CAWA'TA TUNITA 35
35
Yakub semda valam heta ala Israyel
1Lawna di tam Yakub: Fokaŋ kulo'o, tuɗaŋ hay Betel, musaŋ ɗawni; ɗawni naŋ ma in giwin-ma-ɗifinna mi Lawn ma vul tuwam kiraŋŋa hay li ma naŋ pir kay ɓasuŋŋa Esaw. 2Yakub di tam sum sa hay ziyna valamu hiɗi nisi sa ka kuɗum kafna, Lawayn ma pulla ma ka jargin kaf nigi ma cukum goyo, ligi tuwgi goy peldete, muɗgi sligar ma cuki tigina. 3Nay min fok kulo'o, kay nay min kal hay Betel, ɗawni nan min in giwin-ma-ɗifinna tam Lawna, nam ma hum siɗawta vanu hay li ma nan ka vun-zlata, nam ma ay hiɗi nanu hay rogoyta van ta nan la'ta kafe. 4Lawayn ma pulla ma ka hay ɓisin kaf nisi vulum mi Yakub, hiɗi tuju ma humna kafe, Yakub pum gaa kuɗ gu-terebintena ma ka goboy hiɗi Sikem. 5Bugol kayni nisi kaliya, narta vi Ma-Vatɗina nig kay hoyok-ziyn kaf ma ka ŋuyi tisi goboyna, sumun kayni may jaŋ kuɗ gurona vi Yakub loɗi.
6Yakub hiɗi sum sa kuɗumna kaf co hay Luz ta ya' Betel, hay nagat Kanaan. 7Nam in giwin-ma-ɗifinna hay liyn namna. Liyn namna nam tunum selem ala El-Betel; kay kayni mi liyn ma Lawn vul tuwam kiramu hay li ma nam pir goy kay ɓasulumna. 8Debora ta sunda vi Rebekka mita; nisi pa' hay Betel, gaa kuɗ gu-ma'asna ma nisi tunum selem ala «gu-ma'as ma tiyna».
9Bugol hotta vi Yakub hay Padan-Aram, Lawna vul tuwam kiram lo, nam gum bolo. 10Lawn dumu: Semda vaŋu Yakub, may nisi ma yaŋ Yakub loɗi, may semda vaŋ ma muɗ ala Israyel. Nisi vulum semda ala Israyel. 11Lawn dumu: Nanu mi Lawna ma Gaŋeraŋ-Petna. Vuɗaŋ guro'o, biyaŋ ŋolo, jafna ma ŋol suw kaf ma may goy hayaŋ pa, muliyana ma vuɗay goy hay naŋ pa. 12Nan ma vulaŋ nagata ta nan vula' mi Abraham hiɗi Isaak, nagat na'ta nan min vula' mi jafaŋ ma bugolaŋŋa.
13Lawna kalay kulo'o, goy hay liy namna pa bugol nam kus yoboyn hiɗi Yakub kusna. 14Yakub in liyn ma ɗiŋiriŋŋa kulo'o, hay liyn ma Lawn law hiɗi namna. Yakub jak hiɗiyn kulo kay tuwamu, nam ɦok sle ma vulda kalamu, ɦok mul kalam lay. 15Liyn namna ma Lawn law hiɗi namna Yakub tunum selem ala Betel.
16Nisi yaways hay Betel pa; liyn hini voksi gine neeɗa kay co hay Eufrata, hay na'ta Rakel puka, pukka sla' vuna' ŋolo; 17hay li ma na' ka tiy kay pukka kayni, cat ta puk-boyna da'a: Tuwag li narɗi, kay goor mara ka hayag lo. 18Hay li ma sukka va' ka kal goyo, kay na' ka mita, na' tun sem goor namna ala Ben-Oni; may bulum tunum selem ala Benyamin. 19Rakel mita, nisi pa' hay hagata vi Eufrata ta ya' Betlehemta. 20Yakub mola' yam-usa' kulo ɗiŋiriŋi, yam-usa' ma molay kulo ɗiŋiriŋŋa ta-ta vaydi kaw nam ka zaw.
21Israyel kaliya, nam vi guɗukŋa valam goy bugol Migdal-Eder. 22Hay li ma Israyel ka musi ziy hay liy namna kayni, Ruben kaliya, nam bur hiɗi Bilha, cat ta gorvota vi bulum Israyel. Bulum hum labar namna. Gurona vi Yakub noŋ kaf ay doogo yam ma'.
23Gurona vi Leya: Ruben; goor ma vuɗi jewna vi Yakub, Simeyon, Levi, Yuda, Isakar hiɗi Zabulon. 24Gurona vi Rakel: Yosef hiɗi Benyamin. 25Gurona vi Bilha ta sunda vi Rakel: Dan hiɗi Neftali. 26Gurona vi Zilpa ta sunda vi Leya: Gad hiɗi Aser, nisi kayni si gurona vi Yakub sa nam vuɗsiyay hay Padan-Aram.
Hotta vi Yakub hay ziyna vi Bulumu, mitta vi bulum Isaak
27Yakub co tam bulum Isaak hay Mamre, hay Kiryat-Arba, ta ya' Hebron, liyn ma Abraham hiɗi Isaak li ziys hayna. 28Busata vi Isaak li noŋ pet kis hiɗi diram dok-glafandi. 29Sukam kal goyo nam mita. Nisi pum jar sumuna valamu, nam mit kayn viy busay takay-takay'. Gurona valam Esaw hiɗi Yakub pumu.
Seçili Olanlar:
CAWA'TA TUNITA 35: Massana
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
BIBALDA TA PELDETTA © L'Alliance Biblique du Cameroun, 2001