ZAA 'BƆGƲ 4
4
Samalie 'nglɔ -bhlʋ yɛ Zezwi ɔ Puanyɔ 'mö jɩblɩnɩ
1'N Nyininyɔ Zezwi ji-a sɛ jɩblɩnɩ naa falizɩɛ yɛ 'nʋ 'bhë naa mɔ-ɔ -wʋ-a nɩkpa badize 'le, 'n ɔ 'wʋbhlinɩngwa -wʋ-a zumanɩ 'le Zaa -lʋaa bhla. 2-Ɩ -yɛ-a 'dɛdɛɛ, Zezwie 'bhë 'nɩ badize la nɩkpa, ɔ 'wʋbhlinɩngwa badizʋa -bha. 3Ɔ 'bhö-ö -ma Zwidee dʋdʋ -gömö, 'n ɔ ji-e -ma Galilee dʋdʋ -gömö nimï mö. 4Ɔ 'yɛ möö ji-e, Samalie dʋdʋ -gömö ɔ ji la-a 'plɩnɩɛ.
5Zezwi-e mö 'le, 'n ɔ ji-e -ma Samalie -glɔ -bhlʋ wa la-a Sikalɩ 'mö nyini, -bha 'lagblɛ -ɛ Zakɔpö 'nyɛ la-a -benyido'o ɔ 'gu Zozɛfö yawʋ. 6-Bha la'a -bha Zakɔpöö glunyibhë -wʋ la -bha. Zezwi yʋlɔ-a 'yuogblʋbhlibhlie 'wʋ, 'n ɔ ji-e -bha glunyibhë la'aa kpëklikpë -gömö sɛ glɩ-ɩ. -Bhaa do'o, 'ylʋ glɩ jije 'wʋ.
7'N Samalie 'nglɔ -bhlʋ ji-a 'nyu -pli kwla'a ji. Zezwi nɛ -bha ɔ de naa: “Nyɛ'ɛ 'nyu n 'yɛ 'nɩma.” 8-Bhaa do'o, ɔ 'wʋbhlinɩngwa-a la -ma 'gbë 'mö lili -pɩa kwla'a. 9Nglɔ la'a nɛ -bha Zezwie de naa: “Samɩ -nmö 'zwiföyi 'jɩbhajɩbhanɩ-a -amö Samalie 'nglɔ 'nɩmanɩmanyu 'mö 'nɩ?” -Wʋʋ yɛ 'mɔ 'nglɔ gba-a -sɩbha, 'zwiföa -yɛ Samalie nɩkpa 'sɔ 'nɩ 'sibhësibhënɩ la 'wʋɔ yɛ -bha. 10Ɔ 'jɩbhɔ-ɔ -sɩbha ngli, Zezwi nɛ: “-N -yɛ la -Lagɔɔ 'nyɛnyɛlu -ji, -ɔ -wʋ-ɔ la'a -na de nyɛ'ɛ 'nyu n 'yɛ 'nɩma nʋ 'le -n -kɔɔ la 'yɛ -ji-e, -nmö jio la-a -bɛlɩ 'paa ɔ -kamö la 'kɔgwlɛpɩɛ 'nyu 'nyɛ.” 11'Nglɔ nɛ naa: “Nyininyɔ, -nn 'nyuplinɩlu -ka, glunyibhë tlʋnʋ 'yɛ 'mö, la -n ji-a 'mʋ 'kɔgwlɛpɩɛ nyu la'a -saa 'nɩ? 12-Aa -tɩbha Zakɔpö -ɔ -tɩya-a glunyibhë la'a yawʋ -a ɔ 'nɩma-a, ɔ 'gwie -yɛ ɔ nɩma 'sɔ 'nɩma-a, -nmö 'ghli-a -nmö zio-a 'wʋɔ?” 13Zezwi nɛ -bha ɔ de naa: “Nɩkpɛ -mɔ -yɛ nyu -la 'nɩma, 'nyutʋ-ʋ jio-a 'lɩbhaa 'sɔ. 14'N -ɔ la'a n ji-e na-a 'nyu 'nyɛɛ, ɔ -kʋʋ 'nɩma 'nyutʋ 'na 'kɔ-a 'mö 'lɩbha. Nyu la'a n jio-a 'nyɛɛ, ʋ 'na 'kɔ 'mö möna 'n ɔ 'yɛ-a 'kɔgwlɛpɩ ghlɩ.” 15Ɔ gba-a -sɩbha, 'nglɔ nɛ naa: “Nyininyɔ, nyɛ'ɛ na-a 'mʋ 'nyu n 'kʋ 'nɩma, 'nyutʋ ji'i-a 'mö 'lɩbha n ji-e 'nyubo'o ji.” 16Zezwi nɛ naa: “Mö -n 'yɛ -na 'luwli wɔzɩ -n 'yɛ ji.” 17'Nglɔ nɛ -bha ɔ de naa: “N'n 'luwli -ka.” Zezwi nɛ: “-N ka zugo -n 'yɛ nʋ: N'n 'luwli -ka nʋ. 18-Wʋʋ yɛ-a, -n 'bhö-ö nyɩbhɛlɩ -ngbï yawʋ, -ɔ la'a -ɔ -n -nyɔɔ 'sɔ -bhlinɩ-ɛ 'mö-ö -la -sɩka'a 'wʋ, ɛ'ɛ -lɛ -na 'luwli. -Ma ɩ 'mö, -ɩ -n gba-a 'dɛdɛɛ -bha, -nn-n yuo -dɩ.” 19'Nglɔ nɛ naa: “Nyininyɔ, n -ji sɛ naa: -Lagɔɔ 'mögbanɩnyɔ -n glɩnɩ -bha. 20-Aa -lowlengwa, -bha -gɔgɔgbʋ la'a 'klʋ wa bʋbɔnʋ-a -Lagɔ, abha 'zwiföaa -nɩ, a nɛ -ma Zelwizalɛmö -ma -Lagɔɔ bʋbɔnʋde -wʋ -bha.” 21Zezwi nɛ -bha ɔ de naa: “'Nglɔ, jɩblɩnɩ sɛ naa, -bha ji nyini, la a 'na-a -bha -gɔgɔgbʋ -la 'klʋ -Tɩbha -Lagɔ bʋbɔnʋ, ɛ 'na 'yɛ -ma Zelwizalɛmö glɩnɩ. 22Abhaa -nɩ-ɛ, -ʋ a'a-a -ji 'mʋ a bʋbɔ -bha. -Aa -nɩ de, -ʋ -a -ji-a mʋ -a bʋbɔ-a -nɩ, -wʋʋ yɛ-a, 'pʋpʋɛ -ma 'zwiföa 'mö ɛ 'bhönɩ -bha. 23-Ma ɩ 'mö, -bha ji nyini, -bha yɛ 'yɛ nyini 'gamö 'bhë, la bʋbɔngwaa -bʋbɔngwa 'yɛ-a -aa -Tɩbha -Lagɔ -ma dlɩ zɔmö -yɛ 'dɛdɛ'ɛ 'sɔ 'mö bʋbɔnʋ, -wʋʋ yɛ-a, 'mʋa -sɩbhaa bʋbɔngwa la'a 'mʋa -aa -Tɩbha -Lagɔ 'nama -bha. 24-Lagɔ Zuzu -bha, nɩkpɛ -kʋʋ bʋbɔɔ ji, ɔ bʋbɔnʋʋ -ma dlɩ zɔmö -yɛ 'dɛdɛ'ɛ 'sɔ 'mö.” 25'Nglɔ nɛ -bha ɔ de: “N -ji sɛ naa, Puanyɔ -ɔ -Lagɔ -sa-a -bha, -ɔ wa la-a 'Klisɩ, jie ɔ ji -bha, ɔ -yɛ ji-e, ɔ -jiya -li 'bhuoo zɔmö -slʋnʋ.” 26Ɔ gba-a sa'a, Zezwi nɛ: “-Amö-ö -wʋ-ɔ la'a -na de gba 'le, 'mɔ n glɩnɩ -bha.”
27Wa ka wɛlɩkïbhï la'a ngli, 'n Zezwie 'wʋbhlinɩngwa ji-a ji. Wa yɩlɩɔ-a ɔ -wʋ-a 'nglɔɔ de gba 'le, ngli-i mönʋa -bha. -Ma ɩ 'mö, wa gla'aa -bhlʋɔ 'bhë 'nɩɔ-ɔ ngli 'jɩbha naa: “'Manɩ -n -wʋɔ-a ngli 'jɩbhanɩ 'le 'nɩ? 'Manɩgbʋ -n -wʋ 'yɛ-ɛ -bha ɔ de gba 'le 'nɩ?” 28'Nglɔ tɩ-ɛ -bha ɔ 'kpikpiyi, -bha -gaganɩlɩ'ɩ, 'n ɔ ji-e -ma 'gbë 'mö 'dɩ kwa. Ɔ nɛ -bha nɩkpaa de naa: 29“A ji a 'yɛ nɩkpɛ -ɔ -sanɩ'ɩ-a -ɩ la'a 'bhuo n nʋ la-a yɩlɩ, ɛ 'na bhe Puanyɔ -ɔ -Lagɔ -sa-a -bha glɩnɩ?” 30Wa 'wlʋ-ɔ -ma 'gbë 'mö, 'n wa ji-e -ma Zezwi ghlɩ. 31-Bhaa do'o, ɔ 'wʋbhlinɩngwa -wʋɔ -bɛlɩ 'pa 'le naa: “-Abhitɩbha, li-a 'mö.” 32Zezwi nɛ -bha wa de naa: “Lulu n ka-a, -ʋ n ji-a lie a 'nʋ -ji.” 33Ɔ gba-a -sɩbha, ɔ 'wʋbhlinɩngwa-a la'a ngli 'jɩbhajɩbhanɩ 'le naa: “Nɩkpɛɛ cɛ-ɛ -lɔɔ lulu 'nɩ?” 34Zezwi nɛ -bha wa de: “Na lulu -yɛ-a naa, -ɔ la'a -ɔ tia'a-a n 'yɛ -ɩ ɔ 'jɩbha-a nʋ, n 'yɛ 'yɛ 'jinanɩswɩ'ɩ ɔ libho 'ji bhɩa. 35A -yɛ -bha glɩ, a'a nʋ bhe-a naa: 'Cʋɩ -mʋna tʋ-ɔ -bha lilidɩde 'yɛ nyinie? -Amöö -nɩ, 'dɩ n 'nyɛya na-a naa: A 'libhï 'wlu a 'yɛ 'lagblie yɩlɩ, ɩ yɛ zalɩ 'bhë, -dɩdɩɛ ɩ -wʋ-a -kʋ 'le. 36-Dɩdɩnyɔ-ɔ 'gamö ɔ 'pɛnɔ ghlɩ 'le, ɔ-ɔ lili 'wlu 'titanɩ 'le 'kɔgwlɛpɩɛ yɛ, glʋglʋnyɔ -yɛ -dɩdɩnyɔ 'sɔ 'yɛ debhlʋ 'mʋna linɩ. 37-Wʋʋ yɛ-a, 'nine wa pa-a -a nʋ-a: Nɩkpɛ -mʋmɔ -yɛ glʋ 'n nɩkpɛ -mʋmɔ dɩ -bha, 'dɛdɛ'ɛ a glɩnɩ -bha. 38'Lagblɛ -ɛɛ 'wʋ a'a-a libho nʋ a 'yɛ yʋlɔ, ɛ -dɩdɩɛ n tiaya-a 'wʋ, -mʋmʋa kɛ cɛ yʋlɔnʋ 'bhë, 'n a ji-a -nɩ wa yʋlɔyʋlʋɛ 'mö -sa.”
Samalie nɩkpa yɛ Zezwie wɛlɩ 'wʋ nglu
39Dɩ la'a 'nglɔ -sa la-a naa, -ɩ la'a 'bhuo n nʋ la-a 'mɩ ɔ -sanɩ'ɩ -bha-a, ɩ 'wlumö 'n Samalie gbë la'a 'möö nɩkpaa -bɛ ji-a Zezwi dlɩ 'wʋ -ka. 40Samalie nɩkpa ji-a, wa nyini-e -bha Zezwi yawʋ-ɔ, 'n wa jio-a yawʋ bhia naa, ɔ gʋ-ʋ -ma wa 'bhɛyɩ. Ɔ -sa-a -ma 'ylɩ 'sɔ. 41Wa 'nʋ-a ɔ 'bhëë nglie wɛlɩ, 'n ɔ dlɩwʋkangwa ji-a zumanɩ. 42'N wa nʋ-ɔ -bha 'nglɔɔ de naa: “Ɛ'ɛ -lɛ-a 'mö -na -sasadɩɛ wlumö -a kɔ-a 'mö dlɩ 'wʋ, -aa 'bhï yɛ-a 'mö ɔ nglie wɛlɩ 'nʋ 'bhë, -a -ji 'yɛ sɛ naa mɔ-ɔ -yɛ-a 'dɛdɛ'ɛ 'pɩ-ɩ bhëë Puanyɔ.”
43Ylɩ la'a 'sɔ 'plɩ-a, ɔ -sɔ-a 'wʋ 'n ɔ ji-a Galile mö. 44-Wʋʋ yɛ-a, Zezwie 'bhë kɩ la gba 'bhë naa: “Wa'a 'wɔlʋmanɩ -Lagɔɔ 'mögbanɩnyɔ -ma ɔjɩɛ 'bhɛyɩ 'wʋ.” 45Zezwi nyini-e -ma Galile-e, -maa nɩkpa 'bhuo -ɩ la'a ɔ nʋ-ɔ -ma Zelwizalɛmö, -ma 'pɩpɩ 'wʋ 'mɩ wa yɩlɩ-aa yɛ 'jinanɩswɩ'ɩ wa köbhɔ -bha. Wa -nɩ 'bhï -ma 'mɛ 'pɩpɩ 'wʋ wa 'bhö-ö la 'yɛ-a -nɩ.
Zezwi yɛ 'slʋjaa 'bhitɩbha -bhlʋɔ 'gu göpö
46-Ma Galilee dʋdʋ -gömöö -glɔ wa la-a Kana, ma Zezwi zɩzlanɩ la-a 'nyu nʋ-ɔ, 'n ɔ ji-e -ma nimï mö. -Ma Kapɛnaɔmöö 'gbë 'mö, 'slʋjaa 'bhitɩbha -bhlʋ -wʋ la-a -ma, ɔ 'gu gu -wʋ la-a 'lɩbha 'le. 47'Slʋjaa 'bhitɩbha la'a 'nʋ-ɔ naa, Zezwi yɛ -ma Zwidee dʋdʋ -gömö 'bhö-ö ɔ yɛ -ma Galilee dʋdʋ -gömö ji 'bhë-ë, ɔ -sɔ-a 'wʋ 'n ɔ jio-o -ma ghlɩ. 'N ɔ jio-a yawʋ bhia naa, ɔ mö ɔ 'yɛ ɔ 'gu göpö, tlɩtlɩswɩ'ɩ ɔ -wʋ -bha. 48Zezwi nɛ -bha ɔ de naa: “A nɩ -lɛ bhatɩ -yɛ zɩzɛli 'sɔ yɩlɩ 'bhë, a nɩ'ɩ dlɩ 'wʋ -ka.” 49Ɔ gba-a sa'a, 'slʋjaa 'bhitɩbha nɛ: “Nyininyɔ, bhla na 'gu 'nɩ-ɛ -bhla tlɩ, ji.” 50Zezwi nɛ: “Mö, -na 'gu yɛ 'pʋ 'bhë.” -Ɩ Zezwi gba-a nɩkpɛ la'aa de ɔ kɩ dlɩ 'wʋɔ yɛ, 'n ɔ ji-a 'yuogblʋ 'wʋ 'libhï. 51Ɔ-ɔ nimï mö 'le, ɔ namö 'yuogblʋ'ʋ, ɔ nyɩgbajʋlʋɩ möɔ-a 'yuo, 'n wa jio-a 'dɩ -sanɩ naa, ɔ 'gu yɛ 'pʋ 'bhë. 52'N ɔ jua-a ngli 'jɩbha naa, 'glie -mɛɛ 'mö ɔ 'pʋ-a 'nɩ? Wa nɛ: “-Legbli'ie -dudoglie -bhlʋ 'mö ɔ nɩma nanɩmanɩ-a 'ji.” 53'N 'guo -tɩbhaa dlɩ ji-e -bha bhlinɩ naa, 'glie -ɛɛ 'mö Zezwi nʋ la-a ɔ de naa: “-Na 'gu yɛ 'pʋ 'bhë” mɛ -bha. Ɔ -yɛ ɔ -kosu 'jie nɩkpa 'bhuo 'sɔ, 'n wa ji-a Zezwi dlɩ 'wʋ -ka. 54'Ma 'sɔ -bhata -ma la'a, Zezwi yɛ -ma Zwidee dʋdʋ -gömö 'bhö-ö, ɔ yɛ -ma Galilee dʋdʋ -gömö nimï ji 'bhë 'n ɔ jia-a nɛ nʋ.
Seçili Olanlar:
ZAA 'BƆGƲ 4: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996