TADPADBO 4
4
Tingwang Niu Mose Khuga Maisuang Habo Pumtan Pikhaibo
1Siga Mose niu Rapiu tu paokakge, “Chiudi Israel maidungniu atu malum makjiu Iniu kadin piumaksai dechiu ralo? Nangniu akhuga ngaolen khai makge chiujiu dinsai, Iniu degu kamralo?”
2Siga Rapiu niu pakhuga maniu-e, “Nang degu thinbam gulo?”
Paniu paokakge, “Tathun thin bamme.”
3 Rapiu niu pakhuga din-e, “Sise kadihga taliang kiulo.” Mose niu sise taliang khaiboga, sise kaniu mawi mide, siga pah paksude. 4Siga Rapiu niu Mose khuga din-e, “Kinkiu lujiu sise pami lamsu khoisulo.” Sichiujiu Mose niu kinkiu sise khoi suboga, sise tathun mawilan mide. 5Rapiu niu din-e, “Haise kamjiu Israel maidung khuga Rapiu, paliu pao-pehmai Rawang, Abraham, Isaac khatdi Jacob Rawang niu nakhuga ngaolen khaibo-e chiubo kamlenlo.”
6 Rapiu niu Mose khuga dinlan-e, “Nabense na-ntiang lungga kario khailo.” Mose niu kadinbose suijiu, pabense kario khai lujiu khoipad lanboga, pabense nphen mide, kabun kumjiu kapuang mide. 7Siga Rapiu niu din-e, “Nabense na-ntiang lungga kario khai lanlo.” Paniu sichiu kariokhai lujiu thadpad phui lanboga pabense wilan mide. 8Rapiu niu din-e, “Karaibo tasibo ngamkam siniu paliuniu natu malum maksai, khatdi paliu lung kim maksai, haisiniu paliu lungchun kimkhai lubui-e. 9Haibo tasibo tienkam nia hainiudi paliuniu natu malum maksai khatdi nalad piumaksai, Nile Giuki gasu tadui thuaklujiu sise kadihga runkiu khai bilo. Taduise tazai mawimi rabo-e.”
10Chiudi Mose niu din-e, “Chiumakge, Rapiu yo, atu langkhai mane. Ira chalad dinsi kamak mai-e. Wadaodi chalad dinsi makge, khatdi nangniu atu langkhaijiu bamdi. Ira aladdi mani, aladdi ladlao-e.”
11 Rapiu niu pakhuga din-e, “Saoniu chamainatu pamun pikhailo? Saoniu patu pakuon pitid khailo maksai palee pirat khailo? Saoniu patu pi-ngaokhai maksai pamik pitiad khailo? Haise Rapiu, Iniu-e. 12Tuhoira tadsulo! Iniu natu nkha khaijiu, nangniu degu dinralo chiubo katikhai bine.”
13Chiudi Mose niu din-e, “Chiumakge, Rapiu yo, mai kakimaitu langkhailo.”
14Siga Rapiu niu palung pomjiu Mose khuga din-e, “Levi maipiu, nachi Aaron sira dechiulo? Pachangjiu pah tuhoi natu adaora khangkinne, paniu natu adaosai pachun wirabo-e. 15Nangniu degu dinralo chiubo pakhuga dinkhaibo sui-e. Iniu nanai khangniatu degu kamralo maksai dinralo chiubo katikhai bine. 16Maidung khuga degu dinralo chiubo paniu nasung dinkhai ngamme. Sichiujiu nangniu Tingwang kumjiu degu dinralo chiubo pakhuga dinkhai ngamme. 17Haibo thunse khoilujiu tadsulo, palamra haisiniu maisuang habo ngamse nangniu kamrabo-e.”
Mose Niu Egypt Dihga Malan Wangbo
18Sigasu Mose niu papao Jethro khuga wanglujiu din-e, “Iniu Egypt dihga wanglujiu asingna maidung ringbam khama chiubo phui mataine.” Jethro niu suikhaijiu kanui khai bide.
19Mose niu Midia ga bamkhaga, Rapiu niu pakhuga din-e, “Egypt dihga tadlan sulo, palamra natu kamshat raleng kambambo maidungse shai mide.” 20Sijengniu Mose niu panao panah maitu pi qonniam tongkhai lujiu, khatdi Tingwang niu pikhaibo thunse thinlujiu Egypt dihlam tadsude.
21 Rapiu niu Mose khuga dinlan-e, “Tuhoira nangniu Egypt dihga wanglan dasai, Iniu naleng pikhai bibo pumtan siniu chawang masuangga maisuang habo ngam hinase kamlen khai bilo. Chiudi chawangse palung tanra Iniu kamkhai mide, sichiujiu paniu amaidungtu pitad khai lakge. 22Siga nangniu pakhuga haichiu dinbilo, Rapiu Iniu din-e, ‘Israel mai hai anah naraibo-e. 23#Tad 12.29.Anahtu pi tadpad lujiu atu pijiu kahum khailo chiujiu Iniu nakhuga dinbo-e, chiudi nangniu suikhai makge. Sijengniu, tuhoira Iniu nanah naraitu kamshat mine.”
24Egypt lam wangbo rijikyga Rapiu niu Mose tu adao lujiu kamshat mira kamsude. 25-26Sigasu panao Zipporah niu pamun liangbo tu khoilujiu panahpiu-gi romkhaide khatdi siseniu Mose phi#4.25-26: phi: Mose phi niakhaide: khangsianiu Mose bek kanomme chiubo-e. nia-khaide. Chagi-rombo saisuijiu paniu Mose khuga din-e, “Nang hai tazai gasu wangbo akina-e.” Sichiujiu Tingwang niu Mose tu kalan khai bide.
27Sibo wan-ga Rapiu niu Aaron khuga din-e, “Ramjingga tadlujiu Mose tu adao lulo.” Siga Aaron niu masanbo luong gase tadlujiu Mose tu adaode, khatdi biang-hiu khaide. 28Siga Mose niu Aaron khuga Egypt dihlam malan wangrabo cham, khatdi Rapiu niu maisuang habo ngam kamkhaibo hinase paokhaide. 29Sichiujiu Mose nai Aaron niu Egypt dihlam malanwang lujiu Israel maigu jupaodungtu kumadui sude. 30Rapiu niu Mose khuga dinkhaibo hinase, Aaron niu paliu khuga dinkhai bide khatdi Mose niu maidung suangga maisuang habo ngam hinase kamlen khaide. 31Siga paliu malum mide, sichiujiu paliutu kam mathad bambo paliu magenthakse Rapiu niu silujiu paliu khuga wangbamme chiubo chiuluboga kinkiu kahum sude.
Поточний вибір:
TADPADBO 4: LIANBSI
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.