GÉNESIS 21
21
Isaac nacen
1Señorqa, Saraman imatachus qosqayki nisqanman jina, palabrasninta junt'arqa. 2Saraqa wijsayoj rikhurerqa. Jinamanta qosan Abrahampaj wawayoj karqa, Dios mayk'ajchus kananta nerqa chayman jina. Chaypacha Abrahamqa allin machuña karqa. 3Abrahamqa warmin Sara nacechipusqan wawata Isaacta suticharqa. 4Pusaj p'unchayninmantaj wawata circuncidarqa Diospa kamachisqanman jina. 5Abrahamqa pachaj watasniyoj karqa wawan Isaac naceshajtin. 6Chaypacha Saraqa unancharqa: Dios asichiwarqa, kunanqa kayta yachajkuna noqawan khuska asikonqanku. 7Pitaj ninman karqa Abrahamman paypaj wawayojraj kanaytarí? Chaywampis payman wawata rejsichiniraj chay jina machuyaynimpi.
Agar Ismael wawanwan qharqosqas kanku
8Isaacqa jatunña karqa, ñuñumantapis p'itisqaña. Chay p'itisqanku p'unchaypi Abrahamqa jatun mikhuykunasta wayk'ucherqa. 9Saraqa rikorqa Abrahampa wawan Ismael, egipcia Agar kamachimpi karqa chay, Isaacta asipayashajta. 10Chaymanta llojsiytawan Abrahamman nerqa: Kay kamachi warmita wawantinta qharqoy! Isaac wawallay tukuy chayaqeta jap'ikaponqa, kay kamachi warmej wawanrí mana imatapis paywan khuska jap'enqachu. 11Abrahamqa chayta uyarispa mayta llakikorqa, imaraykuchus wawallantaj Ismael kasqanrayku. 12Diostaj nerqa Abrahamman: Ama llakikuychu chay wawaykimanta, nitaj kamachiykimantapis. Kasuy warmiyki Sara imatachá nisunki chayta, qampa mirayniykeqa jatunyasqa Isaac wawaykinejta. 13Kamachiykej wawanmantapis uj jatun nacionta wiñachisaj, qampa wawayki kasqanrayku.
14Q'ayantin tutamanta Abrahamqa Agarpaj wakichiporqa, jaywarqataj t'antata, uj qara botaspi yakutawan. Jinaspataj Agarman wawan Ismaelta q'epiriykucherqa, kacharpayarqataj iskayninkuta. Chaymanta Agarqa riporqa mana yachaspa maymanchus rinanta, Beerseba ch'in pampaman chayanankama. 15-16Apakusqanku yakupis tukukapojtin, wawanta uj juch'uy sach'a uraman siriykucherqa, jinaspataj Agarqa karunejman rerqa, ama waway wañojta rikusajchu, nispa. Chaypi tiyaykukuspataj sinch'ita sonqo nanayta waqarikorqa. 17Diostaj wawaj waqasqanta uyarimorqa, kachamorqataj janaj pachamanta uj angelta, Agarmantaj nerqa: Imanasunkitaj Agar? Ama phutikuychu, Dios uyarin wawaj waqasqanta maypichus kashan chaypi. 18Sayariy, wawaykita makinmanta aysarimuy, noqa paymanta ruwasaj uj jatun nacionta.
19Chaymanta Diosqa rikucherqa Agarman uj yaku pujyuta. Paytaj riytawan qara botasninman junt'aykucherqa, apamuspataj Ismaelman ujyacherqa. 20Ajinata Dios yanaparqa Ismaelta, paytaj wiñarqa, tiyakorqataj ch'in pampapi; chantaqa sumajtataj flechayta yacharqa. 21Pay tiyakorqa Parán ch'in pampapi, mamantaj casaracherqa uj egipcia warmiwan.
Abrahamwan Abimelecwan uj tratota ruwanku
22Chay tiempollapitaj Abimelecqa soldadosninta kamachejnin Ficolwan rerqanku Abrahamwan parlaj. Chayaspataj nerqanku: Rikuyku qanta Dios tukuy ima ruwasqasniykipi yanapasusqanta. 23Chayrayku qan niy ari Diospa sutinta oqharispa, ama ima sajratapis ruwanawaykita, ni wawasniypaj, nitaj mirayniypajpis. Nillaytaj ari allinta ruwanawaykita noqa imaynatachus ruwarqayki ajinata, jinallataj allinta ruwanaykita kay runaspajpis, mayqenkunaj llajtampichus tiyakushanki chaypi.
24Abrahamtaj kuticherqa: Arí, ajinata ruwasaj Diospa ñaupaqempi, nispa. 25Chanta Abrahamqa yuyaricherqa Abimelecpa kamachisnin uj yaku pujyunta qhechusqankuta.
26Abimelectaj nerqa: Kunankama mana yacharqanichu chayta, qampis chaymantaqa mana ima niwankichu, mana yachanichu pichus chayta ruwasqanta. 27Abrahamqa Abimelecman waqerqa ovejasta, wakasta; iskayninkutaj uj tratota ruwarqanku. 28Chanta Abrahamqa qanchis ovejasta wajnejman t'aqarqa. 29Abimelectaj nerqa: Imapajtaj chay qanchis ovejasta t'aqashankiri?, nispa. 30Abrahamtaj kuticherqa: Kay qanchis ovejasta qoshayki chayqa, kanqa yachakunampaj noqa kay yaku pujyuta ruwasqayta. 31Chayrayku chay cheqata suticharqanku Beersebata. Imaraykuchus chaypi allin parlayman yaykorqanku iskayninku.
32Chay tratota Beersebapi ruwaytawan Abimelecwan, general Ficolwan kutiporanku filesteospa llajtanman. 33Abrahamtaj uj tamarisco sach'ata chaypi tarporqa. Beersebapi Abrahamqa wiñay kausayniyoj Señor Diosmanta mañakorqa. 34Jinamanta Abrahamqa unayta tiyakorqa filesteospa jallp'ampi.
Поточний вибір:
GÉNESIS 21: QCHSB
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Qheshwa Biblia DC © Sociedades Bíblicas Unidas, 1986.