CHABANGCHAM 45
45
Joseph Niu Pah Saolo Chiubo Pagu Singnamaidung Khuga Dinbo
1 #
Tk 7.13. Joseph niu pavangmaidung masuangga palung-parai kheng ngamlak mide, sijengniu paliutu sibo bam gasu tadmira chamtan pikhaide. Pahai saolo chiujiu Joseph niu pasingna maidung khuga dinbo lon, mai khatdi siga ha-e. 2Paniu pakhuan padjiu nkiu marungjiu kapsude, sise Egypt maidung chiulujiu sibo chamse chawangkiningga paowang sude. 3Joseph niu pasingna maidung khuga din-e, “I hai Joseph si-e. Apiu ringbam khama?” Haise chiuluboga, pasingna maidungse pingchang-ping mide, sichiujiu npaokak ngamlak mide. 4Siga Joseph niu paliu khuga din-e, “Lungsajiu hailam wang aruang khailo.” Sichiujiu paliu wangboga paniu din-e, “I hai naliuniu Egypt dihga jonkhai mibo, naliu saikariu piu Joseph si-e. 5Tuhoira naliu lung chariu talo, maksai naliuniu atu haiga jonkhai mibo lamga naliu mao mide chiubo dintulo. Haise pachangsiakjiu Tingwang niu naliu masuangga atu langkhai lujiu maidungtu gukhaira kamkhaibo-e. 6Tuhoi charakhum wangbo hai tingkum nia ronna kha-e, tatien tensi lakbo khatdi atiat silakbo tingkum mangiu bamkha-e. 7Tingwang niu atu naliu masuangga langkhai lujiu, haichiu maisuang habo jaigasu naliutu gukhaira khatdi naliu kai-kikdungtu piring khaira kamkhaibo-e. 8Sijengniu atu haiga langkhaibo hai naliuniu makge, chiudi Tingwang niu-e. Sichiujiu paniu atu chawanggu dithubo chakampaose pithiu khaibo-e; Iniu pagu kadih pakhiangnagu papao thiu bambo-e. I hai Egypt maidung mathiugu mawangpao si-e.
9 #
Tk 7.14. “Tuhoira apiu khulam kalangjiu wangsulo, khatdi panah, Joseph niu dinbo hai pakhuga paokhai bilo: ‘Tingwang niu atu Egypt maidung mathiugu mawangpao pithiu khai bamme, akhuga mengra rita sulo. 10Naliuniu Goshen luongriangga amungga lungjiu, naliu tah, naliu nahdung, naliugu khaorui-khaonadung, naliu tom-buidung khatdi naliugu kabambo hina lunglu bui-e. 11Naliuniu Goshen ga lungsai, Iniu naliutu phuilu bui-e. Charakhum wangrabo hai tingkum mangiu bamkha-e; sijengniu naliu khatdi naliu kykhunmaitu khatdi naliugu khaorui-khaonadungtu pijiu makim khaini makge.’”
12Joseph niu dinlan-e, “Tuhoira naliu mathiuniu, Benjamin nangdi, I hai Joseph siakge chiubo ngao lude. 13Iniu Egypt dih haiga dejiukha pumtan bamlo chiubo, khatdi naliuniu ngaolubo hina hai apiu khuga paokhai bilo. Sichiujiu kalangjiu patu haiga puiwanglo.”
14Paniu pasai kariupiu Benjamin tu kiapman lujiu kapsude, Benjamin di patu kiapman lujiu kapsude. 15Sichiu kap-kapjiu, pachimai mathiutu kiaplujiu biang-hiu khai sude. Sichiu khaibo sainiu, pasingna maidungse patu npaopad sude.
16Joseph singnamaidung chawangkiningga mengbam-e, chiubo cham hai chiuluboga, chawang khatdi pagu chakampaodung hina paliu chun wisude. 17Chawangniu Joseph khuga din-e, “Nasingna maidungtu pijiu paliu khaodung bang thiulujiu Canaan kadih lam malanwang paliu piu khatdi paliu kykhunmaitu puilujiu haiga wangra dinkhai bilo. 18Egypt dihga withubo kadihse Iniu paliuleng pikhai bine, sichiujiu paliuniu mali-malanjiu lunglu bui-e. 19Egypt dih gasu talai ponlu wang, paliu nao-nahdung khatdi paliu piutu ponwang raleng dinkhai bilo. 20Paliugu maniadung phutkhai mira majatulo, palamra Egypt dihga withubo kadihse paliugu thiumi rabo-e.”
21Jacob nahdung siniu, paliu khuga dinkhaibo kumjiu kamsude. Chawangniu chamtan pikhaibo kumjiu, talaidung khatdi npuikiga tiuraleng Joseph niu paliuleng pikhai bide. 22Paniu paliu mathiu leng chafai-tani kalira khat-khat pikhai bide, chiudi paniu Benjamin lengra rangkang kai sum nai chafai-tani kalira mangiu pikhai bide. 23Paniu papiu leng Egypt dihgu withubo waniadung qonniam kariu bang, khatdi katiu-kasak, alin-taradung, npuikiga tiuraleng qonniam bang kariu pi khai bide. 24Paniu pasingnamaidung situ maluangpad kanui khaijiu paliu khuga din-e, “Npuikiga ari-ara tulo.”
25Paliuniu Egypt saodiak lujiu paliu ky Canaan lam, paliu piu khulam malanwang mide. 26Paliuniu paliu piu khuga din-e, “Joseph hai ringbam kha-e. Pahai Egypt mai mathiugu mawangpao thiu bamme!” Siga Jacob palad padsilak mide khatdi paliutu malum ngam lulak mide.
27Chiudi paliuniu pakhuga Joseph niu dinkhaibo hina dinsude, khatdi patu Egypt dihlam ponwangra Joseph niu pikhaibo talaise ngaoboga, pah charenbo gasu wilan wide. 28Sichiujiu paniu din-e, “Anah Joseph hai ringbam kha-e! Iniu lunijiu khengbo sira haisitu-e! Iniu shai makhaga tadlujiu patu phuirabo-e!”
Поточний вибір:
CHABANGCHAM 45: LIANBSI
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.