TAUNET 25
25
Kaliletap Abraham
1Ki itun Abraham kwondo age ne kiguure Ketura, 2ak ki sikyi Simran, Joksan, Medan, Midian, Isbak, ak Sua. 3Ak ki sich `Joksan Sheba ak Dedan. Weeriigap Dedan ko ki Asurik, Letusik ak Leumik. 4Weeriigap Midian ko ki: Ephah, Epher, Hanok, Abida ak Eldaa. Chuuto tugul ko ki lagogap Ketura. 5Ki pogokyi `Abraham Isak tuguuk tugul che ki tinyei. 6Ago ye kita kosabei ko ki igoochi weeriigap chebaigeinikyik, kagoochinoik ak koleenji koba koistogei eng' ole mi weeriinnyi Isak, koba emetap kong'asiis. 7Kenyiisyek che ki tar Abraham kosabei, ko pogol ak tamanwogik tisap ak muut. 8Ki ilil Abraham ko kagoosit miising', ko poiyot ne kiga konyi peetuusyekyik, ak ki kiyum kobooto piikyik. 9Kitup ineendet weeriikyik Isak ak Ishmael eng' kebeneetap Makpela ne tokyingei Mamre, ne mi mbareetap Epron, weeriitap Sohar Hitindet, 10#Tau 23.3-16 ne ki alee Abraham piigap Het. Yooto ye ki kitupchi Abraham, ak Sarah kwondonyi. 11Kingo kagobata kaliletap Abraham, ko ki iberuur `Kamuktaindet Isak weeriinnyi, ak ki meny Isak ole neegitee keriingetap peek ne kiguure Beer-lahari-roi.
12Chu ko ortinwegap Ishmael, weeriitap Abraham, ne ki sikyi Hagar Chemisiryot otwogindetap Sarah, 13Chu isubi ko kainaigap weeriigap Ishmael, ko uu kainaikwak ak ko uu ortinwekwak: lakweet ne po tai ne po Ishmael ko Nebaiot; yeityo korup Kedar, Adbeel, Mibsam, 14Misma, Duma ak Massah; 15Hadad, Tema, Jetur, Napis, ak Kedema. 16Chu ko weeriigap Ishmael, ak chu kainaikwak, eng' nganasookwak, ak eng' meng'ootennywa; pounik taman ak aeng' ko uu pororyosyekwak. 17Kenyiisyegap Ishmael che ki tar kosabei, ko pogol ak sosom ak tisap. Kingo lil ineendet, ko ki kigonor kobooto piikyik. 18Ki meng'oot kobooch Havilah agoi Shur ne tokyingei Misiri, eng' ooreet ne wendi Assyria, ki wo komeny olooto eng' taitap tupchosyekyik tugul.
Sigeetap Esau ak Jakobo
19Chu ko ortinwegap Isak, weeriitap Abraham: kisichei `Abraham Isak. 20Ki po Isak kenyiisyek artam ye kingo tuni Rebeka, cheptap Bethuel Syriaindet ne po Padan-aram, chepkametap Laban Syriaindet. 21Ki riirchi `Isak Kamuktaindet ne Toroor miising' agobo kwondonyi, amu kisoon. Ki kasyi Kamuktaindet ne Toroor riirekyik ak ki manach Rebeka kwondonyi. 22Kingo tomono, kobelgei lagok eng' moennyi; ak ki le, “Ngot ko uu nooto, ko kalya si atep ko uu ni?” Ak ki wo koteebe Kamuktaindet ne Toroor. 23#Rom 9.12 Ak ki leenji Kamuktaindet ne Toroor,
“Miitei moeng'ung' pororyosyek aeng'u,
ak tuun pcheegei pororyosyek chu aeng'u punu moeng'ung';
kimitu pororyet age kosiir age;
ak koot ne oo ne ming'in.”
24Ye kingo it anyun peetuunnyi ne po kosigiis, ogeero, ki mi sarameek moennyi. 25Ki indoi ne oo, ak kibiriir. Ki sabul poorto tugul ko uu sambut ak kiguure kainennyi Esau. 26Kingo pata nooto kesich ng'eetap kamet ne kinamonu kwaryatap Esau; ki kiguure kainennyi Jakobo. Ki po Isak kenyiisyek tamanwogik lo ye kingo sichei kwondonyi lagochooto.
27Ki egitu weerchooto, ki kiplogotyot ne ng'oom Esau, chiito ne po timiin. Ago ki chiito Jakobo ne tala ne kimeng'ooti emaisyek. 28Ki chamei `Isak Esau, amu ki amei panyeek che ki ibune logeet, ago ki chamei `Rebeka Jakobo. 29Ye kingo chobei Jakobo sogoryek, koit Esau kobunu timiin, ko kang'et miising'. 30Koleenji anyun `Esau Jakobo, “Kaigai, koono aam amitwogichu piriireen amu kaatanui!” Ki kiguure kainennyi anyun Edom amu nooto. 31Koleenji Jakobo, “Aldaiwo korook imandap etunateng'ung' ne po sigeet.” 32Kole Esau, “Keero, neegit ame; tos tilei nee eng' anee etunateet ne po sigeet?” 33#Heb 12.16 Ak ki leenji Jakobo, “Iyosyeiwo rani.” Ak ki iyasyechi anyun ineendet ak ki aldochi Jakobo etunatennyi ne po sigeet. 34Yeityo kogoochi `Jakobo Esau magatyat ak sogoryek che kiyoe che kiguure lendil. Ki am ak koe, yeityo kong'eet kwo. Ara ki mata koiit anyun Esau etunatennyi ne po sigeet koek kiy.
Поточний вибір:
TAUNET 25: KAPR
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
©Bible Society of Kenya, 2019