ỌMWỤ ỌDADA Ọdawụlẹ
Ọdawụlẹ
Etu nya iJenesisi ri ọmwụ ọdada. Ụpwụ nya Ọmwụ Ọdada ọlẹ ya jaabwọ kị bwu họ odehe bala ọmwu ọdada nya angịnyị ehe bala ụka ka ang onyobyi ọhọhọ dọmwụ bala akama olodehe ọlẹ bala abwụma ọlẹ ká Ohe Oluhye juwa bwu kpa ọngịnyị ehe. Ụpwụ nya Ọmwụ Ọdada ọlẹ la ebwo ịkpọnchị imiiye. (1) Ebwo ọhọhẹ ri jaabwọ ká Ohe Oluhye họ odehe bala ego nya ọgbanyẹ nya ọngịnyị ehe. Ẹgẹlẹ à ya ẹla rụ Adam bala Iivu, iKen bala Ebẹlụ, iNuwa bala ukpenyi ọlẹ kọ do bala ube oluhye nya ịBabịlọn (Egbeju 1-11). (2) Ego nya adịda igogo nya ọgbanyẹ nya ala Isirẹlụ juwa ịnyịnyị. Ọngọ họhẹ-họhẹ nyaa ri Ebiraham ọlẹ kọ lehe chajị nya ọmyịmyị ọlala nyamwụ bala ọlẹ kọ kaa ju Ohe Oluhye ihi. Ebwo ọlẹ ja oja nya Ayịsiki ọnyị nyamwụ bala iJekọbụ ọnyị ọtụma nyamwụ ọlẹ kị wụrụ Isirẹlụ ịnyịnyị. Ọ ya ẹla rụ anyị iwo kụrụ imiiye nya ịJekọbụ ịlẹ kị ri ọmwụ ọdada nya imwawụ iwo kụrụ imiiye nya ala Isirẹlu. Ọ ya ẹla datị rụ ọnyị nyamwụ ọlẹ kị wụrụ iJosẹfụ bala ang odudu ká iJekọbụ bala anyị alẹng nyamwụ ịkịla tụ alugbiyegu nyaa wuu rụ kaka kụ iJipiti (Egbeju 12-50).
Ọ ri nya ịlẹhị, ụpwụ ọlẹ ja oja nya angịnyị, ọgụgụ tị ri ọ-ka ya ang ọlẹ ká Ohe Oluhye họ. Ọ dọmwụ bwụla o-ya dodehe nyori Ohe Oluhye à họ odehe ọlẹ lẹ. Ọ chị ẹla ọlụwa eju bwula ọnụ ọmyịmyị nyori Ohe Oluhye ka kịnyaa juwa kpẹhị rịrị angịnyị nyamwụ. Ẹ-ẹpwụ nya ụpwụ ọlẹ wuu, Ohe Oluhye à ri ọngọ kụ ịlahị lẹ. Ọ ya Ohe Oluhye nyị kaa yẹ angịlẹ kị họ tịpyọ akama. Ọ kaa juwa kpa angịnyị nyamwụ ụgbẹyị, juwa daa ụbwọ bala ọ-kpa ọhịhị nyaa jẹ jaabwọ kọ pwoku. Ị da ụpwụ onyogo ọlẹ nyọka ja oja nya ọmyịmyị ọlẹ ká angịnyị la bala ọ-ka da ụbwọ kpa ọmyịmyị ọọwa kịlahị
Ẹla Ịlụpwụ Ọlẹ
Ị họ Odehe bala Angịnyị ehe 1:1—2:25
Ọmwụ ọdada nya Ọhọbịrị bala Akama 3:1-24
O-bwu Ụka nya Adam kele ka Ụka nya INuwa 4:1—5:32
INuwa bala Ukpenyi 6:1—10:32
Ube Oluhye nya ịBabịlọn 11:1-9
O-bwu Ụka nya ịChẹm kele ka Ụka nya Ebiram 11:10-32
Adịda Igogo: Ebiraham bala Ayịsiki bala iJekọbụ 12:1—35:29
Anyị Ịtụma nya Ịsọ 36:1-43
IJosẹfụ bala Anyịnamwụ 37:1—45:28
Ala Isirẹlụ ụ-ụwa iJipiti 46:1-26
Поточний вибір:
ỌMWỤ ỌDADA Ọdawụlẹ: IBNO
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Igede Bible © The Bible Society of Nigeria, 2019.