GÉNESIS 31
31
Jacob wakichikun ripunampaj
1Jacob uyarerqa Labampa wawasnin nisqankuta: Jacobqa tatanchejpa tukuy kapuyninta jap'ikapun, chaywan qhapajyaykun, nispa. 2Chanta Jacobqa reparallarqataj, Labanqa manaña ñaupajta jinachu payta munakuywan qhawasqanta. 3Chaymanta Señorqa Jacobman nerqa: Kutipuy jallp'aykiman, tatasniykej jallp'anman, maypichus ayllusniyki kashan chayman, noqataj qanwan kasaj.
4Jacobtaj wajyachimorqa Raquelta, Leatawan taripaj rinankupaj, maypichus ovejasninwan kasharqa chayman. 5Chayajtinkutaj nerqa: Noqa reparakuni, tataykichejqa manaña ñaupajta jinachu qhawawasqanta; chaywampis tataypa Diosnenqa noqawampuni kashan. 6Qankuna yachankichej maytachá atisqayta paypaj llank'anipuni. 7Payri sapa kuti ch'aukiyawan, chunka kutikama pagoyta waj jinayachin. Chaywampis Señorneyqa mana saqenchu ni ima sajrata ruwawajta. 8Chayrayku nerqa: Sañi ovejasta qopusqayki, tukuynin ovejas alqas kajtintaj, niwan: Tukuy alqasninta qopusqayki, nispa; uñastaj alqasllapuni karqa. 9Ajinamanta Diosqa uywasninta qhechun, noqaman qonawampaj.
10Uj kuti, uywas chajrukusharqanku chaypacha mosqokorqani; chaypi rikorqani orqos kajkuna chinasman lloq'asharqanku chaypacha karqanku, ch'ejchis, sañis ima. 11Chay mosqoyniypi Diospa angelnin sutiymanta wajyawarqa, noqataj kuticherqani, kaypi kashani, nispa. 12Chay angelqa niwarqa: Allinta qhawariy, rikunki tukuy orqos kajkuna, chinasman lloq'ajkuna alqas, sañis, ch'ejchis ima kanku. Noqa rikuni imaynatachus Labán ruwasusqanta. 13Betelpi rikhurisorqa chay Dios noqa kani, maypichus qan niwarqanki imatachus ruwanaykita, uj rumita sayachispa chayman aceiteta jich'aspa. Kunanqa jaku, sayariy, ripuy kay jallp'amanta, kutipuy maypichus nacerqanki chayman, nispa niwarqa.
14Chayta nejtintaj Raquelwan Leawan nerqanku: Noqaykojtaqa manaña ima chayaqeykupis kanchu tataykoj wasimpi. 15Noqaykutapis waj runasta jinallaña qhawawayku. Chanta vendewaykutaj. Qan noqaykuwan casaranaykipaj pagasqaykitapis mikhuykakapun. 16Cheqamanta tataykumanta tukuy kapuyninta Dios qhechusqanqa, noqanchejpata, wawasninchejpatawan. Ajina kajtenqa qan ruway ari imatachus Dios nisunki chayta.
Jacob ripun Padan-aranmanta
17Jacobtaj wakichikuytawan ripunampaj wawasninta, warmisnintawan camellosman lloq'aykucherqa. 18Jinaspataj tukuy uywasninta qhatiriykukorqa, Padan-arampi ima uywastachus ganakusqasninta; Canaanman tatan Isaacpa wasinman kutipunampaj. 19Chaykamataj Labanqa ovejasnimpa millmasninta ruthusharqa. Raqueltaj tatampa lantisninta suwarqa. 20Ajinata Jacobqa ch'inllamanta riporqa arameo Labanman mana ripushani nispalla. 21Ayqeporqa tukuy imanwan. Chaymantaqa chimparqa Eufrates mayuta, chaymantapis rillarqapuni Galaad orqokama.
Labán Jacobta qhatirin
22Kinsa p'unchaymantaña Labanqa yacharqa Jacob ayqepusqanta. 23Chaymantaqa ayllusninta mink'arikuspa, chaykunawan Jacobpa qhepanta kacharikorqa. Qanchis p'unchay puriyta rispa Galaad orqopi taripamorqa. 24Chay ch'isitaj arameo Labanman Dios mosqoypi nerqa: Uyariway, Jacobta ama phiñasqa parlapayankichu, nispa.
25Labanqa Jacobta tariparqa Galaad orqopi jarasqa kashajtin. Paypis chaynejllapitaj jarakorqa mink'asqa ayllusninwan. 26Jinaspataj Jacobman nerqa: Imatataj kayta ruwawankiri? Imaraykutaj jinata ch'aukiyawankiri? Wawasniyta pusampuwanki guerramantapis jap'isqas kankuman jina. 27Imaraykutaj mana ima niwaspalla pakayllamanta ayqemunkiri? Yachaspaqa sumaj kusiywan kacharpayamuykiman karqa, cajata, arpata tocajkunawan. 28Mana saqewankichu wawasniyta, allchhisniyta much'aykurejllatapis. Loco jina kaytaqa ruwanki. 29Noqamantaqa atiykichejman karqa imatapis qankunata ruwayta; kunanrí mana atiykichejchu, tataykej Diosnin ch'isi niwan: Sumajta qhawarikuy, Jacobta ama may phiñasqa parlapayankichu, nispa. 30Sichus tataykej wasinmampuni kutiyta munanki, chayraykutaj kaykamapis jamunki chayqa, imaraykutaj lantisniyta suwampuwankiri?
31Jacobtaj Labanman kuticherqa: Noqaqa manchachikorqayki. Yuyarqani wapuchaspa wawasniykita qhechunawaykita. 32Sichus kaypi mayqempa makimpi dioskunasniyki kashan chayqa, wañonqa. Ayllusninchej yachashanku: Niway imaykitachus suwasusqayta, rikushajtinkutaj apakapuy imaykita suwamuni chayqa. Imaraykuchus Jacobqa mana yacharqachu Raquelnin lantisninta suwamusqanta.
33Chaymanta Labanqa Jacobpa jara toldon uqhuman yaykorqa lantisninta mask'akapoj. Chaymantaqa Leajmanñataj yaykorqa; chaypipis mana kajtintaj chay iskay warmi kamachisnimpamanñataj yaykorqa. Chaypipis manapuni tarikaporqachu. Leajmanta llojsispataj Raquelpamanñataj yaykorqa. 34Paytaj lantista jap'iytawan camelloj monturan uraman sat'iykorqa, jinaspataj patanman tiyaykorqa. Labanqa tukuy imas ukhuta mask'aspa manapuni tarikaporqachu lantisninta. 35Jinajtintaj Raquelqa tatanman nerqa: Tatáy, ama phiñakuychu, ñaupaqeykipi mana sayarisqaymanta, kunan killay jamushawan, chayrayku mana jatariyta atinichu. Jinamanta Labanqa lantisninta mask'aspa manapuni tarikaporqachu.
36Jacobtaj phiñarikuytawan jatarispa Labanta k'amerqa: Imatataj mana allinta ruwanichuri? Imastaj juchayri, chay jinatapuni qhatirimunawaykipajri? 37Chay jinataña tukuy imasniy ukhuta mask'anki, imaykitataj tarikapunkiri? Churanoqay ayllusniykej ñaupaqenman, ayllusniy rikushajtin, paykuna ninankupaj mayqenchus juchayoj kasqaykuta. 38Chay iskay chunka watasta qampaj llank'apuyki, ni jayk'aj ovejasniyki sullorqachu, nitaj cabrasniykipis; nitaj jayk'ajpis uj ovejallaykitapis mikhuykunichu. 39Ni jayk'aj sajra animalespa mikhusqasninta apamojchu kayki; manachayqa qopoj kayki chay mikhusqasmanta. Sichus ch'isin, chayri p'unchaynin suwaj kanku chaymantapis mañakapuwaj kanki jinallataj chinkasqasninmantapis. 40Noqaqa kaj kani, p'unchay q'oñita muchuspa, tutantaj chirita muchuspa, mana puñusqataj. 41Iskay chunka watasta wasiykipi karqani, chaymanta kaykuna chayawan: Iskaynin ususisniykirayku chunka tawayoj watasta llank'aporqayki, uywasniykiraykutaj sojta watata. Sapa kutitaj pagoyta uj jinayachej kanki. 42Jinaqa, sichus Abrahampa Diosnin, tatay Isaac yupaychan chay Dios mana noqawanchu kanman karqa chayqa, qanqa mana imayojta kacharpayamuwankiman karqa. Chayrayku Diosniy llakiyniyta rikuwan, imaynatachus llank'apususqayta. Chantamá á ch'iseqa k'amisunki.
Jacobwan Labanwan uj tratota ruwanku
43Chaymanta Labanqa Jacobman nerqa: Warmisniykeqa wawasniy, wawasniykeqa allchhisniy; kay ovejasqa ovejasniy; tukuy imasniykipis noqajta. Chaywampis noqaqa imanasajtaj wawasniyta, wawasninku allchhisniytapisrí? 44Chayrayku kunanqa jamuy; qanwan noqawan ruwanachej uj tratota, noqanchej ukhupi iskayninchejpaj allin kanampaj.
45Jinata nejtintaj Jacobqa uj rumita oqharispa cheqanta pañannejman sayaykucherqa. 46Ayllusninmantaj nerqa: Rumista tantamuychej, nispa. Paykunataj tantamorqanku rumista uj qontuta ruwanankupaj. Jinaspataj chay rumi qontu patapi mikhorqanku. 47Labantaj chay mikhusqanku cheqata parlaynimpi suticharqa, “Jegar Sahadurata.” Jacobtaj parlaynimpi suticharqa “Galaadta”. 48Chaymantataj Labanqa nerqa: Kunan, kay rumi qotoqa kanqa uj señal, iskayninchej tratota allinyakuspa kaypi ruwasqanchejta yachanankupaj. Chayrayku kay cheqaj sutenqa Galaad. 49Sutichallarqankutaj Mizpata, imaraykuchus Labán nerqa: Kunanqa Señor waqaychawasunchej qanta, noqata, kaymanta qhepaman mana rikunakojtinchej qanwan noqawan. 50Sichus kaymanta qhepaman wawasniyta llakichipuwanki, chayri waj warmiswantaj casaranki chayqa, Dioslla rikusonqa, noqanchejqa manaña rikunakusunchu. 51Chaywampis nillarqapuni Labanqa: Qhawariy, kay rumis qontu, qanmanta noqamantawan t'aqaj rumis sayachisqayqa uj señal kanqa. 52Kay rumis qontu, kay rumi chuku sayachisqaqa kanqa uj señal ni qan, nitaj noqa pasanakunanchejpaj kay mojonta ama imata ruwanakunanchejpaj. 53Abueloyki Abrahampa Diosnin, abueloyki Nacorpatawan Diosnin cheqanchawasunchej. Chaymanta Jacobqa jurarqa, mayqen Diostachus tatan Isaac yupaycharqa chaypa sutimpi. 54Chaymantaqa Jacob uj rikuchikuta Diosman qorqa chay orqopi, jinaspataj tukuy ayllusninta wajyarqa mikhunankupaj. Ajinata tukuyninku mikhorqanku, chay orqopitaj karqanku sut'iyanankama.
55Labanqa q'ayantin tutamanta jatarispa wawasninta, allchhisnintawan much'ararqa. Jinaspataj bendiciytawan wasinman kutiporqa.
Поточний вибір:
GÉNESIS 31: QCHSB
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Qheshwa Biblia DC © Sociedades Bíblicas Unidas, 1986.