MATIEE 'BƆGƲ 12
12
Zezwi yɛ 'zwiföaa -gwlɛnɩzlɩɛ gbʋ gba
1 -Gwlɛnɩzlɩ -bhlʋɔ 'mö, Zezwi -yɛ ɔ 'wʋbhlinɩngwa 'sɔ-ɔ -ma 'lagbli'ie 'plɩnɩ 'le-e, ngɔmʋ 'lɩbha-a ɔ 'wʋbhlinɩngwa, wa -yɛ lili ghayɩ -dɩnɩ 'n wa liɩ -bha. 2Falizɩɛ yɩlʋa-a, wa nɛ -bha Zezwie de naa: “Yie, -ɩ -aa gbö nʋ la-a -a 'na-a nʋ -gwlɛnɩzlɩ -nɩ, 'mɩ -na 'wʋbhlinɩngwa -wʋ-ɔ -la nʋ 'le.” 3Zezwi nɛ naa: “-Ma -Lagɔwɛlɩɛ 'bɔgʋ 'mö, -ɩ Davidɩ nʋ-a -ɩ 'cɛlɩɔ-ɔ -ma, a 'nɩɩ-ɩ zɛlɩ 'nɩ-ɩ? La ɔ -yɛ ɔ 'wʋbhlinɩngwa 'sɔ ngɔmʋ 'lɩbhʋa-a, 4sa ɔ pla-a -ma -Lagɔbudu 'kadʋ 'mö, 'n ɔ ji-a -Lagɔɔ bʋbɔnʋfʋlo 'wʋ 'libhï, 'n ɔ -yɛ ɔ 'wʋbhlinɩngwa 'sɔ jiʋ-a li. -Sɩbhaa 'fʋlo la'a -aa gböö do'o, ɔ 'na 'kʋ la li, -Lagɔbʋbɔngwaa 'nyizee lililu -bha. 5-Ma -Lagɔɔ gböö 'bɔgʋ 'mö sa'a ɩ 'cɛlɩɔ-ɔ -ma naa: -Gwlɛnɩzlɩ-ɛ, -bha -Lagɔbʋbɔngwa sa-a ɛ gbö 'kɔmʋʋ, -wʋʋ yɛ-a, -ma -Lagɔbudu 'kadʋ 'mö wa libho wa nʋ -bha, -bɛ 'nɩ kʋa ɩ yɛ gbʋ 'wʋ, 'mɩ wɛlɩ la'a a 'nɩɩ-ɩ 'yɛ zɛlɩ 'nɩ-ɩ? 6Sa -Lagɔbudu 'kadʋ 'möö libho ka-a dlɩ yɛ 'n ʋ zia -gwlɛnɩzlɩ 'wʋ-ɔ, -lu -ʋ ka-a -sɩbha dlɩ yɛ -ʋ zia -Lagɔbudu 'kadʋ 'möö libho 'wʋ, ʋ-ʋ la'a a gla'a. 7-Ma -Lagɔwɛlɩɛ 'bɔgʋ 'mö, wɛlɩköbhë -aa 'mö -Lagɔ gba-a naa:
Ngazɩdlɩkakɩɛ n 'jɩbha-a
nɩmaa bʋbɔnʋbʋbɔnʋɛ bhla,
a -yɛ la a zɔmö jɩblɩnɩ-ɛ, nɩkpa -wa 'nɩ-a -lu 'ji nyimanɩ a 'na 'kʋa la gbʋ 'wʋ kwa. 8-Wʋʋ yɛ-a, Nɩkpɛɛ 'Guo bhë-ë nyini-a -gwlɛnɩzlɩ.”
Zezwi yɛ -gwlɛnɩzlɩ nɩkpɛ -bhlʋ -göpö
9Zezwi 'bhö-ö -bha, 'n ɔ ji-e -ma wa -Lagɔbudu'u mö. 10-Ma -Lagɔbudu la'aa 'mö nɩkpɛ -bhlʋ -wʋ la-a -ma, ɔ kɔtɩkpa -yɛ a 'yɛɔ la -bha. -Wa -wʋ la-a -ma wa 'yɛ Zezwi gbʋ köbha-aa yɛ, 'n wa jio-a ngli 'jɩbha naa: “-Ma -aa gbö 'mö wa bhɛlɩ wa 'yɛ -gwlɛnɩzlɩ nɩkpɛ göpö 'nɩ-ɩ?” 11Wa 'jɩbhɔ-ɔ -sɩbha ngli, Zezwi nɛ naa: “A gla'aa nɩkpɛ -mɔɔ wli -yɛ-a -gwlɛnɩzlɩ 'bhʋkwa 'mö bhlinɩ -ɔ 'na 'kɛ-a -ma -sa 'nɩ? 12Nɩkpɛ -yɛ wli 'sɔɔ do'o -mɔ ka-a dlɩ yɛ 'nɩ? -Aa gbö nɛ -a nʋ -lie -li -gwlɛnɩzlɩ.” 13Ɔ gba-a sa'a 'bhë, ɔ nɛ -bha nɩkpɛ la'aa de naa: “Plu -na kɔtɩkpa 'mö.” Ɔ plua-a 'mö 'n a ji-a 'pʋ 'n a ji-a -mabhaa swɩ'ɩ zʋ. 14-Bha -gaganɩlɩ'ɩ, 'n falizɩɛ -wa -wʋ la-a -ma ji-a 'pɩ 'wlʋ. Sa wa 'yɛ-a 'mö zʋzʋnʋ wa 'yɛ Zezwi 'lɩbha, 'n wa ji-a ɩ yɩlɩ pɛ.
Nyɩgbajʋlʋ -ɔ -Lagɔ -sa-a -bha
15Zezwi jɩblɩnɩ-a ɩ sɛ-ɛ, ɔ 'bhö-ö -bha, 'n ɔ ji-a mö. Nɩkpa -bebe -wa bhlinɩɔ-a 'bɩ -sɩbha ɔ göpö-a wa gla'aa guzungwa 'bhuo. 16'N ɔ jua-a 'dɩ 'nyɛ naa, wa'a bia ɔ 'nglɩ yɛ -nɩ. 17-Wʋʋ yɛ ɩ 'plɩ-ɛ -sɩbha, wɛlɩ -ɩ -benyido'oo -Lagɔɔ 'mögbanɩnyɔ Ezayi gba la-a, ɩ 'yɛ 'wʋ 'wlenɩɛ yɛ -bha. Sa'a ɔ gba la-a naa:
18“-Lagɔ nɛ:
Na nyɩgbajʋlʋ n -sa-a -bha mɔ-ɔ la'a,
'mɔ n 'jɩbha-a tenyi,
mɔ-ɔ -yɛ-a na dlɩ zɔmöö 'mʋna bhuo,
na Zuzu n jio-a -gömö zʋɔ,
ɔ 'yɛ-a 'möslɛnɩyuogblʋɔ wɛlɩ 'pɩnɩkpa 'bhuo ngli 'pa.
19Ɔ -yɛ nɩkpɛ 'na 'lʋ,
ɔ 'na nyla, -bɛ 'na ɔ wɛlɩ -glodu'u 'nʋnʋ.
20Sa sukle -yɛ la'a 'mö jɔnʋ,
wa'a 'katɛ-a, -sɩbha ɔ ji-a nɩkpaa de -wʋ-ɔ.
'Napɛ -ɛɛ dalɩ-ɩ 'nɩ-a 'mö 'tɛ-ɛ, ɔ 'na 'kɛ 'ngïma,
'kwa 'na 'kɔ yawʋ tlɩnɩ 'lɩlɩlɩ,
-ɩ slɛnɩ-ɛ -bha -Lagɔ 'ji 'klʋ 'mö 'yɛ-a 'wlu tʋnʋ.
21'Mɔ dʋdʋkpata 'bhuo -gömöö nɩkpa ji-a dlɩ 'tɛnɩɛ.”
Falizɩɛ yɛ Zezwie de 'jinylɔwɛlɩ gba
22'Ylɩ -bhlʋ, 'n wa ji-a Zezwi nɩkpɛ -bhlʋ -la. 'Jinylozuzuko ɔ ka la-a -gömö a yɛ ɔ'ɔ sɛ jɩnɩ, bhobho la 'yɛ -bha. Zezwi göpöɔ-a, 'n ɔ 'jie ji-a 'kaluo, 'n ɔ ji-a gbʋ -dɩ. 23Nɩkpa bhuo -wʋ la-a -bha, ngli-i mönʋa-a tenyi 'n wa 'jɩbhajɩbhanɩ-a ngli naa: “Puanyɔ -ɔ ji la-a jie, Davidɩɛ 'Gu mɔ-ɔ 'nɩ bhe -la -wʋ?” 24Falizɩɛ 'nʋ-a -ɩ la'a, wa nɛ naa: “'Jinylozuzukuo 'bhitɩbha Bɛlɩzebulɩ nɩkpɛ -la ka-a -gömö, mɔ-ɔ 'nyɔ-a 'gbaa yɛ ɔ kpëti-a nɩkpa 'jinylozuzuku -gömö.” 25Zezwi -ji wa dlɩpapɩɛ yɛ, ɔ nɛ -bha wa de naa: “Dʋdʋ -bhlʋ -gömöö nɩkpa -yɛ 'mö donʋ, wa 'bhïë 'nyize -yɛ tʋ gwɩ sɛ ʋ 'sɔ-ɔ -bha. -Glɔ -bhlʋ 'möö nɩkpa -yɛ 'mö donʋ sɛ ʋ yɩla -bha. -Kosu -bhlʋ 'jie nɩkpa -yɛ 'yɛ 'mö donʋ, ʋ 'na gwlɛ. 26'Jinylozuzuko -yɛ a lijinylozuzuko kpëti-e, 'mö ɩ donʋ -bhaa yɛ, sɛ ɩ 'gba ji-a yɩla. 27A nʋ-ɔ naa Bɛlɩzebulɩ nyɛ'ɛ-a 'gbaa yɛ n -wʋ-a 'jinylozuzuku nɩkpa -gömö kpëti 'le-e, a gla'aa -lʋaa -nɩ -mɔ nyʋa 'mö-a -nɩ 'gba 'n wa kpëti-a nɩkpa 'jinylozuzuku -gömö 'nɩ? A gla'aa nɩkpa jiya-a gbʋ köbhaa. 28'N ɛ -yɛ -Lagɔɔ Zuzu nya n -wʋ nɩkpa 'jinylozuzuku -gömö kpëti 'le glɩnɩ-ɛ, a jɩblɩnɩ sɛ naa -Lagɔɔ nyininyinipɩ kaya ghlɩ 'bhë.” 29Ɔ nɛ 'yɛ naa: “Sa nɩkpɛ bhɛlɩ-a ɔ 'yɛ -ma kalɩkalɩnyɔɔ -budu'u 'mö plaplanɩ ɔ 'yɛ ɔ -li 'wʋ 'libhï 'n ɔ nɩ -lɛ 'mɔ kalɩkalɩnyɔ la'a gwa 'bhë 'nɩ? Ɔ -kɔɔ gwa 'mɩ ɔ ji-a ɔ -li 'wʋ 'libhïë. 30Wʋ yɛ n gba-a sa'a a de naa: -Ɔ n -nyɔɔ nɩ 'sɔ -wʋ-ɔ, na tʋnyɔ -bha. -Ɔ nɩ'ɩ 'wlutitanɩtitanɩɛ kwanɩ-ɛ, -lie vɩvɩnyɔ -bha. 31'Dɩɛ -dɩ n nyɛya -bha naa: 'Jinylolie -gɔpö 'bhuo nɩkpa nʋ-a, 'jinylɔwɛlɩ la'a 'bhuo wa gba-a, -Lagɔ ji ɩ gbʋ 'ji 'tatinɩ. 'N -ɔ -yɛ -Lagɔɔ Zuzu ngli nyimanɩ-ɛ, -Lagɔ 'na ɩ gbʋ 'ji 'tatinɩ 'lɩlɩlɩ. 32Sa'a n gba-a naa: -Ɔ -yɛ Nɩkpɛɛ 'Gu ngli nyimanɩ-ɛ, -Lagɔ ji ɩ gbʋ 'ji 'tatinɩ, 'n -ɔ -yɛ Zuzu 'Wlawla ngli nyimanɩ-ɛ, ɛ ji pɩ la'aa 'mö glɩnɩ, ɛ ji pɩ -ɛ ji-a jie 'mö glɩnɩ-ɛ, -Lagɔ 'na ɩ gbʋ 'ji 'tatinɩ 'lɩlɩlɩ.
Su -yɛ ʋ 'bhï 'sɔɔ wɛlɩ
33La a nʋ-a su la'a suo -su -bha, 'bhïë -bhï ʋ tlʋ -bhaa yɛ -bha. -Mʋ a nɩ suo -su la, ʋ'ʋ tlʋ 'bhïë bhïë yɛ -bha. -Wʋʋ yɛ-a, swie -gɔpö 'bhuo ɩ tlʋtlʋbhï 'mö wa jɩblɩnɩɩ -bha. 34'Mʋtɩmabhönɩkpayi, abha kla-a nyanɩ, samɩ wɛlɩɛ -wɛlɩ bhɛlɩ la bhe ɩ 'kaya ngli 'mö 'wlʋwlʋnʋ 'nɩ? -Wʋʋ -yɛ-a, -ɩ ye-a nɩkpɛ dlɩ 'klʋ 'mɩ ɔ gba -bha. 35Nɩkpɛ -ɔɔ dlɩ-ɩ nanɩ-a 'ji-e, -ma ɔ dlɩ zɔmöö -lie -li -wʋ-ɔ -ma, mɩ-ɩ wlʋ-ɔ -ma ɔ ngli. -Ɔɔ dlɩ-ɩ -nyua 'ji-e, -ma ɔ dlɩ zɔmöö 'jinyloli -wʋ-ɔ -ma mɩ-ɩ wlʋ-ɔ -ma ɔ ngli. 36'Dɩ n nyɛya -bha naa: -Lagɔɔ -zijlee zlɩ -yɛ nyini-e, kpakpawɛlɩ la'a 'bhuo nɩkpa gba-a ma'a dʋdʋkpata -gömö, ɩ yɛ -Lagɔ jua-a ngli 'jɩbhaa. 37-Wʋʋ yɛ-a, -bha -Lagɔɔ 'ji 'klʋ, -na gbagbawɛlɩ -jimö-a gbʋ -gömö -saa, mɩ-ɩ -jimö 'yɛ-a gbʋ köbhaa.”
-Ɩ Zezwi gba-a nɩkpa -wa 'jɩbha-a jɩblɩnaa de
38Zezwi gba-a sa'a, 'n -Lagɔɔ gböö nglipangwa gla'aa nɩkpa -yɛ falizɩɛ gla'aa nɩkpa 'sɔ ji-a gbʋ -dɩ, wa nɛ naa: “-Abhitɩbha, -a 'jɩbha -n 'yɛ la'a -aa 'jie 'klʋ jɩblɩna -bhlʋ nɛ nʋnʋ.” 39Zezwi nɛ naa: “Abha -sɩka'aa nɩkpa glɩnɩ-a nyanɩklangwa, abha panɩ-a -Lagɔ -gömö, abha 'jɩbha-a jɩblɩnaa? N 'na 'kaya kaböjɩblɩna 'ji tuluanɩ 'n ɛ nɩ -benyido'oo -Lagɔɔ 'mögbanɩnyɔ Zonasɩɛ -la glɩnɩ. 40Sa Zonasɩ -sa-a -ma zibhiyi 'kadɛɛ 'mlɩ 'ylɩ ta, -sɩbha Nɩkpɛɛ 'Gu ji 'yɛ-a -nɩ -ma glu 'ylɩ ta -saa 'bhë ɔ 'yɛ -ma 'wlʋ. 41-Lagɔɔ -zijle 'kadaa zlɩ -yɛ nyini-e, -ɩ Ninivöö nɩkpa nʋ-a, mɩ-ɩ jiya-a gbʋ köbhaa, -wʋʋ yɛ-a, Zonasɩ 'nyʋa-a -Lagɔwɛlɩ, ligba wa ligba -bha 'n wa ji-a wa 'jinyloli cɛ 'mö -sa. -Ma ɩ 'mö, -ɔɔ 'bhë-ë -yɛ-a 'kadɔ -ɔ zi-a Zonasɩ 'wʋ ɔ-ɔ la'a. 42-Lagɔɔ -zijlee zlɩ -yɛ nyini-e, -ɩ dʋdʋ wa la-a Sebaa nyininyininglɔ nʋ-a, mɩ-ɩ ji-a -zɩkazɩnɩ'ɩɛ nɩkpa gbʋ köbhaa. -Wʋʋ yɛ-a, -ma 'mɔ 'nglɔ 'bhö-a dʋdʋkpataa 'bhlonʋbhɛyɩ 'n ɔ ji-a dʋdʋnyininyɔ Salomɔɔ gbajinɩwɛlɩ 'yukwli -pönɩ kwla'a ji. -Ma ɩ 'mö, -ɔɔ bhë-ë -yɛ-a 'kadɔ -ɔ zi-a Salomɔ 'wʋ, ɔ-ɔ la'a.
'Jinylozuzuko -yɛ nɩkpɛ -gömö 'bhö-ö a bhɛlɩ a 'yɛ nimï ji
43'Jinylozuzuko -yɛ nɩkpɛ -gömö 'bhö-ö, -ma 'mïsekpa 'klʋ a mö-a 'n a zizinɩ-ɛ -ma 'mö, 'n a yɩlɩ-a glɩde yɛ, a nɩ glɩde ghlɩ-ɛ, 44'n a nʋ-a, 'wlu n ji-a 'mö 'bhɩla, la n 'wlʋ la-a n 'yɛ -bha nimï mö. 'Ma 'jinylozuzuko -yɛ nimï ji-e, la a 'bhö-ö la-a -bha -yɛ 'ji nanɩ, 45nimï a mö -bha 'n a ku-a 'jinylozuzuku -mɩmɩ -ngbisɔ -ɩ 'tɛ-a 'mö -ɩ zia-a. 'N ɩ ji-e -ma nɩkpɛ la'a -gömö. -Bhaa do'o, 'mɔ nɩkpɛ la'aa yʋlɔyʋlʋ 'mö ʋ 'tamanɩ-a tenyi 'n ʋ zi-a -tɩtɛɛ yʋlɔyʋlʋ 'wʋ. Abha -zɩnɩ'ɩɛ nɩkpa kla-a nyanɩ, -sɩbha a gbʋ ji-a 'mö -wʋɔ.”
-Wa glɩnɩ-a Zezwie nyʋaa -nyʋa
46Zezwie -bhla wa de gba 'le, 'n ɔ -da -yɛ ɔ -dagwie 'sɔ ji-a ji. Wa 'jɩbha la wa 'yɛ ɔ de gbaa yɛ wa 'nɩgbö -ma 'pɩ. 47'N nɩkpɛ -bhlʋ jio-a 'dɩ kwa, ɔ nɛ naa: “-Na -da -yɛ -na -dagwie 'sɔ glɩ -ma 'pɩ, wa 'jɩbha wa 'yɛ -na de gba.” 48'N Zezwi ji-a nɩkpɛ la'a ngli 'jɩbha naa: “-Mɔ -yɛ-a na -da -yɛ na -dagwie sɔ 'nɩ?” 49'N ɔ ji-a ɔ 'wʋbhlinɩngwa su la-a -bha cɛ 'wʋ 'pa. Ɔ nɛ naa: “Yie, na -da -yɛ na -dagwie 'sɔ mʋa-a -la. 50-Wʋʋ yɛ-a, na -Tɩbha -Lagɔ -ʋ -wʋ-ɔ ma -Lagɔtapɛ'ɛ, -ɩ la'a ʋ 'jɩbha-a -ɔ nʋɩ-a, mɔ-ɔ -yɛ-a na -dagunyɩbhɛlʋgu, mɔ-ɔ -yɛ-a na -dagunglugu, mɔ-ɔ -yɛ-a na -da.”
Seçili Olanlar:
MATIEE 'BƆGƲ 12: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996