Luke 1
1
Idibei Iwuɔ Tiɔfilɔs
Jɔhn Ɔluɔk-onwi-Mmɔŋ Amɨna
1Odo-ukpɨno Tiɔfilɔs,
Kpa sughu awak-iwak enwi egede ubɔk edɨme ukɨme idibɨno ku nde ku nde mbuk omu abaŋa Jisɔs ma ima kpɔ onu ɔgɔwuɔ ozu ku otu enyin sughu Abazi ɔgɔwuŋɔ.
2Ukem su onu ku ima onu, omu egenu nteise tɔŋɔ ku ŋtɔŋɔ, ma ima azuan nsiŋi Abazi, egeyak edio enyin ku ubɔk.
3Ŋgid ku ɔfɔ ami ŋgo, omu mma ŋgu nneŋede mkpiek nnɔŋ nji mvuvak ovid-evid kpɔ ku ata akpa, idiwid inɔ vi, Tiofilɔs, ima ata nnen-nnen kpɔ omu ogotibe,
4man ovu eneŋere avak ku ima kpɔ onu egetɨme vi onu, enu akpanikwɔ.
Enjel Asian Zakrayah Emɨna Onu Jɔhn
5Onji ɔkɔuw gi omu agabak ku esi onu Herɔd omu ogonu okpɨno Ɔfɔŋ ku Ikpeghe Judea, omu egegre Zakrayah, ku ubaghare uto onu Abijah. Nwa izighi egegre Elizabed ogosi ku otu eyo mmani onu Aaron okpɨno Ɔkɔuw.
6Zakrayah ma Elizabed egenu inininen enwi ku onji Abazi, edu uwem enana ndo ku fab-fab ewughɔ ma ibed izighi.
7Onu emu egenji oyo sugi, sia Elizabed ogonu ogii, emu enɔŋ ekpɔŋ enwi ku izughe emɨna.
8Ogonu ku use gi omu onyi agabak ku uto izighi su ɔkɔuw ku tempul Abazi ku Jeruzelem ku ulagha ikpɨghe ima ɔkɔuw emu.
9Sughu azaŋa agasu ma edu ubɨno-kpɔ ima ɔkɔuw, ufio ndɨme ɔgɔdughɔ ku ile izighi idifɔ uwah incense kini omu onyi agaga ku Tempul.
10Onu otu enwi egebɔŋ agam ku eziŋi kini omu Zakrayah ɔfɔ incense.
11Ene, enjel omu Abazi ɔgɔdɔŋ ɔwuɔ onyi ile, ala ku ubɔkulo ufine uwah incense.
12Onu kini Zakrayah ogid onyi, ɔdughɔ ogid onyi, ubighe ɔnɔŋ ɔmuɔ onyi.
13Onu enjel ɔdɔghɔ onyi ogu, “Zakrayah, ku uyak ubɨghe ɔmuɔ vi-ou, ku Abazi egei agam ovu; ndien ŋwa ovu Elizabed ma eme oyo onwi-eni ɔnɔ vi, ovu ma ɔnɔŋ ozighi onyi enyiŋ Jɔhn.
14Oyo onu ma ɔnɔ vi idra ma uni-ogid, awak-iwak enwi ma enɔŋ eni ogid ku emɨna izighi.
15Ku onyi ma okpo ku onji Abazi, onyi edinwɔŋ mmih ma otu-itu mmih sugi. Elile Spirit ma ede onyi odighi tɔŋɔ ku udib onu eke izighi.
16Onyi mane awak-iwak enwi Izruel eza udiɔk-kpɔ eyak egɔŋ Ɔfɔŋ Abazi emu,
17onyi ma ɔnɔŋ efei onji ɔnɔ Ɔfɔŋ ku spirit ma ulu omu Ilajah ogonji, idine emem ku uvɔd eti ma eyo, idide ima ntu-ubughu inɔ mvuvak inin-inen enwi, inɔŋ ine enwi ebak ku mbeŋ-ile etei ebi odidi Ɔfɔŋ.”
18Onu Zakrayah obid enjel ogu, “Su ndine dighi mvak su ovu ozughu kuma ozu kakpanikwɔ? Ami ŋkiɔŋ, ŋwa mi ŋgo ɔkiɔŋ.”
19Onu enjel ɔbrɔ onyi ogu, “Ami nnu Gebrel, omu nla ku onji Abazi, Abazi ɔgɔdɔŋ mi mbei edɨghe etu omu nzɔk fi ku abaŋa oyo ovu.
20Sese, ovu ma onu umuŋ, tutu use omu oyo ovu amina. Sia ku ovu nu umunim mi ku akpanikwɔ.”
21Onu enwi egetei ebi Zakrayah ku eziŋi ɔtɔ tempul, ile ɔnɔŋ akpa emu, sughu onyi ede odio ɔbɔuk ku tempul.
22Ku akpatre omu Zakrayah ɔwuɔ odi ku tempul, onyi egesɔ ekɨme idizughu nsiŋi; emu enɔŋ egre ku onyi ogogid ŋgugid, sia onyi ɔgɔsɔ ede ubɔk ozughu ŋziŋi ma emu.
23Ene, kini uto izighi ku Tempul amagegre, onyi ɔnyɔŋ uvɔk izighi.
24Onu ku ima use onu ema ege-efei, Elizabed ŋwa izighi ohyo udib; onyi ɔnɔŋ adiaŋare unɔgi ma otu enwi ku afiaŋ itiŋ.
25Onyi ɔdɔghɔ ogu, “Sese sughu Abazi ene onu omimi ɔnɔ mi idiyo udib. Onyi ɔfɔ udɔk ma omi ku idibei osuene mi izighi ku otou enwi.”
Enjel Asian Mary Abaŋa Emɨna Onu Jisɔs
26Ogonu ku ɔyɨghɔ afiaŋ itiŋɔgi, tɔŋɔ Elizabed agasaŋa ma udib, Abazi ɔgɔdɔŋ enjel Gebrel uto ku ikpeghe uduŋ Galilee omu egre Nazared,
27obine uyo-etɔ-enwa omu egre Mary, omu nu eme-esevak onwi-eni omu egede enɔ onwi uvɔk onu David omu egre Josef ku nlɔ.
28Enjel ɔluk obine onyi, ɔdɔghɔ onyi ogu, “Ŋkɔ vi, ovu omu onji okpɨno mfiso, Ɔfɔŋ abak ma ovu, enɔŋ ediɔŋ vi ku otu mmani!”
29Onu kini Mary egei su enjel ozughu, afina onyi ku ile, onyi ɔnɔŋ ogre su utɔ ekɔ onu amala ɔnɔ.
30Onu enjel ɔdɔghɔ onyi ogu, “Mary, kubiak ubighe-ou, ku ovu onji mfiso ku onji Abazi.
31Sese, ovu ma ohyo ɔnɔŋ eme oyo-onwi-eni, ma ɔnɔŋ okuh Onyi enyiŋ, ‘JISƆS.’
32Onyi ma onji okpɨno ugra, ma enɔŋ evag onyi su oyo onu ŋkoŋ ŋkeh Abazi. Ɔfɔŋ Abazi ma ene onyi onu okpɨno Ɔfɔŋ omu agra enwi izighi sughu onyi ɔgɔwuŋɔ-ɔnɔ Eti-eti izighi David:
33Onyi ma ede ugra uvɔk onu Jacob ku nzi-nzi; ufɔŋ izighi edinji utid-ou”.
34Onu Mary ɔdɔghɔ enjel ogu, “Su ndine-dighi njo udib kini numa onzamvak onwi-eni?”
35Onu enjel ɔbrɔ ɔnyi ogu, “Elile Spirit ma odi obine vi ɔnɔŋ ene ɔkpɔzɔŋ uto ku ile ovu; ene, Oyo onu odimina onu, odinu elile, ma enɔŋ eku onyi Oyo Abazi.
36Yak nne vi avak, Elizabed iman ovu, ŋgo mɔgu odinji oyo onwi-eni kpa ku ukiɔŋ izighi, omu enwi egedɔghɔ ku medinji oyo, omu onu ɔyɨghɔ afiaŋ itiŋɔgi tɔŋɔ onyi ogoyo.
37Konu, ebak kpɔ omu Abazi numekeme idine.”
38Ene Mary ɔbrɔ ogu, “Yak ovid kpɔm ozu ɔnɔ mi sughu nsiŋi ovu onu, ku ami nnu ɔvɔn-enwa Ɔfɔŋ.” Ndien, enjel alagha ayak onyi.
Mary Agase Elizabed
39Ku use ivaŋ amagefei, Mary alagha ku ɔnyɔŋ awra aga ku uduŋ omu ala ku obod-obod ku ikpeghe uduŋ Judah.
40Kini omu onyi agazim, onyi ɔluk uvɔk onu Zakrayah, ɔnɔŋ ɔkɔ Elizabed.
41Kini omu Elizabed egei ekɔ onu Mary, ulagha-ulaghan oyo alagha onyi ku udib ɔnɔ uniogid; ene, Elizabed ɔyɨghɔ ma Elile Spirit.
42Elizabed ɔkpɔk ku otu-itu usi ogu, “Abazi ɔdiɔŋ vi ku otu mmani, Abazi ɔnɔŋ ɔdiɔŋ mvri udib ovu!
43Onu kpɔ ukpono ɔnɔ mi idinji vi eke Ɔfɔŋ omi omodi odise mi
44Nzughu nnɔ vi ku akpanikwɔ ŋgu, ku ulagha-ulagha omu usi ekɔ ovu ɔluk mi utɔŋ, oyo alagha mi ku udib ɔnɔ uni-ogid.
45Ɔfɔfɔ ɔnɔ vi sia gu onim ku akpanikwɔ, su Abazi ɔgɔwɔŋɔ ɔnɔ vi mazu.”
Ikwɔ Onu Mary
46“Onu Mary ɔkwɔ ogu:
Ukpɔŋ omi ku otro Abazi,
47Spirit omi ɔnɔŋ adra ku Abazi anyiŋ-inyiaŋa mi.
48Ku onu onyi ogogid uzughɔre utei ɔvɔn-enwa izighi, ku utɔ ntak-m, tɔŋɔ ku omu dega, ovid emina ma eku mi ɔdiɔŋ-idiɔŋ.
49Ku onu onyi omu onji ulu oke, onyi ene ikpɨno kpɔ ɔnɔ mi, enyiŋ izighi onu elile.
50Isɨghe izighi ana ɔnɔ emina gi tutu ozim onuŋ ɔnɔ ima omu enji mbiak enɔ Onyi.
51Onyi ɔwuɔ ulu ku ubɔk izighi; Onyi azuan ima ntaŋ-ile ku ogugre ogid emu.
52Onyi ɔduŋɔ ima ifɔŋ oto ku agata emu, ndien Onyi ɔnɔŋ ebei ima nzughɔre ile ku ɔnyɔŋ.
53Onyi ɔyɔuw ima mbiɔŋ ma idɨghe kpɔ; onu ɔdɔŋ ima unji enyɔŋɔ ukpɔk ubɔk.
54Onyi aganwam eyo-uto izighi Izruel, ku idituei uwuŋɔ idiwuɔ emu isighe izighi,
55Sughu Onyi ogozughu ɔnɔ Abraham ma eyo izighi ku nzi-nzi”.
56Ene, Mary adaŋ ma Elizabed ku uvɔk izighi ku kpɔ su afiaŋ ite, ndien ɔsɔ ɔnyɔŋ uvɔk izighi ku Nazared.
Emina Onu Jɔhn Ɔluɔk-Onwi-Mmɔŋ
57Ku ini use umeh onu Elizabed osu, onyi eme oyo onwi-eni.
58Kini ima nduŋ-ndiana ma emme izighi egei sughu Abazi ogonji isɨghe ma onyi, emu edra ma onyi.
59Kini oyo ozim use itɨŋate, nduŋ-ndiana edi iditine oyo ibuuh; emu eluŋɔ idiku onyi enyiŋ onu eti izighi Zakrayah.
60Onu eke izighi Elizabed ɔdɔghɔ ogu, “Inh-inh; ediku onyi Jɔhn.”
61Onu emu edɔghɔ onyi ogu, “Ebak onwi sugi ku otu enwi uvɔk evu omu onji utɔ enyiŋ onu ‘Jɔhn.’”
62Ene, emu ene idiɔŋɔ ku ubɔk ewɔ eti, ebid sughu onyi ɔmɔluŋɔ eku oyo izighi.
63Onu onyi ene idiɔŋɔ ku ubɔk ogu enɔ emu utighe ŋwid, ndien onyi ewid ogu, “Enyiŋ izighi onu Jɔhn”. Ile akpa ovid emu.
64Ulagha-ulagha onu, Abazi ene usi izighi ogih, elei izighi ɔnɔŋ atra, onyi ɔtɔŋɔ iditro Abazi.
65Onu utɨŋe ɔmuɔ ovid-evid enwi omu eduŋ edina emu; ovid-evid ima omu eduŋ gu ikpeghe obod-obod uduŋ Judea esughu ebaŋa su ogotibe.
66Ndien ovid ima omu egegei kpɔ omu enɔŋ ebad ku utɨbe. Emu egu, “ku akpanikwɔ oyom ma ebek odinu okpe-onwi, Emu esughu sia ku onji Abazi abak ma onyi.”
Ikwɔ Itro onu Zakrayah
67Onu Elile Spirit ede Eti onu Jɔhn, Zakrayah odighi idizughu su Abazi ɔgɔluŋɔ onyi ozughu:
68“Yak itro onji Ɔfɔŋ enyin omu onu Abazi Izruel,
Sia ku Onyi odiwam enyin alagha avak enwi izighi,
69Ɔnɔŋ ozighi okpɨno anyiŋ-inyiaŋa ɔnɔ enyin
Ku uvɔk oyo-uto izighi David,
70Omonu su Abazi ɔgɔwuŋɔ ku mine, osi ku ima ilile prɔved omu onyi egemek omu egebak ku ima esi ogu.
71Onyi ogozighi anyiŋ-inyiaŋa ɔnɔ enyin, ede avak enyin ozighi ku ubɔk ima ezughe enyin,
Ma ku ubɔk enwi omu ezughe enyin.
72Onyi egene omu idiwuɔ iseghe izighi inɔ ima Eti-eti enyin, idinɔŋ ituei elile odɨmo izighi omu onyi ɔgɔwɔŋɔ ɔnɔ emu.
73Omu onu odɨmo omu onyi egene ɔnɔ eti enyin Abraham:
74Ogu, ‘Ami mamvak vi nzighi ku ubɔk ima ezughe ovu, man ovu okime idine kpɔ inɔ mi ma unana ubighe.
75Man enyin idu uwem ku odighi omu eleh alagha enen ku onji izighi, adaŋa ini sughu enyin ibag ku uwem.’
76Onu ovu, oyo omi, ma eku vi prɔved onu Ŋkoŋ Ŋkeh Abazi.
Ku onu ovu ma efei onji ɔnɔ odidi Ɔfɔŋ, iditim enwi ile inim inɔ ini odidi izighi.
77Ovu ma anwam enwi izighi evag ku Ɔfɔŋ anyiŋ-inyiaŋa emu mmɔgu odi, ku idilagha-inɔ emu ku udiɔk-kpɔ emu.
78Abazi ɔluŋɔ idinyiaŋa enyin sia gu onyi onu Onwi ogid isɨghe.
Onyi onu ntak omu onyi ɔdɔŋ anyiŋi-inyiaŋa omu osi ku heaven odi-nwam enyin.
79Onyi ma ede unwɨna ɔzɔk ima omu ebak ku egim ma ima omu ebak ku nnananji ma ubighe mkpa.
Idide enyin odighi idu uwem ku emem ma Abazi”.
80Onu Jɔhn ebek ɔnɔŋ eliek ile onwi, egei uko ku udɔk, ɔnɔŋ abak ku ikpeghe mkpakaŋa-izɔŋ tutu use odi omu onyi ɔtɔŋɔ idikwrɔ-ikwɔ inɔ Izruel.
Поточний вибір:
Luke 1: ORX
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Oro Bible by Beyond Translation is licensed under Creative Commons Attribution-ShareAlike 4.0 License.