MATIEE 'BƆGƲ 14
14
Sa Za Badizɩ tlɩtlɩnɩ-a 'mö
1-Bhaa do'o, Galilee dʋdʋnyininyɔ Elodɩ 'nʋ-a Zezwie nʋnʋlie 'dɩ, 2ɔ nɛ -bha ɔ nyɩgbajʋlʋɩɛ de naa: “Nɩkpɛ -la, Za Badizɩ -bha, 'kudungwa 'gbamö ɔ 'wlʋ-aa yɛ ɔ ka-a 'gba 'n ɔ -wʋ-a bhatɩ nɛ nʋ 'le.” 3'Mɔ Elodɩ, mɔ-ɔ -sa la-a ɔjɩɛ -dagu Filipö 'nglɔ yawʋ. 'Mɔ 'nglɔɔ nglɩ-ɩ -yɛ-a Elodiadɩ. Ɔ wɛlɩɛ yɛ 'n Elodɩ ji-a nɩkpa tia naa wa köbha Za Badizɩ. Wa gɔ-a 'n wa jio-a -die 'mö 'pa. 4-Wʋʋ yɛ-a, Za Badizɩ nʋ la-a -bha ɔ de naa: “Ɔ'ɔ -lɛ bhɛlɩ ɔ 'yɛ -na 'nglɔ glɩnɩ.” 5Elodɩ 'jɩbha la ɔ 'yɛ nʋ wa 'lɩbha Za Badizɩ 'bhë-ë, nɩkpaa 'ji ɔ -wʋ la-a -gu 'lee yɛ ɔ'ɔ la bhɛlɩ. -Wʋʋ yɛ-a, -Lagɔɔ 'mögbanɩnyɔ 'wʋ wa libhï la-a Za Badizɩ 'wʋ. 6'Ylɩ -bhlʋ, Elodɩɛ gwalɩgwalɩzlɩɛ 'wʋbhlizlɩ nyini-a, nɩkpa ɔ wɔzɩ la-aa 'ji 'klʋ, 'n Elodiadɩɛ nglugu ji-e -bha jɩnɩ, 'n ɔ jɩjɩbhʋ ji-a Elodɩ dlɩ 'mlɩ -sa. 7Ɩ yɛ 'n ɔ jio-a cɛ zlugonʋ naa, 'manɩluo 'bhë ɔ -kɔɔ 'jɩbhanɩ, ɔ jio 'ye 'nyɛ. 8Elodɩ gba-a -sɩbha, -daa 'dɩmözʋwɛlɩɛ yɛ nglugu nɛ naa: “Zʋ -sɩka'a Za Badizɩɛ 'wlukple -ma 'bëë 'mö yɛ -n -kamö'öa -la.” 9-Bha -gaganɩlɩ'ɩ 'n 'kalɛ ji-a Elodɩ dlɩ zɔmö bhlinɩ. Ɔ yɛ la -bha nɩkpaa 'ji 'klʋ nglugu cɛ zlugonʋ 'bhëë yɛ, ɔ'ɔ la-a 'mö 'jɩbha ɔ 'yɛ -bha ɔ wɛlɩ -sa. 'N ɔ jiɩ-a 'wʋ nglu. 10'N ɔ ji-a nɩkpɛ -ma -diebudu'u tia, 'n ɔ ji-a Za 'wlu 'wʋ -dɩ. 11Ɔ zʋ-ɔ -ma 'bëë 'mö ɔ 'wlukple, 'n ɔ jia-a nglugu 'ye 'nyɛ, 'n nglugu jia-a ɔ -da kwa. 12Za Badizɩɛ 'wʋbhlinɩngwa 'nʋ-a ɔ tlɩtlɩdɩ-ɛ, 'n wa ji-a ɔ -gazɛ ye mö, wa zʋɛ-a 'bhë 'n wa ji-a Zezwi 'dɩ kwa.
Zezwi yɛ nɩkpaa -bebe lilie 'nyɛ
13Zezwi 'nʋɩ-a, ɔ -sɔ-a 'wʋ 'n ɔ ji-e -ma 'gɔlʋ 'mö -gbla ɔ 'yɛ -ma yawʋdobhle -bhlʋ 'klʋ möö yɛ. Nɩkpa 'nʋɩ-a, wa 'bhönɩ -ma -gwlɩ 'bhuo -gömö, wa-a kpli namönɩ 'le 'n wa jio-a 'bɩ mö. 14'Gɔlʋ sɩbha-a 'nyie 'kïkë ngo, Zezwi 'sibhë-a yɛ, nɩkpa su -bha 'nyi ngo'o, ɔ yɩlʋa-a, wa 'bɩ 'mö ngazɩ 'lɩbhɔ-a tenyi. 'N ɔ ji-a wa guzungwa göpö.
15-Dudo'o nyini-a, 'n Zezwie 'wʋbhlinɩngwa jio-a yawʋ nyini. Wa nɛ: “-Abhitɩbha, yawʋdobhle klʋ -a glɩ-ɛ la'a, zlɩ yɛ flanɩ 'bhë, 'nyɛ nɩkpa 'dɩ wa 'yɛ -ma 'gbï 'mö lili -pɩa kwla'a mö, wa 'yɛ li.” 16Zezwi nɛ naa: “Wa'a mömöklʋ -ka. A 'bhï 'nyʋa lili.” 17Wa nɛ naa: “'Fʋloku -ngbï zibhï ja 'sɔɔ 'nyize -a -su -bha.” 18Ɔ nɛ: “A -lamɩ'ɩ.” 19Wa -nyɩɩ ji-a, 'n ɔ ji-a nɩkpa 'dɩ 'nyɛ naa, wa glɩ -bha -putuko -gömö yɛ. Ɔ 'libhï-a 'fʋloku la'a -ngbï -yɛ zibhï -ja la'a 'sɔ 'wʋ, ɔ yɩlɩ-a ghayɩ, 'n ɔ ji-a -Lagɔ bhalɩ, ɔ -dɩdɩnɩɩ-a 'mö 'n ɔ jiɩ-a ɔ 'wʋbhlinɩngwa 'ye 'nyɛ, 'n wa jiɩ-a nɩkpa cɛ dlinɩ. 20Wa 'bhuo li-a, 'n wa ji-a lʋ. 'Fʋlokukïbhï -yɛ zibhïkïbhï sɔ-ɔ tʋ-a 'wʋ wa 'libhiɩ-a, ɩ yena -köka kugbïa 'sɔ. 21Nɩkpa -wa li-a lili la'a wa gla'aa nyɩbhɛlɩɛ 'bhïë 'nyizee nɩkpaa 'wli -ngbï, 'ngwlɩ -yɛ 'gwie 'sɔ 'nɩ 'zɛlɩɔ.
Zezwi yɛ -bha 'nyi 'klʋ namönɩ
22Wa bhɩa-a lilie 'ji tɔngʋ, 'n Zezwi ji-a ɔ 'wʋbhlinɩngwa 'dɩ 'nyɛ naa wa -gbla 'gɔlʋ 'mö wa 'yɛ -ma 'nyie kïkë -mabhaa -gömö 'yu 'plɩ, ɔ 'yɛ nɩkpa ngo -gömö -sa wa 'yɛ mö. 23Nɩkpa mö-a 'bhë-ë, 'n ɔ ji-e -ma -gɔgɔgbʋ 'klʋ mö, ɔ 'yɛ -Lagɔ -bɛlɩ 'paa yɛ. Ɔ -bhlʋ glɩ -ma 'n sɛ ji-a julu. 24Ɔ glɩ -bhla -ma 'n ɔ 'wʋbhlinɩngwa -yɛ 'gɔlʋ ji-e -ma 'nyi nyɩdɩ nyini. Nyɔmʋ -wʋ la-a 'pa 'lee yɛ, 'n gïnyie -gbɔkɔlɩ -wʋ-a 'gɔlʋ 'yuo -sa 'le. 25Zlɩzɩdo'o, Zezwi -sɔ-a 'wʋ, ɔ-ɔ -bha 'nyi 'klʋ namönɩ 'le 'n ɔ jua-a 'wʋ mö. 26Ɔ 'wʋbhlinɩngwa yɩlɩɔ-ɔ -bha 'nyi 'klʋɔ namönɩlɩ'ɩ-ɛ, -kakö-ö bhlinʋa-a ku 'mö. 'Kuë wa -tɔnʋɔ-aa yɛ nganɔ -wʋʋa 'lɩbha 'le 'n wa ji-a 'mö 'kpö. 27'N Zezwi ji-a gbʋ -dɩ, ɔ nɛ -bha wa de naa: “A sulu dlɩ yɛ, -amö -bha. A 'na-a nganɩ -nɩ.” 28Piɛlɩ nɛ: “Nyininyɔ, ɛ -yɛ 'dɛdɛ'ɛ -nmö glɩnɩ-ɛ, gba n 'yɛ na-a -bha 'nyi 'klʋ namönɩ n -kamö -ma ghlɩ.” 29Zezwi nɛ: “Ji!” Piɛlɩ 'wlʋ-ɔ -ma 'gɔlʋ 'mö, ɔ-ɔ 'nyi 'klʋ namönɩ 'le, 'n ɔ -wʋ-a Zezwi 'wʋ mö 'le. 30Ɔ yɩlɩ-a nyɔmʋɔ -zunɔ 'wʋ, nganɔ 'lɩbhɔ -bha, 'möna 'le ɔ -wʋ-aa yɛ, 'n ɔ ji-a 'mö 'kpö, ɔ nɛ: “Nyininyɔ, ji'i 'wʋ.” 31-Bha -gaganɩlɩ'ɩ Zezwi plu-a sɔ 'mö, 'n ɔ jio-a köbha. Ɔ nɛ: “Nɩkpɛ -ɔ 'nɩ 'jinanɩswɩ'ɩ -Lagɔ dlɩ 'wʋ -ka, 'manɩɛ yɛ -n dudua 'nɩ?” 32Wa 'sɔ -kpɔ -gbla-a -ma 'gɔlʋ 'mö 'n nyɔmʋ ji-a 'wʋ donʋ. 33-Mʋa -wʋ la-a -ma 'gɔlʋ 'mö, 'n wa ji-e -bha ɔ dlɩ'ɩ -kokomunigbö glu 'pa, wa nɛ: “'Dɛdɛɛ -n glɩnɩ-a -Lagɔɔ Gu.”
Zezwi yɛ Zenezalɛtɩɛ dʋdʋ -gömöö guzungwaa -bɛ göpö
34Wa -dɩ-a gïnyi 'mö-ö, dʋdʋ wa la-a Zenezalɛtɩ wa sɩbhʋ-a ngo, 'n wa ji-a 'gɔlʋ 'nɩgbanɩ. 35-Maa nɩkpa jɩblɩnɩ-a Zezwi, 'n wa ji-a ɔ jijidɩ -ma yawʋɔ -gwlɩ 'bhuo -gömö bia, 'n wa jio-a guzungwa -la. 36'N wa pɔ-a -bɛlɩ naa, ɔ nglu guzungwa 'yɛ ɔ -banaa klee 'fʋ cɛ zʋ. -Wa 'bhuo-o zʋa-a cɛ, 'pʋ wa 'pʋ -bha.
Seçili Olanlar:
MATIEE 'BƆGƲ 14: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996