BBN 6
6
1Dɛnaa pɛ Muizu ni: «Kanna kəni, ma bɛ́ re màn mɛn zɛnɛɛ *Faarahɔn nɛ, n tá re bɛ yii. Ma á re sii nyɛɛ a yii ni, á re toɛ ka woo. Ma á re sii nyɛɛ a yii ni, á re ka lui dinin, a ka bɔ a gána nɛ.»
Lawa nə n lɛ kɔ Muizu la lɔn mà asɛ á re Izirayeli kirisibiɛ
2 #
SGK 17.1; 28.3; 35.11; BBN 3.13-15 Lawa boo da Muizu ni, á pɛ-n kɛnɛn: «Ma din nə "Dɛnaa Lawa" lɛa. 3Má n din nyaa Abrahamu ni, Izaaki laanka Zakɔba nɛ, "Lawa Pàãyiidɛnaa" lɛa, sɛnɛ, ma tɔ ke "Dɛnaa" ke, man din nyaa ǹ nɛ ka bɛ-n wa. 4Man má lɛ kɔ kɔn la wɔ ka ǹ dinin lɛn nɛ, máa ma á die Kanaan gána koe ǹ la, gána mɛn bɛ́ ǹ nə́ tiibaa zɛnaa a nɛ. 5Kanna kəni, má Izirayeli nɛnyaanan busii pɛ lɛ ma, má ǹ bɛ̀rɛbaa a nɔmaa lɛ yɛ Ezipti minin gɔn, ma yiri gisĩ maa lɛ kɔ lɛ nɛ. 6Bɛ lɛ taman yii, Muizu, wo pɛ Izirayeli nɛnyaanan manɛ mà ma din nə Dɛnaa Lawa lɛa. Ma á re ǹ boe Ezipti minin nɔmaa ǹ dín kɛn li. Ma á re ǹ boe bɛ̀rɛbaa kɛ nɛ ǹ gɔn. Ma á re ǹ boe ka ma din pàã taãn-taãn kɛ nɛ, ma dɔlɔ bɔ ǹ ganaa sɔnbɔraanɛ. 7Ma á re ǹ sii, ǹ goã ma din a zaman lɛa, ma dɔ goã ǹ dɔn Lawa lɛa. Ǹ tá re doɛ̃, mà ma din Dɛnaa lɛ nə ǹ Lawa lɛa, Lawa mɛn bɛ́ ǹ boe Ezipti minin nɔmaa ǹ dín li. 8Ma din nə n liɛ, máa ma á re gána mɛn koe Abrahamu la, ka Izaaki laanka Zakɔba nɛ, man woe bɛa gána lɛ koe ǹ dinin kɛn lɛn la, ǹ nɛnyaanan lɛa. Man die koe ǹ la, a ǹ wɔ baa. Ma din lɛ n Dɛnaa Lawa lɛa.»
9Muizu boo lɛ da miɛ̃ Izirayeli nɛnyaanan lɛn manɛ, sɛnɛ, ǹ nə n too kɔ a lon wa, a giala, ǹ tá bɛ̀rɛbaa-n lɛ na á goã ǹ foo ziziɛ̃ parsiini. 10-11Dɛnaa pɛ Muizu-n doo: «Woo, n pɛ Ezipti gána a kii Faarahɔn nɛ, mà a toa Izirayeli nɛnyaanan lɛn nə soo, ǹ nə n bɔ a gána lɛ nɛ.»
12Sɛnɛ, Muizu kɛ pɛ Dɛnaa yɔrɔ-a: «Á ke, Izirayeli nɛnyaanan dinin nə n too kɔ ma lon wa. Faarahɔn nə die n too koe ma lon lɔn, masɛ mɛn bɛ́ maa boo diɛ doɛ̃ wa?»
13Dɛnaa boo da Muizu laanka Aarɔn nɛ, a ná a dí kɔ ǹ la, Izirayeli nɛnyaanan laanka Ezipti gána a kii Faarahɔn wɔ lɛa, màn mɛn bɛ́ toɛ, ǹ soo ka Izirayeli nɛnyaanan lɛn nɛ, ǹ nə ǹ bɔ Ezipti gána nɛ.
Muizu laanka Aarɔn tɔrɔ giala basa
14Izirayeli nɛnyaanan digolon tɔn man ke: Zakɔba a nɛgiĩ bibinaa Urubɛn lɛ a nɛnyaanan tɔn man ke: Anɔɔki ni ka Paluu ni, Ɛsirɔn nɛ ka Karmii ni. Urubɛn a tanlɛ minin man bɛn nɛ.
15Simiɔn a nɛnyaanan: Yemoeli-n ka Yamin ni, Ohadi-n ka Yakini ni, Sohara nɛ ka Kanaan lɔ kɛ a nɛgiĩ Sawulu ni. Simiɔn a tanlɛ minin man bɛn nɛ.
16 #
MNS 3.17-20; 26.57-58; KZS1 6.16-19 Levii a nɛnyaanan tɔn nə́ ke, a n kɔnpii ǹ tɔrɔ basa nɛ: Gɛrsɔn nɛ ka Keyati laanka Merarii ni. Levii a tá kanaa na á kɔnpɛ ka lɛ̀ paabiɛ ka pɔsɔɔwensɔbaa (137) nɛ. 17Gɛrsɔn a nɛnyaanan: Livini ni ka Simiyii ni, a n kɔnpii ǹ tanlɛn nɛ. 18Keyati a nɛnyaanan: Amuramu ni ka Isaari ni, Ebrɔn nɛ ka Uziili ni. Keyati a tá kanaa na á kɔnpɛ ka lɛ̀ paabiɛ ka pɔsɔɔwensɔɔ (133) nɛ. 19Merarii a nɛnyaanan: Mayili ni ka Musi ni. Levii a tanlɛn minin lɛn man bɛn nɛ, a n kɔnpii ka ǹ tɔrɔ basa nɛ.
20Amuramu na á ǹ dɛlan Zokebɛdi saa lɔ lɛa. Á Aarɔn laanka Muizu yɛ la. Amuramu a tá kanaa na á kɔnpɛ ka lɛ̀ paabiɛ ka pɔsɔɔwensɔbaa (137) nɛ. 21Isaari a nɛnyaanan: Kooree ne, ka Nɛfɛgɛ laanka Zikiri ni. 22Uziili a nɛnyaanan: Misayeli ni ka Elisafan laanka Sitri ni.
23Aarɔn Elizabɛti saa lɔ lɛa, Aminaadaabuu a nɛlɔ nɛ, Nasɔn ǹ miãnɛn nɛ. Á Nadaabu laanka Abiu, ka Eleyazaara laanka Itamaara yɛ la. 24Kooree a nɛnyaanan: Asiiri ni, ka Elkana laanka Abiazafu ni. Kooree a minin tanlɛn man bɛn nɛ. 25Aarɔn a nɛgiĩ Eleyazaara na á Putiɛli a nɛlɔ goon saa lɔ lɛa. Á Pinasi yɛ la. Levii a minin kɛdɛnan man bɛn nɛ, a n kɔnpii ǹ tanlɛn nɛ.
26Dɛnaa pɛ Aarɔn laanka Muizu mɛn nɛ mà ǹ wo soo ka Izirayeli nɛnyaanaan lɛn nɛ, ǹ nə ǹ bɔ Ezipti gána nɛ, ǹ nə ǹ kakaa kun ka zia-baalin bɛ́ lɔn, bɛn lɛn sii n ke. 27Ǹ dinin lɛn man nə́ boo da Ezipti gána a kii Faarahɔn lɛ nɛ, màn mɛn bɛ́ toɛ, Izirayeli nɛnyaanan nə soo, ǹ nə n bɔ Ezipti gána nɛ. Muizu lɛ laanka Aarɔn a sii n ke kəni.
Lawa wusoo a ná a lɛ kɔ ǹ boo lɛ pɛ Muizu ni
28Dɛnaa boo da Muizu ni ǹ mɛn pinaa Ezipti gána nɛ, 29a na á pɛ-n kɛnɛn:
– Ma din nə Dɛnaa Lawa lɛ lɛa! Woo, ma din nə màn mɛn tumaa pɛ nnɛ, n bɛ pɛ Ezipti gána a kii Faarahɔn nɛ doo.
30Sɛnɛ Muizu pɛ Dɛnaa nɛ: «Á ke, masɛ a boe boo la wa. Faarahɔn nə die n too koe ma lon lɔn?»
Поточний вибір:
BBN 6: SBPE2011
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
San Bible Protestant Edition © Bible Society of Burkina Faso, 2011.