LUKA 22
22
Yesu Hpe Gyam Ai Lam
(Mat 26:1-5; Mrk 14:1-2; Yhn 11:45-53)
1Ya Matsi n rawng ai Muk sha ai poi ngu ai Shalai wa ai Poi aten du na ni wa sai.#Pru 12:1-27; Mat 26:2; Mrk 14:1. 2Hkinjawng agyi ni hte Tara sara ni gaw, mung masha ni hpe hkrit da mu ai majaw, Yesu hpe kadai n chye ai sha sat kau na lam langai mi tam nga ma ai.
Yesu Hpe Ap Kau Na Matu Yuda Myit Hkrum ai Lam
(Mat 26:14-16; Mrk 14:10-11)
3Dai shaloi sape shi lahkawng hta lawm nga ai Iskarut ngu ai Yuda a myit masin hta Satan shang wa sai. 4Dai majaw Yuda gaw pru wa nhtawm, Hkinjawng Agyi Kaba ni hte Nawku Htingnu sin ai hpyen du ni kaw Yesu hpe kaning di ap kau ya na lam shanhte hte sa bawng ban wu ai. 5Shanhte kabu ai hte Yuda hpe gumhpraw jaw na ngu nna myit hkrum ma ai. 6Yuda mung dai hpe myit hkrum nna, masha ni n chye ai sha Yesu hpe shanhte a lata de ap kau lu na mai ang ai ahkaw ahkang ginwan kaja tam nga ai.
Shalai Wa Ai Poi Sha Na Matu Yesu Hkyen Lajang Ai Lam
(Mat 26:17-25; Mrk 14:12-21; Yhn 13:21-30)
7Matsi n rawng ai Muk sha ai poi ten hta Shalai wa ai Poi lusha a matu sagu kasha ni hpe sat nawng na nhtoi du ra ai. 8Yesu gaw, Petru yan Yawhan hpe, “Anhte sha na matu Shalai wa ai Poi hpe sa shachyip lajang magang mu,” ngu nna shangun dat mu ai.
9Dai yan gaw, “An hpe kanang e shachyip lajang da shangun mayu n ta?,” ngu nna shi hpe san mu ai.
10Shi gaw, “Nan mare de shang wa yang, ntsin di bu hpai ai la langai mi hte hkrum na marin dai. Shi kaw hkan nang wa nna, shi shang ai nta hta hkan shang mu. 11Nta madu hpe, ‘Nye a sape ni hte Shalai wa ai Poi sha lu na manam gawk kanang rai ta?,’ nga nna sara gaw nang hpe san shangun dat ai, ngu nna tsun mu. 12Shaloi shi gaw jahting shachyip tawn ai ntsa gawk kaba langai mi nan hpe madun na ra ai. Dai kaw shachyip lajang da na rai myit dai,” ngu nna tsun dat mu ai.
13Dai sape yan pru sa wa ma yang, Yesu tsun dat ai hte maren, mu ma ai rai nna, Shalai Wa ai Poi shachyip da ma ai.
Madu A Shana Shat Sha Poi
(Mat 26:26-30; Mrk 14:22-26; 1Ko 11:23-25)
14Ya aten du jang, Yesu gaw sape ni hte rau sha ku e dung nga ai. 15Madu gaw, “Ngai nni nkri garai n hkrum yang, nanhte hte rau, Shalai Wa ai Poi sha na ngai grai sharawng da we ai. 16Hpa majaw nga yang, ngai nanhte hpe tsun made ga, ndai poi galaw ai lam a shatawng shada ai gaw, Karai Kasang a Mungdan hta ndai poi bai galaw ai ten hta she hkum tsup ai lachyum pru wa na re, Dai aten garai n du du gaw, ngai dai hpe bai n sha na ni ai,” ngu nna tsun mu ai.
17Shaloi Yesu gaw, gawm la nna shakawn ngut jang, “Ndai la nna nanhte shada da garan lu mu, 18ngai nanhte hpe tsun made ga, Karai Kasang a Mungdan garai n du dingsa ya kaw nna ndai sabyi ntsin hpe ngai n lu na ni ai,” ngu mu ai.
19Shaloi shi muk tawng la nna shakawn ngut jang, dai hpe ahkyep alep nna shanhte hpe jaw let, “Ndai gaw nanhte a matu ya kau ai, nye a hkum rai li ai, ngai hpe adum nga na matu, ndai galaw mu,” ngu mu ai. 20Dai hte maren shana shat sha ngut jang, dai gawm hpe mung shi la nhtawm, “Ndai gaw nanhte a matu ru kau ai, nye a asai hta gaw da ai Karai Kasang a ga shaka ningnan rai nga ai.#Yer 31:31-40; Pru 24:7-8; 1Ko 10:16.
21Rai ti mung, “Yu mu, ngai hpe ap kau na wa gaw, ndai sha ku hta ngai hte rau rai nga ai.#Pru 12:1-27; Shk 41:9; Mat 26:21,23; Mrk 14:18; Yhn 13:22,25. 22Masha Kasha gaw Karai Kasang e san da ai hte maren, si hkam na rai nga ai; rai ti mung shi hpe ap kau ai wa hta hkrithpa dingnye lu na ra ai,” ngu mu ai.
23Shaloi sape ni gaw, shanhte hta na kadai wa ndai lam galaw na ra ai kun? nga nna shada da san hkat nga ma ai.
Kadai Grau Kaba Ai Htai Lai Ai
24Sape ni gaw, shanhte hta na kadai wa mahtang kaba htum nga ai kun? nga nna shada da tsun shajang pru wa ma ai.#Luk 9:46; Mat 18:1; Mrk 9:34. 25Yesu gaw shanhte hpe, “Tara mai gan ni a hkawhkam ni gaw, mung masha ni a ntsa e atsam hte up hkang lu ma ai. Daru magam ahkang aya lu ai ni mung, tinang a hkum hpe, ‘Amyu masha ni a jinghku ni ngu nna hkungga shagrau nga ma ai.’#Mat 20:25; Mrk 10:42. 26Rai ti mung, nanhte shada da gaw dai hku n mai rai ang ai. Nanhte hta kaba dik ai wa gaw, asak kaji dik ai wa zawn rai u ga; ningbaw tai ai wa gaw, shangun ma zawn rai u ga.#Luk 9:48; Mat 20:26; 23:11; Mrk 9:35; 1Pe 5:5. 27Kadai mahtang grau kaba a ta? Sha dung nga ai wa kun? Shing n rai galaw jaw ai wa kun? Sha dung nga ai wa re ai n rai ni? Rai ti mung ngai gaw, nanhte hta na galaw jaw ai wa zawn rai nga nngai.#Luk 12:37; Mat 20:28; Yhn 13:12-15.
28“Nanhte gaw, ngai gunglau hkrum ai ten ni ting hta ngai hte rau nga nna hkrum katut sai ni rai nga myit dai. 29Dai re ai majaw, nye Wa gaw ngai hpe up hkang na ahkang aya jaw ai zawn, ngai mung nanhte hpe, up hkang na ahkang jaw made ai. 30Nye a mungdan hta, nye a sha ku e nanhte ngai hte rau lusha lu na marin dai hte tingnyang ni hta dung nna Israela amyu shi lahkawng hte hpe up nga lu na marin dai.#Shk 49:14; Mat 19:28; 1Ko 6:2; Shr 3:21; 19:9.
Petru Nyet Kau Na Lam Hpe Yesu Tau Tsun Ai.
(Mat 26:31-35; Mrk 14:27-31; Yhn 13:36-38)
31“Simun, Simun! Madat yu u! Nanhte hpe kaja ai hte n kaja ai garan ginhka na matu hkauna galaw ai wa gaw hkaulan mam hpe numhkaw hte mam gu hking ginhka ai zawn, nanhte yawng mayawng hpe jep sagawn na matu Satan wa gaw ahkang lu da nu ai. 32Rai ti mung, na a kam sham ai myit n hten lit ga ngu nna, nang Simun a matu ngai akyu hpyi da ni ai. Shing rai nang ngai hpang de bai kayin dum wa yang, na nhpu nnau ni hpe shangang shakang ya lu na rai ndai.”
33Simun gaw, “Madu e, ngai gaw htawng de rai ti mung, si hkam na de rai ti mung, nang hte rau sa na matu jin nga chyalu rai nga nngai,” ngu nna htan wu ai.
34Yesu gaw, “Petru e, ngai nang hpe tsun de ga, dai na pyi, u garai n goi yang, nang ngai hpe n chye nngai nga nna masum lang nyet kau na rin dai,” ngu wu ai.
Gumhpraw Sumbu, Nhpye Hte Nhtu
35Dai hpang Yesu gaw shi a sape ni hpe tsun mu ai gaw, “Gumhpraw sumbu, nhpye, hkyepdin n gun n lang ai sha, ngai nanhte hpe shangun dat ai shaloi, nanhte hta lama ma ra kadawn ai lam nga malit ni?,” ngu nna san mu yang,
“Hpa mung n ra ga ai,” ngu mu ai.#Luk 9:3; Mat 10:9-10.
36Yesu gaw, “Rai ti mung ya gaw, gumhpraw sumbu, nhpye, lu ai wa gaw la gun u ga; nhtu n lu ai wa gaw hpun palawng kaba dut nna mari u ga. 37Hpa majaw nga yang, ngai nanhte hpe tsun made ga, ‘Dai wa gaw tara tawt lai ai ni hta lawm nga ai,’ nga nna nye a lam ka da ai hte maren, ngai hta byin na ra ai. Dai gaw nye a lam ka da ai chyum ga hte maren byin nga sai majaw rai nga ai,”#Esa 53:12; Mrk 15:28.
38Sape ni gaw, “Madu e, yu u! Nang e nhtu lahkawng nga nga ai,” ngu nna tsun mu yang,
Yesu gaw, “Dai hte ram sai,” ngu nna shanhte hpe tsun mu ai.
Yesu Tsanlun Bum Ntsa E Akyu Hpyi Ai
(Mat 26:36-46; Mrk 14:32-42)
39Yesu gaw Mare na pru nna, shawoi galaw ga ai hte maren, Tsanlun Bum de sa mat wa ai; sape ni mung shi kaw hkan nang ma ai. 40Dai shara de du jang, shi shanhte hpe, “Nanhte gunglau ai hta n lawm mat myit ga, akyu hpyi nga mu,” ngu nna tsun da mu ai. 41Dai hpang shi gaw, sape ni nga ai kaw nna nlung kabai hkap daram gang hkra sa nhtawm, lahput hput di let, 42“Wa e, nang ra n yang gaw, ndai nni nkri ngu ai gawm hpe ngai kaw na shalai kau ya e; rai ti mung ngai ra ai hku n rai, nang ra ai hku she rai u ga,” ngu nna hpyi wu ai. 43Dai shaloi, lamu de na lamu kasa langai mi shi kaw dan pru nna, shi hpe sa shalan n-gun jaw ya wu ai.#Mat 4:11. 44Myit masin hta dik hkra nni nkri hkrum nga ai majaw, shi grau nna akyu hpyi shaja wu ai. Shi a salu salat mung sai kahte ni zawn ga de hkrat lu ai.
45Akyu hpyi ai kaw na rawt nna sape ni kaw wa yu yang, shanhte gaw myit yawn myit ba mat ai hte yup nga ma ai hpe wa mu wu ai. 46Madu gaw, “Hpa rai yup nga myit ta? Gunglau ai de n lawm mat myit ga, rawt nna akyu hpyi nga mu,” ngu nna shanhte hpe tsun mu ai.
Yesu hpe rim la ai lam
(Mat 26:47-56; Mrk 14:43-50; Yhn 18:3-11)
47Yesu ga naw tsun nga yang, sape shi lahkawng hta lawm ai Yuda lam woi nna masha wunawng du sa wa ma ai. Shi gaw Yesu kaw sit sa nna Madu hpe pup wu ai. 48Rai ti mung, Yesu gaw, “Yuda e, kalang mi pup ai hte Masha Kasha hpe ap kau n ni?,” ngu nna shi hpe tsun wu ai.
49Yesu hte rau nga ai sape ni gaw, hpa baw byin wa hkyen nga ai ngu ai hpe tau chye ma ai majaw, “Madu e, anhte nhtu hte kahtam na rai ni?,” ngu nna san mu ai. 50Shanhte hta na marai langai mi gaw, hkinjawng agyi a mayam langai mi hpe kahtam mu ai rai nna, dai wa a hkra maga ana di mat lu ai.
51Rai ti mung Yesu gaw, “Dai ram sai!” ngu nna tsun ngut jang, dai mayam a na hpe ahtawk nna shamai ya wu ai.
52Dai hpang Yesu gaw, shi hpe rim la na du sa ai hkinjawng agyi ni, Nawku Htingnu sin ai hpyen du ni hte agyi salang ni hpe, “Nanhte gaw gumlau langai mi hpe rim la ai zawn ngai hpe rim la na matu, nhtu ni dawhkrawng ni hte rai nna pru sa wa marin ni? 53Ngai shani shagu Nawku Htingnu e, nanhte hte rau nga nga yang, nanhte ngai hpe hpa rai n rim myit ta? Rai ti mung ndai ahkying gaw nanhte a ahkying rai nga ai hte nsin a n-gun atsam up ai aten mung rai nga ai,” ngu mu ai.
Petru Yesu Hpe Nyet Kau Ai
(Mat 26:57-58,69-75; Mrk 14:53-54,66-72; Yhn 18:12-18,25-27)
54Shanhte gaw Yesu hpe rim la nna Hkinjawng Kaba wa a nta de woi bang wa mu ai. Petru mung tsan tsan kaw nna hkan nang nga ai. 55Ya masha ni nta wang ka-ang e wan wut nna hpawng dung nga ma yang, Petru mung shanhte a ka-ang e dung lawm nga ai. 56Shangun ma numsha ni, wan htoi ai kaw dung nga ai hpe mu ma yang, shi hpe azi yu nna, “Ndai wa mung Yesu hte rau nga ai wa rai nga ai,” ngu wu ai.
57Rai ti mung Petru gaw, “Num nang e, dai wa hpe ngai n chye nngai,” ngu nna nyet kau wu ai.
58Dai hpang loi hkring rai jang, la langai mi Petru hpe matsing nna, “Nang mung shanhte hta na langai mi rai nga ndai!,” ngu wu yang,
Kanang, ngai n rai nngai!
59Hkying hkum mi daram na ai hpang, langai wa mi mung, “Kaja wa teng teng hpa sawn shut shara n nga ai, ndai wa mung Yesu hte rau rai nga ai, hpa majaw nga yang, Galile masha shi rai taw nga ai!” nga nna atik anang tsun wu ai.
60Petru gaw, “La nang e, nang hpa tsun nga ai hpe ngai n chye nngai!” ngu wu ai.
Shing nga naw tsun nga yang, u la langai mi goi sai. 61Shaloi Madu gaw kayin nna, Petru hpe mada yu wu ai. Dai rai nna Petru gaw, “Dai na pyi u garai n goi yang, nang ngai hpe masum lang nyet kau na rin dai,” nga nna Madu shi hpe tsun ai ga dum dat wu ai. 62Shaloi Petru gaw shinggan de pru nna ja ja hkrap nga ai.
Yesu Hpe Jahpoi Asawng Nna Anu Kayat Ai Lam
(Mat 26:67-68; Mrk 14:65)
63Yesu hpe jum sin nga ai ni mung, shi hpe asawng asang di nna anu kayat mu ai. 64Shi a man magap kau ya nhtawm, “Tak yu u, nang hpe htwi ai gaw, kadai wa rai ta?,” ngu nna san mu ai. 65Shanhte lam kaga law law hku nna shatan nhkan roi rip ai ga tsun ma ai.
Yesu Hpe Salang Hpawng De Woi Sa Ai Lam
(Mat 26:59-66; Mrk 14:55-64; Yhn 18:19-24)
66Nhtoi htoi jang, Yuda amyu masha ni a ningbaw rai nga ai salang ni, hkinjawng agyi ni hte Tara sara ni hpawng ma ai. Yesu hpe dai kongsi hpawng de woi wa nna, shanhte a man de jashawn nhtawm,#Mat 27:1; Kas 4:26. 67“Nang gaw Meshia rai nga n ni? Anhte hpe tsun dan mi,” ngu mu ai.
Yesu gaw, “Ngai tsun timung nanhte kam na myit dai n rai. 68Ngai san timung nanhte htan na myit dai n rai. 69Rai ti mung Masha Kasha gaw, ya kaw nna daru magam hpung shingkang rawng ai Karai Kasang a hkra maga de dung nga lu na ra ai,” ngu nna shanhte hpe tsun mu ai.
70Shaloi shanhte yawng gaw, “Dai rai yang, nang gaw Karai Kasang a Kasha rai nga n hka i?,” ngu nna san mu ai.
Shi gaw, “Ngai re ai, nga nna nanhte nan tsun nga myit dai,” ngu nna shanhte hpe htan mu ai.
71Shaloi shanhte gaw, “Anhte hpa sakse mi naw ra nga ga ta! Shi a n-gup na nan anhte dai na lu saga ai!” nga ma ai.
Поточний вибір:
LUKA 22: JCLB
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Jinghpaw Common Language Bible © Bible Society of Myanmar, 2009.