JOHANA 1
1
Ng’alek che kindoune
1Eng’ taunet ko kimi Ng’olyondet, ak kimi Ng’olyondet ak Jehovah, ak ki Jehovah Ng’olyondet. 2Kimi inendet ak Jehovah eng’ taunet. 3Kigiyai tuguk tugul eng’ inendet; ak kima kiyai kiy age tugul ne kiga keyai ne kima yai inendet. 4Kimi sobondo eng’ inendet; ak ki lapkeiyetab bik sobonato. 5Amu iluu lapkeiyet eng’ mesundeito; ak kima iterter mesundeito lapkeiyonoto.
6Kinyo chi, ne kiiyok Jehovah, ne kigiguure Johana. 7Kinyo chichoto koek baoriat, si kobaorianji lapkeiyet, si kobiit koyan bik tugul amu inendet. 8Kima ko lapkeiyonoto inendet, ago kinyo si kobaorianji lapkeiyonoto. 9Kimi lapkeiyet ne bo iman, ne nyonei ng’ony, ne iluuchin chi tugul.
10Kimi ng’ony inendet, ak kigiyai ng’ony eng’ inendet, ak kima nai ng’ony inendet. 11Kinyonji chechik, ak kima taach inendet bikyik. 12Ago tugul che kitaach inendet, ko kiigochi kamuget koek lagokab Jehovah, ichek che iyani kainennyi: 13che kigisich, ama eng’ korotik, anan eng’ magetab borto, anan eng’ magetab chi, ago eng’ Jehovah.
14Ak kiek Ng’olyot borto, ak komeny kwenunnyo (ak kigigeer torornatennyi, torornatet ne u ne bo ne kigii inegei kobunu Kwanda), ko nyiitat mieindo ak imanit.
15Kibaorianji inendet Johana, koititen kole, Inendet ni ne kiamwaitoi ale, Inendet ne isubwa koegu ne bo tai eng’ ane, amu ki bo tai inendet eng’ ane.
16Amu kigitaach achek tugul che bo nyiiennyi, ak mieindo eng’ mieindo. 17Amu kigigon Ng’atutiet eng’ Musa; kibwa mieindo ak imanit eng’ Jesu Kristo. 18Mami chi ne kigeer Jehovah ole kigoi; kigong’ang’wech inendet Werit ne kigii inegei, ne mi tegetab Kwanda.
Baornatet ne kibaorianji Johana Kabatisanindet Jesu
19Ak ni ko baornatetab Johana, ye kingoyok Yahudik tisiik ak Lawik eng’ Jerusalem koba koteebe kole, I ng’o inye? 20Ak king’any inendet, ama tiiyo; king’any kole, Ma a Kristo ane. 21Ak kiteebe inendet kole, Nee anyun? I Elija? Ak kile, Ma a inendet. I maotiondonoto? Ak kiwol kole, Achicha. 22Kilenji anyun inendet, I ng’o inye? Si kobiit kewolji che koiyokwech. Imwae nee agobo inyege? 23Kile, A kutitab chi ne ititeni eng’ surkwen, Olitit oretab Kiptaiyat, ko u ye kimwa maotiot Isaia.
24Ak icheget che kigiyok ko ki bo Parisaik. 25Ak kiteebe inendet, kolenji, Kalya anyun si ibatisanisiei, ngo ma i Kristo, anan Elija, anan maotiondonoto? 26Kowolji Johana bichoto kolenji, Abatisanisie beek: ago tononi eng’ kwenung’wong’ age ne mongen, 27inendet ne isubwa, ne manyoljina atiach anokab kweonikyik.
28Kiyaogis tuguchuto eng’ Betania Jordan komosin, ole kiibatisanisie Johana.
29Eng’ betut ne bo aeng’ kogeer Johana Jesu konyonjin, ak kole, Ogeero, Aruet ne bo Jehovah, ne ibei tengektab ng’ony! 30Inendet ni ne kiamwa ale, Isubwa chito ne egu ne tai eng’ ane: amu ki bo tai eng’ ane. 31Ak kima angen ane inendet; ago si kobiit kibarta inendet eng’ Israel, kianyo anyun amu noto abatisane beek.
32Ak kibaorian Johana, kole, Kiageer Tamirmiriet kochorugei eng’ kipsengwet ko u cheptuget; ak kotebe inendet. 33Ak kima angen inendet: ago inendet ne kiiyokwa abatisane beek, ko inendet ne kimwawa kolenja, Chichoto igeere kochorjingei Tamirmiriet, ak kotebe inendet, ko noto ne ibatisane Tamirmiriet ne Tilil. 34Ak kiageer, ak kiabaorian ale nito ko Weritab Jehovah.
Alamalyetab Kabatisanindet, ak Jesu
35Kogeny eng’ betut ne kiisubu betunoto, ko kitononi Johana, ak aeng’ che bo alamalyennyi; 36ak kigeerot inendet Jesu kowendoti, ak kole, Ogeero, Aruet ne bo Jehovah! 37Ak kigas choto aeng’ che bo alamalyennyi kong’alali inendet, ak kosub Jesu. 38Ak kiwelelgei Jesu, ak kogeer ichek kosubu, ak kolenji, Ocheng’e nee? Ak kilenji inendet, Rabbi (ye kiweech kele, Konetindet), imenye ano? 39Kolenji ichek, Obwa si ogeer. Kibwa anyun kogeer ole menyei, ak kitebi koboto inendet betunoto; ki olo bo sait taman.
40Ki Andrea, ne tupcho ak Simon Petero, age eng’ choto aeng’ che kigasei kong’alali Johana, ak kiisub inendet. 41Kisib konyor Simon ne tupcho, ak kolenji, Kagenyoru Mesia (ye kiweech, ko Kristo). 42Kiimutyi inendet Jesu. Kigeer Jesu inendet, ak kole, I Simon weritab Johana: ta keguurenen Kepa (ye kiweech, ko Petero).
43Kimach anyun kwo Galili eng’ betut ne kiisubi betunoto, ak kinyor Pilipu: ak kilenji Jesu inendet, Isubwa. 44Ak ki bo Pilipu Betsaida, nganaset ne bo Andrea ak Petero. 45Kinyor Pilipu Natanael, ak kolenji, Kagenyoru inendet, ne kisir Musa eng’ Ng’atutiet, ak maotik, Jesu ne bo Nasaret, weritab Josep. 46Ak kilenji Natanael, Tos imuchi kobun Nasaret kiy age tugul ne mie? Kolenji Pilipu inendet, Nyo si igeer. 47Kigeer Jesu Natanael konyonei ole mi inendet, ak kole agobo inendet, Ogeero, Israelindet iman, ne matinyei ng’alset! 48Kolenji Natanael inendet, Kenaena nee? Kowolji Jesu kolenji, Kageerin, ye kemi mogoiywet kel, kotom koguurin Pilipu. 49Kowolji Natanael kole, Rabbi, i Weritab Jehovah; i Laitoriatab Israel. 50Kowolji Jesu kolenji, Iyani amu kamwaun ale, kaagerin ye kemi mogoiywet kel? Tatun igeere tuguk che eechen che siirei chu. 51Ak kilenji, Amwawok, iman, iman, ale, Tatun ogeere kipsengwet koyatoksei, ak kotogostoi malaikaisiek che bo Jehovah ak kochorjigei Weritab chi.
Поточний вибір:
JOHANA 1: BUKUIT
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
God's word open for all
©Bible Society of Kenya, 2020