ZAA 'BƆGƲ 12
12
Mali yɛ -bha Zezwie kpli -gömö palɩfɛ sulu
1'Ylɩ -ngbʋpʋlʋ tʋ-ʋ -bha gïyikwlaa 'möwlʋpɩpɩ 'yɛ bhɩa, 'n Zezwi ji-e -ma Betani mö, gbë -aa 'mö Lazalɩ -ɔ ɔ -sa la-a glu -wʋ la-a. 2'N wa jio-o -ma lili 'wʋ pi. Malɩtɩ dlinɩ-a lili, -wa -yɛ Zezwi 'sɔ -wʋ-a li 'le, Lazalɩ-ɛ la -ma wa nyɩdɩ. 3Mali 'libhï-a palɩfɛ -ɛɛ pɛlʋ-ʋ 'tɛ-a tenyi -ɛ wa la-a nadɩɛ 'bïtelie 'köbhë 'wʋ, 'n ɔ jie-e -bha Zezwie kpli -gömö sulu, 'bhë 'n ɔ jiɩ-a ɔ nyuko nya yawʋ sɔnʋ. -Ma -budu'u, 'n palɩfɛɛ nglɛ ji-e -ma ye. 4Zezwie 'wʋbhlinɩngwa gla'aa -bhlʋ wa la-a Zwida Isɩkaliɔtɩ -ɔ jio-a 'pɛlʋ 'paa nɛ: 5“'Manɩɛ yɛ wa'a -lɛ-a palɩfɛ -la mënie 'wlie gwlɩ kugbïa -ngbï 'mö 'pɛlʋ 'pa, wa 'yɛ ɛ mëni 'pʋangwa 'ye 'nyɛ 'nɩ?” 6Ɔ 'kɩ-a gba, ɛ'ɛ -lɛ naa, 'pʋangwaa gbʋ-ʋ -wʋɔ pla 'lee yɛ, 'winyɔ ɔ glɩnɩ la -bhaa yɛ -bha. Wa mënikputu -ʋ ɔ -su-aa 'mö, -lu -mʋ wa -yɛ -ma palɩ -ma ɔ sʋ-a 'wi 'mö. 7Ɔ gba-a -sɩbha, Zezwi nɛ: “-Sɔɔ cɛ yawʋ, ɔ 'yɛ -bha palɩfɛ -la sɛ zʋ zlɩ -ɛɛ 'mö wa ji-e na -gazɛ zʋɔ yɛ. 8'Pʋangwaa -nɩ-ɛ, wa wʋya gla'a 'kɔmʋʋ, -amöö -nɩ-ɛ, n 'na 'kaya na-a gla'a -wʋ 'kɔmʋʋ.”
9'Zwiföaa -zakpa 'kada jɩblɩnɩ-a sɛ naa, ɔ-ɔ -bha, 'n wa ji-a ji. Ɛ'ɛ -lɛ Zezwie 'bhëë 'nyizee yɛ, wa 'yɛ 'yɛ Lazalɩ ɔ -sa la-a glu yɩlɩɛ yɛ -bha. 10'N -Lagɔbʋbɔngwaa 'bhitɩbhangwa ji-a 'dɩ zʋ naa wa 'yɛ 'yɛ Lazalɩ 'lɩbha kökamö. 11-Wʋʋ yɛ-a, ɔ yɛ 'zwiföaa -bɛ panʋa-a -gömö, 'n wa ka la-a Zezwi dlɩ 'wʋ.
Zezwi yɛ Zelwizalɛmöö 'gbë 'mö pla
12Zlɩ zɩ-a, nɩkpaa -bebe -wa ji la-a 'pɩpɩ 'wʋ 'n wa ji-a sɛ jɩblɩnɩ naa, Zezwi-e -ma Zelwizalɛmö ji 'le. 13Wa 'libhï-a -galɩkpɩ 'wʋ, 'n wa jio-a 'yuo mö. Wa-a la'a 'mö 'kpö 'le naa:
“-Lagɔɔ 'nglɩ 'ghlimanɩ!
Puanyɔ -ɔ jinɩ-ɛ la'a -aa Nyininyɔ -Lagɔɔ 'nglɩ 'mö,
-ɔ glɩnɩ-a Izlayɛlɩɛ dʋdʋnyininyɔ,
-Lagɔ 'pɔ 'nyupalɩ!”
14Zezwi 'libhï-a -sʋkʋfalʋgu 'wʋ, 'n ɔ jiʋ-a -gömö -gbla, sa ɩ 'cɛlɩɔ la-a -ma -Lagɔwɛlɩɛ 'bɔgʋ 'mö naa, -Lagɔ nɛ:
15“Zelwizalɛmö, sulu dlɩ yɛ,
-na dʋdʋnyininyɔ -wʋ-ɔ -ma ji 'le,
ɔ glɩ -sʋkʋfalʋgu -gömö.”
16'Mɩ -ɩ la'a 'plɩ-ɛ -sɩbha, Zezwie 'wʋbhlinɩngwa 'nɩɩ-ɩ 'mö 'nʋ -pa. Zezwie 'ghlinɔ 'kadʋ yɛ 'tuluo 'bhë 'n wa dlɩ ji-e -bha bhlinɩ naa ɔ yɛ 'mɩ -ɩ la'a 'cɛlɩɔ la-a -ma -Lagɔwɛlɩɛ 'bɔgʋ 'mö, 'n wa jiɩ-a ɔ yɛ 'wʋ 'wlenɩ.
17Nɩkpaa -zakpa -a -wʋ la-a -bha, la Zezwi 'nɩgbö-ö -bha lesikpa ngo'o 'n ɔ ji-a Lazalɩ wɔzɩ, 'n ɔ jio-o -ma 'kudungwa 'gbamö -sa, wa-a la'a ɔ 'dɩ -sa 'le. 18'Ma bhata la'aa 'dɩ nɩkpaa -bebe 'nʋ la-aa yɛ wa mö-a Zezwi 'yuo. 19Ɩ yɛ falizɩɛ nɛ -ma wa 'bhïë 'nyizee nyɩdɩ naa: “A jɩnɩ -bha 'wʋ, a'a -ma ɩ 'mö -lu ghlɩ 'le -wʋ, a yie, nɩkpa 'bhuo kɔ 'bɩ 'suluo 'bhë.”
'Glɛköa 'jɩbha wa 'yɛ Zezwi yɩlɩ
20-Maa nɩkpa -wa mö-ö -ma Zelwizalɛmö 'pɩpɩ 'wʋ wa 'yɛ -Lagɔ bʋbɔɔ yɛ, -ma wa gla'a lagangwa wa la-a 'glɛköa wa-a la -ma. 21Wa ghlɩ-ɛ -bha Zezwie 'wʋbhlinɩngwa gla'aa nɩkpɛ -bhlʋ wa la-a Filipö, -ɔ glɩnɩ-ɛ -ma Galilee dʋdʋ -gömöö -glɔ wa la-a Bɛtɩsayidaa nɩkpɛ, wa nɛ -bha ɔ de: “Nyininyɔ, -a 'jɩbha -a 'yɛ Zezwi yɩlɩ.” 22Wa gba-a -sɩbha, Filipö -sɔ-a 'wʋ 'n ɔ ji-e -ma Adle ghlɩ, 'n wa 'sɔ -kpɔ ji-a Zezwi 'dɩ kwa. 23Wa -sanɩ-a Zezwi 'dɩ, ɔ nɛ: “A yie, Nɩkpɛɛ 'Guo 'ghlimanɩde nyini-e la'a. 24'Dɩɛ -dɩ n nyɛya -bha naa: 'Sɩkajeyi nɩ -ma glu pla ɛ 'yɛ mi-e, -bhlʋ 'tɩ 'mö ɛ tʋ -bha. 'N ɛ -yɛ glu pla ɛ -yɛ mi-e, 'jʋɔ -bebe ɛ pa -bha. 25-Ɔ -yɛ ɔjɩɛ 'pɩ 'wʋ gwɩ, cɛ'ɛ ɛ jio-a 'bhö-ö, -ɔ -yɛ ɔjɩɛ 'pɩ dlɩ -sa ma'a pɩ la'aa 'mö, 'mɔ ɛ ji-a cɛ'ɛ tʋɔ 'kɔgwlɛswɩ'ɩ. 26Nɩkpɛ -yɛ nʋ ɔ 'yɛ na libho nʋ nʋ-ɔ, ɔ -ganɩ'ɩ, la n glɩ-a, -bha na nyɩgbajʋlʋ ji 'yɛ-a -nɩ glɩɛ. Nɩkpɛ -mɔ -yɛ na libho nʋ-ɔ, 'wʋ na -Tɩbha jio-a 'wɔlʋmanɩɛ.
Zezwi yɛ ɔ tlɩtlɩgbʋ gba
27-Sɩka'a-a 'mö, dlɩ-ɩ kla'a-a 'ji, sa cɛ n 'yɛ yɩ gba 'nɩ? N 'yɛ cɛ nʋ naa: -Atʋ, sa'a -ɩ ji'i-e -la -sɩka'a ghlɩɛ ngli-a? -Ma ɩ 'mö, ɩ 'bhïë yɛ n ji -bha. 28-Atʋ, 'ghlimanɩ -na 'nglɩ.” Ɔ gba-a -sɩbha, -ma -Lagɔtapɛ'ɛ 'n wɛlɩ ji-e -ma 'bhönɩ. Ɩ nɛ naa: “N kɩ 'ghlimanɩ 'bhë, 'ghlimanɩɛ n jiɩ 'yɛ-a 'sɔ.” 29Nɩkpa -wa su la-a -bha -wa 'nʋ-a 'mɩ wɛlɩ, wa nɛ -dɛ 'gba-a -bha, -mʋmʋa nɛ -Lagɔzuzuko gba-a -bha ɔ de. 30-Ma ɩ 'mö, Zezwi nɛ -bha wa de: “Na yɛ wɛlɩ -la 'nɩ-ɛ -ma -Lagɔtapɛ'ɛ 'bhönɩ, a 'bhïë yɛ -bha. 31Pɩ la'aa -zijletunʋde nyini-e 'mö-ö la'a, -sɩka'a-a 'mö, pɩ la'aa nyininyɔɔ zɔmöbhlide yɛ nyini 'bhë. 32-Amö-ö -nɩ-ɛ, wa ka'a ghayɩ kwa 'bhë, n ji nɩkpa 'bhuo -ma na 'wʋ -lanɩ.” 33Ɔ gba-a -sɩbha-a, sa ɔ ji-a 'mö tlɩtlɩnɩɛ, ɔ 'kɩ tuluaa yɛ -bha. 34Ɔ gba-a -sɩbha, nɩkpa -wa su la-a -bha nɛ -bha ɔ de naa: “-Ma -Lagɔwɛlɩɛ 'bɔgʋ 'mö sa'a wa 'cɛlɩ-ɛ -ma naa:
Puanyɔ -ɔ -Lagɔ -sa-a -bha,
-kitiki ɔ ji-a -bhlɩɛ.
'Manɩɛ yɛ -n nʋ-ɔ 'mö-ö -na naa: Nɩkpɛɛ 'Gu, ghayɩ wa jio-a kwa 'nɩ? A'a -mɔɔ bhë -yɛ-a Nɩkpɛɛ Gu 'nɩ?” 35Zezwi nɛ naa: “Yʋlokpë-ë -bhla -ma a 'gbamö, a 'bɩ 'na 'mö gwlɛ, bhla yʋlokpë -wʋ -bhla -ma a 'gbamö, a namö 'misikpoko jiya-a 'mö bhuluo. Nɩkpɛ -ɔ namönɩ-a 'misikpoko 'mö, la ɔ -wʋ mö 'le ɔ'ɔ -bha de -ji. 36Bhla a -su -bhla yʋlokpë-ë, a -kaa dlɩ 'wʋ a 'yɛ yʋlokpëë 'gwie zʋ.” Zezwi gba-a -sɩbha, ɔ 'bhö-ö -bha 'n ɔ jua-a 'ji zuzonʋ.
'Zwiföa 'nɩ Zezwi dlɩ 'wʋ -ka
37Bhatɩ Zezwi nʋ-ɔ -bha wa 'jie 'klʋ nɛ, ɩ'ɩ mʋno 'bhë wa 'nɩɔ la dlɩ 'wʋ -ka. 38-Ma ɩ 'mö, wɛlɩ -ɩ -Lagɔɔ 'mögbanɩnyɔ Ezayi gba la-a, ɩ 'yɛ 'wʋ 'wlenɩɛ yɛ -bha. Sa'a naa:
“Nyininyɔ, wɛlɩ -a gba-a,
a'a -mɔ kɩ-a dlɩ 'wʋ 'nɩ?
A'a -mɔ jɩblɩnɩ-a Nyininyɔɔ 'mötɛnɔ 'nɩ?”
39Wa'a la 'yɛ bhɛlɩ wa 'yɛ Zezwi dlɩ 'wʋ -ka, -wʋʋ yɛ-a, sa'a Ezayi gba 'yɛ-a 'sɔ naa:
40“-Lagɔ kʋa 'lɔkpʋa 'bhë,
'n ʋ ji 'yɛ-a wa dlɩa 'mö 'tumanɩ,
wa 'jie ji-e sɛ jɩnɩ,
wa dlɩa ji-e -lu 'mö 'nʋ,
Wa ji-e dlɩa 'mö 'bhɩla n jua-a puaa yɛ.”
41-Wʋʋ yɛ Ezayi gba-a -sɩbha, Zezwie 'ghlinɔ ɔ yɩlɩ la -bha, 'n ɔ ji-a ɔ gbʋ gba. 42-Ma ɩ 'bhuoo 'mö, 'zwiföaa 'yuganɩngwaa -bɛɛ bhï-ï ka la-a Zezwi dlɩ 'wʋ, falizɩɛɛ -gugu yɛ wa'a ghlɩ-ɩɩ la-a 'mö ngli, wa jua-a -ma -Lagɔbudu'u kpëtie yɛ. 43Nɩkpa 'kwa 'nglɩɛ nglɩ -dɩ, 'mɩ wa 'jɩbha-a -Lagɔ 'kwa 'nglɩɛ nglɩ -dɩɛ bhla.
Zezwi mɔ-ɔ -yɛ-a yʋlokpë
44Zezwi 'kpö-a 'mö, ɔ nɛ: “-Ɔ ka'a dlɩ 'wʋ -ka, na 'nyize ɔ'ɔ -lɛ dlɩ 'wʋ -ka, -ɔ tia'a-a 'mɔ ɔ ka 'yɛ-a dlɩ 'wʋ. 45-Ɔ ka'a 'yɛ yɩlɩ, -ɔ tia'a-a 'mɔ ɔ yɩlɩ -bha. 46-Amö-ö -yɛ-a yʋlokpë, -ɔ la'a -ɔ ka'a dlɩ 'wʋ -ka, ɔ ji-e -ma 'misikpoko 'mö tʋ-ʋɔ yɛ n ji-e ma'a 'pɩ 'wʋ. 47Nɩkpɛ -yɛ na wɛlɩ 'nʋ 'bhë ɔ nɩɩ 'ji zʋ-ɔ, n 'na 'kɔ -zijle tunʋ. -Wʋʋ yɛ-a, n'n -lɛ 'pɩnɩkpa -zijle -tunʋ kwla'a ji, n 'yɛ 'pɩnɩkpa puaa yɛ n ji -bha. 48-Ɔ ka'a -ma 'sunʋ, -ɔ nɩ na wɛlɩ 'wʋ nglu, ɔ ka ɔ -zijletunʋnyɔ. Wɛlɩ la'a n 'pa-a ngli, mɩ-ɩ jio-a -zijle tunʋɔ 'pɩɛ 'wʋbhlonʋzlɩ. 49-Wʋʋ yɛ-a, na nglie wɛlɩ 'nɩ-ɛ -ma na 'bhë 'mö 'bhönɩ. -Ɩ la'a n ji-a gbaa, wɛlɩ -ɩ n ji-a nɩkpa 'nyɛɛ, na -Tɩbha la'a -ɔ tia'a-a, mɔ-ɔ -pamɩ'ɩ-a ngli. 50N -ji sɛ naa -ɩ la'a ɔ pa'a-a ngli, 'kɔgwlɛpɩ ɩ nyɛ -bha. Ɩ yɛ -ɩ 'bhuo n gba-a, sa na -Tɩbha nʋ la-a n gbɩ, -sɩbha n gbɩ -bha.”
Seçili Olanlar:
ZAA 'BƆGƲ 12: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996