Yùxanà 18
18
È Yesù kuun min niì
(Matsiyù 26.47-56; Marikì 14.43-50; Lukì 22.47-53)
1Àyìwà, Yesù Ŋaablà mafyɛ̀n dòu tà tsuru waatsi riì bwèy, è bo mɔn à ko e re kàràndzin neè yè bè don sɔn kɛyn, tɔ kir'là Sedɔrɔn doon. Tɔ̀ gàne rɔ̀n, gɔ̀ɔ̀ gane lamɔ̀nɔunma wùù sɔn na ni. Àwà, à ko e re kàràndzin neè yè bè dɔ̀n mɔn.
2Yudasì, tɔ̀ niì ni Yesù jàànfaà rà, tɔ̀ sa na tɔ̀ gàneè kpàtɔ̀, kàtsu Yesù na dɛ̀rɔɔ̀n è bèe è ka mɔn. 3Yesù ko e re kàràndzin neè ni tɔ̀ gàne rɔ̀n, Yudasì, tà ko kaadzin kuru sɔn yeè nà e kungɔ bo mɔn, Ŋaablà re gbà blàa kplatsuubaa rèè swey sa na ni è ka. Saaka Jɔundzin neè, ko Faridziɲɛn rèè rìì na twɛy ka naɔ è bà Yudasì tɛ̀y. È ci e ye nà bo, fìtsina rèè, ko kaan deunma rèè, ko màràmàge rèè rìì na ni è suun.
4Goo nìi sapɛ nà Yesù tàrà, à na tɔ̀ tɔ̀ tsùù nòn. Tà doùn è kpɛrɛ̀ na è ra, è tey ci: «Ye tsì rii gaa ?»
5Yè dzin à ra ci: «Ɲe Nazarɛtsika kpiri Yesù rìì gaa.»
È dzin è ra ci: «À mun nì.»
Tɔ̀ y'a tàrà, Yudasì, tɔ̀ niì ni à jàànfaà rà, tɔ̀ sa ni è ɲan. 6Àwà, Yesù dziu dzin min niì, ci à wò rii, è sapɛ yeè bè e bonè, yè mɛɛy dzɔn nɔ̀n. 7Yesù yè è tey kɔn ci: «Ye tsì rii gaa ?»
Yè dzin ci: «Ɲe Nazarɛtsika kpiri Yesù rìì gaa.»
8È dzin è ra ci: «Mun na dzin ye ra nòn, ci à mun nì ɔ̀ ? È ba mun nì gaakɔɔn, ye nèe rèè to mɔn yè bèe.»
9Tɔ̀un, à re gooma deuma sɔn yeè bo e shi tsɛ, nìi yɛ nèe ci: «Wo nìì reè sapɛ kɛɛ̀yfau mun mà, twɛy sɔn na firì mun suun waa.»
10Àwà, kaamunun nìi ni Shimɔn Piyɛr'lè, tɔ̀ yeè tɔ̀ sɔ̀ɔ̀n bo e taàn doùn. À y'à sɔ̀ɔ̀n bou, Saaka Jɔundzin blaa rè faagoofadzian raa sirama si jaa re tor'là, è tɔ̀ sen bo mɔn caù. Tɔ̀ faagoofadzian tsoo na Malakusì. 11#Mat 26.39; Mar 14.36; Luk 22.42.Yesù yè dzin Piyɛr'là tɔ̀un ci: «A re kaamun'nà sèè wɔ e taàn doùn. Mun Fàà ci byɛnbe riì yè mun tàrà, tɔ̀ na wù è mun tàrà gbɛ ?»
12Tɔ̀un, kaadzin kur'là mòdzin neè ko e kuntsiɛ̀ ko Ŋaablà re gbà blàa kplatsuubaa rèè yè Yesù kun, y'à shì. 13Àwà, yè b'a ka Anì jɔ̀na re. Anì na Kàyifè blan kpiri, tɔ̀ niì na Saaka Jɔundzin blaa tɔ̀ jiɛ rà. 14#Yux 11.49,50.Kàyifè, wò rii na Dzyèèsìbee mòdzin neè jɔundzin neè latsiɔ̀ nèe gooma ree ka nìi yɛ ci: «Nìi fyan, mòò sɔ̀n dzin soo yeè san mòdzian sapɛ tsɔsaan ɲàn.»
È bèu Yesù ka Saaka Jɔundzin bla Anì nè min niì
(Matsiyù 26.69-70; Marikì 14.66-68; Lukì 22.55-57)
15È bèkɔɔn Yesù ka, Shimɔn Piyɛrì ko kàràndzian sɔn na gbaɔn Yesù kpɛyn. Tɔ̀ kàràndzian na Saaka Jɔundzin blaa tɔ̀baa. Tɔ̀un, à sa yeè dɔ̀n Yesù ka Saaka Jɔundzin bla bɔrɔɔ rè fɔɔn doùn. 16Nìi Piyɛrì, tɔ̀ yeè to fɔɔn dziɛ rà da rɔ̀n. Tɔ̀un, kàràndzin niì Saaka Jɔundzin blaa tɔ̀baa, tɔ̀ yeè bo na. À bo nau, tàan nìi dziɛ̀ kplatsuɔ, è nà gooma tɔ̀ ka, è Piyɛrì dɔ̀n fɔɔn doùn. 17Piyɛrì dɔ̀nkɔɔn, tɔ̀ faagoofadzin taan nìi fɔɔn dziɛ kplatsuɔ, tɔ̀ yeè dzin à ra ci: «Wo sa na kpir'lee re kàràndzin neè sɔn ni fyeu ɔ ?» À ci: «Mun na è sɔn waa.»
18Mùnkɛɛ̀ na ni nìi fa, tɔ̀ kamà faagoofadzin neè ko kaadzin neè na sàtsììn sa sɔn wɔɔ, yè bà tɔ̀ laguruɔ̀, yè e ma gɔ̀r'la. Piyɛrì sa na tsìiŋnà è ka mɔn, è bà e ma gɔ̀r'la.
19Tɔ̀un, nìi Yesù rè kàràndzin neè, tà ko à mòdzian kàr'na goo nìì reè tsɛ, Saaka Jɔundzin bla Anì yè Yesù tey twɛy goo rèè mà. 20Yesù yè dzin à ra ci: «Mun gooma niì sapɛ deu mòdzian jaa ra, mun na à pɛn dè mɛnɛn doùn waa. Kudɛyn, mun na mòdzian kàr'na ŋaablabegba rèè doùn, min bà è kàr'na Ŋaablà re gbà blàa rà, Dzyèèsìbee mòdzin neè sapɛ yeè e ladzyèe twɛy gàne nìì reè ɲàn. Mun na gèsɔn pɛn dè gòndo ɲan waa. 21Feera, wo yè bà mun teè ? Nìì reè mun lamyɛun, mun nìi dèu, twɛy tey tɔ̀ mà. Mun nìi dèu è ra, y'à jaa tɔ̀.»
22Yesù tɔ̀ goomaa dèu min niì, Ŋaablà re gbà blàa kplatsuubaa rèè mòò sɔn nìi tsìiŋnà à tɛyn, tɔ̀ y'a dɔrɔ e taàkuùn, è dzin à ra ci: «Tɔ Saaka Jɔundzin blaa rè goomaa latsiu'n kur'la rìì wo re o ?»
23Yesù yè dzin à ra ci: «Min ba gooma ɲaan ni deò, à ɲaanbemaà nìi, tɔ̀ kpàdè. Mun to ye ba wùù rii deò, fee mun ban kun wo re ?»
24Tɔ̀un, Yesù si rèè shì tsùuŋmaà, Anì y'à bàji be Kàyifè rè, Saaka Jɔundzin bla yee.
25Tɔ̀ y'a tàrà, Shimɔn Piyɛrì ni fɔɔn doùn, à sàà mà gɔ̀r'la. Tɔ̀un, sɔn y'a tey ci: «Wo sa na kpir'lee re kàràndzin neè sɔn ni ɔ̀n ?» Ŋà, Piyɛrì yè e sɔswɛy ci: «Ayi, mun na è sɔn dɛ.»
26Àwà, Piyɛrì kpir'liì toro sɔn kùnùn bou, tɔ̀ kpir'la raa neema kpiri sɔn na ni mɔn. Tɔ̀ sa na Saaka Jɔundzin blaa raa jòòn sɔn. È dzin Piyɛr'là ci: «Mun na wo jà à ka gɔ̀ɔ̀ gane lamɔ̀nɔunma wùù ree ɲan ɔn ?»
27Ŋà, Piyɛrì yè e sɔswɛy kɔn, ci à na wò waa. Tɔ̀ nɔ̀nkɔɔrɔn ko e sa, tsɛ̀ken sɔn yeè ben.
È bèu Yesù ka Pilatsì rè min niì, è kitsi
(Matsiyù 27.1-2; 27.11-31; Marikì 15.1-20; Lukì 23.1-5,13-25)
28Tà shɔ̀ùn, yè bo ko Yesù ka Kàyifè rè. Ɔ̀rɔ̀mùnkà kpiri jàmààntsi rìi tsoo ci Pilatsì, yè b'a ka tɔ̀ re jàmààntsì gbaà doùn. Tɔ fau gbishɛɛ̀mà mur'lɔùn nì. Nìi Dzyèèsìbee mòdzin neè jɔundzin neè, twɛy na e tsiì yè dɔ̀n jàmààntsì gbaà doùn waa, kàtsu y'à jàu, ci ye ye e gbiiman kun kpɛrɛ mòdzin neè ɲàn, tɔ nà ye noo, ye fa dzi Geren n tsɛɛ̀ sɛr'là ɲwɛɛ̀n ɲɔn waa. 29Tɔ̀ kamà, jàmààntsi Pilatsì yè bo na è kpà da rɔ̀n, è tey ci: «Fee soo ye jàà kun kpir'lee ra ?»
30Yè dzin à ra ci: «Kpir'lee ma ba na gooɲaanfabaa fyeu, ɲe fa à wɔ wo suun do.»
31Pilatsì yè dzin è ra ci: «Ye yɛ̀r'leè yè bè à ka, ye bè kitsia kùnùn à tsɛ, è bè ye re sàrìyà shià tsɛ.» Yè dzin ci: «À shi na ni ɲe suun, ɲe yè mòò kitsi, ci è vu waa.»
32 #
Yux 3.14; 12.32. Yesù na nà san saun'n kur'liì rà, à gooma niì deò tà goò tsɛ, nèe sapɛ fau, sànko tɔ̀ goomaa yè bo e shi tsɛ. 33Tɔ̀un, Pilatsì yè dɔ̀n jàmààntsì gbaà doùn kɔn, à yè Yesù kir'na, à y'à tey ci: «Wo rìì Dzyèèsìbee mòdzin neè rè màsà kpir'là ɔ̀ ?»
34Yesù yè dzin ci: «Wo yɛ̀r'la rìì tɔ̀ kɛ̀sɛɔ wo y'à dè ràà, tàà swey rìì tɔ̀ deò wo ra mun tsɛ ?»
35Pilatsì yè dzin à ra ci: «Mun Dzyèèsìbee mòdzin gbɛ ? Wo kuan mòò rèè, ko Saaka Jɔundzin neè rìì wo wɔɔ mun suun. Wo fee rìì faɔ̀ do ?»
36Yesù yè dzin ci: «Mun ne màsàbee na nèe dziɲan ree doùn naa waa. Mun ne màsàbee yè bà na nèe dziɲan ree doùn naa, mun kpɛyn dzin neè na nà kaà fa mun kamà, sànko mun mà wɔ Dzyèèsìbee mòdzin neè jɔundzin neè suun waa. Ŋà, mun ne màsàbee to na nèe dziɲan ree doùn naa do.»
37Pilatsì y'à tey tɔ̀un ci: «Tà bwèy, wo màsa rii kɛ̀ ?» Yesù yè dzin à ra ci: «Wo rìì ci mun màsa. Mun kere kùàn nì, min nà dziɲaan doùn, min sààbeen dè. Sààbeen dzi mòò o moò rà, twɛy sapɛ yeè e toro wɔɔ̀ mun ne goomaa rè.»
38Pilatsì y'à tey kɔn ci: «Fee rìì sààbeen ?» Pilatsì twɛy goomaa reè dè dòu, è bo na Dzyèèsìbee mòdzin neè kpà da rɔ̀n kɔn, è dzin è ra ci: «Mun na kùn pɛn jàa, nìi dzia bà kitsi mɛɛy kùn kpir'lee tsɛ waa. 39Geren n tsɛɛ̀ sɛr'là ye wɔ, ye re làndà shià doùn, kàsòdzian soo bo bàjia. Ye sào ni min Dzyèèsìbee mòdzin neè rè màsà kpir'là rìì bàji ye kɔ̀ ɔ̀ ?»
40Yè sɛ̀ɛ fààn na ci: «Ɔ̀ɔɔn, maà tɔ̀ bàji waa, Barabasì rìì bo bàji !» Tɔ̀ y'a tàrà Barabasì, tɔ̀ na gookoronfabaa rìì.
Seçili Olanlar:
Yùxanà 18: BDZU
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 Église Évangélique Mennonite du Burkina Faso (EEMBF) et SIL International