Nau Ntơm 1
1
Rnôk ơm kăl e, ntơm bơh nau rhăk njêng neh ntu tât rơh Y-Abraham
(1:1 – 11:9)
Nau rhăk njêng neh ntu
1Ntơm saơm, Brah Ndu rhăk njêng trôk jêh ri neh.
2Neh mâu geh rup ôh jêh ri nsoih bŏng, nau ngo nkŭm ta klơ brŏng jru, jêh ri Huêng Ueh Brah Ndu#1:2 Mlr: nau brah Brah Ndu; mâu lah: du nau sial tă bơh Brah Ndu. rsong ta klơ n'ha dak. 3Brah Ndu lah: “Ăn geh nau ang,” jêh ri geh nau ang.#II Kô 4:6. 4Brah Ndu saơ nau ang jêng ueh. Brah Ndu tâm rnglah nau ang bơh nau ngo. 5Brah Ndu kuăl nau ang jêng “nar,” jêh ri nau ngo jêng “măng.” Pôri, geh măng jêh ri geh ôi. Nây jêng nar tal nguay.
6Brah Ndu lah: “Ăn geh du ntŭk đôr ta nklang n'gul dak gay ma tâm nkhah dak đah dak.”#II Pê 3:5. 7Brah Ndu njêng đôr trôk jêh ri tâm nkhah dak tâm dâng đah dak ta klơ đôr, nau nây geh kơt nĕ. 8Brah Ndu rnha ntŭk đôr jêng “trôk.” Pôri, geh măng jêh ri geh ôi. Nây jêng nar tal bar.
9Brah Ndu lah: “Ăn dak tâm dâng trôk rgum nsŭn tâm du ntŭk jêh ri ăn geh neh sơh mpơl,” nau nây geh kơt nĕ. 10Brah Ndu rnha ntŭk sơh jêng “neh,” bi ntŭk dak nsŭn jêng “dak mƀŭt.” Brah Ndu saơ nau nây jêng ueh. 11Brah Ndu lah: “Neh mra hon gơ̆ tơm si: gơ̆ geh găr ntil, tơm si klơ neh tĭng nâm ntil luh play jêh ri geh găr,” pôri nau nây geh kơt nĕ. 12Neh hon gơ̆ tơm si: gơ̆ geh găr tĭng nâm ntil, tơm si geh play jêh ri tâm play geh găr tĭng nâm ntil. Brah Ndu saơ nau nây jêng ueh. 13Pôri, geh măng jêh ri geh ôi. Nây jêng nar tal pe.
14Brah Ndu lah: “Ăn geh lĕ rplay nau ang ta đôr trôk gay tâm nkhah nar đah măng, gay ăn nau mbên tâm nal lĕ yan,#1:14 Mlr: lĕ yan nau rƀŭn. nar jêh ri năm; 15jêh ri gay ƀư lĕ nau ang ta đôr trôk sol ang rplay neh,” nau nây geh kơt nĕ. 16Brah Ndu njêng bar rplay nau ang toyh: nau ang toyh lơn gay mât uănh nôk nar, nau ang jê̆ lơn gay mât uănh nôk măng. Păng njêng đŏng lĕ mănh mbing. 17Brah Ndu dơm lĕ nau ang nây ta đôr trôk gay sol ang rplay neh, 18mât chiă nôk nar jêh ri măng, jêh ri tâm nkhah nau ang bơh nau ngo. Brah Ndu saơ nau nây jêng ueh. 19Pôri, geh măng jêh ri geh ôi. Nĕ jêng nar tal puăn.
20Brah Ndu lah: “Dak ăn geh âk râk ăp ntil ndơ rêh, jêh ri geh ăp ntil sĭm mpăr klơ neh tâm dâng đôr trôk.” 21Brah Ndu rhăk njêng lĕ ntil ka toyh, lĕ ntil mpa rêh tâm dak, tĭng nâm ntil gay deh kon bĭk rơ̆ tâm dak, jêh ri lĕ ntil sĭm geh năr mpăr tĭng nâm ntil. Brah Ndu saơ nau nây jêng ueh. 22Brah Ndu ăn nau ueh uĭn ma lĕ ntil nây jêh ri lah: “Ăn deh bĭk rơ̆ dŭt âk, gay bêng tâm dak mƀŭt; bi ma lĕ ntil sĭm ăn bĭk dŭt âk ta klơ neh.” 23Pôri, geh măng jêh ri geh ôi. Nây jêng nar tal prăm.
24Brah Ndu lah: “Ăn neh geh lĕ mpa rêh tĭng nâm ntil: mpô mpa rong, lĕ ntil mpa vơr jêh ri mpô mpa bri tĭng nâm ntil,” geh kơt nây ro. 25Brah Ndu njêng lĕ mpô mpa bri tĭng nâm ntil, mpô mpa rong tĭng nâm ntil, jêh ri lĕ ntil mpa vơr ta neh tĭng nâm ntil. Brah Ndu saơ nau nây jêng ueh.
Nau rhăk njêng kon bunuyh
26Brah Ndu lah: “Ăn He njêng bunuyh tĭng nâm rup He jêh ri tâm ban ma He Nơm, gay ăn khân păng chiă uănh lĕ ntil ka tâm dak mƀŭt, lĕ ntil sĭm klơ trôk, lĕ ntil mpô mpa rong, jêh ri lam neh,#1:26 Nau rblang ơm Syriac: jêh ri lĕ mpô mpa bri. ndrel ma lĕ rngôch ntil mpa vơr ta neh.”#I Kô 11:7.
27Brah Ndu rhăk njêng bunuyh tĭng nâm rup Păng Nơm.#Mat 19:4; Mark 10:6.#Ntơm 5:1-2.
Păng rhăk njêng bunuyh tĭng nâm rup Brah Ndu.
Păng rhăk njêng bu klâu jêh ri bu ur.
28Brah Ndu ăn nau ueh uĭn ma bunuyh jêh ri lah: “Ăn khân may deh kon, ăn bĭk rơ̆ âk râk jêh ri ƀư ăn bêng neh; ƀư hom ăn neh tông bâr, chiă uănh hom ntil ka tâm dak mƀŭt, ntil sĭm mpăr klơ trôk jêh ri lĕ rngôch mpa vơr ta neh.”
29Brah Ndu lah: “Aơ, Gâp mra ăn ma ay may ăp ntil gơ̆ geh găr hon lam klơ neh, nđâp lĕ ntil tơm si play geh găr. Nây mra jêng ndơ sa ăn ma ay may. 30Bi ma lĕ ntil mpô mpa bri, ntil sĭm klơ trôk, ntil mpa vơr ta neh, jêh ri ăp ntil mpô mpa geh nau rêh Gâp ăn ma ăp ntil gơ̆ nse jêng ndơ sa,” pôri geh kơt nây ro. 31Brah Ndu saơ lĕ ntil ndơ Păng hŏ njêng jêh; ri, ueh ngăn ngên! Pôri, geh mhaơ jêh ri ôi. Nây jêng nar tal prao.
Поточний вибір:
Nau Ntơm 1: CMO2023
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023 United Bible Societies. All rights reserved.