CAWA'TA TUNITA 34
34
Dina hiɗi sum sa hay Sikemna
1Dina goot-cata ta Yakub vuɗa' kay Leyata kalay goyo kay ɗuw guro-boy sa hay nagatna. 2Sikem goora vi Hamor yerimana vi nagata iram tun ka'a, nam moka' dono'o, bur hiɗi na'a, ɓulaka'a. 3Dikam jun dono ŋolo tam Dina goota vi Yakub; goot-cat kayni nam mina' ŋolo ta-ta nam fi law ma haya'na. 4Nam di tam bulum Hamor: Goot-cat kayni naŋ jobaŋ ka'a nan min sla'a. 5Yakub hum labara ala goota valamu ɓulakay kay Sikem. Hay na'ta gurona vi Yakub ay goy sine kuɗ luwayn tuwa. Yakub min di vaɗi ta-ta nisi co tuwa.
6Hamor bum Sikem co tam Yakub kay dum law na'ta. 7Gurona vi Yakub hotay vo'o kuɗ luwayn pa, hay li ma nisi hum labar namna; diksi ɓulaka, nisi muɗ ɦiy ŋolo, kay Sikem lum kayni mi law ma yawi hay Israyel, kay nam bur hiɗi goota vi Yakub, kayni mi va ma as a liɗi. 8Hamor sli ditiya: Goora van Sikem dikam juni dono ŋolo tam goota vigiya, nan siɗawgiya kay nigi ma vulumti ca'a. 9Jungi bonot hiɗi numa'a; nigi vulma guro-boyna vigiya, nigi kaw yaw guro-boyna vuma'a. 10Nigi as li ziy hiɗi numa dari, nagat waŋŋi ka hay ɓigiya, lakgi haya'a, ligi filiwna, figi farayn ŋol lay.
11Sikem di tam bum-goota hiɗi ɓosiyo'na: Hinan fi slugota vok irgi fige, nala la nigi jobanti mige kaw nan ma vulgita. 12Nigi joban faray ma ɗumna ŋolo, joban sle ma vul ɦawan ŋol lay, nan min vulgi sle ma nigi dan kalamna kafe; may goot-cat kayni nigi ma vulanti ca'a. 13Gurona vi Yakub hot dit mi Sikem hiɗi bulum Hamor; nisi hot dit ta mileta kay Sikem ɓulak ɓasusit Dina goyo. 14Nisi disiya: Kayni may mi va ma numa as a lumɗi, a vul ɓasuma'ta goy mi sa ma bay ka gosayna, kayn mi law ma kuma ir zulo'o. 15La nigi min ala numa hum kuɗ dita vigiya, nigi kaw ma muɗ ki numa nala, kayn di ala sumuna vigi sa jufayn kaf ma ka gosaya. 16Nala numa ma vulgi gurona vuma'a, numa kaw ma yaw gurona vigiya, numa as li ziy hiɗi nigi dari, nay ma muɗ goy mi jaf ma kepna may. 17May la nigi min hummaɗi, la nigi min ka gosayɗi, numa vi goota vuma'a, numa kalma'a. 18Lawta visi cuk kuɗ hay Hamor hiɗi goora valam Sikem. 19Sa ma joriyon kayni min vi yalam kay li law na'ta loɗi, kay nam min goota vi Yakub. Hay ziyna vi bulum kayni sumun kaf slum yalam kulo'o.
20Hamor hiɗi goora valam cuk goy hay vun-galana vi hoyok-ziyna, nisi ka di tam sum sa hay hoyok-ziyn ala: 21Sumun kayni min lak hiɗi naya hay sle'ta; nay hinsi lak hay nagata, hinsi li filiwi, nagat ka hiriŋ-hiriŋ' a nisi lak haya'a, nay as yaw gurona visi boy may naya, nay as a vulsi gurona vay lay. 22May sum nisin kayni la nay min ala nisi lak hiɗi naya, a nisi muɗ goy jaf ma kepna hiɗi naya kayni, say sumuna vay sa jufayn kaf ma ka gosaya ki nisi nala kaw. 23Farayna visiya, slena visiya hiɗi luwayna visi noŋ kaf ma muɗ ir vayaɗi su? Nay ma vi dita visiya, kay nisi lak hiɗi naya. 24Sum sa co tok hay vun-galana vi hoyok-ziyn kaf hum dita vi Hamor hiɗi goora valam Sikem; sum sa jufayn kaf ka gosaya, kayn di ala sum sa co hay vun-galana vi hoyok-ziyn kafe.
25Hay buurta ɦidita, hay li ma nisi ka ci las ŋolo kayni, gurona vi Yakub sa ma'na: Simeyon hiɗi Levi sa ɓosiyom Dina, yaw kew-gaferaŋa visi hay ɓisiya, nisi mok hoyok-ziyna, sum sa hay hoyok-ziyn may varay ala law ma fisiyaɗi, may nisi ci sum sa jufayn goy kafe. 26Hamor hiɗi goora valam Sikem kaw nisi cisi goyo, nisi kal hay ziyna vi Sikem, nisi vi Dina, bugolda nisi cukay goyo. 27Gurona vi Yakub kaf mok sum sa tuwsi fi milla, nisi vurum hoyok-ziyna, kay sumun kayni ɓulak ɓasusita. 28Nisi yaw farayna vi sum nisina, luwayna hiɗi kurona, slen ma hay hoyok-ziyna hiɗi ma ay goy hay sinena kafe. 29Farayna vi sum nisina nisi vurumum kafe, boyna visiya hiɗi gurona visiya, hiɗi slen ma ka hay ziyna kafe.
30Ki kayn nala Yakub di tam Simeyon hiɗi Levi: Nigi viyan liynawa kiranu, kay nigi muɗanawa bisi kir sum sa hay nagatna, kir sum sa Kanaaniyana hiɗi sum sa Feresiyena. Nanu sumuna van kiɗaya; wulin ɗawn nisi ma tok tuwsi kay mokonu, vatan jafan ɗawn goyo, nan hiɗi ziyna van noŋ kafe. 31Nisi hot dumu: Ɓasuma'ta san as lasa' ki na' ti cata-viyuwta nala kayn as su?
Seçili Olanlar:
CAWA'TA TUNITA 34: Massana
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
BIBALDA TA PELDETTA © L'Alliance Biblique du Cameroun, 2001