CHABANGCHAM 47
47
1Sichiujiu Joseph niu pasingnamai khang mangiutu Chawang khuga puiwang lujiu din-e, “Apiu khatdi asingnamaidung Canaan kadih gasu, paliugu matom-kabui, khaorui-khaona khatdi paliugu kabambo hina puilujiu wangbam-e. Tuhoi paliu Goshen luongriangga bamme.” 2Sichiujiu paniu pasingnamai situ chawang khuga puiwang khaide. 3Chawangniu paliu khuga maniu-e, “Naliu nde kamjiu lungmailo?”
Paliuniu paokakge, “Aliu paopehdung kumjiu aliudi mily khuanjiu lungmai-e, paohubo yo. 4Canaan kadihga charakhum wangbo hai saju mibo jengniu, aliugu khaorui-khaona leng piubuan hamide, siniu aliu haiga lungra wangbo-e. Aliutu lungsajiu Goshen luongriangga lungra suikhai khelo.” 5Chawangniu Joseph khuga din-e, “Tuhoira, napiu nai nasingna maidung wangbam-e, 6Egypt kadih hai paliu gu-e. Withubo kadih Goshen luongriang gase paliutu pilung sulo. Sichiujiu paliu rong gasu kabuimai bamsai, agu khaoruitu phuikhaira paliutu pikhailo.”
7Sichiujiu Joseph niu papiutu chawang khuga puiwangde. Siga Jacob niu chawangtu thoikhai bide, 8siga chawangniu pakhuga maniu-e, “Nagu tingkum dejiukha milo?”
9Jacob niu paokakge, “Iniu haichiujiu lungron kinbo hai tingkum kaikhat-je-samriu tang mide. Chiudi agu ringting haira nda apao-apehmai kummakjiu, chariu magenthiu sui khai mibo-e. 10Jacob niu chawangtu kanambo thoidam pikhai lujiu tadmide, 11Sichiujiu chawangniu dinkhaibo kumjiu, Joseph niu papiutu, pasingna maidungtu khatdi paliu kykhunmai mathiutu withubo kadih Rameses namdi mungga pijiu lungkhai bide. 12Joseph niu papiu khatdi pasingnamaidung leng khatdi ngenadung leng tangbo katiu pikhai bide.
Charakhum Wangbo
13Charakhum wangbo hai sabi-bi mide. Siniu Egypt maidi, Canaan maidi paliu pum suankiu kam mide. 14Paliuniu katiu liubo gasu rangkang hinase Joseph niu chawangkiningga khai madui kam mide. 15Egypt kadihgu khatdi Canaan kadihgu rangkangse thinkam mibo sai, paliuniu Joseph khuga wanglujiu din-e, “Aliu leng katiu pikhailo! Aliutu pishai khai tulo. Wakhatra kam khailo! Aliugu rangkang hamide.”
16Joseph niu paokakge, “Naliugu rangkang hamisai, naliu gu khaorui-khaona phungwanglo. Iniu naliuleng katiu nkhiak khai bine. 17Sijengniu Joseph khuga paliuniu paliugu khaorui-khaonadung: chaqondung, milydung, kamidung, matom-kabuidung khatdi qonniamdung phungwangjiu katiu nkhiak sude. Sibo kumse, sichiujiu paniu paliugu khaorui-khaonadung nai katiuse nkhiak khai bide.
18Pasaibo kumse paliuniu pakhuga wangjiu din-e, “Aliuniu wakhatdi nakhuga mahinra hamide, aliugu rangkang hamide. Aliugu khaorui-khaonadi hamide. Tuhoira aliu pum nai aliu ram makbo wakhatdi hamide. 19Aliutu pijiu shai khai tulo. Wakhatra kamkhailo! Aliugu luzam haitu pijiu mariu kiumibo ram thiu khaimi tulo. Aliu pum nai aliu ram haitu katiu leng nkhiak khai sulo. Aliu chawang vang thiune, khatdi aliu kadihga pijiu alin lingkhailo.”
20Joseph niu haichiujiu chawang leng Egypt kadih pakhiang liulude. Egypt mai hinaniu katiu leng paliugu kadih charam hai jonkam mide. Sichiujiu charam hina chawanggu kam mide, palamra charakhum wangbo hai sachang-sa mide. 21Joseph niu Egypt dih pakeh machang mai hinatu chawang vang pithiu khai kam mide. 22Paniu liumakbo sira singkumaidungu kadih ronna mide. Chawangniu paliuleng katiu hai pikhaijiu bambo jengniu paliuniu paliugu kadihse jonmakbo-e. 23Joseph niu maidung khuga din-e, “Phuilo, Iniu naliutu khatdi naliu ram haitu chawang leng liulude. Siniu haiga naliu luzamga lingkhaira alin-tara bamme. 24Sichiujiu atiat tingga naliugu dam mangiu-gu dam khatse naliuniu chawang leng pirabo-e. Masiakbo siniu naliuleng khatdi naliu kykhun maileng thiurabo-e.”
25Paliuniu paokakge, “Nangniu aliu ringting haitu gukhai bide. Nangniu aliuleng kawibo kamkhai bide, chaibo, siniu aliu chawang vang thiu rabo-e.” 26Sichiujiu Joseph niu Egypt dihga atiatpatbo dam mangiu-gu dam khatse chawang leng pirabo cheng hai kamkhai bide. Haise thainai tangbo tadbambo-e. Singkumaidung gu kadih ronna chawanggu makbo-e.
Jacob Gu Kanambo Kheng
27Israel maidungniu Egypt dih, Goshen luongriangga lungjiu kalekwi khang mide khatdi nahmaidung kingpad sude. 28Jacob niu Egypt dihga tingkum kariu-je-chinniakiu lung khangjiu, pah tingkum kai khat atai-je-chinniakiu mide. 29#Chab 49.29-32; 50.6.Paniu shaisu raga, panah Joseph tu kulujiu pakhuga din-e, ‘Nabense ahingpom kania kakga kariokhai lujiu, atu Egypt dihga baikhai lakge chiubo tasiang siang khailo. 30Nangniu atu Egypt dih gasu ponpad lujiu apao-apeh mainiu lungbo kadih gase atu baikhai rabo-e.”
Joseph niu paokakge, “Nangniu kadinbose I kamrabo-e.”
31Jacob niu din-e, “Nangniu kamrabo-e chiubogu tasiang sianglulo.” Joseph niu tasiangse siangkhaide, sichiujiu Jacob niu pazi gasu Tingwang tu thuonde.
Поточний вибір:
CHABANGCHAM 47: LIANBSI
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.