John 3
3
Jesus na Nikodemɔs
1Nna nyimpa bi fi Farisiifo no mu wɔ hɔ a ne dzin dze Nikodemɔs a ɔyɛ Jewfo panyin bi; 2ɔnoara na ɔbaa Jesus nkyɛn anadwe, na ɔbɛsee no dɛ, Rabae, yenyim dɛ ifi Nyankopɔn nkyɛn na aba dɛ kyerɛkyerɛnyi; osiandɛ obi nntum nnyɛ nsɛnkyerɛdze a eyɛ yi, gyedɛ Nyankopɔn ka no ho. 3Jesus buae see no dɛ, Meka no nokwar mu kyerɛ wo dɛ, Sɛ wɔannwo nyimpa fofor a,#3.3: Anaadɛ, Sɛ woemmfi sor annwo nyimpa a. orunntum nnhu Nyankopɔn ahenman no. 4Nikodemɔs kaa kyerɛɛ no dɛ, Ɔbɛyɛ dɛn na nyimpa a oenyin no, wobotum awo no bio? Obotum akɔ ne na yamu bio ma wɔasan awo no anaa? 5Jesus buaa dɛ, Meka no nokwar mu pefee kyerɛ wo dɛ, Sɛ woemmfi nsu nye Sunsum mu annwo nyimpa a, orunntum nnhɛn Nyankopɔn ahenman mu. 6Nyia wofi honam mu awo no no, ɔyɛ honam; na nyia wofi Sunsum mu awo no no, ɔyɛ Sunsum. 7Mma ɔnnyɛ wo nwanwa dɛ mese wo dɛ, Otwar dɛ wɔwo hom fofor. #3.7 Anaadɛ Otwar dɛ wofi sor wo hom. 8Mframa bɔ wɔ mbrɛ ɔpɛ, na etse ne ndze, naaso innyim mbrɛ ofi ba, na mbrɛ ɔkɔ. Mbrɛ obiara a wofi Sunsum mu awo no tse nye no. 9Nikodemɔs bisaa no dɛ, Yinom besi dɛn ayɛ hɔ? 10Jesus buaa no dɛ, Ana eyɛ Israel kyerɛkyerɛnyi na innyim yinom yi? 11Ampaara, mese wo dɛ, yɛka dza yenyim na yedzi dza yeehu ho dase; na hom nngye hɛn dasee no nndzi. 12Sɛ meka hom asaase afamu ndzɛmba na hom nngye nndzi a, ɔbɛyɛ dɛn na sɛ meka ɔsor ndzɛmba kyerɛ hom a, hom bɛgye edzi. 13Na obi mmfoow sor, gyedɛ nyia ofi sor sianee no, mekyerɛ, nyimpa Ba no a. 14Na dɛ mbrɛ Moses maa ɔwɔ no do wɔ sar no do no, dɛmara so na otwar dɛ wɔma nyimpa Ba no do, 15ama obiara a ɔgye no dzi no eenya onnyiewiei nkwa.
16 Na mbrɛ Nyankopɔn sii dɔɔ wiadze nye yi, dɛ ɔdze ne Ba a ɔwoo no kor no mae, ama obiara a ɔgye no dzi no aannhera, na oeenya onnyiewiei nkwa. 17Na Nyankopɔn annsoma ne Ba wɔ wiadze dɛ ombobu wiadze atsɛn, na dɛ wondua no do ngye wiadze nkwa. 18Nyia ɔgye no dzi no, wommbu no atsɛn; nyia ɔnngye no nndzi no, woebu no atsɛn dada; osiandɛ ɔnngyee Nyankopɔn ne Ba kortsee no ne dzin nndzii. 19Na iyi nye atsɛmbu no, dɛ kan no aba wiadze, na nyimpa adɔ sum akyɛn kan no; osiandɛ hɔn ndwuma yɛ bɔn. 20Na obiara a ɔyɛ dza ɔmmfata no, okyir kan, eso ɔmmba kan no ho, amma woeennyi no atsɛn wɔ no ndwuma ho. 21Na nyia ɔyɛ nokwar no, ɔba kan no ho, ma no ndwuma aada edzi dɛ Nyankopɔn mu na ɔayɛ.
Jesus na John
22Iyi ekyir no Jesus nye n’esuafo baa Judea asaase do, na ɔnye hɔn tsenaa hɔ, na onumae. 23Nna John so runuma wɔ Aenon a ɔbɛn Salim, osiandɛ nsu pii wɔ hɔ; na binom baa hɔ ma onumaa hɔn. 24#Mat 14.3; Mar 6.17; Luk 3.19, 20 Nna wonnyae mmfaa John nntoo efiadze. 25Na ekyingyegye bi baa John n’esuafo nye Jewnyi bi afamu a ɔfa ahoguar ho. 26Na wɔbaa John nkyɛn bɛsee no dɛ, Rabae, nyia ɔkaa wo ho wɔ Jordan egya no a egyee no ho dase no, hwɛ, ɔno so runuma na nyimpa nyina reba no hɔ. 27John buae na ɔsee dɛ, Nyimpa runntum nnya biribi, gyedɛ wɔdze fi sor ma no. 28Homankasa gye me dase dɛ mekaa dɛ, Nnyɛ emi nye Kraest no, na wɔsomaa me dzii n’enyim. 29Nyia ɔwɔ ayefor no nye ayeforkun; na ayeforkun ne nyɛnko a ogyina hɔ na otsie no, n’enyi gye kɛse wɔ ayeforkun no ne ndze ntsi; afei na m’enyigye yi ahyɛ ma. 30Ɔno dze, otwar dɛ ɔkɔ kan kyɛn me, na emi dze, midzi ekyir.
Nyia Ofi Sor Ba no
31Nyia ofi sor bae no kyɛn nyimpa nyina; nyia ofi famu no, ɔyɛ famunyi, na ɔkasa dɛ famunyi. Nyia ofi sor bae no kyɛn nyimpa nyina; 32dza oehu na ɔatse no na ɔgye ho dase, na obiara nngye ne dasee nndzi. 33Nyia ɔagye ne dase no, ɔasɔw ano dɛ Nyankopɔn yɛ nokwafo. 34Na nyia Nyankopɔn somaa no no, ɔka Nyankopɔn ne nsɛm, na Nyankopɔn dze Sunsum no ma no mbordo. 35Egya no dɔ Ɔba no, na ɔdze ndzɛmba nyina ahyɛ ne nsa. 36Nyia ɔgye Ɔba no dzi no, ɔwɔ onnyiewiei nkwa; na nyia onndzi Ɔba no n’asɛm do no dze, orinnya nkwa, na Nyankopɔn n’ebufuw wɔ no do.
Поточний вибір:
John 3: MFANBRPC
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Mfantse Bible © Bible Society of Ghana, 2011.