Matthieu 3
3
Jean‐Baptiste, mobenga ma Jésus. Baptême a Jésus.
1O machu ma, Jean‐Baptiste ayakaki bochiakole mawo o bobè ba Judée,
2alobaki bwe: ”Boyenche mitema ma beni, tonga bokonchi b’ikolo boya mpoli.
3Tonga yena edi wango echiakolaki mobandi ma Nzambe, Esaie, mwango molobaki bwe:
”Ikingo a moto idi ingamwe o bobè bwe:
”Bolòngele manè ma Nzambe, botèmizaka manè ma kongele ma wango.”
4Na Jean achwaki mokoto ma nchungi a chameau, na mobunga o ning’a wango, ko, bekidya ba wango bibèki matètè na bwe.
5Na bato ba Jérusalem batubaki na bato bachò ba Judée, na bato ba bibati bichò mpoli na Jourdain bakièki o ma wango.
6Na bango bachiakolaki machuma ma bango, na wango abaptisaki bango o ebale Jourdain.
7Ko, o wango ayènèki bapharisien na basadducéen bakama baya o baptême, wango alobaki na bango bwe: ”Beni bana ba michèmè, wona edikizaki beni bwe, bobangana ichèbo, dyango tiya, nda?
8Eleki enyòngò bobota mpuka inyòngò, dyango idi na bato bayenchaki mitema.
9Tochimunyake na tolobake bwe: Banga bodi na chango a banga Abraham, tonga nga lobe na beni, Nzambe ayiche bowumuze maboko ma, bana ba Abraham.
10Kinòwa chopha adi nywa o tin’a milange, molange mwango mobobota mpuka inyòngò ka, echoko takòtè mwango na tabwaka mwango o meya yango.
11Nga baptise beni o may, tonga n’iyencha mitema ma beni, ko, wango eya o chima nga alèki nga nguli. Nga di odya monyòngò ichwa bachaphata ba wango ka, wango tabaptisa beni n’Eyaye Echwa na meya.
12Wango adi na phelo a wango ebòkò a wango, na wango tachocha ndako a wango a mpoto, na wango takonginya mpoto a wango o ndako ikonginya mpoto, ko, biphocho byango wango tatumba o meya.”
13Na Jésus achònòki o Galilée n’ayakaki o Jourdain o ma Jean, tonga n’idyala baptisé.
14Ko, Jean atonaki, n’alobaki bwe: ”Nga di na phocha bodyale baptié na kò, no k’òya mo ma nga.”
15Ko, Jésus ayambolaki n’alobaki na wango bwe: ”Kiela kobona kinòwa! Elèki enyòngò mo banga bokiele bonyòngò bochò.” Na Jean achimitaki.
16Ko, o Jésus abèki baptisé, wango achabwaki o may nikichi, na kieka, ikolo idiphawaki, na wango ayenèki Eyaye Echwa a Nzambe echundaki ko ebenga bona, n’eyakaki o chomb’a mutu ma wango.
17Na kieka, ikingo ichònòki ikolo, ilobaki bwe: ”Wona edi Mwan’a bole a nga akonde, wango alèki bochangize nga.”
Поточний вибір:
Matthieu 3: BUI1947
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).