Yòhanɛ̀s 1
1
Wo sɔ ènyà wɔ̀ ŋutilã
1So gɔ̃mèjèje a, Ènyàa lè; Ènyàa nɔ̀ ku Mawu, eye Ènyàa nyi Mawu. 2Eye e nɔ̀ ku Mawu so gɔ̃mèjèje a. 3Mawu ɖo ènuwo keŋu to e ji; wo mu ɖo ènu ɖekpe tovò lè e ŋuti ò. 4E ye mè àgbè lè, eye àgbè a nyi kɛ̃klɛ̃ na àmèwo. 5Eye kɛ̃klɛ̃a kɔ̀nà lè vìvìti mè; vɔ̀a vìvìtia mu xɔ̀ ɛ̀ ò. 6Àmè ɖe va, ekè Mawu dɔ̃ ɖoɖaa, yebe nyikɔ ye nyi Yòhanɛ̀s 7àmè ŋua va la nyi ɖàsèfo, ne bèa ɖù ɖase so kɛ̃klɛ̃a ŋuti, ne àmèwo keŋu ne xɔ̀sè to e ji. 8Mu nyi e ye nyi kɛ̃klɛ̃a ò, vɔ̀a, e va ne bèa ɖù ɖase so kɛ̃klɛ̃a ŋuti. 9Ènyàa nyi kɛ̃klɛ̃ àdodoe kè va xixea mè, ne bèa klɛ̃ na àgbètɔwo keŋu.
10E lè xixea mè; eye Mawu ɖo xixea to e ji; vɔ̀a xixea mu jèsi ì ò. 11E va ye ŋutɔ ye tɔ̀wo gbɔ, vɔ̀a, ye tɔ̀wo mu xɔ̀ ɛ̀ ò. 12Vɔ̀a àmè kèwo xɔ̀ ɛ̀, eye wo xɔ̀ yebe nyikɔ ji sè a, e na wo ŋusɛ̃ be woa trɔ zũ Mawu be èviwo. 13Wo mu trɔ zũ Mawu be èviwo, to xixea be ɖoɖo, àlo àlekè ye àmè jìnà èvi nène ò, vɔ̀a Mawu ŋutɔ ye na wo àgbè yeye.
14Eye ènyàa trɔ zũ ŋutilã, eye be nɔ̀ mia dòmè, ɖɔ ku màje kudo nyàwo. Mi kpɔ yebe gogoa, gogo kè Èvi àkòŋùgòa xɔ̀ so Ètɔa gbɔa. 15Yòhanɛ̀s ɖù ɖase so e ŋuti gblɔ̃ be: “Àmè kè be ènyà mù to na mì sãa be: 'àmè ɖe lè yo nyè mè gbãnà, vɔ̀a, e jè ŋùkɔ̀ na mù ɖo e jɔ̀ gbɔ̀xue mù jɔ̀.'” 16Đo yebe ɖɔɖɔ mè, ye mia keŋu mi xɔ̀ màje ɖo màje ji lè. 17Ne Mosè ji ye èseawo to vaa, Yesù Kristò ji ye màje ku nyàwo a to va. 18Àmè ɖekpe mu kpɔ Mawu kpɔ ò; Mawu be Èvi àkòŋùgò, kè nyi Mawu eye be gbà le Àta gbɔa ye ɖè è fiɔ mi.
Yòhanɛ̀s ɖù ɖase
(Màt 3.1-12; Mrk 1.1-8; Luk 3.1-18)
19Ekèa ye nyi Yòhanɛ̀s be ɖase, wàlɛbɛ kè Yudàviwo dɔ̃ mawunɔwo ku Levìwo so Yèruzàlɛm, be woa yì biɔ ɛ̀ sè be: “Àmè kɛ ye wò nyi ò?” 20Mu mɔ ò, eye e hũ e mè be: “Mu nyi ènyè ye nyi *Mɛ̀sia ò.” 21Eye wo gbà biɔ ɛ̀ be: “Àmè kɛ koŋu ye wò nyi ò? Èwò ye nyi Eliyaa?” E ɖo e ŋuti be: “Ào! Mu nyi ènyè ye ò.” Wo gbà biɔ ɛ̀ be: “Èwò ye nyi Mawu be gblɔ̃ɖɛtɔa?” E ɖo e ŋuti be: “Ào.” 22Wo gbà biɔ ɛ̀ be: “Àmè kɛ ŋutɔ koŋu ye wò nyi ò? Ne mia yì ɖo ègbè na àmè kèwo ye dɔ̃ mi ɖoɖa gbɔ wòa. Àmè kɛ ye wò ŋutɔ wò gblɔ̃nà be yè nyi ò?” 23E ɖo e ŋuti be:
“Ènyè ye nyi àmè kè be ègbè le ɖì lè zògbè ji be:
'Mì jɔ̀ Tɔhonɔ̀ be èmɔa.'”
Sìgbè àlekè Mawu be gblɔ̃ɖɛtɔ, Ezayà gblɔ̃a nène.
24Farizìwo lè àmè kèwo wo dɔ̃ ɖoɖa Yòhanɛ̀s gbɔawo dòmè. 25Wo biɔ ɛ̀ be: “Kè wò mu nyi *Mɛ̀sia, àlo Èli, àlo Mawu be gblɔ̃ɖɛtɔ òa, nukɛ ŋuti ye wò jo le lè mawusi na àmèwo ɖo ò?” 26Yòhanɛ̀s ɖo e ŋuti na wo be: “Ènyè yaa, mù le lè mawusi na mì kudo èsì. Vɔ̀a àmè ɖe lè mìa dòmè, ekè mì mu jèsi ò; 27àmè ŋua ye nyi àmè kè le yo nyè mè gbãnàa; nyè mu sù la tu yebe àfɔ̀kpa-kawo ŋutɔ cã ò.” 28Ènu kèawo jɔ̀ lè Betanìa, lè Yɔrdàn be ètɔ̀a godo, àfi kè Yòhanɛ̀s le lè mawusi na àmèwo lèa.
Mawu be àlɛ̃via
29Ekè èŋù kèa, Yòhanɛ̀s kpɔ Yesù zɔ̃ gbãnà e gbɔ, eye be gblɔ̃ be: “*Mawu be àlɛ̃vi kè la va sɔ xixea be èvuɛ̃wo yìa ye nyi ekèa. 30Àmè kèa ye nyi àmè kè ŋuti mù gblɔ̃ so be: 'Àmè ɖe jè yo nyè mè gbãnà, ɖo, e jè ŋùkɔ̀ na mù, eye e jɔ̀ gbɔ̀xue mù jɔ̀.' 31Nyè ŋutɔ nyè mu jèsi ì sãa ò. Vɔ̀a, mù va le lè mawusi na àmèwo kudo èsì, ne ma sɔ ɖè è fiɔ Izràɛl dùkɔ̃a.”
32Yòhanɛ̀s gbà gblɔ̃ so e ŋuti be: “Mù kpɔ Gbɔ̃gbɔ̃ a, be lè sìgbè àhɔ̃ne nène, ɖì so jiŋùkusi va nɔ̀ e ji. 33Nyè mu kpɔ nya àmè kè ŋùmè ye be nyia ò. Vɔ̀a, Mawu kè dɔ̃ mù ɖoɖa be ma lè mawusi na àmèwo kudo èsìa, gblɔ̃ na mù be: 'Àmè kè ji ye wò la kpɔ Gbɔ̃gbɔ̃ a la ɖì va, eye be la nɔ̀ ɛ̀ jia, àmè ŋua ye nyi àmè kè la sɔ Gbɔ̃gbɔ̃ Kɔ̀kɔ̀ɛ a lè mawusi na àmèwo.' 34Eye nyè ya mù kpɔ, eye mù gbà le ɖù ɖase be, àmè kèa ye nyi Mawu be Èvia.”
Yesù be nukplavi cucugbã tɔ̀awo
35Yebe èŋù kè gbèa, Yòhanɛ̀s gbà lè funua ke kudo yebe *nukplavi èvè. 36Eye, kè be kpɔ Yesù va le yìa, e gblɔ̃ be: “Kpɔɖa, *Mawu be àlɛ̃via ye nyi ekèa!” 37Ekè Yòhanɛ̀s be *nukplavi èvèawo sè ènu kè be gblɔ̃a, wo jè Yesù yomè. 38Yesù trɔ kpɔ ŋùgbe eye be kpɔ be Yòhanɛ̀s be nukplaviawo jè yè yomè. E biɔ wo be: “Nukɛ mì le ji ò?” Wo ɖo e ŋuti na ɛ̀ be: “Rabì, e gɔ̃mè ye nyi 'Ènufiɔtɔ', fikɛ ye wò nɔ̀nà ò?” 39E gblɔ̃ na wo be: “Mì va kpɔ àfi kè mù nɔ̀nàa ɖa.” Wo kpàsà ɛ̀ do yì jèsi àfi kè be nɔ̀nàa, eye wo nɔ̀ e gbɔ gbè ŋua gbè. Ènu kèawo kpata le jɔ̀, wètrɔ gà ènè mè lɔ̀ge.
40Nukplavi èvè kèwo ye sè Yòhanɛ̀s be ènyà, eye wo jè Yesù yomèa dòmètɔ ɖèka ye nyi Ãdre, Simɔ̀n Petrò be nɔ̀vi. 41Ãdre yì kpɔ nɔ̀via Simɔ̀n cucugbã, eye be gblɔ̃ na ɛ̀ be: “Mi kpɔ *Mɛ̀sia.” E gɔ̃mè ye nyi “Kristò”#1.41 Kristò: Mawu be àmè si àmì na. . 42Eye e kplɔ̀ ɛ̀ va Yesù gbɔ. Yesù kpɔ ɛ̀ dũu, gblɔ̃ na ɛ̀ be: “Èwò ye nyi Simɔ̀n, Yòhanɛ̀s be èvi. Wo la yɔ wò be Kefàs.” E gɔ̃mè ye nyi: “Àkpã#1.42 Àkpã: èkpe gãa. .”
Yesù yɔ Filipò ku Natanàɛl
43Yebe èŋù kè gbèa, Yesù ɖo e be yèa yì Galilea. E dogò Filipò lè èmɔ ji, eye be gblɔ̃ na ɛ̀ be: “Kpàsà mù do!” 44Filipò so Bɛtsaida, Ãdre ku Petrò be èdù mè. 45E yì kpɔ Natanàɛl, gblɔ̃ na ɛ̀ be: “Mi kpɔ àmè kè be ènyà Mosè to na mi lè Èse Xoma a mèa, àmè kè ŋuti gblɔ̃ɖɛtɔwo cã pò nupo soa, Yesù, Yozɛ̀f be èvi, Nazarɛttɔ̀a ye.” 46Vɔ̀a Natanàɛl gblɔ̃ na Filipò be: “Ènu ɖɔ̀hũi ɖe teŋu to so Nazarɛta?” Filipò ɖo e ŋuti na ɛ̀ be: “Va, ne wòa kpɔ.”
47Yesù kpɔ Natanàɛl gbãnà ye gbɔ, eye be gblɔ̃ so e ŋuti be: “Mì kpɔ ɖa, Izràɛlvi àdodoe, kè mè àjè-zɔ̃li ɖekpe mu lè òa ye nyi ekèa.”
48Natanàɛl biɔ Yesù be: “Fikɛ ye wò jèsi mù so ò?” Yesù ɖo e ŋuti na ɛ̀ be: “Wàlɛbɛ kè wò lè vòtia gɔ̃mèa, gbɔ̀xue Filipò la yɔ wòa, mù kpɔ wò xoxo.” 49Natanàɛl gbà gblɔ̃ na ɛ̀ be: “Ènufiɔtɔ, èwò ye nyi Mawu be Èvia, èwò ye nyi Izràɛl be èfìɔa!” 50Yesù ɖo e ŋuti na ɛ̀ be: “Ekè mù gblɔ̃ na wò be mù kpɔ wò lè vòtia gɔ̃mèa, wò xɔ̀sè. Vɔ̀a wò la gbà kpɔ ènu kèwo wu ekèawoa!” 51Yesù yì e ji, gblɔ̃ be: “Nyàwo mù le to na mì: mì la kpɔ jiŋùkusi la hũ, eye Mawu be àtikplɔtɔwo la nɔ̀ yì ji, la nɔ̀ gbɔ̀ va *Àgbètɔ be Èvia ji!”
Поточний вибір:
Yòhanɛ̀s 1: GEN
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Mina Bible © Bible Society of Togo, 2014.