JOHAN 4
4
Jisu Leh Samaria Nunau
1Chun, Jisu nih Johan ngâk hen ṭhiruai tam dauh a siam mi leh a baptis ti Farisai tla nih an theih ti Lalpa nih a theih kâ hen, 2(Sikhawmsele Jisu tak nih chun a baptis lo, a ṭhiruai tla nih an baptis tâwn.) 3Judai ram chu a kaltâk le, Galili ram ah a kîr nawlh rawh. 4Chun, Samaria ram a pal ding asi. 5Chuvachun, Samaria ram ah khua pakhat, Saikar an ti mi chu a tleng le, Jakob nih a fa Josef sinah mun a pêk mi kiang kha; 6Jakob tikhurchawh khawm kha chunah chun a um. Chun, Jisu chu a lam kal dît ruangah tikhurchawh kiang ah a to: Sûn dâr leinih liau asi.
7Chun, Samaria nunau pakhat tî than a hawng. Jisu nih a sinah, “Din ding hawng ka pêk,” a ti. 8A ṭhiruai lam chu ei ding châwk hen khua ah an kal rawh.
9Chuvachun, Samaria nunau nih chun a sinah, “Nang Juda mi na si, kei Samaria nunau kasi, zeitin zia hen ka sinah din ding na ka deih?” a ti. (Juda tla nih Samaria tla zei lak khawm ah an mang#4.9 ‘Manglo ti hi îk tinâk asi. dahlo ruangah.)
10Chun Jisu nih a sâng le, a sinah, “Pathian thilpêk le, Din ding hawng ka pêk,’ na sinah titu hi theih le chu, nangnih a sinah na deih dauh ding asi, chun, anih nih tî nung a nan pêk rawh ding asi,” a ti.
11Chun, nunau nih chun a sinah, “Pu, a thannâk zeikhawm na nei lo mi, tikhurchawh a thûk thlo mi, kha zei a mi tî nung na tawng? 12Kan pu Jakob ngâk hen na rokual dauh mazei? Anih nih chun tikhurchawh hi hawng kan pêk le, amah khawm nih a din le, a fa le, a ran tla hen,” a ti.
13Chun, Jisu nih a sâng le; a sinah, “Âuzawng hi tî dintu vial an tîhâl nawlh lai; 14âuzawng an sinah ka pêk ding mi tî dintu vial lam chu zungzâl hen an tîhâl lai loh, kei nih an sinah tî ka pêk ding mi chu an sung ah tî nung a um lai le, zungzâl nung tiang hen a irh lai,” a ti.
15Chun, nunau nih chun a sinah, “Pu, chu tî chu hawng ka pêk, ka tîhâl lonâk ding leh hi bang tiang tî than ding hen ka hawng lonâk ding hen,” a ti.
16Chun, Jisu nih a sinah, “Na pasal va kawh le, hinah hawng nawlh,” a ti.
17Chun, nunau nih chun a sinah, “Pasal ka nei lo,” a ti le, a sâng.
Jisu nih a sinah, “Pasal ka nei lo, na ti mi hi, na dik ngâk; 18pasal panga na nei rawh, tu ah mi hi na pasal asi lo asi, hi thu hi na sim dik ngâk,” a ti.
19Nunau nih chun a sinah, “Pu, khuavâng na si ti ka theih. 20Kannih thlâktu tla nih chun hi tlângah hin Pathian an sawnh tâwn; sikhawmsele, nannih nih chun, ‘Minung nih Pathian an sawnhnâk mun ding chu Jerusalem ah a um,’ nan ti tâwn,” a ti.
21Chun, Jisu nih a sinah, “Nunau, ka thu lung rawh, hi tlâng kher lo khawm ah, Jerusalem kher lo khawm ah Pa nan sawnh tik a tlung awt rawh. 22Nannih nih nan theihlo mi nan sawnh tâwn; kannih nih kan theih mi kan sawnh tâwn. Ruangsuaknâk Juda tla sin thawk hen a hawng suak awt asi. 23Chuvachun, a tik a tlung awt rawh, tu khawm ah a tlung liau chir, chu tik chun Pathian sawnhtu tatak tla nih Thlarau leh thudik hen Pa an sawnh lai, Pa nih chu hâwi mi chu amah sawnhtu ding hen a hâwl asi. 24Pathian chu Thlarau asi, a sawnhtu tla nih Thlarau leh thudik hen an sawnh ding asi,” a ti.
25Chun, nunau nih chun a sinah, “Mesia, (Sariak Thuh an ti mi chu)#4.25 g Greek hawlh hen Krist tinâk asi, Mesia chu Hebrai hawlh. Mesia mawh Krist chu Sariak Thuh tinâk asi. Juda tla dân hen lalchem ding hen sariak an thuh tâwn ruangah. a hawng kal awt ti ka theih, anih chu a hawng kal tikah zeizawng hawng kan simh lai,” a ti.
26Chun, Jisu nih a sinah, “Keimah a nan sawnhtu hi amah chu kasi,” a ti. 27Chun, chu liau tak chun a ṭhiruai tla chu an hawng kal le, nunau a sawnh mi chu chê an ti; sikhawmsele, âukhawm nih, “Zeime na hâwl?” “Zeirang nunau na sawnh?” khawm an ti lo.
28Chun nunau nih chun a tibêl a kaltâk le, khua ah a kal, mi zapi sinah, 29“Ka thilti zawzawng hawng ka simh vimatu mi pakhat a um, hawng kal ule, zauhnik u, Mesia asi kho lai ma?” a ti. 30Chun, annih chu khua ah mi chu an hawng suak le, amah lei an fûk rawh.
31Chu karah a ṭhiruai tla nih chun a sinah, “Sîntirtu, ei rawh,” an ti chiam. 32Sikhawmsele, anih nih chun an sinah, “Buh nan theihlo mi ei ding ka nei,” a ti.
33Chun, ṭhiruai tla chu anna sâwn le, “A ei ding, mi nih an hawng put piak masi le?” an ti.
34Chun, Jisu nih an sinah a sim le, “Hawng ka fialtu duhzia ti leh a rianṭuan dih ding hi ka buh asi. 35Nannih nih, ‘Fâng ât ding thla li a um rih,’ nan tilo mazei? Ngâi u, ka nan simh na; chuanh ule, lo tla zauh u, tu thawk hen ât ding hen a vâng asi. 36A âttu nih lawh a tawng tâwn le, zungzâl a nung tiang um ding hen rah a khawmh tâwn, a tuhtu leh a âttu anna lâwm vevê khonâk ding hen. 37‘Pakhat nih a tuh le, midang nih a ât, ti thu hi, chu lak chun a dik asi. 38Nan ṭuan tha fâk lo ât ding hen ka nan fial na kha; midang nih an ṭuan le; nannih nih an ṭuan chia chu nan zulhpeh asi,” a ti.
39Chun, nunau nih chun, “Ka thilti zawzawng a hawng ka simh vima,” ti hen, a theihtir mi thu ruang khan, chu khua mi Samaria mi tam tak nih Jisu an zumh rawh. 40Chuvachun, Samaria mi tla chu Jisu sinah an hawng le, an sinah châm ding hen an ngiar chiam; chun, chunah ni nih a châm. 41Chun, midang tam tak nih amah thu ruangah an lung rawh. 42Chun annih nih chun, nunau sinah chun, “Tu lam chun na thusim ruangah lung kan si lo rawh; kanmah ngelchel nih a thu kan theih le, hi minung hi laikulh Ruangsuahtu asi ngelchel ti kan theih rawh,” an ti.
Jisu Nih Hotu Fapa A Damhnâk
43Chun, ni nih nûnah chun chu thawk hen a suak le, Galili ram ah a kal rawh. 44Jisu tak nih, khuavâng chu amah khua leiah chun chawnglawmh hen a um dahlo ti a theihtir tâwn. 45Chuvachun, Galili ram a va tlung chun Galili ram ah mi tla nih an lawmh le, Jerusalem ah Kût liauah a thilti zawzawng an muh ruang khan; annih khawm chu Kûtnâk ah an kal bâk dangâiah. 46Chun, Galili ram ah Kana ah tî uain a changtirnâk kha a hawng tleng nawlh. Chun, Sorkar rianṭuantu âumawh a um le, a fapa Kapernaum ah a damlo. 47Chun, Jisu Judai ram mi Galili ram ah a hawng ti a theih kâ hen a va kal, a fapa damh ding hen a ngiar chiam le, a thi awt ngangâi asi. 48Chun, Jisu nih a sinah, “Singsiahnâk tla leh thilchê tla nan muh lo chun nan lung rîlmâl lai loh,” a ti.
49Chun, Sorkar rianṭuantu nih chun a sinah, “Pu, ka fa thih lânah hawng ko me a,” a ti.
50Chun, Jisu nih a sinah, “Tlung ko rawh, na fapa chu a dam rawh,” a ti.
Chun, chu minung nih chun Jisu nih a sinah thu a sim mi chu a lung le, a kal rawh. 51Chun a kal liauah a to-aw tla nih an hawng dawng le, “Na fapa chu a dam rawh,” an hawng ti.
52Chun, anih nih chun an sinah a dam liau tik chu a deih na. Chun, annih nih chun a sinah, “Mazân nî her sat#4.52 Nî her sat ti mi hi sunnilei dâr 1 asi. ah a râifanh nih a thlah rawh asi,” an ti. 53Chun, a pa nih, Jisu nih a sinah, “Na fapa chu a dam rawh,” a ti liau tak chu asi ti a theih rawh; chun, amah leh a dâwngsung tla nih an ektê hen Jisu an zumh rawh.
54Chu chu Jisu nih a thilchê ti Judai ram thawk hen Galili ram ah a hawng kal liauah a ti veinihnâk chu asi.
Поточний вибір:
JOHAN 4: BCLBV
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Bawm Common Language Bible © Bangladesh Bible Society, 2004. All rights reserved.