NƲNƲLI 21
21
Pɔlʋ yɛ Zelwizalɛmö mö
1-A -nyʋa 'sɔ -sɔnʋ-a yawʋ, 'n -a ji-a bato 'mö -gbla, -glɔ wa la-a Kɔsʋ, 'n a ji-e -ma mö 'tɩklɩlɩɩ. Zlɩ zɩ-a, 'n -a ji-a -glɔ wa la-a Wlodɩ nyini. -A 'bhö-ö -bha, 'n -a ji-a -glɔ wa la-a Patala nyini. 2-Ma -a ghlɩ-a bato -ʋ -wʋ-a dʋdʋ wa la-a Fenisie -gömö mö 'le. -A -gbla-a -ma ʋ 'mö, 'n -a ji-a mö. 3-A 'yɛ Siplɩɛ dʋdʋ ngo sɩbha mö-ö, -a 'panʋa-a kɔpɛ 'mö 'n -a ji-a -aa 'yuogblʋ 'ji zʋ. -A 'plɩnɩ-a Silie dʋdʋ 'ji, 'n -a ji-a Tilɩ nyini. -Ma bato ji la-a ʋ -susuli sɛ 'sibha. 4-Ma -a ghlɩ-a Zezwie 'wʋbhlinɩngwa. -A -sa -ma 'ylɩ -ngbisɔ. Zezwie 'wʋbhlinɩngwa la'a Zuzu Wlawla-a gbanʋa-a 'mö, wa nɛ -bha Pɔlʋɔ de naa, ɔ 'na-a mö -ma Zelwizalɛmö -nɩ. 5Ylɩ la'a -ngbisɔ 'plɩ-a, 'n -a ji-a 'wʋ -sɔ -a 'yɛ -aa 'yuogblʋ 'ji zʋɔ yɛ. Wa 'bhuo, wa 'ngwlɩ -yɛ wa 'gwie 'sɔ -kwaya-a 'yuo, 'n -a -nyʋa 'sɔ ji-a 'gbë 'mö 'wlʋ. -A nyini-e -bha 'nyie 'kïkë yawʋ, -a 'pa-a -kokomunigbö glu, 'n -a ji-a -bɛlɩ 'pa. 6-A kɩnɩkɩnɩnɩ-a, -a -gbla-a -ma bato 'mö, 'n wa ji-a -nɩ wa 'ligbï'ï nimï mö. 7-A bhɩa-a 'nyi 'mö, -a 'bhö-a Tilɩ, 'n -a ji-a -glɔ wa la-a Pötolemayisɩ nyini. -A bhalɩ-ɛ -maa -Lagɔdagwie-e, 'n -a ji-e -bha wa yawʋ 'ylɩ -bhlʋ -sa.
8Zlɩ zɩ-a, -a 'libhï-a 'yuogblʋ 'wʋ, 'n -a ji-a Sezale nyini. Zezwie 'tɩtɩɛ -tɩtɩɛ kwakwanyɔ Filipö, -ɔ -yɛ-a 'jiwʋngwa -ngbisɔ wa -sa la-a -bhaa gla'aa -bhlʋ, 'n -a ji-e -ma ɔ 'ligbë'ë mö. -Ma -a gʋ-ʋ -bha. 9Ɔ ka la nglugwie -mʋna -waa-a nyɩbhɛlʋ -ji, 'n -Lagɔ gbanʋa-a 'mö. 10'Ylɩ ja -a -sa-a -bha. -Lagɔɔ 'mögbanɩnyɔ -bhlʋ wa la-a Agabwisɩ 'bhönɩ Zwidee -gwlɩ yawʋ, 11'n ɔ -jiya-a -bha ghlɩ. Ɔ 'libhï-a Pɔlʋɔ 'bɛdlʋ 'wʋ, ɔ gwanʋ-a ɔjɩɛ kpli -yɛ ɔ -kɔtɩ 'sɔ yɛ, ɔ nɛ: “-Ɩ Zuzu 'Wlawla gba-a mɩ-ɛ la'a. Nɩkpɛ -ɔ nyini-a 'bɛdlʋ la'a, sa'a 'zwiföa jio-o sa'a -ma Zelwizalɛmö gwaa, wa 'kɔ-a -ma lagangwa cɛ'ɛ 'pɛlʋ 'pa.” 12-A 'nʋ-a wɛlɩ la'a, -a -yɛ -bhaa nɩkpa 'sɔ, 'n -a ji-a Pɔlʋ -bɛlɩ 'pa naa ɔ 'na-a mö -ma Zelwizalɛmö -nɩ. 13Ɔ nɛ: “'Manɩɛ yɛ a nʋ bhe -sa, 'n a -wʋ-a wi 'le, 'n a wʋ'ʋ-a dlɩ jilia 'le 'nɩ? N pö najɩ 'wʋ, ɛ'ɛ -lɛ wa ka'a gwaa 'nyizee yɛ, n 'yɛ -ma Zelwizalɛmö Nyininyɔ Zezwie 'nglɩɛ yɛ tlɩnɩ, n pɩ 'wʋ 'gamö.” 14-Aa wɛlɩ 'nɩɔ la nimï -lanɩ 'le -wʋɔ yɛ, -aa -lɛ-a 'mö -bha ngo nyʋnanɩ 'sɔ, -a nɛ: “-Ɩ Nyininyɔ 'jɩbha-a ɩ 'wlenɩ 'wʋ.”
Pɔlʋ yɛ -ma Zelwizalɛmö nyini
15'Mɩ ylɩ la'a 'plɩ-a, -a göganɩ-a -aa -li, 'n -a ji-a Zelwizalɛmö mö. 16-Ma Sezalee -Lagɔdagwie -mʋmʋa -ganɩya 'yɛ. Siplɩɛ dʋdʋ -gömö -Lagɔgu -bhlʋ -ɔ gwlɛ-a -Lagɔ 'mö wa la-a Mönasɔ, 'n wa -jiya-a -ma ɔ 'bhɛyɩ kwa -a 'yɛ -ma gʋ-ʋɔ yɛ.
17-A nyini-e -ma Zelwizalɛmö-ö, 'mʋna 'mö -Lagɔdagwie -sanɩya-a 'yuo. 18Zlɩ zɩ-a, 'n -a -yɛ Pɔlʋ 'sɔ ji-e -ma Zaköö 'ligbë'ë mö, 'n 'yuganɩngwa 'bhuo ji-e -ma ji 'gamö. 19Ɔ bhalʋa-a 'bhë, -Lagɔ 'plɩnɩɔ-a 'mö libho la'a ʋ nʋ-ɔ -ma -wa 'nɩ-a 'zwiföaa gla'a, 'n ɔ jua-a ʋ 'bhuoo 'tɩtɩ -sanɩ. 20Wa 'nʋɩ-a, 'n wa ji-a -Lagɔɔ 'nglɩ 'ghlimanɩ. 'Bhë wa nɛ -bha ɔ de naa: “-Dagu, yie -sa 'zwiföaa gla'aa nɩkpa -bebe ka-a Zezwi dlɩ 'wʋ. Wa 'bhuo -Lagɔɔ gböö dlɩ wa ka 'yɛ -bha. 21-Ma ɩ 'mö, -ɩ wa 'nʋ-ɔ -na -gömö, mɩ-ɩ -yɛ-a naa, wa nɛ 'zwiföa bhuo -wʋ-ɔ -ma laga -gömö, mʋa -n pa-a ngli naa, wa bhlɩ Moyizɩɛ gbö yɛ, wa 'na-a -dɩ wa nyɩbhɛlɩgwiee zɔmö 'wʋ -nɩ, wa 'na-a zʋ 'yɛ -bha wa gbö -nɩ. 22Sa -n ji-a zʋɔ 'nɩ? Nɩkpa ji-a 'wlu 'titanɩɛ, -wʋʋ yɛ-a, sɛ wa ji-a jɩblɩnɩɛ naa -n yɛ ji 'bhë. 23Ɩ yɛ -ɩ a ji-e la'a -na de gba nʋɩ. Nɩkpa -mʋna -wʋ-ɔ ma'a -aa gla'a, -Lagɔ wa palɩ-a 'dɩ 'yukwli 'mö. 24'Libhua 'wʋ, -n -nyʋa 'sɔ nʋ 'wlawlazʋli, zʋ wa mëni wa 'yɛ wa nyuku kpalɩ. -Bhaa do'o, nɩkpa 'bhuo ji sɛ jɩblɩnɩ naa, -ɩ wa 'nʋ-ɔ -na -gömö, yuodɩ -bha, -ma ɩ 'mö -Lagɔɔ gböö -bhazʋnyɔ -n glɩnɩ 'yɛ-ɛ -na. 25Nɩkpa -wa 'nɩ-a 'zwiföa glɩnɩ 'bhë -wa ka-a Zezwi dlɩ 'wʋ-ɔ, wa de wʋ -a 'cɛlʋa-a naa, wa 'na-a li -kʋnɩbʋbɔnʋnɩma -nɩ, wa 'na-a li dlu -yɛ nɩma -ɩ dlu 'nɩ-a 'mö 'wlʋ -nɩ, wa 'na-a -sasanɩ 'ngwlɩ -yɛ nyɩbhɛlɩ 'sɔ -nɩ.”
26Zlɩ zɩ-a, 'n Pɔlʋ ji-a nɩkpa la'a 'wʋ 'libhï, wa nʋ-a 'wlawlazʋli, 'n ɔ -nyʋa 'sɔ ji-e -ma -Lagɔbudu 'kadʋ 'mö pla. Zlɩ -ɛɛ 'mö wa 'wlawlazʋli ji-a 'bhlonʋ 'bhë wa 'yɛ -Lagɔ -lu 'nyɛ, ɔ 'yɛ ɛ gbʋ gbaa yɛ.
Wa yɛ Pɔlʋ köbha
27'Wlawlazʋylɩ -ngbisɔ bhɩa-a, -ma Azie dʋdʋ -gömöö 'zwiföa yɩlɩ-ɛ -ma -Lagɔbudu 'kadʋ 'mö Pɔlʋ-ɔ, 'n wa ji-a nɩkpa 'bhuo ghayɩ 'pa 'n wa jio-a köbha. 28Wa-a nyla 'le, wa nɛ: “Izlayɛlɩɛ nɩkpayi, a ji, nɩkpɛ -ɔ -yɛ-a de 'bhuo ngli 'pa 'le -wʋ -ɔ gba-a -bha nɩkpa 'bhuoo de -aa 'jinylɔgbʋ, 'n ɔ nyimanɩ-a -Lagɔɔ gbö -yɛ -Lagɔbudu 'kadʋ 'sɔ ngli mɔ-ɔ la'a. 'Glɛköaa 'bhï ɔ 'pa-a -ma -Lagɔbudu 'kadʋ 'mö, -budu -ʋ -wʋ la-a 'wlawla 'n ɔ jiʋ-a nyanɩ palɩ.” 29-Wʋʋ yɛ wa gba-a -sɩbha, Pɔlʋ -yɛ Efɛzɩɛ nɩkpɛ Tlofimö 'sɔ -bhlinɩ 'wʋ 'n wa jio-o -ma 'gbë 'mö yɩlɩ. Wa -tɔnʋ -ma -Lagɔbudu 'kadʋ 'mö ɔ -nyɔɔ 'sɔ pla la. 30'Gbë 'bhuo gbugblonʋ-a, 'n nɩkpa ji-a de 'bhuo 'bhönɩ. Wa pla-a -ma -Lagɔbudu 'kadʋ 'mö, wa -sa-a -ma Pɔlʋ, 'n wa ji-e -bha -gaganɩlɩ'ɩ ʋ klanɩ -gba. 31Wa 'jɩbha wa 'kɔ la 'lɩbha, 'n 'dɩ ji-a 'slʋjaa 'bhitɩbha ghlɩ naa, Zelwizalɛmöö 'gbë-ë 'vɩɔ 'le. 32-Bha -gaganɩlɩ'ɩ, ɔ 'libhï-a 'slʋja -yɛ wa -zakpöö 'yuganɩngwa 'sɔ 'wʋ, 'n ɔ ji-e -ma sɛcɛ kwa. Nɩkpa yɩlʋa-a, 'n wa ji-a Pɔlʋɔ 'lɩbhalɩbhagbʋ 'wʋ -gɔ. 33'Slʋjaa 'bhitɩbha nyini-e -bha wa yawʋ, ɔ gblo-a Pɔlʋ 'wʋ, ɔ nɛ wa palɩɔ 'gɔgwɩ sɔ'ɔ. 'Bhë 'n ɔ ji-a ngli 'jɩbha naa, -mɔ ɔ glɩnɩ-a 'nɩ? 'Manɩ ɔ nʋ-a 'nɩ? 34-Ma nɩkpaa -zakpa la'aa 'mö, -mʋmʋa 'kpö ma'a 'mö -mʋmʋa kpö -ma 'mö, jɔɔ yɛ 'slʋjaa 'bhitɩbha 'nɩ la bhɛlɩ ɔ 'yɛ -lu 'mö 'nʋ. Ɩ yɛ, ɔ nɛ wa kwa Pɔlʋ -ma 'slʋjaa 'mögunʋbudu'u. 35Pɔlʋ nyini-e -bha kpëklikpï -gömö-ö, nɩkpa 'nɩ nglu 'le -wʋɔ yɛ, 'n 'slʋja jio-a 'wʋ 'libhï. 36-Wʋʋ yɛ-a, nɩkpaa -bebe -ganʋa, wa-a nyla 'le naa: “A 'lɩbhɔ ɔ 'yɛ tlɩ!”
Pɔlʋ yɛ ɔjɩɛ gbʋɔ -gömösawɛlɩ gba
37Wa 'yɛ Pɔlʋ -ma 'slʋjaa 'mögunʋbudu'u 'paa ji-e, ɔ nɛ -bha 'slʋjaa 'bhitɩbhaa de naa: “N bhɛlɩ n 'yɛ -na de wɛlɩköbhë -bhlʋ gbaa?” -Mɔ la'a nɛ: “-N -ji 'glɛkögbʋɔ gbaa? 38-Aan -nn -lɛ ezipötiyi -ɔ 'libhï-a 'ylɩ ja la'a 'mö 'kulɩbhangwaa 'wli -mʋna 'wʋ -ɔ -nyʋa mö-ö -ma 'mïsekpa klʋʋ?” 39Pɔlʋ nɛ: “'Zwiföyi n glɩnɩ -bha, -ma Silisie dʋdʋ -gömö, -ma Talɩsɩɛ 'gbë 'möö nɩkpɛ n glɩnɩ -bha, 'ma 'gbë 'nɩ-ɛ kpakpala. N -bhiamö yawʋ, nglu n 'yɛ nɩkpaa de gba.” 40'Slʋjaa 'bhitɩbha nglu-a, Pɔlʋ 'nɩgbö -bha -buduo kpëklikpï -gömö ɔ kwa-a -kɔta ghayɩ, 'n wa 'bhuo ji-a 'wʋ dʋ. 'N Pɔlʋ ji-a eblegbʋ 'mö gbanɩ. Ɔ nɛ:
Seçili Olanlar:
NƲNƲLI 21: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996