SGK 44
44
Zozɛfu nə n diɛ ǹ dɔɔ̃nɔn gɔ́ɔ̃ li
1Bɛ kio, Zozɛfu pɛ a kion mìilandɛnaa nɛ: «Wii kaa minin kɛn lɛn boroon ne ǹ pã. Ǹ dinin bɛ́ boe la ǹ gũ lɔn, a kaa ǹ lon miɛ̃, n didie a wɔrɔ kaa a *belee lalan a boroo gɔ́ɔ̃ nɛ. 2Maa mu mi ǹ kaaran ke, ǹ nə́ zɛnaa ka wɔrɔ nɛ, n die n bɛ da ǹ kiɛɛrɛdɛnaa kɛa belee lalan a boroo ne, kun ka a belee pii ǹ giɔ̀mɔ nɛ.»
Zozɛfu màn mɛn pɛ, giĩ lɛ bɛ zɛnaa. 3Lɛ̀ bɛ́ á waa lɔn, ǹ nə́ minin lɛn toa ǹ nə́ woo, kun ka ǹ dundunun ni. 4Ǹ bɛ́ ǹ nə́ soo, ǹ nə́ n bɔ kiwi gɔ́ɔ̃ nɛ, ǹ wɔlɔ din ná a tɔn lui taãn wa, Zozɛfu pɛ a kion mìilandɛnaa lɛ nɛ:
– Yoo! Minin kɛn lɛn kio loo, n dɔ ǹ ganaa, n pɛ ǹ nɛ: «Wàa na á baa, ka bǐɛ̃ saraa ka baraa nɛ? 5Wàa na á baa, ka maa dɛnaagiĩ a màn koã? A din lɛ nɛ, á mu mii ni, á n dí nyɛɛ nɛ, bɛ̀ a ga a din mìi gɔ́ɔ̃ ǹ sii ganaa. Ka sii mɛn zɛnaa, a siĩn wa dɛ!»
6Giĩ lɛ nə́ ǹ loo, á dɔ ǹ ganaa, á bɛa boon lɛn pɛ ǹ nɛ. 7Ǹ ná a lɛ si kɛnɛn: «Wàa mɛn boo tɔrɔ n ke, wɔa dɛnaagiĩ á diɛ? Wɔsɛn ba bɛ miã a zɛnaa lɛn zoɛ̃ wa dɛ! 8Wɔ bɛ́ wɔ́ wɔa belee boroon lɛ bũ, wɔ wɔrɔ mɛn yɛ wɔa belee lalan lɛlɛ, wɔ́ bɔ ka bɛ-n Kanaan, wɔ daa koa. Wɔ n siɛ lɔn, wɔ wɔa dɛnaagiĩ a wɔrɔ laanka a sana koã? 9Bɛ̀ ń màn lɛ yɛ wɔsɛn min mɛn lon, bɛa dɛnaa gã! Wɔ dɔn dininmaan tá re Zozɛfu a bɛ̀rɛn biɛ.»
10Giĩ lɛ tɔ́n pɛ: «Á siĩni! Bɛ̀ màn lɛ yɛ min mɛn lon, bɛa dɛnaa á die a bɛ̀rɛ biɛ, gialakunun kɛn tá re n boe a nɛ.»
11Ǹ nə́ ǹ boroon lɛn kaa tán fufuu, didie ná a wɔ lɛ bũ. 12Giĩ lɛ ga boroon lɛn tumaa nɛ, á saa goledɛnaa ganaa, a ná a giala nyɔmɔɔ kiɛɛrɛdɛnaa ganaa. Ǹ nə́ mu mi ǹ màn lɛ yɛ Bɛnzamɛn lon. 13Sii lɛ bɛ́ á ǹ tumaa kã, ǹ nə́ ǹ mɔnaan tɔtoɛ̃, didie ná a guĩ saa, á da a dundun la, ǹ nə́ n bɔyaa ǹ nə́ daa kiwi gɔ́ɔ̃ nɛ.
Zudaa n boo diɛ n doe Bɛnzamɛn lɛ
14Zudaa laanka ǹ dɔɔ̃nɔn lɛn nə́ dɔ Zozɛfu a piɛ, ǹ nə́ woo yaa bɛ̀ á tɔn kion, ǹ nə́ kaa tán a giulun. 15Zozɛfu tɔ́n pɛ ǹ nɛ: «Wàa mɛn dí n ka kɛ nɛ ka nya! Ma bɛ́ min mɛn lɛa, ka a doɛ̃ mà máa sii toɛ tìãlɛa ma dɔ̃ wa?»
16Zudaa tɔ́n a lɛ si: «Dɛnaagiĩ, wɔsɛn man boe la, wɔ wàa mɛn boo da n nɛ? Wàa mɛn boo-n wɔsɛn lɛ-n? Wɔ n die wàa mɛn boo diɛ, wɔ n dinin si ni? Wɔ sii mɛn la, Lawa na á wɔ giala da kanaa. Dɛnaagiĩ, wɔ n bɛ̀rɛn baa, wɔ dininmaan ka min mɛn bɛ́ mu mi ǹ kaaran lɛ yɛ a lon.»
17Zozɛfu tɔ́n pɛ: «Lawa die a ma kanbaa bɛ miã a zɛnaa ganaa. Mu mi ǹ kaaran lɛ yɛ min mɛn lon, bɛa dɛnaa lɛ n die maa bɛ̀rɛ biɛ. Gialakunun kɛn, Lawa die a ka bǐɛ̃ koa kaa díi lɛ li.»
18Zudaa nə́ n zɔ̃ á dɔ Zozɛfu li, á pɛ nɛ:
– Ń golebaa lɛ laanka *Faarahɔn wɔ n goon. Dɛnaagiĩ, sabara baa, n toa ma boo goon pɛ n nɛ, n foo baran yoo ma li wa. 19Dɛnaagiĩ, táa n din ni ń nɔ̀n da wɔ la lɛlɛ ń pɛ mà wɔa díi laanka wɔ diɛ̃ tan ya? 20Wɔ n lɛ si wɔ́ pɛ wɔ́a wɔa díi tan, á zizi kɔ, a zizimaa lɛ nɛ mɛn yɛ, wáa bɛ á tɔn boɛɛn nɛ. Wáa ǹ gologiĩ gã. A dinsɔɔ̃ na á goã ǹ dan a nɛ lɛa sisia, a díi á narɛ parsiini. 21N din nə́ n pɛ mà wɔ kũ wɔ da nɛ n yɛ. 22Wɔ́ pɛ n nɛ: «Dɛnaagiĩ, nɛginin lɛ a boe la a n na, a n bɔ ǹ di lɛ ganaa doɛ̃ wa. A giala, bɛ̀ á n na á n bɔ ǹ di ganaa, a n die ǹ di lɛ a gɛ̀ giala biɛ.» 23Sɛnɛ, ń pɛ wɔ nɛ mà n baran wɔ yɛ n yɔrɔ-a kànaa doo, bɛ̀ wɔ diɛ̃ boɛɛn kɛ ná a ba kun ka wɔ-n wa. 24Wɔ bɛ́ wɔ́ n bɔyaa wɔ woo wɔ di lɛ li ǹ mɛn waáraa, wɔ́ n boon lɛn pɛ nɛ. 25Bɛ kio, wɔa díi pɛ mà wɔ wusoo wɔ da belee pii. 26Wɔ́ tɔ́n pɛ nɛ wá́a bɛ̀ wɔ diɛ̃ boɛɛn lɛ á woe kun ka wɔ nɛ, wɔ á woe. A giala, wɔa giĩ lɛ a die lɛ koe, a wɔ yɛ a yɔrɔ-a doo, bɛ̀ wɔ diɛ̃ boɛɛn lɛ ná a ba kun ka wɔ-n wa. 27Wɔa díi tɔ́n pɛ wɔ nɛ mà wɔ á doɛ̃, mà asɛ a lɔ Raseli lɛ na á nɛ màn paa dinsɔɔ̃ yɛ. 28Goon soo a li á papaã, a yii mɛ a ganaa doo wa. Sàabaa ba la wa, mà don màn babaraan man nə́ kũ, ǹ nə́ pɔpɔsɛ kɔn. 29Mà wɔ n giɛ li doo, wɔ kɛ dɔ si asɛ la! Mà bɛ̀ sii mɛn wɔ lɛ zii la, mà asɛ a zizimaa n die giɛ̃ ka foo-busii ni, wɔ dinin zɛnaa ǹ sii taman yii.
30Bɛ̀ ma dɔ maa díi li sisia, nɛginin kɛ ná a kun ka wɔ-n wa, a bɛ́ na á n baa a nyin lɛa, 31bɛ̀ á dɔ̃, mà a ba kun ka wɔ-n wa, a tá a gɛ̀ giala biɛ. Bɛ̀ á n zɛnaa miɛ̃, wɔ dinin zɛnaa ǹ sii a foo-busii na á ná a zizimaa dɛ. 32Ka bɛ dɔ nɛ, má n mìi koa nɛ lɛ a sii li wɔ di yɔrɔ-a, má pɛ: «Bɛ̀ man bɔyaa ka nɛ lɛ-n wa, maa díi a zɛ̀rɛ n ma ganaa biikoo tumaa li.» 33Sisia, ma nə n nyankoe, toa ma din giã bɛ̀rɛ lɛa nɛginin lɛ bǎã nɛ. Sabara baa, n toa a wo kun ka ǹ golon lɛn nɛ! 34Man boe la, ma wusoo ma wo wɔ di kɛ li lɔn kɛnɛn, nɛginin lɛ ná a ba kun ka wɔ-n wa? Bɛ bɛ́ re sii mɛn biɛ ma di lɛ ganaa, bɛ baran ma yii sii baa wa dɛ!
Поточний вибір:
SGK 44: SBPE2011
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
San Bible Protestant Edition © Bible Society of Burkina Faso, 2011.