Yoane 13
13
1Buso bu nianko mu rusu Rasamp Ntsampe, Yes kuyeb ampe, itankua rante ramator rukobu u kat a bat ba man, isina kuwe ra bor Isante, yante amawont bat bante ba man, amabawont kakaka u tunt.
2Ampis nter aman banta bisima bikokoro, Satan kunyingns mey u kate ntem mua Yuda Iskariot, muan a bora Simon isina kusariy Yes.
3Yes amayeb Isante amangwek biket bikima u biar biante, yante atoa ngwar Ntsampe, ya ikakaru ngwa Ntsampe.
4Nter aukudji banta, ya kukatu u mes u iyinta, ya kuwor misuekiya miante, ya kurab itampar ya kururat.
5Ampis ya kusik mas u kate a somp, ya kutetshiy uwebs matampi mu baronki bante, yante kukamanumun nto itampar rarat yante.
6Ya kuwiy ngwa Simon Petero, Simon Petero kunor yampe : Ye, Kumu ! Wene upueb minyi matampi ?
7Yes kunsaks yampe : Wene wakuyeb mey muk biker minyi kekanko bo, di wene wapasamayeb ampis.
8Petero kunor yampe : Bo, Kumu ! Wene wakuwebs matampi mami bo, Yes kunor yampe : Mpe rawa rek iwebs wene wakuwar ikapua nto ami bo.
9Simon Petero kunor yampe : Kumu ! rek upuebs na matampi mami bo, upuebs i mayatsh, i ntshue ake.
10Yes kunor yampe : Ntshu uwok matampi mumayenem i matampi ; di yante apayempu rutoko rukima, binu bamayempu, di reke bawar nkos ruera binu bakim bo.
11Isina ya amatayeb ntshu awak nsariy ante, isina kankos aror ya ampe : Binu bakima rek bawar bayemp bo.
12Nter aman yante ubawebs matampi, ya kukarab misuekiya miante, ya kukawar u mes nto a banta kubaror yampe : Bumayeb mey mene mumabiker minyi ?
13Binu bapur ana, Ronki, nto ake Kumu, batot ana busek isina minyi ru yante.
14Mpe minyi Kumu nto ake Ronki rumabiwebs matampi ma binu, busek binu ake bukuwebs matampi bana bam- wetshi bekra ba binu.
15Isin minyi ramabiwek ipua isin binu buker nko amabiker minyi binu.
16Barabara, barabara, minyi rik birori, nker ngun keanekak kumu ante bo, mpe Apotre keanekak ntshu makuntom bo.
17Mpe binu bayeb mey mene binu bungwa bina nianko mpe bumaront.
18Minyi rek ribiror ruera binu bakim bo, isina minyi ramayeb bene basor minyi, di mey mene muwiya isin kukoks mey maror mukanta mua Ntsampe ampe : Ntshu ndjik kat nto ami insanginy itinti u mpungun ami.
19Minyi ribiror kekanko buso ingwar ruey rek ututor, isina keka nter itor rinta keka binu buyeb, minyi ru yante.
20Barabara, barabara, minyi rik birori, muot ntshu raba yone yetoma minyi, amantab minyi, ntshuntab minyi ake anab ntoma ami.
Nter aten Yes nsariy ante
21Nter aman Yes uror nkos, ntem muante kunyisr, yante kutot irengene irengene yampe : Barabara, barabara, minyi rik birori, mwetsh u kat a binu isariy kusariy minyi.
22Baronki baukurentsi bamet usik pantshi umitem mia banta ampe, ya ik ror nake ?
23Ronki rumwetsh ntshu awont Yes abesa u tor a Yes.
24Simon Petero kunsuengen isin kungor ampe, nake ntshu ikiteni yante.
25Yante isina awar yante u tor a Yes, ya kungor yampe : Kumu ! nake ?
26Yes kunsaks yampe : Angwa yante ntshuwek minyi nyimu mua kat mu sasr. Yante kate nyimu mua kat nkos, keka yante kuwek Yuda Iskariot muan a bora Simon.
27Ampis nter amangwe yante nyimu muna, Satan kunyingin u ntem muante. Yes kunor yampe : Ker buasi buasi ruey rungan wene.
28A muot mwetshi kat a bene bawar u mes uyeb bo isin ye amanor yante nkos.
29Isina Yuda awar nont a kuempe, bana bamwetsh bakan bampe : Yes amanor, kusomp biket biawara banta isot rusu ru nianko, mpe kuwek tshumpua iket.
30Nter arab Yuda nyimu muna, yante kuto busuebe buas buasi. Butu buamapit.
31Nter ato Yuda, Yes kutot yampe : Kekanko Muan a Muot amaton, Ntsampe amaton ukate ante.
32Mpe Ntsampe amaton nto ante, Ntsampe ake apakantons yamet, yante ansot ntonos.
33Bana bami bakeke, minyi ruwar a binu itankua kakek, binu busak sot minyi, nko aror minyi basi Yuda ampe, binu bak yeb uwiy u irak ruwe minyi, rubiror binu ake kekanko.
34Minyi rumabiwek ikin rumwetsh ra roronto, isina binu buwont ake bekra ba binu, nko amabiwont minyi, binu bukawonts binu a binu.
35Isina mey mene keka bat bakima bayeb ampe, binu bungwak baronki bami mpe binu ba wonts binu a binu.
36Simon Petero kunor yampe : Kumu ! wene uwe kue ? Yes kunsaks yampe : Wene wakeyeb urabs ami kekanko irako ruwe minyi bo ; wene uparabs ami ampis.
37Petero kunor yampe : Kumu ! Isin ye iwar minyi rek uyeb urabs awo kekanko ? Minyi rapaiwus.
38Yes kunsaks yampe : Wene wak pus minyi ! Barabara, barabara, minyi rik irori, buso koko utubek bo, wene umper kumper mpeer isat.
Поточний вибір:
Yoane 13: EJK2012
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Copyright © 2012, ASAREB, Suisse MiDi BIBLE