MATIEE 'BƆGƲ 21
21
Zezwi yɛ -ma Zelwizalɛmö nyini
1Zezwi -yɛ ɔ 'wʋbhlinɩngwa 'sɔ 'yɛ -ma Zelwizalɛmö nyinie ji-e, -bha 'yuogblʋ'ʋ -gɔgɔgbʋ -bhlʋ wa la-a Olivieswie -gɔgɔgbʋ zɔmöö -glɔ wa la-a Bɛtɩfaze yawʋ, wa nyini-e -bha, 'n ɔ ji-a ɔ 'wʋbhlinɩngwaa gla'aa nɩkpa 'sɔ tia. 2Ɔ nɛ -bha wa de naa: “'Gbë a jɩnɩ-ɛ -la 'wʋɔ 'mö, a mö -ma, a -yɛ -ma a 'mö pla bhleemö, -sʋkʋfalʋnglɔ -yɛ ʋ 'gu 'sɔ 'glɔ-ɔ -bha. A bulonʋɩ a -kamɩ'ɩ -la. 3Nɩkpɛ kaya gbʋ 'wʋ -dɩ-ɛ, a nʋ naa: Nyininyɔ 'jɩbhɩ -bha. A -yɛ -sɩbha gba 'gamö, cɛ ɔ jiya-a yawʋ -saa a -nyɩɩ 'yɛ ji.” 4-Ɩɩ yɛ Zezwi nʋ-ɔ -sɩbha, -ɩ la'a -ɩ -Lagɔɔ 'mögbanɩnyɔ gba la-a 'yɛ 'wʋ 'wlenɩɛ yɛ -bha. Sa'a naa:
5“A 'nyɛ Zelwizalɛmö 'dɩ naa:
-Na Nyininyɔ -wʋ-ɔ -ma ji 'le.
Ɔ'ɔ yakalɩ -ka, ɔ glɩ -sʋkʋfalʋgu -gömö,
-sʋkʋfalʋnglɔɔ 'gu.”
6'N Zezwie 'wʋbhlinɩngwa la'a 'sɔ ji-a mö, sa Zezwi nʋ la-a wa nʋ, 'n wa ji-e -sɩbha nʋ. 7-Sʋkʋfalʋnglɔ -yɛ ʋ 'gu 'sɔ, 'n wa -nyɩɩ ji-a ji, -bha ɩ -gömö wa lʋlʋ-ɔ -bha wa -banɩ, 'n wa ji-a Zezwi -bha -gömö sɛ zʋ. 8Wa-a 'mö 'le, 'n nɩkpaa -bɛ ji-e -bha 'yuogblʋ'ʋ wa -banɩ lʋlʋ, 'n -mʋmʋa ji-a -patɩ -dɩ, 'n wa jiɩ-e -bha 'yuogblʋ'ʋ sɛ sulu. 9'N nɩkpa -wa -ganʋa-a 'yu, wa -yɛ -mʋa -ga -ma nimï 'sɔ kpö-a 'mö. 'N wa nʋa: “Davidɩɛ 'Guo 'nglɩ 'ghlimanɩ. -Ɔ jinɩ-ɛ la'a -aa Nyininyɔ -Lagɔɔ 'nglɩ 'mö, -Lagɔ 'pɔ 'nyupalɩ. -Lagɔ -ʋ -wʋ-ɔ -ma -Lagɔtapɛ'ɛɛ 'nglɩ 'ghlimanɩ.” 10Wa-a -sɩbha 'bhli 'le, 'n wa ji-e -ma Zelwizalɛmö nyini. Wa pla-a -ma 'gbë 'mö, gbugblonʋ a gbugblonʋ -bha. 'N wa 'jɩbhajɩbhanɩ-a ngli naa: “Nɩkpɛ -mɔ 'mö-ö -la -nɩ 'nɩ?” 11Wa nɛ: “-Lagɔɔ 'mögbanɩnyɔ Zezwi -bha, -ma Nazalɛtɩɛ nɩkpɛ -bha, -ma Galilee gwlɩ yawʋ.”
Zezwi yɛ -lie 'pɛlʋpangwa -ma -Lagɔbudu 'kadʋ 'mö kpëti
12Zezwi pla-a -ma -Lagɔbudu 'kadʋɔ -kʋkwa 'mö, 'n ɔ ji-a -lie 'pɛlʋpangwa -yɛ -lie pɩapɩangwa sɔ -wa -wʋ la-a -ma kpëti, 'n ɔ ji-a mënie 'mözigbanɩngwaa 'tabhli -yɛ -kpakʋɩɛ 'pɛlʋpangwaa kpï 'sɔ sɛ bhlɩ. 13Ɔ nɛ -bha wa de naa: “Sa'a ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö naa:
-Lagɔ nɛ naa:
Na -budu, -bɛlɩɛ 'möpanɩbudu wa jiʋ-a laa.
'Mʋ -budu la'a 'mʋ a zʋa-a 'wingwaa -gbʋ 'wʋɔ?”
14Zezwi glɩ -bhla -ma -kʋkwa la'a 'mö, 'n 'lɔkpɔlɔkpɔngwa -yɛ bhɩgbökangwa 'sɔ jio-a yawʋ nyini, 'n ɔ jua-a göpö. 15-Lagɔbʋbɔngwaa 'bhitɩbhangwa -yɛ -Lagɔɔ gböö nglipangwa 'sɔ yɩlɩ-a 'mʋnaa 'wʋbhïli -ɩ Zezwi nʋ-a -yɛ 'gwiekikie -wa -wʋ-a 'mö 'kpö 'le naa: “Davidɩɛ 'Guo 'nglɩ 'ghlimanɩ-ɛ,” kalɛ-ɛ 'lɩbhʋa -bha. 16Wa nɛ -bha ɔ de naa: “-N -nganɩ bhe -ɩ wa -wʋ-ɔ -la gba 'le?” Zezwi nɛ: “Nn, n -nganɩɩ. A -nɩ 'bhï wɛlɩ -ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö -ɩ nʋ-ɔ naa:
-Lagɔ, -n yɛ zɩgbadlɩ'ɩ
'gwiekikie -yɛ 'gwiegbëëpï 'sɔ wɛlɩ 'mö -sa,
wa yɛ -na 'nglɩ 'ghlimanɩ,
a 'nɩɩ-ɩ zɛlɩ 'nɩ-ɩ?”
17Zezwi gba-a sa'a wa de 'bhë, ɔ tʋa-a -bha, 'n ɔ ji-a 'gbë 'mö 'wlʋ, 'n ɔ ji-e -ma Betani gʋ-ʋ kwla'a mö.
Zezwi yɛ figösu bhlɩ
18Zlɩ zɩ-a, Zezwi 'bhönɩ -ma Betani, ɔ-ɔ -ma Zelwizalɛmö nimï mö 'le, 'n ngɔmʋ jio-a 'lɩbha. 19Ɔ yɩlɩ-ɛ -bha 'yuogblʋɔ -kʋkʋngoyawʋ figösu -bhlʋ, 'n ɔ jiʋ-a yawʋ nyini. Ɔ 'nʋ-ʋ 'bhë 'wlu ghlɩ, kpɩɛ 'nyize ʋ ka la-a 'wlu. Ɔ nɛ -bha 'mʋ figösuo de naa: “-Nmö su -la, -n 'na-a 'pa-a 'mö 'bhë 'lɩlɩlɩ -nɩ.” Ɔ gba-a -sɩbha, -bha -gaganɩlɩ'ɩ 'n su la'a ji-a yɛ. 20Zezwie 'wʋbhlinɩngwa yɩlɩ-a -ɩ la'a, ngli-i mönʋa -bha. Wa nɛ: “Sa figösu -la yɛyɛnɩ-ɛ -sa -bha -gaganɩlɩ'ɩ 'mö 'nɩ?” 21Zezwi nɛ -bha wa de naa: “A -yɛ -Lagɔ dlɩ 'wʋ -ka, a nɩ duduadudue dlɩ zɔmö -ka, -ɩ n nʋ-ɔ -la -sɩka'a su -la 'ji, a jiɩ nʋ. 'N a -yɛ 'yɛ -bha -gɔgɔgbʋ a jɩnɩ-ɛ -la 'wʋɔ de nʋ naa: 'Bhö-ö -la -sɩka'a 'ye, bhlinɩ -ma gïnyi 'mö nʋ-ɔ, 'wʋ ɩ ji-a 'wlenɩɛ. 22Wʋ yɛ n gba-a naa: A -yɛ -Lagɔ -bɛlɩ 'pa 'le -wʋ, 'n a -kʋʋ dlɩ 'wʋ -ka -ɩ la'a 'bhuo -kpö a jiʋ-a 'jɩbhanɩɛ, ghlɩɛ a jiɩ -bha.”
'Zwiföaa 'kadɩ nɛ naa: -Mɔ 'nyɛ-a Zezwi 'gba 'nɩ?
23Zezwi pla-a -ma -Lagɔbudu 'kadʋ 'mö, ɔ-ɔ nɩkpa ngli 'pa 'le, 'n -Lagɔbʋbɔngwaa 'bhitɩbhangwa -yɛ 'zwiföaa nɩkpazɔgblʋɩ 'sɔ jio-o -bha ghlɩ. 'N wa jio-a ngli 'jɩbha. Wa nɛ naa: “-Ɩ la'a bhuo -n -wʋ-ɔ -la nʋ 'le, -mɔɔ 'nglɩ mö -n -wɩɩ bhe nʋnʋ 'le 'nɩ? Gba -a -n -su-o -la, -mɔ -nyɛmöa-a 'nɩ?” 24Zezwi nɛ naa: “N kɩ 'nʋ 'bhë, -ma ɩ 'mö, wɛlɩköbhë -bhlʋ -gömö n jiya 'yɛ na-a ngli 'jɩbhaa, a -bhlʋ 'tɩ, a -kaa zɔmö -sa-a, n jiya -ɔ la'a -ɔɔ 'nglɩ 'mö n nʋnʋ-a -ɩ la'a 'bhuo -slʋnʋ.” 25Ɔ nɛ naa: “-Mɔ tia la-a Za Badizɩ naa ɔ ji ɔ 'yɛ nɩkpa badize 'nɩ? -Lagɔ la-a 'nɩɩ bhlɩ'ɩ nɩkpa la-a?” Zezwi 'jɩbhʋa-a sa'a ngli, -ma wa 'bhïë 'nyize nyɩdɩ 'n wa ji-a yɩlɩ pla. Wa nɛ naa: “-A -yɛ -sɩka'a gba naa -Lagɔ tuo -bha nʋ-ɔ, sa'a ɔ ji-a gba naa: Ɛ -yɛ -sɩbha glɩnɩ, 'manɩɛ yɛ a 'nɩɔ la 'mö-a dlɩ 'wʋ -ka 'nɩ? 26Nɩkpa 'bhuo -ji 'yɛ sɛ naa Za -Lagɔɔ 'mögbanɩnyɔ la-a 'dɛdɛ'ɛɛ yɛ, -a 'na 'yɛ nʋ naa nɩkpɛ tuo la -bha nʋ.” 27Wa 'bhö-a yɩlɩ 'mö wa nɛ -bha Zezwie de naa: “-Ɔ tia la-a Za -a 'nɩɔ -nɩ -ji.” Wa gba-a -sɩbha, Zezwi nɛ: “Ɛ -yɛ -sɩbha glɩnɩ-ɛ, -ɔɔ 'nglɩ 'mö n -wʋ 'yɛ-ɛ na-a -ɩ la'a nʋnʋ 'le n 'na-a 'kɔ 'yɛ na-a 'nglɩ -dɩ.
Zezwi yɛ 'gwie 'sɔɔ 'nine 'pa
28A -sanɩ -lɛ köbhë la'a yawʋ. Nɩkpɛ -bhlʋ ka la nyɩbhɛlɩgwie 'sɔ. 'Ylɩ -bhlʋ, ɔ nɛ -bha taka -lɔɔ de naa: Na 'gu, mö -n 'yɛ -zɩnɩ'ɩ -ma na 'lagblɛ'ɛ libho nʋ. 29'Gu nɛ 'bhëbhë, n'n -ma mö 'le -wʋ. Ɔ gba-a -sɩbha 'bhë, ɔ dlɩ 'bhɩlɔ-a 'mö 'sɔ, 'n ɔ ji-e -ma 'lagblɛ la'aa 'wʋ mö. 30-Tɩbha ghlɩ-ɛ -bha 'sɔ -lɔ, 'n ɔ ji-a 'ma köbhë la'a -bhlʋ ɔ de gba. 'Gu nɛ: -N! Ɔ gba-a -sɩbha 'bhë, ɔ'ɔ -lɛ mö. 31Nimï n jɩbhaya 'mö-a naa: -Bha gwie la'a 'sɔɔ gla'a, gu -mɔ nʋ-a ɔ -tɩbhaa dlɩɛ -li 'nɩ?” Wa nɛ: “Taka -lɔ -bha.” Zezwi nɛ -bha wa de: “'Dɩɛ -dɩ n nyɛya-a naa: Lepoo mëniköbhangwa -yɛ -tuutungwlɩ sɔ-ɔ jiya-a -ma -Lagɔɔ nyininyinipɩ 'wʋ 'yu -ganɩɛ. 32-Wʋʋ yɛ-a, Za ji-a ɔ slʋnʋya-a 'möslɛnɩyuogblʋ de a 'kʋ 'wʋ namönɩ-ɛ, a'a -lɛ ɔ 'dɩ 'dɩ la. Lepoo mëniköbhangwa -yɛ -tuutungwlɩ 'sɔ, mʋa-a kɔ la-a dlɩ 'wʋ. A yɩlɩɩ-ɛ -sɩbha 'bhë-ë, a dlɩa 'nɩ-ɛ 'mö 'bhɩlɔ a 'kɔ dlɩ 'wʋ -ka.
Libhonʋngwa -wa kla-a wa 'bhitɩbha nyanɩ 'möö 'nine
33A pönɩ 'yukwli n 'yɛ nine -möma 'pa. Nɩkpɛ -bhlʋ zʋ-a 'likpï -ɩɩ 'jʋ wa nʋ-a dwivɛ 'wʋ nɛɛ 'lagblɛ. Ɔ 'pɛ-a -glɛglɛ 'mö, 'bhʋkwa -aa 'mö wa 'yɛ-a nʋ dɔlʋnʋ, 'n ɔ jia-a -bha ɛ nyɩdɩ'ɩ 'wlu. -Gbëgbë -aa 'wlu wa 'yɛ-a sɛ glɩ-ɩ wa 'kɛ -kʋ 'n ɔ jia-a 'pa. 'Mɛ 'lagblɛ la'a, 'n ɔ jiɛ-a libhonʋngwa 'mö palɩ, wa -kɛɛ -sa, wa -nyɔɔ 'sɔ 'yɛ dlinɩ. Ɔ -sɔ-a 'wʋ 'n ɔ ji-a lowlu'u mö. 34-Sasade nyini-a, 'n nɩkpɛ la'a ji-e -ma libhonʋngwaa 'bhɛyɩ ɔ nyɩgbajʋlʋɩ tia, wa 'yɛ 'mö -dlinɩ wa 'kɔ ɔ köbhë 'ye 'nyɛɛ yɛ. 35Nyɩgbajʋlʋɩ la'a nyini-e -ma, libhonʋngwa gblo-a -bhlʋ 'wʋ bhɔtɔ wa bhɔtɔɔ -bha, 'n wa ji-a 'sɔ -lɔ 'lɩbha, 'n wa ji-a ta -lɔ -gboku 'pa. 36'Lagblɛlowli 'nʋɩ-a, 'n ɔ ji-a nɩkpa -mʋmʋa -wa -zu-a -wa zia taka -lʋa -ma tia. Wa nyini 'yɛ-ɛ -nɩ -ma, sa wa köbha la-a taka -lʋa -sɩbha wa köbhʋa -bha. 37'Wʋbhlonʋdo'o, 'n ɔ ji-e -ma ɔ 'mlɩgwalɩgu tia. Sa'a ɔ 'pa-a dlɩ naa: Na 'gu -yɛ -ma mö, wa jio -bha zʋ, wa 'na 'kɔ -lu nʋ. 38'Gu nyini-e -ma wa yɩlɩɔ-a, 'n wa ji-a 'dɩ 'nyɛnyɛnɩ. Wa nɛ: -Ɔ ji-a ɔ -tɩbhaa gugbë 'wʋ 'libhïë mɔ-ɔ -la. -A 'lɩbhɔ 'lagblɛ -kaya cɛ'ɛ tʋ-ʋ. 39Wa gblo-a 'wʋ, 'n wa -nyɔɔ ji-e -ma 'lagblɛɛ -kʋkʋngoyawʋ mö 'n wa jio-a 'lɩbha. 40Ngli n jɩbhaya-a naa: A -nɩ de, 'lagblɛlowli -yɛ ji, sa ɔ ji-a libhonʋngwa la'a zʋɔ 'nɩ?” 41Wa nɛ naa: “Nyanɩklaswɩ'ɩ ɔ ji-a 'mʋa nyanɩklangwa la'a 'lɩbhaa. 'Bhë ɔ 'yɛ-a 'lagblɛ libhonʋngwa -jalɩ -wa -yɛ-a -sa -wa 'kɔ-a 'nyɛ 'mö palɩ.”
42Zezwi nɛ -bha wa de naa: “Wɛlɩköbhë -bhlʋ 'cɛlɩɔ-ɔ -ma -Lagɔwɛlɩɛ 'bɔgʋ 'mö a 'bhï ka zɛlɩ 'bhë. Ma-a gba-a sa'a naa:
Tikpë -a 'sɩbhasɩbhangwa nʋ la-a a'a-a -laa -la-a,
ma-a zʋ-a -buduo jijekwa.
-Ɩ -aa Nyininyɔ -Lagɔ nʋ-a mɩ-ɛ -la,
-a -kɩɩ 'wʋ yɩlɩ 'mʋna 'wʋ ɩ -bhïya -bha.
43Wʋ yɛ n gba-a a de naa: -Lagɔɔ nyininyinipɩ, cɛ'ɛ wa jiya-a -saa, wa 'kɛ nɩkpa -wa ji-a ɛ libho tulua 'ye 'nyɛ. [ 44'Ma tikpë la'a, -mɔ -kaa 'wlu gla ɔjɩ ɔ ji-a 'katɛ. -Mɔ a -yɛ 'yɛ -gömö bhlinɩ 'wʋ a jio-a 'titlie.”] 45-Lagɔbʋbɔngwaa 'bhitɩbhangwa -yɛ falizɩɛ 'sɔ 'nʋ-a nini la'a-a, sɛ wa jɩblɩnɩ-a naa 'mʋa Zezwi kpi-a 'wʋ. 46Wa 'jɩbha wa 'kɔ la köbha 'bhë, nɩkpa wa -gu -bha. -Wʋʋ yɛ-a, -Lagɔɔ 'mögbanɩnyɔɔ swɩ'ɩ nɩkpa 'bhuo libhïo la-a 'wʋ.
Seçili Olanlar:
MATIEE 'BƆGƲ 21: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996