TADPADBO 13
13
Nah-raitu Kadkhaibo
1 Rapiu niu Mose khuga din-e, 2#Par 3.13; Lk 2.23.“Nah-raibo npiumai nah hinase akhuga kadkhai rabo-e, palamra Israel mai nahrai hina khatdi piangrai thubo pachi hinase agu-e.”
Chakhi Khaimakbo Taruak Ngee
3Mose niu maidung khuga din-e, “Haibo tingmiktu maningtaojiu bamlo--naliuniu kavang thiujiu bambo bam, Egypt dihtu naliuniu phut mibo-e. Haibo tingmik hai Rapiu niu pagu kadibo pumtan gasu naliutu maluangpad khaibo-e. Chakhi khaibo taruakse naliu tiumak rabo-e. 4Naliuniu rai thubo hiu, Abib hiu gasu Egypt dihtu phut mibo-e. 5Rapiu niu pachang-palingjiu naliuleng, Canaan mai, Hitt mai, Amor mai, Hiv mai khatdi Jebus mai kadih hai pikhaine chiujiu naliu pao-pehmai khuga ladriat thiukhai mibo-e. Paniu naliutu lungwibo khatdi kadih-tam kawibo dihga, naliutu maluangwang khaiboga, naliuniu haibo ngee hai takum machang raithubo hiuga changi rabo-e. 6Jeng chinnia hai naliuniu chakhi khaimakbo taruak tiurabo-e, sichiujiu chinniabo nai hai Rapiu tu chakhuang thiubogu changi rabo-e. 7Jeng chinnia lungga hai chakhi khaibo taruak naliuniu tiumak rabo-e; khatdi naliu ram lungga chakhi, maksai pajui khaibo taruak hai pibam mak rabo-e. 8Haibo ngee kamsuboga, naliuniu naliu nahdung khuga, naliuniu Egypt dih phutbo tingga Rapiu niu degu kamkhailo chiubo hai katikhai rabo-e. 9Haibogu maningtaobo haise naliu ben-ga, maksai naliu san-ga wakhat raokhaibo kumjiu bamrabo-e; haisiniu Rapiu gu Tacheng-tajai katikhaibo nai alikhaibo situ naliuniu maningtao bamrabo-e, palamra Rapiu niu pagu kendibo pumtan siniu naliutu Egypt dih gasu maluang padkhai bibo-e. 10Haibo ngee hai naliuniu takum machang riatkhaibo tingga changi rabo-e.
Nahrai Hina
11“Rapiu niu naliu khuga khatdi naliu pao-pehmai khuga pachang paling ladriat khaibo Canaan kadihga naliutu maluangwang khai bine. 12#Tad 34.19,20; Lk 2.23.Paniu naliuleng pikhaiboga, naliuniu npiumai nahrai hinatu Rapiu khuga kadkhai rabo-e. Naliugu khaorui khaonaniu piangrai thubo hinadi Rapiu gu-e. 13Chiudi naliuniu piangrai thubo qonniam hina tura sibosung milypoi kadkhaijiu liulan rabo-e. Naliuniu sibo qonniamse liulanni maksai, pawongcheng kamtang milo. Naliuniu naliu nahpiu nahrai hina tura liulan siak rabo-e. 14Pasai, naliu nahniu haibo ramba maniusai, naliuniu haichiu paokak rabo-e, ‘Rapiu niu pagu kendibo pumtan siniu, aliu Egypt dihga kavang thiujiu bambo gasu puipad khai bibo-e. 15Egypt mai wangpiu siniu palung tanjiu, aliutu pitad khai makboga, Rapiu niu Egypt dihga chakhao-chamai pakhiangnagu nahrai hina kamshat mibo-e. Sijengniu piangraibo khaorui-khaona hina aliuniu Rapiu khuga kadkhaibo-e, chiudi aliuniu aliu nahpiu nahrai hina tura liulanbo-e. 16Haichiu maningtaobo hai, aliu ben-ga maksai aliu san-ga ratman khaibo kumbo-e, Rapiu niu pagu kendibo pumtan siniu Egypt dih gasu aliutu puipad khai bibo-e’”.
Kamuang Tiang Nai Chami Tiang
17Egypt mai wangniu, Israel maitu pitad khaiboga, Philistia kadih lam tadkhaibo npuise dunthubo thiubamdi, Tingwang niu sibo npui makjiu kaki lamsu puitad khai-e. Tingwang niu haichiu maning-e, “Israel maidungniu chari thiura ngaobo tingga paliu lung lilanjiu Egypt dihlam malanwang mira Iniu suini makge”. 18Sibosung, paniu paliutu tadkoibo ramjing npui, Hengbo Duipui lamsu majang khai-e. Siga Israel mainiu chari thiura kaden sude.
19 #
Chab 50.25; Jos 24.32. Israel mai khuga Joseph niu ladriatsui khaibo saisuijiu, Mose niu Joseph phawse ponlu tadsude. Joseph niu dinkhai-e, “Tingwang niu naliutu kalan khaibo naira, naliuniu haibo bam gasu aphaw hai pontad rabo-e”.
20Israel mainiu Sukkoth tu phut lujiu ramjing mung, Etham ga riji thiukhaide. 21Rapiu niu n-nien sai, kamuang tiang thiujiu, nchun sai, chami tiang thiujiu paliu masuangga tadraijiu npui jukhaibi-e, sichiujiu nchun, n-nien saomakjiu paliu tabin tadlu-e. 22N-nien sai kamuang tiang siniu, nchun sai chami tiang siniu paliu masuangga tadrai tan-tan khaibi-e.
Поточний вибір:
TADPADBO 13: LIANBSI
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.