LUKA 18
18
Kiruogindet ne kima ko bo imanda
1Kimwachi anyun kalewenet kole, Kanyol kosa betusiek tugul, amat chorirenso; 2kolenji, Kimitei nganaset age kiruogindo, ne kima koiywei Jehovah, ak kima koiiti chi: 3ak kimi mosoget age nganasanato; ne kinyonei ole mi kotugul, kolen, Ibesiewa kiruoget ne bo iman eng’ bunyondennyu. 4Ak kiesio eng’ betusiek alak: ago eng’ let, komwa eng’ orinnyi kole, Agot ngo maiywei Jehovah, amaiiti chi; 5ago amu inyalila mosogani, abesiechini anyun, si ma konyonei kotugul koiima.
6Ak kile Kiptaiyat, Ogas kit ne kimwa kiruogindet ne ma bo imanda. 7Tos mayachin Jehovah imanda che lewenotin, che rirjin inendet bet ak kemoi, ak muitoi inendet eng’ ichek? 8Amwawok ale, yachin inendet ichek imanda kochokyin. Ago ye tun nyo Weritab chi, ko tos nyoru kayanet eng’ ng’ony?
Parisaindet ak taagindetab aisurut
9Ak kimwachi kogeny kalewenoni alak che kiimang’ugei kole, ki bo imanda, ak kosasei bik tugul, 10kolenji, Kitogosta bik aeng’u hekalut koba kosa; Parisaindet age, ko taagindetab aisurut age. 11Kitonon Parisaindet kosa kong’alal inegei ko u ni kole, Jehovah, amwaun kongoi, amu ma ki kergei ak bik alak, che rebik, che ma bo iman, che ibegei, anan taagindoni bo aisurut. 12Arugutige konyil aeng’ eng’ wigit; agoitoi kebeberta ne bo taman eng’ tuguk tugul che anyoru. 13Ago kitonon taagindetab aisurut eng’ ye loo, ak ma cham agot konyal kipsengwet, ago kiluch tegennyi, kole, Jehovah, rirena, a kiptengekyo. 14Amwawok ale, kichortagei chichoto gonnyi ko kagoek ne bo imanda kosiir nin age: amu chi age tugul ne itororigei kiming’ini; ak age tugul ne iming’inigei ko tun kitorori.
Koberuri Jesu manyurunik
15Ak kiimutyi bik inendet manyurunik, si kobiit kotwa ichek: ago ye kingogeer alamalyet, koger kong’. 16Ago kiguur Jesu ichek kobwanji, ak kolenji, Ochamji lagok che mengech kobwanja, amat oete: amu bo che u chu bounatetab Jehovah. 17Amwawok iman ale, Age tugul ne mataachei bounatetab Jehovah ko u lakwet ne ming’in, ko magoi mong’ji oloto matiny.
Sobondab koigeny; imuchi magornatosiek konach bich
18Ak kiteebe inendet bounindet age, kole, Konetindoni mie, ayai nee si kobiit anyor sobondab koigeny? 19Ak kilenji Jesu, Amu nee si iguurena ne mie? Mami ne mie, kobate agenge, noto ko Jehovah. 20Ingen Ng’atutik, Amoipge, Amerumisie, Amechorse, Amebaorian lembech, Teech kwandang’ung’ ak komet. 21Ak kile, Kiarib tuguchuto tugul koboch ko a neran. 22Ak ye kingogas Jesu, kolenji, Ta ko rartaat kit agenge eng’ inye: alde tugul che itinye, ak ipchechi kibananok, si inyoru konoruet eng’ kipsengwet: ak inyo, isubwa. 23Ago ye kingogas inendet tuguchu, koarogen mising’; amu ki magorio kot.
24Ak kingogeer Jesu inendet, komwa kole, Bichii ne tia eng’ che tinyei magornatosiek komong’ji bounatetab Jehovah! 25Amu nyamnyum eng’ tambesiet kochut kondab katet, kosiir komong’ji magoriot bounatetab Jehovah. 26Kimwa anyun che kigasei, kole, Ng’o anyun ne kesoru? 27Kile, Tuguk che maimugaksei eng’ bik komugaksei eng’ Jehovah.
28Kole Petero, Keero, kigebagakte tugukyok, ak kisubun. 29Ak kilenji ichek, Amwawok iman ale, Mami chi ne kibagakta got, anan osotiot, anan che tupcho, anan sigik, anan lagok, agobo bounatetab Jehovah, 30ne manyoru che chang’ kosiir eng’ betusiechu, ak sobondab koigeny eng’ betusiek che tun bwanei.
Sib komwaei Jesu ne bo somok agobo meennyi
31Ak kiimut taman ak aeng’ kobwa ole mi, ak kolenji, Ogeero, kitogostoi Jerusalem, ak kosulda tuguk tugul che kisir maotik agobo Weritab chi. 32Amu kindoi inendet eunekab Bororiosiek, si kechurachur, ak kitewer, ak kesing’ilji: 33ak kobire kipcharitit, ak kobar: ak kong’eet kogeny eng’ betutab somok. 34Ak kima iguiyo icheget tuguchuto, agot agenge; ak kiung’ak mwaonito eng’ ichek, ak kima ibesio tuguk che kiga kimwa.
Kosoobi Jesu kipkoratiat
35Ak kingorikyi Jeriko, ko kitebyei ng’ony kipkoratia eng’ oret taban kosomsei: 36ak kingogas kosiirtoi tuiyet, koteeb kole, Nee chu? 37Ak kimwachi ichek inendet kolenji, Jesu ne bo Nasaret ne siirtoi. 38Ak kiwaach, kole, Jesu, Weritab Daudi, rirena. 39Ak kiger kong’ inendet anyun che kiindoi, kole kosis: ago kites kowaach mising’ kole, Weritab Daudi, rirena. 40Ak kitonon Jesu, ak kong’at kimut inendet kwo ole mi: ak ye kiga rik, koteebe inendet, 41kole, Imache ayaun nee? Ak kile, Kiptaiyandani, amache ageerto. 42Ak kilenji Jesu, Keerte: kagosoobin kayaneng’ung’. 43Kigeerto anyun ngunoto, ak kosub inendet, kolosunoti Jehovah: ak kingogeer tuiyet komugul, kogonyit Jehovah.
Поточний вибір:
LUKA 18: BUKUIT
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
God's word open for all
©Bible Society of Kenya, 2020