to fa dzi tɔ̀ taamadzibeè bo ye ɲan waa.

Yesù goomaa fyɛu e re kàràndzin neè rà min niì

23Àwà, tɔ̀ jisee ye wɔ, ye fa mun tey goo sɔn pɛn mà dɛ. Sààben fyan, mun nì ci e ra, ye ye gè o ge gaa Fà Ŋaablà re mun tsoo ka, à nà tɔ̀ sìn ye ra. 24Arì she, ye na gèsɔn pɛn gaa mun tsoo ka ŋe waa. Y'a gaa, ye nà à tàrà. Tà tsuru e re taamadzibeè yè bà taamadzibe dziitsyɛunma.

25Àwà, mun tɔ̀ sapɛ deu ye ra gooma bɔɔ ì rìì ka. Ŋà, waatsi nàa waatsi ra, mun na naà gooma ye ka gooma bɔɔ ì ɲàn dɛ. Goo o goo ni Fà Ŋaablà re goò ɲàn, mun nà à sapɛ de fyɛ ye ra. 26Tɔ̀ jisee ye wɔ, ye nà gè o ge gaa Fà Ŋaablà re, ye nà à gaa mun tsoo ka. Mun to na dzin ye ra, ci mun nì nà gè gaa à re ye kɔ̀ waa, 27kàtsu, Fà Ŋaablà yɛr'la ye kɛ̀niɔ̀n. À ye kɛ̀niɔ̀n, kàtsu ye mun kɛ̀niɔ̀n, ye to ɲɛun à ra ci mun daɔn min bo wò rii lè. 28À sààben ni, mun boo Fà Ŋaablà rii lè, mun yè nà dziɲan na, mun to nà bo dziɲan na dòònuùn, mun yè bè Fà Ŋaablà re.»

29Kàràndzin neè yè dzin à ra tɔ̀un ci: «Dòònuùn kpɛ̀yn, wo goomaa fyɛ dèe ɲe ra, wo na goomaa ɲe ka gooma bɔɔ ɲan dɛ. 30Dòònuùn, ɲe y'à tɔ̀u, ci wo goo sapɛ tɔ, à to na wɔɔ̀, mòò yè wo tey goo mà dɛ, kàtsu, goo rìi ni mòò duùn, tɔ̀ na mɛnɛɔn wo mà waa. Tà kamà, ɲe ɲɛɔ̀n à ra, ci wo daɔn, wo yè bo Ŋaablà re.»

31Yesù yè dzin è ra tɔ̀un ci: «Dòònuùn nì ye ɲɛun à ra kɛ ? 32Àwà, waatsi nàa waatsi ra, è bà wɔɔ nòn sa, ye sa nà jee e jaaterema ka, ye yè mun soo to. Ŋà, à na mun soo waa, kàtsu Fà Ŋaabla ni mun ka. 33Àwà, mun tɔ̀ dèu ye ra rii, sànko ye yè jaancin tàrà, è ye to mun ɲan. Ye nà e byɛɛn goo giri jà dziɲan doùn, ŋà, ye e maxɔbe, kàtsu, mun dziu dziɲan gooɲaan nà nòn.»

Seçili Olanlar:

Yùxanà 16: BDZU

Vurgu

Paylaş

Kopyala

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

Bible Dzùùngoo Unicode Hakkında Daha Fazlasını Öğrenin

Yùxanà 16

Yùxanà 16
Popüler Kutsal Kitap Ayetleri

Kutsal Kitap:

Dzùùngoo

Çeviri: Bible Dzùùngoo Unicode - BDZU

Yùxanà 16

Yùxanà 16

Yùxanà 16 Popüler Kutsal Kitap Ayetleri

Kutsal Kitap:

Dzùùngoo

Çeviri: Bible Dzùùngoo Unicode - BDZU

Yùxanà 16

Yùxanà 16
Popüler Kutsal Kitap Ayetleri