Màtay 3

Ywan Un'düümà u nsye a ipɔl

(Mlk 1.1-8; Luk 3.1-18; Ywn 1.19-28)

1Utaaŋ alan, Ywan Un'düümà kàyàmɛnà u nsye a ipɔl a Yuday mulɔŋ naa: 2« Làbuul mpem abɛ, ntɔn Imwol a du kye tsütsü! » 3Ywan awà wà mbuur kàsam ŋangɔɔm Yɛsay utaaŋ kàtɛɛnà nde naa:

« Ndaa mwɛy yàmusaa in'kwɛŋ u nsye a ipɔl:

Làlɔ̈ɔ̈n mbwo a Mwol,

làsuub myay ande! »

4Ywan kàbwäärà ipfɛy a in'kà a Kamɛl anà un'kab a ibaan a ntsür u lɔŋ ande. Nde kàdyee mpay anà bwey a ndwaŋ. 5Abun Yɛlusàlɛm, Yuday lanswà, anà un'tà a Yɔrdan bàkyeenà akà nde. 6Ba bàkyeyà man'be aba u mii a baar anà Ywan kadümà u Yɔrdan.

7Mpal kàmɛn nde naa Amfarisi anà Asadusi mbɔɔn bàyee akà nde ntɔn muwal ndüümà, nde kàtɛn a ba naa: « Mbil a iyäy! Nà kàlalɔŋ mutiin nkyɛl a Nzam ayà iyà? 8Làswɛŋ unsà nsyääl abɛ naa bɛ lan'buul mpem, 9anà twon lan'tɛn u mpem abɛ naa: "Abàlam wà nkaa abi!" Ntɔn mɛ alakyään naa Nzam kan'kwo mutwey ikyee a Abàlam u nkɔŋ yi! 10Fà itaan nkwar yà tsütsü mutsul in'te kun'swɛy: un'te wanswà mpa afàbɔr imbɛŋ aŋàbwaŋ, bàkyer asun'tsul, waa bàsun'tɔɔm u mbaa.

11« Mɛ, mɛ in'kàladümà kan'dà ntɔn mbuul a mpem. Wɛɛ mbuur awà ayà ungö a mɛ kàman'lyaŋ u ngwal: mɛ in'kwe anki musɔɔl idyäär ande. Nde, nde asàladümà u Dweelà In'kyɛɛl anà u mbaa. 12Nde we anà impye u kɔɔ ande ntɔn mukɔɔm blɛ. Nde asàsà imbɛŋ uboo a ikɔr, wɛɛ un'lɛŋ nde asàtɔɔm u mbaa mpa isàdim akà ikikye. »

Ndüümà a Yɛsu

(Mlk 1.9-11; Luk 3.21-22)

13Abun, Yɛsu kàfü Ngalilɛ, waa kàyàkɔlà u Yɔrdan akà Ywan Un'düümà u ngyäl a Yɔrdan, ntɔn nde kun'dümà. 14Wɛɛ Ywan kàmɛn ube, waa kàtɛn a nde naa: « Mɛ, mɛ in'làkwo muyà akà ngye, ntɔn ngye an'pɛ ndüümà, wɛɛ ngye, ngye afàyà akà mɛ! » 15Wɛɛ Yɛsu kun'fuur naa: « Wɛy ya ikäl abà apanà, ntɔn yà ubwaŋ naa bi ikwey balàbal lanswà. » Abun, Ywan waa kàkyey. 16Pa kàwɛl nde ndüümà, Yɛsu laa kàtoo nde kan'dà. Taaŋ nsil la du waa làyaanà, nde kàmɛn Dweelà a Nzam wàmuyàtyà akà nde asànaa nkokà. 17Le, ndaa mwɛy yàfü du, waa yàtɛn naa: « Wawà wà Mwan amɛ wà nkween. Mpem amɛ yanswà ye amu nde. »

Seçili Olanlar:

Màtay 3: YNS

Vurgu

Paylaş

Kopyala

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

Bible Iyansi Hakkında Daha Fazlasını Öğrenin

Màtay 3

Màtay 3
Popüler Kutsal Kitap Ayetleri

Kutsal Kitap:

Yansi

Çeviri: Bible Iyansi - YNS

Màtay 3

Màtay 3

Màtay 3 Popüler Kutsal Kitap Ayetleri

Kutsal Kitap:

Yansi

Çeviri: Bible Iyansi - YNS

Màtay 3

Màtay 3
Popüler Kutsal Kitap Ayetleri