CHABANGCHAM 13
13
Abram nai Lot Tampadbo
1Abram niu panaotu khatdi pagu kabambo hina phunglujiu Egypt dih tingpi lamsu kensujiu Canaan dih tingrun lamse tadsude, siga Lot di pasai suitadle. 2Abram hai kalek wichang wi-e, pagu milydung, kamidung, matom-kabuidung khatdi kachia rangkanggi kengkha bam-e. 3Sichiujiu paniu sibo bamse phutlujiu pabam khat gasu khatga tadjiu Bethel lamse tadkhai-e. Paniu karaiga rijiky thiukhai mibo bam Bethel nai Ai gase wangtangde, 4siga paniu rathakbam khat thiukhaide. Sichiujiu siga pah Rapiu tu kahum-e.
5Lot gudi milydung, kamidung, matom-kabuidung khatdi pavangdung kengkha bamme. 6Panai khangniagu khaorui-khaona kengju mibo jengniu panaileng piubuanse buita mide. 7Sijengniu Abram gu khaorui-khaona khuanmai nai Lot gu khaorui khaona khuanmai n-gi sude. (Sibo wan-gase Canaan mai nai Periz mai sibo kadihga lungbam kha-e).
8Siga Abram niu Lot khuga din-e, Ania hai singna-e, siniu namai nai amai n-gi athao makrabo-e. 9Sijengniu ania kalek tam mikhe. Nangniu lunibo kadih kada lulo. Nangniu npui khatlam, Iniu khatlam tadrabo-e.
10 #
Chab 2.10. Lot niu ajangjiu phuiboga Jordan Ramjeng pakhiangna Zoar npui luongriang hina, tadui kengbambo, Rapiu gu kareng kumbo maksai Egypt dih kumbo hai ngaode. (Haise Rapiu niu Sodom nai Gomorrah namditu kam maha makhabo suang-e). 11Sijengniu, Lot niu Jordan Ramjeng pakhiangna hai paleng kadalujiu naimikpad lam tadmide. Sichiujiu panai khangniase ramna mibo-e. 12Abram niu Canaan dihga bammide, khatdi Lot niu namdigu ramjeng gase lungjiu Sodom mungga rijiky thiukhaide, 13haiga lungmaidungra kasa mai-e khatdi Rapiu khuga kamao kammaidung-e.
Abram niu Hebron lam Tadbo
14Lot niu tadmibo sai, Rapiu niu Abram khuga din-e, “Nangniu chap bambo gasu pabam hina ajangjiu phuilo. 15#Tk 7.5.Iniu haise naleng khatdi nakai-kikleng pikhai bine, sichiujiu haise tingtheng nagu thiurabo-e. 16Iniu nakai-kik leng, mainiu pariak singamlakbo pikhai bine; haise mai khatniu kadihga nbuiniang situ singam lakbo kumrabo-e! 17Tuhoira tadlujiu kadih pakhiangnase phuisulo, palamra Iniu haise naleng pikhai rabo-e.” 18Sijengniu Abram niu pagu rijibam kali lujiu Hebron ga bambo Mamre gu masanbo singbang mungga wang lungde, siga paniu Rapiu leng rathakbam khat thiukhai-e.
Поточний вибір:
CHABANGCHAM 13: LIANBSI
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.