KÜÜRORI 3

Rünyihküpriri Küsü Saküümühie

1Loküsü kükhuo tsotho münühu tügu vü Pitor thi Johan masü tü Kükhurüzhe vü wa. 2Thinü ma za volo vünüh rünyihpri nü küwuo küsü nyuri Kükhurüzhe vü küruri vünüh zanyo küükhuo nti rülorülo sieru Kükhurüzhe Küzü kheri ti küjiwa kütuo vü sasati. 3Ma tü Pitor thi Johan masü Kükhurüzhe lovü tu nasaküveh ngu nü ma nüh zanyo khuo. 4Thinü Pitor thi Johan masü tü ma nophoke taji ma vü, “Hisü noluo,” ti küza. 5Jütiküsavü ma nga masü vünüh zanyo ngu nati rühluo nü masü vü amüshe thse. 6Thitü Pitor nüh ma vü, “Hi tü raka nga thi suna nga münyie, thitü hi nüh eh kevü küpewa no tsü naveh, tinü Jisu Khrista Nazareth nyo vünüh süra nü letse luo,” ti küza. 7Jüti sataji ma nüh ma ke azhiewuo vünüh ma shokütsie, thinü müküzhike wiethuoh nüh ma jih thi ma khekheri tü müzhotewa. 8Jütisanü ma tü joke nü tsie taji letse thi masü sie nü Kükhurüzhe lovü tu nü letse thi jo taji Saküüwuowa siake. 9Nyiri aveh tü ma letse thi Saküüwuowa siake ti küsa ngu. 10Thi mari tü ma Kükhurüzhe Küzü Kheri vünüh zanyo khrütsa küpewa ta küsa thsüra nü ma vü moti sathuoh nüh müshe nü ngo thi küükrükükra sa she.

Kükhurüzhe vü Pitor Zhühlekütsü

11Rünyih küpriwa tü Pitor thi Johan küthuohke nü tsieküveh vü nyiri tü ngo she taji Solomon atela ti küji vü zhüru khe. 12Pitor nüh jü ngu taji nyiri vü, Israel nyiri, nohri mowa sanü hama kenüh ngo veh lo? Nohri tü mokenüh hiri nophoke veh lo? Nohri kümüshe vü jisu kükhra vünüh nyutü hisü kümühie vünüh anyi hama alesakütse saveh ti saveh ülo? 13#Tse 3.15. Abraham thi Isaac thi Jacob, thi hiri lahnyiri Saküüwuowa nüh ma Tsa Jisu saküthola küvehwie. Nohri nüh ma vi kükhraküvira ke vü thsemü thi Pilate nüh ma küze nta sathuoh tü nohri nüh ma tü vünüh ma kulemü. 14#Mat 27.15-23; Mrk 15.6-14; Luk 23.13-23; Jhn 19.12-15. Thitü nohri tü Kümtsewa thi Künyitsawa kürümü nü nyiküfethewa vi nohri tsü üta khuo. 15Thi kürholi Rhuwa zothemü, thitü aküsü vünüh Saküüwuowa nüh ma saküsüra. Thi hisü tü hama povü küsari. 16Thi ma nyo kütsotü vünüh nohri nüh ngu thi thsüküveh anyi hama rünyihküpri sakümüzhora; thi kütsotü Jisu vünüh küruwa nüh nohri aveh atü vünüh anyi hama kürho sajutsüthuoh. 17Thi jükenüh eh füri, nohri sierhüri kümüjie nohri nga zanyomüthsüju nüh samüwiethuoh. 18Thitü Khrista tü mümünomünaji mümühie ta küsa Saküüwuowa nüh setsaküthsüri povü vünüh küphrateke kümüjie sajuthuoh. 19Jükenüh nohri kükhiemuori phrazhujamü nü Vüwa atü vünüh nohri sakürherho le na küsa kenüh luoveh khaphrü thi süle le luo; 20thi Vüwa vünüh sietse sakükhra tsothowa re naveh, thi ma nüh Jisu küze naveh, ma tü Messiah nohri kenüh chuküsawa. 21Thitü khanavü Saküüwuowa nüh kümtse setsaküthsüri vünüh küüza kümüjie zanyo aveh müjie saküürüthele küju nü ma tü thajüwu rügivü müpelawieji mümühie. 22#Kho 18.15,18. Küpakenühnyunü Mosa nüh, “Vüwa Saküüwuowa nüh hi küüshu kümüjie nohri küshukütu vünüh setsaküthsüri küsü küshu naveh. Thi ma nüh momowa nohri vü küza naveh nüh nohri ma zhü küna naveh. 23Thi thari nüh setsaküthsü jüma zhü müküna nüh sa naveh nüh nohri anyi azhie vünüh zothemü naveh. 24Thi setsaküthsüri aveh Samuel vünüh wa ma se vünüh küruri aveh nga nosü zhüku hamari aveh phrate. 25#Atü 22.18. Nohri tü setsaküthsü jümari thi Saküüwuowa nüh nohri nyiri vü kümühie vünüh azhih vü tsapatharuo aveh kütsia ngu naveh ta küza küsa atsari wiethuoh. 26Nohri mükümühie vünüh khaphrüle nü nohri vü kütsia tsü na küsa kenüh Saküüwuowa nüh ma Siepewa rüka nü nohri vü küzekhu,” ti küza.

Поточний вибір:

KÜÜRORI 3: POCHBSI

Позначайте

Поділитись

Копіювати